Cori̧tio Ma̧ȩ 1 5 - Biblia Pume

Ma̧i̧ da chjai̧dë oa japamȩ pio ju̧i̧ chjadüpea̧de a̧dopaji̧ri̧ pio ji̧ri̧ nö̧ta ori̧ bagari̧ ëba cjiarea̧mi̧dëri̧

¹ Danȩrȩ ca̧ oti̧, o judiro̧ yo̧a̧bea oa goë ta̧rëa̧requede pio dibë chjiari. Aja̧, a̧dë chjäte chjai̧dëri̧ japavedirȩ yo̧a̧bea oa ta̧rëa̧requede. Üi̧ judi baë ëba mo̧a̧ chjaovedejȩ jȩa nö̧rimȩ pio ju̧i̧ ja̧ iei̧ pio ji̧ yo̧a̧ oa ta̧rëa̧requede pio dibë chjiari. Jabo cjäri̧ mavede, a̧dë chjäte ma̧i̧ dari̧ japamȩvede. Jabechji̧ Ichiae ja̧ pumȩ pio judiro̧ ja̧di dari̧ japadëräbo, jaboti̧ri̧ japamȩde pio jiro üi̧ üdë. Quëna̧mȩborë ma̧i̧ dari̧ japavede.

² Ado mȩnȩro̧ orë pio ju̧i̧iä gito ana̧ri̧ jo̧rȩtatärea̧ ji̧, ejaro cjiami̧ tarari̧ jo̧rȩtatärea̧ ji̧, cjäri̧ manȩrȩ, ‘jabechji̧ chjadëri̧ cjo̧ro̧ baäa̧ro̧da, ta̧rëdiäji̧ri̧rȩ cjo̧ro̧a̧ro̧da’ quëna̧ jo̧rȩtaji̧ri̧rȩ cjo̧ro̧nȩrȩ ca̧ oti̧, dibëa̧ chji̧rämo̧ jo̧rȩtaji̧ri̧rȩ. Jabo cjäri̧ manȩrȩ ca̧ oti̧, pio jiro üi̧ pio ju̧i̧, ma̧i̧ dari̧ japamȩ pio ju̧i̧ chjadütäreji̧ri̧renȩro̧jo̧ȩ pio dibë nö̧ta chjare yu̧ë a̧doparea̧mi̧dëri̧, pio dibë nö̧ta ori̧ bagari̧ ëba cjiarea̧mi̧dëri̧.

³ Ado cüdë jachiräpȩ cjiamȩborë, cüdë pio dibë nö̧ta ëba cjiadëmȩborë, jabechji̧ pio dibë nö̧tamȩmi̧ dari̧ cjiarequede dibë ana̧ri̧ jo̧rȩta̧ oaiä. Ado pio dibë nö̧ta cjiamȩmi̧ dari̧ peadë ütara̧reconȩ chjai̧dëri̧ jape chjaomȩ pio ju̧i̧.

⁴ Tjamo̧ davä. Ano̧mȩ Jechu Quiricho pio ju̧i̧ ja̧ ma̧ȩrä ütara̧reconȩ judi chjai̧dëri̧ japea̧ pio ju̧i̧ chjiari. ‘Aja̧, chjai̧dëri̧ japea̧dida, ado pio ju̧i̧iä jabechji̧ chjadüpea̧dida’ quëna̧ jo̧rȩtamȩrȩ ütara̧reconȩ jabërä. Ado pio ju̧i̧iä jabechji̧, Ano̧mȩ Jechu ja̧ quȩrä a̧dopatäreji̧ri̧nȩrȩ pio ju̧i̧ ja̧ tjamo̧ yo̧rea̧ chiaji̧ri̧rȩ. Ado pio cüdëborë pio dibë nö̧ta a̧dopamȩmi̧ dari̧ cjiaparequede.

⁵ Ado ja̧dëa ji̧ jabechji̧, dairäpȩ tutia̧ oa cjiami̧ dari̧ chjadütäreji̧ri̧renȩro̧jo̧ȩ ma̧i̧ dari̧ jape chjaomȩ pio ju̧i̧. Jabechji̧ Ichiae pio judi jibëa̧ icjara oa conȩdarea̧mi̧ dari̧ dairäpȩ tutia̧ oa cjiami̧ dari̧ chjadüchji̧jo̧ȩ. Ado dëdë, conȩda̧ oa cjiadiäpade jibëa̧ icjara üdë. Jabo danȩrȩ, chjätärea̧ dapade jibëa̧ tjo üdë. Tjamo̧ davä. Ibëa̧ Ano̧mȩ Jechu judi ütara̧ doro ado jana̧rä, jabechji̧ pio ju̧i̧ ja̧ tjo üdë chjätärea̧ dapade.

⁶ ¿Tjana̧ ju̧i̧iä oëra̧ jo̧rȩtanȩrȩ chjai̧dëri̧ japamȩ pio ju̧i̧ chjiari? ¿Tjana̧ ju̧i̧iä dibëa̧ chji̧rämo̧ jo̧rȩtanȩrȩ? ¿Tjana̧ ju̧i̧iä ‘chjadëri̧ cjo̧ro̧ maa̧ro̧da’ quëna̧ jo̧rȩtaji̧ri̧rȩ goaeri̧ yo̧nȩrȩ pio dibë chjiari? Ja̧di dari̧ yo̧rea̧mi̧dënȩrȩ. Danȩrȩ, pio jiro chjai̧dë oa japamȩ pio judi, pjuru chiaparȩrea̧mi̧ dade. Ado danȩrȩ, pjuru chiaparȩrea̧ üdë boi̧chji̧räbo chjaodëri̧ boadäräpai̧ dadejȩ davä chja̧pe codë oa. Ado peaja̧dimi̧ dari̧ japade chjai̧dë üdë. Jabechji̧ boi̧chji̧mi̧ daräbo, quëna̧ji̧ri̧ ütëbo oa chjaodëri̧ boadärämi̧ dari̧ japapai̧ dadidibe.

⁷ Ado pio ju̧i̧iä yo̧requededibe ca̧ oti̧. Danȩrȩ, pio jiro pjuru chiaparȩrea̧mi̧ damȩ pio ju̧i̧, chjai̧dëri̧ japamȩ pio ju̧i̧ dairäpȩ tutia̧ oa cjia tänȩmi̧ dari̧ chjadüchji̧jo̧ȩ pio dibë nö̧ta ori̧ bagari̧ ëba cjiarea̧mi̧dëri̧, pio dibë boadärämi̧ dari̧ japachea oa. Danȩrȩ, icharaita judiro̧ ejito chiriräpȩ jabë cjo̧ro̧rä judirä, pjuru chiaparȩrea̧ chiadëmȩ chja̧pe maea oa juratä eamȩrȩ yo̧rëremȩdejȩrȩ Ütë tjamo̧ judi. Jabechji̧ pjuru chiaparȩrea̧ pio ju̧i̧ chiadëmȩ chja̧pe üdë na̧rȩrëremȩde pumȩ judiro̧ china̧chjari̧ tutia̧ oa cjiami̧ dari̧ cjo̧ro̧pea̧ pio ju̧i̧ chjiari, chjai̧dë oa japadëji̧ri̧rȩ cjo̧ro̧pea̧ pio ju̧i̧ chjiari. Ja̧di tara yo̧requededibe ca̧ oti̧. Jabechji̧ pio jiro chjai̧dë oa japamȩ pio ju̧i̧ dairäpȩmo̧ tutia̧ oa cjiami̧ dari̧ chjadüchji̧jo̧ȩ, pjuru chiaparȩrea̧mi̧ damȩ pio ju̧i̧, pio dibë boadärämi̧ dari̧ japapai̧ damȩ pio ju̧i̧. Jabechji̧ mȩnȩro̧ pjuru chiamȩ chja̧pemi̧ dari̧ cjiadiächea oa chjadüchji̧jo̧ȩ, mȩnȩro̧ chja̧pe chjadëmi̧ dari̧ cjiapea̧ oa, mȩnȩro̧ tjamo̧ri̧ china̧chjari̧ tutia̧ oa cjiami̧ dari̧ cjo̧ro̧pea̧ oa. Jabechji̧ mȩnȩro̧ chjai̧dëri̧ japea̧ üdë duridëparȩa̧ oa cjia maeade ca̧ oti̧. Pio ibë chjiari ano̧ mire ja̧boa̧mȩ oveja pio judi peadëri ja̧ goe gu̧rori̧ ja̧bo tänȩa̧ oa cjiarëremȩde. Tjamo̧ davä. Uëmo̧ a̧dë chjätärea̧ doro ano̧ mire ja̧bomȩ ovejami̧ damȩ pio judi, Quiricho pio judi, pio ibë chjiari goe gu̧rori̧ ja̧bo tänȩa̧ oa cjiarëremȩde a̧ro̧rȩ pjuru chiadëmȩ chja̧pe chjadëmi̧ dari̧ cjiapea̧ oa, a̧ro̧rȩ chjai̧dë ja̧ chja̧oerä cjo̧ro̧chea oa.

⁸ Ado pio ju̧i̧iä jabechji̧, airi̧ cjia airi̧ cjia a̧dopatäreji̧ri̧rea̧rȩ ca̧ oti̧. Tjamo̧ davä. Icharaita pio judiro̧ uëmo̧ a̧dë chjätärea̧ doro airi̧ cjia airi̧ cjia a̧doparërea̧mi̧ japatäreji̧ri̧rea̧rȩ pio a̧ro̧rȩ peaja̧di. Jabo tjaoëpai̧ dari̧ japatäreji̧ri̧rea̧rȩ jabo. Danȩrȩ, icharaita judiro̧ pio jiro japamitërä, jabechji̧ jibëa̧ bëri pio judiri pjuru chiaparȩrea̧ chjö̧na̧i̧därä oa aeno̧rëreji̧ri̧diro̧jo̧ȩ, chjai̧dë pio ju̧i̧ chjiari na̧rȩrea̧ pio ju̧i̧. Ado a̧ro̧rȩ peaja̧dimi̧ dari̧ japa matäreji̧ri̧rea̧rȩ. Jabechji̧ dami̧ti̧ chjai̧dë jo̧rȩtarea̧ oa, Ütë tjamo̧ pio ju̧i̧iä chjadëdë oa aeno̧mi̧ dari̧ japatäreji̧ri̧rea̧rȩ. Chjaocjiarea̧ decjiari̧ cjo̧ro̧täreji̧ri̧rea̧rȩ tjamo̧i̧ cjiari̧ baämȩ ma̧ȩrä, coëma cjiari̧ cjo̧ro̧cji̧ quëna̧ japarea̧ decjiari̧.

⁹ Danȩrȩ ca̧ oti̧, cüdë dibë no̧mȩ go̧ȩpe chjadürërea̧ ji̧, jabechji̧ china̧cha pio ji̧ri̧ bae ëba mo̧a̧ji̧ri̧ pio ji̧ri̧ ëba cjiadë machji̧jȩrȩ yo̧mȩrȩ go̧ȩpe chjadürëremȩrequededibe.

¹⁰ Jabo danȩrȩ, pio ji̧ri̧ ëba cjiadë machji̧jȩrȩ yo̧mȩrȩ go̧ȩpe chjadürërea̧ ji̧, jabechji̧ quëna̧dëji̧ri̧ pio ji̧ri̧ jo̧rȩtamȩrȩ go̧ȩpe chjadüdëa̧requededibe jabo jabechji̧, quëna̧ji̧ri̧ pio ji̧ri̧mo̧i̧ jo̧rȩtamȩrȩ go̧ȩpe chjadüa̧requededibe ca̧ oti̧. Tjamo̧ davä. Quëna̧dëji̧ri̧ pio ji̧ri̧ tjamo̧ri̧ jo̧rȩtamȩrȩ go̧ȩpadëa̧requede. Quëna̧dëji̧ri̧ pio ji̧ri̧, baë ëba mo̧a̧ji̧ri̧ pio ji̧ri̧, o ji̧ri̧ ja̧ oa dae ja̧bo dae ja̧bo dae chjaoji̧ri̧ pio ji̧ri̧, ado garüji̧ri̧ pio ji̧ri̧, ado ‘teracabarë ütëdida’ quëna̧ji̧ri̧ pio ji̧ri̧ jo̧rȩtamȩrȩ go̧ȩpadëa̧requede, jabo quëna̧ji̧ri̧ pio ji̧ri̧mo̧i̧ jo̧rȩtamȩrȩ go̧ȩpe chjadürëremȩrequededibe ca̧ oti̧. Jabo chia chia, cüdë dibë quëna̧dëji̧ri̧ pio ji̧ri̧ ütëbo oa ëba cjiadë machji̧jȩrȩ yo̧mȩrȩ go̧ȩpe chjadüa̧rä judicjȩ, cjäri̧ manȩrȩ, pio yoa chiri oa a̧dë cjarapea̧täreji̧ri̧renȩro̧jȩrȩ pio ji̧ri̧ nö̧ta ëba cjiachea oa.

¹¹ Jabo cjäri̧ marequededibe ca̧ oti̧, ja̧di ta̧rëri̧ go̧ȩpe chjadüdëa̧requededibe, jabo quëna̧ji̧ri̧ pio ji̧ri̧mo̧i̧ jo̧rȩtamȩrȩ go̧ȩpe chjadürëremȩrequededibe. Jabechji̧ eami̧ pumȩ üdë, “quëna̧mȩrequede” yo̧mȩ pio judi, china̧chja pio ji̧ ji̧dë ma bae ëba mo̧a̧mȩrȩ cjo̧ro̧mȩ pio judi, jabechji̧ ëba cjiadë mapea̧de. Ado china̧chja pio ju̧i̧ ji̧dë ma baë ëba mo̧a̧yi̧ pio jini̧, peaja̧di ëba cjiadë mapea̧nȩ. Tjamo̧ davä ca̧ oti̧, quëna̧ji̧ri̧ pio ji̧ri̧ chjiari jo̧rȩtamȩrȩ ni̧bä chjaorequededibe, quëna̧dëji̧ri̧ pio ji̧ri̧ chjiaridë. Ado danȩrȩ, eami̧ quëna̧mȩ judi, o ji̧ri̧ ja̧ oa ji̧dë ma dae ja̧bo dae ja̧bo dae chjaomȩrȩ cjo̧ro̧mȩ pio judi, jabechji̧ ëba cjiadëpea̧de. Ado eami̧ quȩna̧mȩ judi, teracaba ütë oa chjacjiamȩri̧ jo̧rȩtamȩ pio judi peaja̧di ëba cjiadëpea̧de. Ado eami̧ quëna̧mȩ judi, o pio ji̧ri̧iä ji̧dë ma garümȩrȩ cjo̧ro̧mȩ pio judi peaja̧di ëba cjiadëpea̧de. Ado eami̧ quëna̧mȩ judi, o ji̧ri̧ chjiari ji̧dë ma ma̧ȩ chjádë yürümȩ pio judi peaja̧di ëba cjiadëpea̧de. Ado eami̧ quëna̧mȩ judi, ërü oa ji̧dë ma a̧dë chjäte jaramȩrȩ yu̧i̧pe bagamȩrȩ cjo̧ro̧mȩ pio judi, peaja̧di ëba cjiadëpea̧de ca̧ oti̧. Ja̧di maeade. Ado pio ju̧i̧ uëri ëba juradë mapea̧de peaja̧di. Jabechji̧ chjadëri̧ ëba jurarërea̧ ji̧, ‘ëba juradëpea̧dida yaba̧’ quëna̧ jo̧rȩtapea̧de.

^12-13 Aja̧ ca̧ oti̧, ja̧di dari̧ japapea̧de. Jabo quëna̧dëji̧ri̧ pio ji̧ri̧, cjäri̧ marequedejȩrȩ, pio judiro̧ bape chjaoa̧ oa cjiapea̧ oa ütararea̧mi̧dërequedejȩrȩ. Judiro̧ ibëa̧ oti̧dë tara, judiro̧ quëna̧dëji̧ri̧ tara, jabechji̧ jënȩro̧ chjai̧dëri̧ japea̧ pio ju̧i̧ ütararea̧mi̧dërequedejȩrȩ, jabo Ütë tjamo̧ pio judimo̧rȩ ütarapadejȩrȩ. Tjamo̧ davä. Judiro̧ japea̧ pio ju̧i̧ ütarapadejȩrȩ Ütë tjamo̧ pio judi, cüdëdë. Jabo danȩrȩ ca̧ oti̧, quëna̧ji̧ri̧ pio ji̧ri̧, pio ibë nö̧ta quëna̧ji̧ri̧pea̧ pio ji̧ri̧, Quiricho ja̧ a̧doparea̧rä cji̧däa̧ oa cjiaji̧ri̧ pio ji̧ri̧, dëdë, mö̧rȩda̧rea̧ra̧ ütarami̧ dari̧ ütarë dapea̧ chiarenȩro̧jȩrȩ jënȩro̧ chjai̧dëri̧ japea̧ pio ju̧i̧ chjiari. Peaja̧di ta̧rëri̧ go̧ȩpa tänȩrëremȩde Ütë tjamo̧ judi. Ta̧rëchji̧vä: “Aja̧, pio dibë nö̧ta a̧doparea̧mi̧dëri̧ dairäpȩmo̧ tutia̧ oa cjiami̧ dari̧ chjadüchji̧jo̧ȩ chjai̧dëri̧ japamȩ pio ju̧i̧, pio coaiä goaedëti̧ oa jape chjaomȩ pio ju̧i̧.” Aja̧, ja̧di ta̧rëri̧ go̧ȩpa tänȩrëremȩde Ütë tjamo̧ judi jabërä quëna̧ji̧ri̧ pio ji̧ri̧ chjiari. Ado pio ju̧i̧iä ja̧di dari̧ japapea̧de ca̧ oti̧. Tjamo̧ davä. Dairäpȩ tutia̧ oa cjiami̧ dari̧ chjadüpea̧de. Ëba cjiadëpea̧de. Ëba juradëpea̧de.