Corochȩche Ma̧ȩ 1 - Biblia Pume

Taruparea̧ Ma̧ȩ

¹ Pablo pio judirequede. Ütë tjamo̧ pio judi ütarë jo̧rȩtamȩrȩ china̧chjari̧ mitërëremȩdique, cüdë Jechu Quirichorë chjadüa̧ oa ja̧bepapea̧ oa. Ado pio cüdë go̧ȩpe chjadürequededibe yaba̧, Timoteo pio ju̧i̧ nö̧ta cjiamȩrȩ.

² China̧chjari̧ tutia̧ oa cjiaji̧ri̧ pio ji̧ri̧, Quiricho pio judiri ja̧ji̧ri̧ pio ji̧ri̧, Ütë tjamo̧ ja̧ ma̧ȩrä cjo̧ro̧ji̧ri̧ pio ji̧ri̧ go̧ȩpe chjadürequededibe Corochȩcheräpȩji̧ri̧ oa. Jabechji̧ Ütërë cjäri̧ri̧ cjia da̧ pio ju̧i̧ chjadëri̧ yürütädidibe, ma̧ chjupi̧ cjiari̧ jo̧rȩtarea̧ pio ju̧i̧bo.

Pablo judi quëna̧ji̧ri̧ pio ji̧ri̧ chjiari goë cjo̧dërëremȩde

³ A̧ro̧rȩ pio dibë jo̧rȩta̧mi̧ nö̧ta, a̧ro̧rȩ pio dibë chjiari goë cjo̧dëa̧mi̧ nö̧ta, ‘jabechji̧ chjadëri̧ japea̧diji̧ri̧da’ quëna̧ jo̧rȩtarea̧ro̧jo̧ȩ ibëa̧ Ano̧mȩ Jechu Quiricho pio ju̧i̧ ja̧ Ama̧i̧ Ütë pio ju̧i̧, ma̧ chiadëri̧ cjiaji̧ri̧rȩ. 'Aja̧, pumȩ ji̧ri̧ chjadëri̧ japea̧diji̧ri̧da’ quëna̧ jo̧rȩtaji̧ri̧rȩ ni̧bärea̧ro̧jo̧ȩ.

⁴ Jabechji̧ a̧ro̧rȩ pio dibë chjiari ma̧ȩ goae oa goë ta̧rëa̧ oaiä, ma̧ chiadëri̧ cjia tjamo̧rea̧rȩ ca̧ oti̧. Tjamo̧ davä. Mȩnȩro̧ Jechu Quiricho pio ju̧i̧ quëna̧ji̧ri̧pea̧ pio ju̧i̧ ta̧rëa̧ oaiä, mȩnȩro̧ Ütë tjamo̧ ja̧ pumȩ ütëbodärä oa eaji̧ri̧rȩ cjo̧ro̧a̧ pio ju̧i̧ ta̧rëa̧ oaiä, jabechji̧ ma̧ chiadëri̧ cjiari̧ jo̧rȩtaji̧ri̧rȩ ni̧bärea̧ro̧jo̧ȩ, ‘chjadëri̧ japea̧diji̧ri̧da’ quëna̧ jo̧rȩtaji̧ri̧rȩ.

⁵ Jabechji̧ jidatarea̧ chiarë cjo̧ro̧renȩrȩ ca̧ oti̧. Ado jidatarea̧ chia tara järirea̧ daea̧nȩrȩ davä ja̧di dari̧ cjo̧ro̧pea̧ ji̧. Jabechji̧ mȩnȩro̧ ma̧ȩ chjadëi̧ pio ju̧i̧ ta̧rërërea̧ oaiä, tjamo̧i̧ cjiari̧ baämȩ ma̧ȩ chjadëi̧ pio ju̧i̧ pearä ta̧rërërea̧ oaiä, na̧e chiapea̧nȩrȩ Ütë tjamo̧ judi dibë yürüpea̧ pio ju̧i̧ chjiari. Ado pio ju̧i̧iä jidatarea̧ chianȩrȩ. Ado mȩnȩro̧ jidata̧ üdë, jabechji̧ chjadëri̧ boea̧ oa cjiade a̧dëräpȩ ju̧ri̧.

⁶ Aja̧ ca̧ oti̧, ma̧ȩ chjadëi̧ pio ju̧i̧ quëna̧ji̧ri̧pea̧nȩrȩ. Ado pio jiro ma̧ȩ üdë pio dibëmo̧ a̧ra̧ano̧a̧ oa cjiadëde, jabo chiriräpȩti̧ oa chuchjupechämi̧ dari̧ baäa̧de, pumȩ no̧i̧dërë ta̧rërea̧mi̧ dari̧, pumȩ no̧i̧dërë tjaoëpe järea̧mi̧ dari̧, ütëchjai̧pe järea̧mi̧ dari̧. Ado pio jiro pumȩ judiro̧ Ütë ja̧ ma̧ȩ pio ju̧i̧iä, jabechji̧ tjaoëpai̧ dari̧ cjiaji̧ri̧pea̧dirȩ. Ado peaja̧dinȩrȩ mȩnȩro̧. Tjaoëpai̧ dari̧ cjiaji̧ri̧pea̧nȩrȩ. Tjamo̧ davä. Mȩnȩro̧ pearä dabapea̧ pio judiri yurori tjaoëpai̧ dari̧ cjiadiäa̧nȩrȩ. Jabechji̧ mȩnȩro̧ dabapea̧ oaiä, Ütërë cjäri̧ri̧ cjiamȩrȩ yürüa̧ pio ju̧i̧ chjiari dabapea̧ oaiä, tjaoëpai̧ dari̧ cjiadiäa̧nȩrȩ.

⁷ Ado mȩnȩro̧ pearä ta̧rërërea̧ ji̧, Ütërë cjäri̧ri̧ cjiamȩrȩ yürüa̧ pio ju̧i̧ chjiari pearä ta̧rërërea̧ ji̧, Epapara quȩmȩ pio ju̧i̧iä ta̧rërëreji̧ri̧nȩrȩ. Aja̧, pio ibë nö̧ta ja̧bepamȩ mu̧i̧tjoi̧ pio ju̧i̧iä ta̧rërëreji̧ri̧nȩrȩ, a̧ro̧rȩ tjamo̧ri̧ ea̧ pio ju̧i̧iä. Aja̧ ca̧ oti̧, chjadëri̧ ja̧bepade Quiricho ja̧ oa, jibëa̧ maea oa jo̧rȩtadëmȩrȩ. Jabechji̧ judi pio dibë a̧doa̧ oaiä, chjadëri̧ a̧dodiibe peaja̧di.

⁸ Jabechji̧ Epapara pio ju̧i̧iä ta̧rëa̧rea̧rȩ davä pio dibë chjiari. Pio ju̧i̧iä ta̧rëa̧rea̧rȩ mȩnȩro̧ dibëa̧ oti̧ ji̧ri̧ chjadëri̧ ea̧ pio ju̧i̧, Tjo tjamo̧rȩ yürüa̧ra̧ pio ju̧ri̧ra̧ ea̧ pio ju̧i̧.

⁹ Ado a̧ro̧rȩ pio dibë chjiari ma̧ȩ ji̧ra̧ oa goë ta̧rëa̧ oaiä, jabechji̧ goë cjo̧dë chjaorea̧rȩ pio dibë chjiari ca̧ oti̧. Jabechji̧ pio dibë chjiari pearä ta̧rëa̧ dori ja̧, mȩnȩro̧ chjuari̧ quëna̧ji̧ri̧pea̧ pio ju̧i̧ chjiari pearä ta̧rëa̧ dori ja̧, ji̧dë ma goë cjo̧dë chjaorea̧rȩ, goë cjo̧dë ano̧rea̧ decjiari̧. Aja̧, Ütë tjamo̧ judi jibëa̧ dabarea̧ codë oa pio dibëiäpȩmo̧ yürütä eaji̧ri̧rȩ goë cjo̧dë chjaorea̧rȩ. Aja̧, mȩnȩro̧ pio ju̧i̧ ja̧ chji̧ra̧ jo̧rȩtami̧ dari̧ cjo̧ro̧pea̧ oa, Tjo tjamo̧rȩ yürüa̧ dabarea̧ra̧ jo̧rȩtapea̧ oa, ‘Ütë tjamo̧ judi ja̧di dari̧ cjo̧ro̧tä eadicoada, ja̧di dari̧ japatä eadicoada’ quëna̧ dabapea̧ oa dabarea̧ codë oa yürütä goë cjo̧dë chjaorea̧rȩ.

¹⁰ Ado mȩnȩro̧ ja̧di dari̧ japariä cjo̧ro̧rä judi, jabechji̧ goae tjamo̧padejȩ Ano̧mȩ pio ju̧i̧iä. Ado judi ea̧ tüdüa̧mi̧ darä cjo̧ro̧panȩrȩ, pio ju̧i̧iäpȩmo̧ ji̧dë ma ma̧ chiadëri̧ cjiaparȩji̧ri̧rȩ. Ado dami̧ti̧ jurarea̧ oa chiami̧ dari̧ na̧rȩ chjaopanȩrȩ chjadëri̧ jape chjaoa̧ oaiä. Ado ji̧dë u̧i̧ urëdi oa dabarea̧ daparenȩro̧jo̧ȩ Ütë tjamo̧ ju̧i̧, joë ya oa areiëa̧mi̧ dari̧.

¹¹ Ado danȩrȩ, mȩnȩro̧ dibëa̧ tjoro to̧bari̧ cjiami̧ dari̧ cjiatä eaji̧ri̧rȩ goë cjo̧dë chjaorea̧rȩ peaja̧di Ütë tjamo̧ pio ju̧i̧iä. Jabechji̧ Ütë tjamo̧ pio ju̧i̧ ja̧ jauëchja chjacjiamȩra̧ pio ju̧ri̧ra̧ to̧bari̧ cjiami̧ dari̧ cjiatä earea̧ro̧dibe, mȩnȩro̧ ji̧dë ma ma̧ chjuari̧ quëna̧ji̧ri̧rȩ cjo̧ro̧pea̧ oa, mȩnȩro̧ ma̧ chjuaji̧ri̧rȩ cjo̧ro̧pea̧ oa, chjai̧dë oa chjätäräbo. Aja̧, ma̧ chiadëri̧ cjiaji̧ri̧rȩ cjo̧ro̧tänȩrȩ,

¹² ‘ibëa̧ Ama̧i̧ judi chjadëri̧ japea̧diibëda’ quëna̧ jo̧rȩtaji̧ri̧rȩ. Jabechji̧ pio judi dibë chjiari ana̧ri̧ tuti japea̧ oaiä, nö̧tanȩrȩ yaba̧ jënȩ goë boea̧ pio ju̧i̧ mitëpea̧ oa. Jabechji̧ jibëa̧ pumȩ pio ji̧ri̧iäpȩmo̧ chjarapë yürüpea̧ oa, goë boea̧ oa goadejȩ, tatami̧ darä cjo̧ro̧ji̧ri̧ pio ji̧ri̧ ja̧ oa.

¹³ Jabechji̧ a̧ro̧rȩ bagönȩmi̧ daräpȩ cjiarërea̧ ji̧, yaröca ja̧ ütërë yo̧a̧ chja̧oerä cjo̧ro̧rërea̧ ji̧, jabechji̧ ado cja̧rȩmo̧räpȩmo̧ ano̧ mire cjo̧ro̧ tänȩpea̧ oa go̧dü tänȩrëremȩdiibe Ütë tjamo̧ judi, uapai̧ dadëräpȩ. Tjamo̧ davä, jibëa̧ Jarë cjiamȩräpȩ ano̧ mire cjo̧ro̧pea̧ oa, jibëa̧ Jarë yo̧a̧ chja̧oerä ano̧ mire cjo̧ro̧pea̧ oa, ano̧ mire tutirëremȩdiibe, jënȩ tjamo̧ri̧ ea̧ chja̧oerä ano̧ mire cjo̧ro̧pea̧ oa.

¹⁴ Jabechji̧ Joja pio judi ba ano̧däräa̧ oaiä, go̧dü tänȩrëremȩdidibe Ütë tjamo̧ judi. Ado a̧ro̧rȩ chjai̧dëri̧ japea̧ pio ju̧i̧, jabechji̧ duridëparȩrëremȩdejȩ chjö̧na̧i̧ oa.

Pablo judi yo̧a̧diibe a̧dë chjäte ba chiamȩ pio ju̧i̧ chjiari

¹⁵ Danȩrȩ, Ütë tjamo̧ judi darea̧mi̧dëde, jabo Quiricho pio judi, dëdë, darea̧mi̧ dade icjarabomȩpea̧ tara. Ado icjarabomȩpea̧mȩ pio ju̧i̧iä, jabechji̧ dapai̧ darea̧ro̧jo̧ȩ Tjo maearë cjiamȩ pio ju̧i̧. Aja̧, darea̧mi̧ damȩ pio ju̧i̧iä dapai̧ darea̧ro̧jo̧ȩ darea̧mi̧dëmȩ pio ju̧i̧. Ado darea̧mi̧ damȩ pio judi, jabechji̧ Quiricho pio judide. Ado Quiricho pio judi, jabechji̧ cjiamȩde. Jabechji̧ pearä judirämȩde. Jabechji̧ eami̧ üdë jabë pareapea̧ oa cjiadëa̧rä cjiarëremȩde. Jabechji̧ pareapea̧ oa cjiadëde, jabo jabechji̧ cjiamȩ pio judide. Ja̧di tara ji̧dë u̧i̧ ba chiade. Aja̧, Ütërë pareapea̧ pio ju̧i̧iä ji̧dë u̧i̧ ba chiade. Jabechji̧ a̧dë chjäte ba chiamȩ pio judide.

¹⁶ Jabechji̧ Ütë tjamo̧ judi pearä judi chjö̧na̧i̧ oa pareaparërea̧ ji̧, Joja pio ju̧i̧iä pareapa marëremȩdejȩ. A̧dëräpȩ cjiamȩ oa, daburopȩ cjiamȩ oa, darea̧mi̧dë oa, darea̧mi̧ da oa pareaparëremȩdejȩ chjö̧na̧i̧därä oa. Ado a̧dëräpȩ mu̧i̧tjoi̧ pio ji̧ri̧, yaröca pio ji̧ri̧, tjamo̧ yo̧ji̧ri̧ yaröca pio ji̧ri̧, chjö̧na̧i̧därä oa pareaparëremȩde Ütë tjamo̧ judi. Joja pio ju̧i̧ ja̧ oa pareaparëremȩdejȩ Joja pio ju̧i̧iä.

¹⁷ Jabechji̧ orë jabë pareapadëa̧rä cjiarëremȩde Quiricho judi. Ado pio judi jida̧ oaiämo̧i̧ chjadëri̧ jida̧ oa cjiade jënȩ pareapea̧ üdë. Jabechji̧ judi jidadëa̧rä judi, chjaodëri̧ goarijäa̧ oa cjia matäremȩde chjö̧na̧i̧rȩ. Jabechji̧ pio ju̧i̧ ja̧ ma̧ȩrämo̧ cjo̧ro̧de. Judi ütara̧rämo̧ cjo̧ro̧de. Pio ju̧i̧iämo̧ quirë baä quirë baä cjiarea̧ dade.

¹⁸ Ado tjübëmi̧ dade. Danȩrȩ, ju̧i̧ ja̧ a̧doparea̧ üdë, pio ju̧i̧ ja̧ icjarami̧ dade. Ado icjarami̧ da pio ju̧i̧ ja̧ tjübëmi̧ da üdë, Quiricho pio judide. Pio ju̧i̧iämo̧i̧ pumȩdiëno̧rea̧ dade icjarami̧ da üdë. Ado ja̧boa̧remȩrȩ bëdürëremȩde ado chjereno̧ cjo̧ro̧pea̧ oa. Jabechji̧ pio judide yabo bëdüa̧mi̧ bëdümȩ judi. Ado pio ju̧i̧iä a̧dë chjäte Ütëmȩrȩ cjiade a̧dë chjäte ba chia tjamo̧räpȩ ju̧ri̧.

¹⁹ Jabechji̧ goae tjamo̧rëremȩdejȩ Ütë tjamo̧ pio ju̧i̧iä Joja üdë pio jënȩmi̧ dari̧ cjiapea̧ oa peadëri ja̧, jabëdiärea̧ decjiari̧. Jabechji̧ nö̧tami̧ cjiadirȩ. Ji̧mo̧ ma cjiadirȩ. Joja üdë Ütë tjamo̧ pio judi tjamo̧mi̧ dari̧ cjiade. Ütë tjamo̧ pio judimȩrȩ cjiade. Jabechji̧ goae tjamo̧dejȩ Ütë tjamo̧ ju̧i̧iä, judi Jojarä bëpapea̧ ji̧.

²⁰ Ado Joja pio ju̧i̧iä, jabechji̧ jachidai̧parȩmi̧ dari̧ japatä earëremȩdejȩ Ütë tjamo̧ judi jënȩ pareaparërea̧ chjö̧na̧i̧ oa, pio jȩa nö̧ta ado chjereno̧ chjadëri̧ ëba cjiarea̧mi̧ dari̧ cjiapea̧ oa. Tjamo̧ davä. A̧dëräpȩ cjiamȩ chjö̧na̧i̧ oa, ado daburäpȩ cjiamȩ chjö̧na̧i̧ oa ado chjereno̧ pio jȩa nö̧ta chjadëri̧ ëba cjiarea̧mi̧ dari̧ cjiatä earëremȩde. Ado pio ju̧i̧iä chjadürëremȩdejȩ Joja oa. Ado Joja üdë toro goe gu̧rori̧ ja̧boa̧ oaiä, jabechji̧ pio jȩa nö̧ta ado chjereno̧ ëba cjiarea̧mi̧ dari̧ cjiadiäa̧de jënȩ pareapea̧ chjö̧na̧i̧rȩ. Jabechji̧ a̧dëräpȩji̧ri̧ judiro̧, daburäpȩji̧ri̧ judiro̧, jachidai̧parȩmi̧ dari̧ cjiadiäa̧dirȩ, pio ju̧i̧ ja̧ mape bagaji̧ri̧rȩ.

²¹ Pearä judi mȩnȩro̧ jachi cjiami̧ dari̧ cjo̧ro̧rërea̧ ji̧, Ütë tjamo̧ pio ju̧i̧ nö̧ta ori̧ bagari̧ ëba cjiarea̧mi̧dërërea̧ ji̧, jabechji̧ pio ju̧i̧ goëdëri̧ cjia tjamo̧ji̧ri̧rȩ cjo̧ro̧rëreji̧ri̧nȩrȩ, pio ju̧i̧ ea tjamo̧dëji̧ri̧rȩ. Jabechji̧ ji̧dë ma chjai̧dëri̧ jape cjiarëreji̧ri̧renȩro̧jo̧ȩ, ji̧dë ma chjai̧dëri̧ jo̧rȩtaji̧ri̧rȩ.

²² Jabo yaba̧ Ütë tjamo̧ ja̧ Jojarë ja̧boa̧ oaiä, pio ju̧i̧ ja̧ icjara üdë tjamo̧ri̧ ja̧boa̧ oaiä, jabechji̧ jachidai̧parȩrëremȩdidibe, pio ju̧i̧ ja̧ pumȩpea̧ji̧ri̧rȩ. Jabechji̧ china̧chjari̧ tutia̧ oa cjo̧ro̧nȩrȩ yaba̧, chjai̧dë chiadëji̧ri̧rȩ. Aja̧, cja̧rȩmȩ co chjai̧dëri̧ japadëji̧ri̧mi̧ dari̧ cjianȩrȩ, eami̧ üdë dibë aechide yo̧rea̧mi̧dëri̧. Ado ja̧di dari̧ cjoroji̧ri̧ oa, jabechji̧ cjiadärä tänȩpadidibe davä jibëa̧ dëbëräpȩ ju̧ri̧.

²³ Jabo mȩnȩro̧ dabapea̧ ma̧ȩrä ji̧dë ma chjuari̧ quëna̧pea̧ chianȩrȩ, jaejaeami̧ dari̧ cjiarea̧ decjiari̧. Jabechji̧ ji̧dë ma jo̧rȩtachji̧vä mȩnȩro̧ pearä jidatarërea̧ pio ju̧i̧. Jabechji̧ ado cja̧rȩmo̧ ma̧ȩ oa ano̧ mire quëna̧rea̧ decjiari̧, ma̧ȩ chjadëi̧ pio ju̧i̧ a̧dë jachipe bagami̧ dari̧ japarea̧ decjiari̧ ji̧dë ma jo̧rȩtachji̧vä. Pio jiro ma̧ȩ üdë chiriräpȩti̧ oa a̧ra̧ano̧a̧ oa cjiade. Ado pio jiro ma̧ȩ oa a̧ra̧ano̧mȩpea̧requede cüdë, Pablo pio judi.

Ütë tjamo̧ judi chjadürëremȩdejȩ Pablo ju̧i̧ quëna̧ji̧ri̧ pio ji̧ri̧ chjadëri̧ a̧dopea̧ oa

²⁴ Cüdë pio dibë a̧ra̧ano̧a̧ oaiä, jabechji̧ ana̧ri̧ tararequede. Pumȩ judiro̧ pio coa conȩda̧ oaiä ana̧ri̧ tararequede. Jabo chjai̧dë oa chjätämȩborë jabechji̧ ji̧dë ma ma̧ chiadëri̧ cjiarequede. Jabechji̧ ca̧ icjararä gito ana̧ri̧ tara̧ oaiä, jabechji̧ nö̧tadärämi̧ dari̧ cjiapade Quiricho judi jabë tarapea̧ üdë, pio coaiä a̧de tara̧ oaiä. Jabechji̧ Quiricho judi jibëa̧ icjarami̧ damȩ pio ju̧i̧iä tarapea̧ üdë jabë pjärämȩde. Judi jibëa̧ a̧doparea̧ pio ju̧i̧ chjiari tarapea̧ üdë jabë pjärämȩde. Ado pio ju̧i̧iä cjiadiäa̧mȩ pio ju̧i̧ a̧de tararequede nö̧tadärämi̧ dari̧ cjiapea̧ oa.

²⁵ Jabechji̧ Ütë tjamo̧ pio judi tänȩa̧ oa a̧doparea̧ pio ju̧i̧ ja̧ mu̧i̧tjoi̧pea̧requede. Tjamo̧ davä. Ütë tjamo̧ judi pio yoa ja̧beparea̧ oa yürürëremȩdique pio dibë chjadëri̧ a̧dopea̧ oa. ¿Tjana̧ ja̧beparea̧ yürüa̧dique? Tjana̧dë, jabechji̧ pio ju̧i̧ ja̧ ma̧ȩ oa nö̧tadäräri̧ a̧ra̧ano̧pea̧ pio ju̧i̧ yürüa̧dique.

²⁶ Jabo pearä judi pio ju̧i̧ ja̧ ma̧ȩ üdë orë goadia̧ oa cjiarëremȩde. Jabechji̧ goadia̧ oa cjiarërea̧ oaiä, pearä judirä cjo̧ro̧rëreji̧ri̧ judiro̧ pio jiro ma̧ȩ oa dabadë marëreji̧ri̧diro̧jo̧ȩ. Jabo ja̧didëde yaba̧. Jabechji̧ jibëa̧ pumȩ pio ji̧ri̧ dabarea̧ yürürëremȩdejȩrȩ Ütë tjamo̧ judi.

²⁷ Tjamo̧ davä. Ütë tjamo̧ judi no̧mȩ tjamo̧ri ja̧ goadia̧ oa cjiarërea̧ ma̧ȩ pio ju̧i̧ dabapa tänȩtämi̧ cjiadejȩrȩ yaba̧ judio ji̧ri̧, ado judiodë pio ji̧ri̧bo. Ma̧ȩ ba chia tjamo̧ oa, ma̧ȩ a̧dë chjäte goae oa chjadëri̧ dabapa tänȩtämi̧ cjiadejȩrȩ pumȩ ütëbodärä ja̧ oa, chiriräpȩti̧ oa cjo̧ro̧ji̧ri̧ ja̧ oa. Ado ¿tjana̧ ma̧ȩde goadia̧ oa cjiarëremȩ ma̧ȩ üdë? Tjana̧ ma̧ȩdë, jabechji̧ Quiricho judi dibëa̧ icjararä bëpea̧mȩ pio judide. Pio judide goadia̧ oa cjiarëremȩ ma̧ȩ üdë. Tjamo̧ davä. Quëna̧ji̧ri̧ ja̧ icjararä bëpea̧de Quiricho judi. Ado dibëa̧ icjararä bëpea̧ tara, jabechji̧ jidatarea̧ chianȩrȩ. Jabechji̧ Ütë tjamo̧ pio judimi̧ dari̧ cjiapea̧ oa, pio judi tatachjami̧ dari̧ cjiapea̧ oa, jidatarea̧ chianȩrȩ.

²⁸ Ado pio ju̧i̧iä a̧ro̧rȩ eami̧räpȩ järä, jabechji̧ Quiricho pio ju̧i̧ chjiari ma̧ȩ oa a̧ra̧ano̧ chjaorea̧rȩ pumȩ ütëbodärä oa. Tjamo̧ davä. A̧ra̧ano̧rea̧ro̧jȩrȩ. Ado a̧dërimȩ dabarea̧ra̧ tuti chi̧dëearea̧ro̧jȩrȩ peaja̧di. Ado uapai̧ ta̧rëri̧ yo̧ë cji̧därea̧ro̧jȩrȩ peaja̧di, judiro̧ na̧e chiape jäpea̧ oa. Jabechji̧ pio jiro pumȩ ji̧ri̧ Ütë tjamo̧ ja̧ dëbëräpȩ ju̧ri̧ ëba cjiatämi̧ cjiarea̧ro̧jȩrȩ üi̧padäräa̧mi̧ dari̧ cjia maea oa, Quiricho pio judiri ja̧ maea oa.

²⁹ Ado pio ju̧i̧iä jabechji̧ goae tarari̧ ja̧beparequede järi tjamo̧mȩrȩ. Jabechji̧ Quiricho judi coa yürüa̧ ju chiarea̧ra̧ pio ju̧ri̧ra̧ ja̧bepamȩrȩ a̧ra̧ano̧ chjaorequedejȩrȩ.