Corochȩche Ma̧ȩ 2 - Biblia Pume

Järimȩrȩ ja̧beparëremȩde Pablo judi

¹ Ado pio dibë chjiaribo ana̧ tjamo̧ri̧ ja̧beparequede. Danȩrȩ, dibë bücjüri̧ cjia tjamo̧mȩrȩ ji̧dë ma goë cjo̧dë chjaorequede ibë eadëji̧ri̧ pio ji̧ri̧ nö̧ta goae tarari̧ japatamȩmi̧ dari̧ japamȩrȩ. Ado peaja̧di dari̧ ja̧beparequede Daodichea quȩmȩräpȩ quëna̧ji̧ri̧ ja̧ oa. Ado coa cja̧rȩmȩ co dadëji̧ri̧ pio ji̧ri̧ chjiribo ana̧ri̧ ja̧beparequede, goë cjo̧dë chjaomȩrȩ. Aja̧ ca̧ oti̧, pio ju̧i̧ chjadëri̧ dabatä eamȩrȩ yo̧requededibe.

² Jabechji̧ ja̧di dari̧ goë cjo̧dërequede mȩnȩro̧ dibëa̧ chji̧rä järi tjamo̧ji̧ri̧rȩ jo̧rȩtapea̧ oa, mȩnȩro̧ earea̧ra̧ pio ju̧ri̧ra̧ cja̧rȩmȩrä cara̧ oa cjiami̧ dari̧ cjiapea̧ oa. Jabechji̧ Ütë tjamo̧ judi goadi tänȩrërea̧ ma̧ȩ pio ju̧i̧ codë oa dabatä earequededibe, mȩnȩro̧ tjamo̧i̧ cjiari̧ dabapea̧ oa, chjara chia jo̧rȩtarea̧ decjiari̧ dabapea̧ oa, mȩnȩro̧ cjiadiämi̧ tarari̧ jo̧rȩtapea̧ oa. Jabechji̧ Quiricho pio ju̧i̧ chjiari goadia̧ oa cjiarërea̧ ma̧ȩ pio ju̧i̧ nö̧tadäräri̧ dabatä earequededibe.

³ Jabechji̧ Quiricho pio ju̧i̧iä tjamo̧ri̧ dabaparea̧mi̧ dade Ütë tjamo̧ ja̧ dabarea̧ üdë. Quiricho pio ju̧i̧iä tjamo̧ri̧ dabaparea̧mi̧ dade a̧dë chjäte dabarea̧ üdë, urëdi tjamo̧ oa jo̧rȩtarea̧ üdë. Jabechji̧ Ütë tjamo̧ ja̧ dabarea̧ chjö̧na̧i̧rȩ tutia̧ oa cjiami̧ dade jo̧ tjomi̧ darä, chjuari̧ tutia̧ oa cjiamȩ jo̧ tjomi̧ darä. Jabo Quiricho pio ju̧i̧iä arë ia̧ oa cjiami̧ dari̧ cjiade, a̧ro̧rȩ chjö̧na̧i̧ oa chjadëri̧ dabapadärärea̧mi̧ dari̧.

⁴ Jabechji̧ pio yoa ma̧ȩ oa ni̧bä chjaorequededibe mȩnȩro̧ gari̧pe gari̧pe ni̧bätaji̧ri̧ pio ji̧ri̧iä u̧i̧pea̧ oa cjiachea oa, goaeri̧ yo̧ji̧ri̧ pio ji̧ri̧iä oëra̧diächea oa.

⁵ Jabechji̧ cüdë dibëa̧ chjarerä cjiadëmȩborë, jabechji̧ pio dibë nö̧ta ëba cjiamȩmi̧ dari̧ cjiarequede pio dibë chjiari jo̧rȩte chjaoa̧ oaiä. Ado ma̧ chiadëri̧ cjiarequede davä mȩnȩro̧ cja̧rȩmȩ pumȩmi̧ dari̧ cjo̧ro̧a̧ oaiä, mȩnȩro̧ Quiricho pio ju̧i̧iäpȩmo̧ chjuari̧ quëna̧ oaiä.

Quiricho pio ju̧i̧iä a̧dë chjäte goae tarari̧ cjo̧ro̧rea̧ darea̧rȩ

⁶ Mȩnȩro̧ Ano̧mȩ Jechu Quiricho pio ju̧i̧iäpȩmo̧ quëna̧ oaiä, jabechji̧ pio ju̧i̧ ja̧ chja̧oerämo̧ cjo̧ro̧chji̧vä, pio judiri ma̧na̧mȩ cjo̧ro̧rea̧ra̧.

⁷ Jabechji̧ to üdë urëdi oa tacö̧mi̧ dari̧ chjuari̧ cjiachji̧vä Quiricho pio ju̧i̧iä. Pio judiri ma̧na̧mȩ tumi̧ da oaiä gägäari̧ cjiami̧ dari̧ cjo̧ro̧chji̧vä dibëa̧ tjoro, mȩnȩro̧ mȩnȩro̧ dabapea̧ ma̧ȩrä ji̧dë u̧i̧ chjuari̧ quëna̧pe bagurapea̧ oa. Ado ji̧dë ma ma̧ chiadëri̧ cjiari̧ jo̧rȩtatäreji̧ri̧nȩrȩ Ütë tjamo̧ pio ju̧i̧iäpȩmo̧, ‘chjadëri̧ japea̧diibëda’ quëna̧ jo̧rȩtaji̧ri̧rȩ.

⁸ Ado na̧e chiachji̧vä. Mȩnȩro̧ dai chirirä ja̧ dabarea̧ra̧ pio ju̧ri̧ra̧ u̧i̧pea̧ oa cjiachea oa, pio jiro ma̧ȩ oaiä boadäräa̧ oa cjiachea oa na̧e chiachji̧vä. Danȩrȩ, o judiro̧ jibëa̧ ütëti̧rea̧ judiro̧ yo̧rërea̧ duri maea oa a̧ra̧ano̧ chjaodirȩ. Jabo jibëa̧ chji̧ri pio judiri cjitëmȩ jo̧rȩtarea̧ maeade. Yaröcarë u̧i̧pea̧ duri maeade. Badëde. Quiricho pio judiri ma̧na̧dëmȩ a̧ra̧ano̧rea̧ ma̧ȩde. Jabo a̧ro̧rȩ quëna̧ üdë, Quiricho pio judiri ma̧na̧mȩ ma̧ȩde.

⁹ Ado Quiricho judi Ütë tjamo̧ pio judide. Jabechji̧ pio ju̧i̧ ja̧ tjoro cjiade Ütë tjamo̧ judi. Ado pio ju̧i̧iä Ütë tjamo̧ ja̧ jo̧rȩtarea̧ chiade. Ado Ütë pio ju̧i̧ ja̧ üdë Quiricho pio ju̧i̧ ja̧de peaja̧di.

¹⁰ Ado mȩnȩro̧ Quiricho pio judiri ja̧ mapea̧ tara, jabechji̧ a̧dë chjäte goae tarari̧ cjo̧ro̧rea̧ chiaji̧ri̧pea̧nȩrȩ yaba̧. Jabechji̧ Quiricho pio judiri ji̧dë ma cjitëde goae tarari̧ cjo̧ro̧rea̧ üdë, jabëdiärea̧ decjiari̧. Ado pio ju̧i̧iä bücjüri̧ cjiadë matäreji̧ri̧nȩrȩ. Tjamo̧ davä. Pio ibë dëbëpe chjaoji̧ri̧ pio ji̧ri̧ chjiari bücjüri̧ cjiadë matäreji̧ri̧nȩrȩ. Jabechji̧ a̧dë chjäte tjamo̧ yo̧mȩ pio judide Quiricho judi. O judiro̧ nö̧tadë madiro̧jo̧ȩ. Tjamo̧ yo̧ji̧ri̧ yaröca judiro̧, tjo maearë cjiaji̧ri̧ judiro̧, jauëchjaji̧ri̧ pio judiro̧, nö̧tadë madiro̧jo̧ȩ. Jabechji̧ a̧dë chjäte yo̧mȩ pio judi tjamo̧de.

¹¹ Ado mȩnȩro̧ Quiricho pio ju̧i̧ pearä quëna̧rërea̧ ji̧, pio judiri ja̧ji̧ri̧pea̧nȩrȩ. Ado pio judiri ja̧ji̧ri̧pea̧ji̧ri̧ oa budomi̧ dari̧ japarëremȩdidibe. Jabo pumȩrȩ japarëmi̧ cjiari̧ japadërëremȩdidibe, jabo jauëchja cjiari̧ japarëremȩde, mȩnȩro̧ dibëa̧ chja̧oerä cjo̧ro̧chea oa. Jabechji̧ dibëa̧ icjararä chjai̧dërë yo̧a̧ chja̧oerä ji̧dë ma cjo̧ro̧rërea̧ ji̧, budomi̧ dari̧ japarëremȩdidibe, mȩnȩro̧ pio jiro chja̧oeri pio judiri go̧düpea̧ oa, mȩnȩro̧ tjaoëpai̧ dari̧ cjo̧ro̧pea̧ oa.

¹² Ado danȩrȩ, mȩnȩro̧ go̧ȩ cjaeä chuda̧ oa cjiarërea̧ ji̧, Quiricho pio ju̧i̧ nö̧ta na̧ra̧ oa cjia cjiarëreji̧ri̧nȩrȩ. Ado Quiricho pio ju̧i̧ nö̧ta bëdüa̧ oa cjiarëreji̧ri̧nȩrȩ peaja̧di. 'Jabechji̧ Ütë tjamo̧ ja̧ jauëchja pio ju̧i̧iä bëdüa̧ oa cjiaa̧ro̧da yaba̧’ quëna̧ jo̧rȩtaji̧ri̧rȩ quëna̧ji̧ri̧pea̧nȩro̧jo̧ȩ Ütë pio ju̧i̧, Quiricho pio ju̧i̧ bëdü tänȩrëremȩ pio ju̧i̧. Ado pio ju̧i̧iä bëdürea̧ yürüa̧didibe.

¹³ Jabo pearä judi mȩnȩro̧ chjai̧dëri̧ japaji̧ri̧rȩ cjo̧ro̧rërea̧ pio ju̧i̧iä, jabechji̧ ja̧boa̧mi̧ dari̧ cjiarëremȩde dibëa̧ tjo üdë. Jabechji̧ Ütë tjamo̧ ja̧ pumȩdërëreji̧ri̧nȩrȩ. Ado mȩnȩro̧ dibëa̧ icjararä chjai̧dërë yo̧a̧ chja̧oeri pio judiri go̧düpea̧ oa budoa̧ oa cjiami̧ dari̧ cjiadërëreji̧ri̧nȩrȩ. Jabo Ütë tjamo̧ judi cjo̧ro̧rea̧ yürürëremȩdidibe Quiricho pio ju̧i̧ nö̧ta mȩnȩro̧ pea chjari̧ cjo̧ro̧pea̧ oa. Ado mȩnȩro̧ chjai̧dëri̧ japea̧ chjö̧na̧i̧ oa duridëparȩrëremȩdejȩ cjiadiärea̧ decjiari̧.

¹⁴ Jabechji̧ Quiricho judi toräpȩ ja̧boa̧ oaiä tuti ba ano̧därärëremȩde a̧ro̧rȩ chjai̧dëri̧ japea̧ ba oa. Ado pio ju̧i̧iä Ütë tjamo̧ judi duridëparȩa̧dejȩ. Jabechji̧ a̧ro̧rȩ chjai̧dëri̧ japea̧ chjö̧na̧i̧rȩ go̧ȩ irä go̧ȩpea̧ oa cjiarërea̧ ji̧, toropȩ cjae guna̧ oa cjiami̧ dari̧ cjiarëremȩde Ütë tjamo̧ judi pio ibë ba earea̧mi̧dëri̧. Jabechji̧ pio ibë chjiari go̧ȩpea̧ oa cjiarëremȩ ma̧ȩ üdë pio ibëiäpȩmo̧ ma̧i̧ dari̧ aechide yo̧mi̧ dari̧ japarërea̧ ji̧, badë mapea̧de yaba̧. Quiricho pio judi tuti ba ano̧däräa̧ oaiä, jabechji̧ badë mapea̧de.

¹⁵ Ado Jechu judi toro ja̧boa̧ ji̧, goae tarari̧ boadärärëremȩdejȩrȩ yaröca chjö̧na̧i̧ oa, tjamo̧ yo̧ji̧ri̧ yaröca pio ji̧ri̧bo. Ado pio ju̧i̧iä idëri̧ cjia maearë cjiadiäa̧dirȩ. Jabechji̧ tjamo̧ yo̧ji̧ri̧mi̧ dari̧ cjiarërea̧ ji̧, ju chiadëmi̧ dari̧ cjiadiä tänȩrëremȩdejȩrȩ Jechu judi, mö̧na̧ maearë cjiadiäri̧. Jabechji̧ pumȩ judiro̧ ütëbodärärë darea̧mi̧ dari̧ goae tarari̧ boadärärëremȩdejȩrȩ yaröca pio ji̧ri̧, ‘Quiricho pio judi boadärämȩ tjamo̧dida’ quëna̧ dabarea̧mi̧ dari̧.

A̧dëräpȩ cjiamȩ ba chia pio ju̧i̧ jo̧rȩtaji̧ri̧rȩ cjo̧ro̧täreji̧ri̧rea̧rȩ

¹⁶ Ado pio ju̧i̧iä jabechji̧, Quiricho pio ju̧i̧ ja̧ chja̧oerä cjo̧ro̧ji̧ri̧pea̧rea̧rȩ yaba̧. Ado pio ju̧i̧iä eami̧ üdë jibëa̧ ma̧na̧ri̧ jo̧rȩtamȩrȩ teracaba ma̧ȩra̧ dibë yo̧rä judi, jabechji̧ ta̧rë ja̧bodëpea̧de. Aja̧, pio dibë yo̧rä judi, “Aja̧, pio yoamo̧i̧ juravä jabo pio üdëje cjäna̧papea̧de” yo̧rä judi, ta̧rë ja̧bodëpea̧de. “Aja̧, pio yoamo̧i̧ jarapea̧de, jabo pio jiro jararea̧ üdë china̧chjade” yo̧rä judi, peaja̧di ta̧rë ja̧bodëpea̧de. Ado eami̧ üdë yo̧rä judi, "Aja̧, pio jiro do üdë do chjätärea̧ dode” yo̧rä judi, ado “Gupënȩrȩ pea a̧rȩdiäa̧rä ja̧di dari̧ japapea̧de” yo̧rä judi, peaja̧di ta̧rë ja̧bodëpea̧de. Ado dibë järätä chjaparea̧ do pio ju̧i̧ chjiari yo̧rä judi, peaja̧di ta̧rë ja̧bodëpea̧de.

¹⁷ Jabechji̧ pio jiro ma̧ȩrä cjo̧ro̧rea̧mi̧dëde. Judiro̧ yo̧a̧ üdë, jabomo̧ chja̧oe cjiami̧ dari̧ cjiarëremȩde. Jabomo̧ chja̧oemi̧ darëremȩde ado cja̧rȩmo̧rȩ ma̧na̧bëmi̧. Duri oa ma̧na̧pamȩ pio ju̧i̧ ja̧ chja̧oerä cjiami̧ dari̧ cjiarëremȩde. Ja̧di dari̧ yo̧a̧ üdë jabomo̧ na̧rȩrea̧de. Jabomo̧ na̧rȩmi̧ dari̧ japarëremȩdejȩrȩ judio pio ji̧ri̧iäpȩmo̧ cja̧rȩmȩrȩ ma̧na̧pea̧ pio ju̧i̧ chjiari. Ado pio judi ma̧na̧de peadë. Ado pio ju̧i̧iämo̧i̧ cjo̧ro̧rea̧ darea̧rȩ yaba̧, Quiricho pio ju̧i̧iämo̧i̧. Tjamo̧ri̧ cjo̧ro̧rea̧ yürümȩ pio judide.

¹⁸ Peaja̧di na̧e chiachji̧vä oëra̧ a̧ra̧ano̧ji̧ri̧ pio ji̧ri̧ chjiari. Goaeri̧ ni̧bädirȩ jibëa̧ chji̧rämo̧ jo̧rȩtataji̧ri̧rȩ. “Aja̧, pio dibë u̧i̧ dabarea̧rȩ” yo̧ chjaodirȩ. “Jabechji̧ a̧dë chjäte dabarea̧ chiarea̧rȩ a̧ro̧rȩ darämi̧ cjia chjaoa̧ oaiä” yo̧dirȩ. “A̧dëräpȩ cjiaji̧ri̧ mu̧i̧tjoi̧ pio ji̧ri̧iäpȩmo̧ chjacjiamȩri̧ jo̧rȩtapea̧de” yo̧dirȩ. Jabo cjäri̧ madirȩ, dai chirirä ja̧ jo̧rȩtarea̧ maeara̧ jo̧rȩtadirȩ. “Ibëa̧ chji̧rämo̧ jo̧rȩtatadërea̧rȩ” yo̧ji̧ri̧borë jibëa̧ chji̧rämo̧ jo̧rȩtataji̧ri̧rȩ cjo̧ro̧dirȩ, ‘o ji̧ri̧ u̧i̧ ba chia tjamo̧a̧ro̧da’ quëna̧ jo̧rȩtaji̧ri̧rȩ. Ado pio ju̧i̧iä yo̧requededibe ca̧ oti̧. Ta̧rë ja̧bodë machji̧jȩrȩ.

¹⁹ Jabechji̧ Quiricho pio judiri ja̧dë madirȩ. Tjübëmi̧ dadëri ja̧dirȩ. Jabo ja̧didënȩrȩ mȩnȩro̧. Tjübëmi̧ dari ja̧nȩrȩ. Ado pio judiri ja̧ji̧ri̧ pio judiro̧, jabechji̧ pio ju̧i̧ ja̧ icjarami̧ dadirȩ. Ado ju̧i̧ ja̧ icjarami̧ da codërë chjadëri̧ jida̧ oa cjiade Quiricho pio ju̧i̧iä. Pio judi yürüa̧ oaiä cjo̧ro̧rea̧ chiade ji̧dë ma ju chiape järea̧mi̧ dari̧. Pio judi yürüa̧ oaiä ji̧dë ma ütëchjai̧pe järea̧ dade, Ütë tjamo̧ pio judi tänȩa̧mi̧.

A̧ro̧rȩ Quiricho pio ju̧i̧ nö̧ta ja̧boa̧ oaiä, dai chiri oa ana̧ri̧ jo̧rȩtadëtäreji̧ri̧rea̧rȩ

²⁰ Danȩrȩ ca̧ oti̧, mȩnȩro̧ Quiricho pio ju̧i̧di ja̧borërea̧ oaiä, yaröcarë yo̧a̧ chja̧oeri pio judiri go̧dürea̧ daea̧nȩrȩ. Ado pio ju̧i̧iä iëno̧ë ta̧rërequededibe. ¿Tjana̧ ju̧i̧iä ji̧dë ma cjo̧ro̧renȩrȩ dai chirirä ja̧ji̧ri̧mi̧ dari̧? ¿Tjana̧ ju̧i̧iä jabë jo̧rȩtariä cjo̧ro̧nȩrȩ ibëa̧ ütëti̧rea̧ pio judiro̧ yo̧rërea̧ oaiä?

²¹ Dëdë, dami̧ti̧ oa yo̧dirȩ pumȩ judiro̧. “Aja̧, pio yoa mitëdëpea̧de, china̧chjade” yo̧dirȩ. “Ado pio jiro jurarea̧ oa peaja̧di juradëpea̧de. Ado jiro oa ga̧re taradëpea̧de, peaja̧di chjina̧chjade” yo̧dirȩ.

²² Jabo danȩrȩ ca̧ oti̧, pio jiro ma̧ȩ üdë dabadëji̧ri̧ pio ji̧ri̧ ja̧ yari pio judiri go̧dü maeade. Ba chiadëde. Teracabari̧ a̧ra̧ano̧rea̧ maeade. Goarijäpea̧ pio ju̧i̧ chjiari yo̧rea̧ maeade.

²³ Jabo dëdë, pio jiro a̧ra̧ano̧rea̧ ma̧ȩ üdë coëma cjiari̧ cjiami̧ dari̧ cjiapai̧ dade jabo. Aja̧, urëdi tjamo̧ oa jo̧rȩtarea̧ chiami̧ dari̧ cjiapai̧ dade. Jabo cjäri̧ made, oëra̧ baämȩ ma̧ȩ maeade. Ado pio jiro ma̧ȩrä cjo̧ro̧ji̧ri̧ judiro̧ jibëa̧ icjara oa chjadëri̧ jidatärea̧ ji̧, ma̧i̧ dari̧ conȩdadiro̧jo̧ȩ, gito tjamo̧ri̧. Ado judiro̧ o ji̧ri̧iäpȩmo̧ cjäri̧ri̧ cjia datärea̧ ji̧, jibëa̧ chji̧rämo̧ jo̧rȩtatadirȩ, jibëa̧ chji̧rämo̧ jo̧rȩtatadëcji̧ quëna̧ japaji̧ri̧rȩ. Ado judiro̧ japea̧ üdë, jabechji̧ goae tjamo̧dë madejȩ Ütë tjamo̧ ju̧i̧iä. Ado ji̧dëri̧ a̧dodë madejȩrȩ. Jabechji̧ jënȩro̧ quëna̧ üdë a̧dotärea̧ ji̧, jibëa̧ icjararä chjai̧dërë yo̧a̧ chja̧oeri pio judiri go̧düpea̧ ji̧ chjadëri̧ a̧dotärea̧ ji̧, a̧dodë madejȩrȩ.