Cori̧tio Ma̧ȩ 1 4 - Biblia Pume

Pablo judi ni̧bä chjaorëremȩde Jechurë chjadüa̧ pio ji̧ri̧ chjiari.

¹ Ado pio ju̧i̧iä mȩnȩro̧ pio coa darä, Aporo pio ju̧i̧ darä, ‘jabechji̧ Quiricho pio ju̧i̧ ja̧ mu̧i̧tjoi̧diro̧da’ quëna̧ jo̧rȩtaji̧ri̧rȩ dachji̧ibe. Jabechji̧ Ütë tjamo̧ judi pio ibëiäpȩmo̧ yürüa̧ pio ju̧i̧ a̧ra̧ano̧rea̧ro̧jo̧ȩ ma̧ȩ oa, pearä goadia̧ oa cjiarërea̧ ma̧ȩ pio ju̧i̧. Jabechji̧ pio jiro ma̧ȩ oa tjamo̧ jidaji̧ri̧mi̧ dari̧ ja̧beparea̧rȩ.

² Ado danȩrȩ, jidaji̧ri̧mi̧ dari̧ ja̧bepaji̧ri̧ pio judiro̧, bë oa jidaji̧ri̧mi̧ dari̧ ja̧bepaji̧ri̧ pio judiro̧, jabechji̧ nö̧tadäräri̧ ta̧rëdiäji̧ri̧rȩ ja̧bepatäreji̧ri̧dirȩ bë ano̧mȩ pio judi yo̧a̧mi̧.

³ Ado pio cüdëborë ja̧di dari̧ ja̧bepatämi̧ cjiarequede ca̧ Ano̧mȩ ja̧ oa, a̧dëräpȩ cjiamȩ Ano̧mȩ ja̧ oa. Ado pio ju̧i̧iä ana̧ri̧ jo̧rȩtadërequede pumȩ judiro̧ pio coa chjiari ütarë yo̧a̧ pio ju̧i̧ chjiari. Jabechji̧ mȩnȩro̧, o judiro̧, dëdë, “Pablo judi chjadëri̧ jo̧rȩtamȩrȩ ja̧bepamȩde Ano̧mȩ ja̧ oa” yo̧pai̧ danȩrȩ. Jabo o judiro̧, “Cjäri̧ made, Pablo judi chjadëri̧ jo̧rȩtamȩrȩ ja̧bepadëmȩde” yo̧pai̧ dadirȩ peaja̧di. Ado pio ju̧i̧iä ana̧ri̧ jo̧rȩtadërequede ca̧ oti̧. Jabechji̧ ca̧ chji̧ oa cjacjarë darea̧ chiadë madirȩ. Ado danȩrȩ, pio cüdëborë tjamo̧ri̧ dabadërequede ca̧ chji̧ pio ju̧i̧ chjiari. Ado pio ju̧i̧iä, ‘Aja̧, chjadëri̧ jo̧rȩtamȩrȩ ja̧bepamȩ jiroquëda, jabo chjai̧dëri̧ jo̧rȩtamȩrȩ ja̧bepamȩ jiroquëda’ quëna̧ jo̧rȩtamȩrȩ tjamo̧ri̧ ütarë jo̧rȩtadërequede.

⁴ Jabechji̧ Ano̧mȩ pio judi tjamo̧de ca̧ chji̧ oa cjacjarë damȩ judi. Pio judi tjamo̧de cüdë jo̧rȩta̧ pio ju̧i̧ ütarë yo̧pamȩ judi, pio cüdëdë. Jabechji̧ cüdë pio ju̧i̧ ja̧ oa chji̧ goaera̧ jo̧rȩtamȩrȩ ja̧bepamȩborë, ‘oëra̧ jo̧rȩtamȩrȩ ja̧bepapai̧ daquëda’ quëna̧ dabarequede. Ado pio ju̧i̧iä jabërä, ‘Aja̧, chjadëri̧ jo̧rȩtamȩrȩ ja̧bepaquëda, chjai̧dëri̧ jo̧rȩtamȩrȩ ja̧bepaquëda’ quëna̧mȩrȩ ütarë jo̧rȩtadërequede, jabo ca̧ Ano̧mȩ pio judi tjamo̧de pio coa chjiari ütarë yo̧pamȩ judi.

⁵ Ja̧di tara ca̧ oti̧, ibëa̧ Ano̧mȩ judi ibë ütarapea̧ oa jabë jana̧dëa̧ tara, jabechji̧ ibëa̧ oti̧ judiro̧ jo̧rȩta̧ pio ju̧i̧ chjiari jabërä ütarë yo̧dëtäreji̧ri̧rea̧rȩ. Jabechji̧ a̧ro̧rȩ ji̧ri̧ ja̧ chji̧räpȩmo̧ cjacjarë darea̧ chia ma ja̧didë. Jabo ibëa̧ Ano̧mȩ pio judi jana̧rä, urëdi tjamo̧ oa cjacjarë damȩrȩ ütarapadiibe ibëa̧ chji̧ oa, a̧ro̧rȩ jo̧rȩta̧ pio ju̧i̧. Jabechji̧ a̧ro̧rȩ jo̧rȩta̧ pio ju̧i̧, a̧ro̧rȩ jo̧rȩtariä ja̧bepea̧ pio ju̧i̧ ütarapadiibe, a̧ro̧rȩ goadi jo̧rȩtarërea̧ pio ju̧i̧. Jabechji̧ ibëa̧ chji̧rä urëdi tjamo̧ oa charërea̧ pio ju̧i̧, a̧ro̧rȩ eami̧ oa japea̧rä jo̧rȩtarërea̧ pio ju̧i̧ ütarapadiibe, chjadë maearä cjia tänȩrea̧mi̧ dari̧. ‘Aja̧, ja̧di dari̧ jo̧rȩtamȩrȩ ja̧bepea̧dida, pio ju̧i̧mo̧i̧ jo̧rȩtamȩrȩ japea̧dida, pumȩ judiro̧ pio jȩaiäpȩmo̧ chjacjiamȩri̧ jo̧rȩtapea̧ oa japea̧dida, jabomo̧ bacjiami̧ dari̧ a̧dorëremȩdiji̧ri̧da, jabo tjaoërä, dëdë pio coamo̧ ta̧rëdiätämi̧ cjiamȩrȩ a̧dorëremȩdiji̧ri̧da’ quëna̧ dabamȩrȩ ütarë yo̧padiibe Ano̧mȩ judi, a̧ro̧rȩ ibëa̧ chji̧ra̧ jo̧rȩtarërea̧ pio ju̧i̧. Ado ja̧dëa ji̧ Ütë tjamo̧ pio judi chjacjiamȩri̧ ni̧bäpade pio ibë chjiari. Tjamo̧ davä. Quëna̧ji̧ri̧ pio judiro̧ ütëborë chjadëri̧ jo̧rȩta̧ ba oa chjacjiamȩri̧ ni̧bäpade pio ibë chjiari cja̧rȩmȩrȩ a̧dë cjiadiärea̧ decjiari̧. Jabo chjadëri̧ jo̧rȩtadëji̧ri̧rȩ ja̧bepaji̧ri̧ pio ji̧ri̧ chjiari, jabechji̧ judiro̧ chjadëri̧ jo̧rȩtadëa̧ ba oa chjacjiamȩri̧ ni̧bädëpade.

⁶ Danȩrȩ ca̧ oti̧, cüdë dibë pio yabo pio yoa go̧ȩ irä go̧ȩpea̧ ji̧, jabechji̧ na̧rȩrea̧ ma̧ȩmi̧ dara̧ pio ju̧ri̧ra̧ go̧ȩpea̧requededibe pio ibë chjiari. Tjamo̧ davä, cüdë cho ponȩmȩmi̧ dari̧ ja̧bepea̧ pio ju̧i̧ chjiari, ado Aporo judi uira̧ cjarämȩmi̧ dari̧ ja̧bepea̧ pio ju̧i̧ chjiari go̧ȩpea̧requededibe mȩnȩro̧ chjadëri̧ a̧doa̧ oa cjiapea̧ oa, mȩnȩro̧ dibë a̧ra̧ano̧ji̧ri̧ ütëbo oa cja̧rȩmȩ ba chiara̧ dapea̧ oa. Aja̧ ca̧ oti̧, ja̧di ta̧rëri̧ yo̧mȩrȩ go̧ȩpe chjadüremȩrequededibe pio yabo mȩnȩro̧ Ütërë go̧ȩpa tänȩrërea̧ ma̧ȩrämo̧ cjo̧ro̧pea̧ oa, mȩnȩro̧ dibëa̧ chji̧rämo̧ jo̧rȩtaji̧ri̧rȩ cjo̧ro̧chea oa. Jabechji̧ dibë a̧ra̧ano̧mȩ pio ju̧i̧ cja̧rȩmȩ oa badë dadë dadë matäreji̧ri̧renȩro̧jo̧ȩ. ‘Cja̧rȩmȩ üdë o ji̧ri̧iä ji̧dë u̧i̧ ba chiadida’ quëna̧ jo̧rȩtaji̧ri̧rȩ goaeri̧ yo̧dëtäreji̧ri̧nȩrȩ jabo jabechji̧, ütëbo oa cja̧rȩmȩ ba chia maeara̧ datäreji̧ri̧renȩro̧jȩrȩ, o pio ji̧ri̧iäpȩmo̧ badë darea̧ decjiari̧.

⁷ Jabo cjäri̧ manȩrȩ ca̧ oti̧. Badë daji̧ri̧rȩ ütarë darenȩro̧jȩrȩ o ji̧ri̧iäpȩmo̧. Ado pio ju̧i̧iä iëno̧ë ta̧rërequededibe. ¿Chjiarë ütarë darea̧ yürüa̧ oa badë darenȩro̧jȩrȩ? ¿Tjana̧ ju̧i̧iä ‘pio ji̧ri̧iä ji̧dë u̧i̧ dabarea̧ chiaquëda’ quëna̧ jo̧rȩtanȩrȩ mȩnȩro̧? Jabechji̧ dibëa̧ ma̧na̧ri̧ japea̧ oaiä dabapea̧ ma ja̧didë, jabo jabechji̧, Ütë tjamo̧ pio judirimȩ maearë cjäri̧ri̧ cjiamȩrȩ dabarea̧ yürürëremȩdidibe. Tjamo̧ davä. Dibëa̧ ma̧na̧ri̧ japea̧ oaiä dabaji̧ri̧pea̧ ma ja̧didë, jabo a̧ra̧ano̧ji̧ri̧ pio ji̧ri̧iämo̧i̧ dabapea̧nȩrȩ. Ütë tjamo̧ pio judi dabarea̧ yürüa̧ oaiämo̧i̧ dabaji̧ri̧pea̧nȩrȩ. Ado pio ju̧i̧iä pio dibë chjiari ji̧dë ma goaeri̧ ni̧bärea̧mi̧dëde. Ado peaja̧di dibë a̧ra̧ano̧ji̧ri̧ pio ji̧ri̧iäpȩmo̧ badë darea̧mi̧dënȩrȩ. Teracabari̧ ütarë darea̧mi̧dënȩrȩ.

⁸ Jabo cjäri̧ manȩrȩ mȩnȩro̧, oëra̧ jo̧rȩta tjamo̧nȩrȩ. Jabomo̧ goaeri̧ jo̧rȩtanȩrȩ pio dibë chjiari. ‘Jaeboa̧ro̧da, a̧dë chjäte chjadëri̧ cjo̧ro̧ji̧ri̧pea̧a̧ro̧da, chiri ütë maearë cjo̧ro̧ji̧ri̧pea̧a̧ro̧da yaba̧, jabechji̧ Pablo pio ju̧i̧iä a̧dë ütëti̧mi̧ dari̧ cjiaji̧ri̧pea̧a̧ro̧ju̧i̧da, jabechji̧ Pablo pio ju̧i̧ ja̧ jadü pio ji̧ri̧iä a̧dë ütëmi̧ dari̧ cjiadiäa̧a̧ro̧da yaba̧, jabechji̧ Pablo pio ju̧i̧iä ji̧dë u̧i̧ dabaji̧ri̧pea̧a̧ro̧da yaba̧, ado chja ja̧di ado judiri a̧dodëtäremȩdiibëda, jabechji̧ chjadëri̧ a̧ra̧ano̧dëmȩ pio ju̧i̧iä ado chjereno̧ ta̧rëdëri̧ cjiaa̧ro̧ju̧i̧da’ quëna̧ jo̧rȩtaji̧ri̧rȩ cjo̧ro̧nȩrȩ, dibëa̧ chji̧rämo̧ jo̧rȩtaji̧ri̧rȩ, pio dibë chjiari goaeri̧ jo̧rȩtaji̧ri̧rȩ Tjamo̧ davä. ‘Peadë nö̧tadäräri̧ goaji̧ri̧mi̧ dari̧ cjo̧ro̧ji̧ri̧pea̧a̧ro̧da, jabechji̧ jabëdiärea̧ decjiari̧ goaji̧ri̧mi̧ dari̧ cjo̧ro̧ji̧ri̧pea̧a̧ro̧da yaba̧, ado Ütërë yo̧a̧ chja̧oeräpȩ cjo̧ro̧ji̧ri̧rȩ chiri ütërë cjo̧ro̧mi̧ dari̧ cjo̧ro̧ji̧ri̧pea̧a̧ro̧da’ quëna̧ jo̧rȩtaji̧ri̧pea̧nȩrȩ ca̧ oti̧, dibëa̧ chji̧rämo̧ jo̧rȩtaji̧ri̧rȩ, jabomo̧ goaeri̧ jo̧rȩtaji̧ri̧rȩ. Ado dëdë, goae tjamo̧täremȩde ca̧ oti̧, mȩnȩro̧ ja̧di dari̧ tjamo̧ri̧ cjo̧ro̧ji̧ri̧pea̧rä judicjȩ. Tjamo̧ davä. Mȩnȩro̧ peadëri ja̧ chiri ütëti̧mi̧ dari̧ tjamo̧ri̧ cjo̧ro̧ji̧ri̧pea̧rä judicjȩ, goae tjamo̧täremȩde. Chia chia, mȩnȩro̧ ja̧di dari̧ tjamo̧ri̧ cjo̧ro̧ji̧ri̧pea̧rä judicjȩ, pio a̧ro̧rȩborë chiri ütëti̧mi̧ dari̧ cjo̧ro̧täreji̧ri̧rea̧rȩ pio dibë nö̧ta. Tjamo̧ davä. A̧ro̧rȩ dibë a̧ra̧ano̧a̧ tara, Jechurë chjadüa̧ oa a̧ra̧ano̧a̧ tara, jabechji̧ pio a̧ro̧rȩborë tjamo̧ yo̧ji̧ri̧rȩ cjo̧ro̧täreji̧ri̧rea̧rȩ pio dibë nö̧ta. Ado ja̧di dari̧ cjo̧ro̧a̧rä judi, cjäri̧ marea̧rȩ, ji̧dë u̧i̧ goaeri̧ cjo̧ro̧täreji̧ri̧rea̧rȩ davä, a̧ro̧rȩ pio yoaiä cjo̧ro̧a̧ pio ju̧i̧iä.

⁹ Jabo cjäri̧ madiro̧ibe jabo. Chiri ütëti̧mi̧ dari̧ cjo̧ro̧ji̧ri̧ oa tjamo̧ri̧ dadë madiro̧ibe pumȩ judiro̧ jabo badë maea oa dadiro̧ibe ji̧dëri̧. Jabechji̧ Ütë tjamo̧ pio judi tänȩa̧ oaiä, a̧ro̧rȩ, Jechurë chjadüa̧ pio judiro̧ badëmi̧ dari̧ cjo̧ro̧ marea̧rȩ. A̧dë chjäte ba chiadë maearë cjo̧ro̧ji̧ri̧mi̧ dari̧ cjo̧ro̧rea̧rȩ, a̧dë chjäte goaedë maearë. Jabechji̧ o ji̧ri̧iä badë tjamo̧mi̧ dari̧ cjo̧ro̧rea̧rȩ pumȩ ba chiadë maearë. Jabechji̧ ja̧bo tänȩpea̧ maearë cjiami̧ dari̧ cjo̧ro̧rea̧rȩ. Tjamo̧ davä. Jachiri pio judiri acji jana̧ji̧ri̧ pio ji̧ri̧iä baë goa baäa̧ji̧ri̧mi̧ dari̧ cjiarea̧rȩ, ja̧bopea̧ maearë tutia̧ oa cjiaji̧ri̧mi̧ darë. Jabechji̧ ütëbodärärë darea̧mi̧ dari̧ ja̧bo tänȩpea̧ maearë tutia̧ oa cjiami̧ dari̧ cjo̧ro̧rea̧rȩ, a̧dëräpȩ cjiaji̧ri̧ mu̧i̧tjoi̧ pio judiro̧borë dari̧. Aja̧ ca̧ oti̧, Ütë tjamo̧ pio judi tänȩa̧ oa ja̧dimi̧ dari̧ cjo̧ro̧ baärea̧rȩ Jechurë chjadüa̧ pio judiro̧.

¹⁰ Jabechji̧ a̧ro̧rȩ Quiricho ja̧ oa ja̧bepaji̧ri̧rȩ cjo̧ro̧a̧ oaiä, ‘Aja̧, pumȩ japëtaraji̧ri̧diro̧da’ quëna̧ jo̧rȩtaji̧ri̧rȩ dadiro̧ibe pumȩ judiro̧. Jabo mȩnȩro̧, Cori̧tioräpȩ quëna̧ji̧ri̧ pio judiro̧ Quiricho pio judiri ja̧ji̧ri̧pea̧ tara, ‘jaeboa̧ro̧da, japëtaraji̧ri̧ pio judiro̧dëa̧ro̧da jabo a̧dë chjäte urëdi tjamo̧ oa jo̧rȩtarea̧ chiaa̧ro̧da’ quëna̧ jo̧rȩtanȩrȩ dibëa̧ chji̧rämo̧ quëna̧taji̧ri̧rȩ. Jabo a̧ro̧rȩ Quiricho pio ju̧i̧ ja̧ oa ja̧bepea̧ oaiä, cjäri̧ madiro̧ibe, ‘ju chiadë madiro̧da, ju baebaeami̧ dari̧ cjiadiro̧da, chjadëri̧ ja̧beparea̧ chiadë madiro̧da’ quëna̧ jo̧rȩtaji̧ri̧rȩ dadiro̧ibe o judiro̧. Jabo mȩnȩro̧, cjäri̧ manȩrȩ, tjaoëpai̧ dari̧ jo̧rȩtanȩrȩ pio dibë chjiari. ‘Aja̧, jabechji̧ ju chia tjamo̧ji̧ri̧rȩ cjo̧ro̧a̧ro̧da, dami̧ti̧ oa chjadëri̧ ja̧bepapai̧daa̧ro̧da’ quëna̧ jo̧rȩtaji̧ri̧rȩ cjo̧ro̧nȩrȩ, pio dibë chjiari goaeri̧ jo̧rȩtaji̧ri̧rȩ. Ado pumȩ judiro̧, dëdë, pio dibëiäpȩmo̧ ba chia dadiro̧dibe. Pio dibë chjiari chjacjiamȩri̧ ni̧bädirȩ, jabo pio ibë chjiari, cjäri̧ madiro̧ibe, badë dadiro̧ibe, ‘ba chiadë madiro̧da’ quëna̧ jo̧rȩtaji̧ri̧rȩ.

¹¹ Tjamo̧ davä. A̧ro̧rȩ, Quiricho pio ju̧i̧ ja̧ oa chjuari̧ ja̧bepariä cjo̧ro̧ oaiä, jabechji̧ peadëri ja̧ pio yaba̧mi̧rä yuro ji̧dë ma ta̧mȩcho̧ ja̧boji̧ri̧rȩ cjo̧ro̧rea̧rȩ. Ui ja̧boji̧ri̧rȩ cjo̧ro̧rea̧rȩ. Ado a̧ro̧rȩ chjadëri̧ ina̧ oa cjiatärea̧ ji̧, chjadëri̧ ina̧dëji̧ri̧rȩ cjo̧ro̧rea̧rȩ chjöchja ja̧bo tjamo̧ji̧ri̧rȩ. Ado pio ju̧i̧ uëri babui̧ra̧ bide cjaeädiro̧ibe ji̧dëri̧. Ado a̧ro̧rȩ ibëa̧ bërä chjadëri̧ cjo̧ro̧tärea̧ ji̧, jabechji̧ bë goadëji̧ri̧rȩ chjätäti̧ cjiarea̧rȩ.

¹² Ado ibëa̧ jurarea̧ oa gatëpea̧ oa, jabechji̧ ibëa̧ ichira̧ pio ju̧ri̧ra̧ järätäji̧ri̧rȩ ja̧bepe chjaorea̧rȩ uri̧ jäcjiaji̧ri̧rȩ. Jabo cjäri̧ madiro̧ibe, a̧ro̧rȩ pumȩ pio ji̧ri̧iäpȩmo̧ eami̧ chjai̧dë oa japadëräbo, jabechji̧ ya̧e chjaodiro̧ibe. Jabo ibë ya̧ea̧räbo, jabechji̧ ba dëbë ya̧dërea̧ro̧jȩrȩ, jabomo̧ goë cjo̧dërea̧rȩ pio ji̧ri̧ chjiari Ütë tjamo̧ pio ju̧i̧iä, judi pio ji̧ri̧iäpȩmo̧ chjadëri̧ a̧dotä. Aja̧ ca̧ oti̧, ja̧di dari̧ japarea̧rȩ. Ado danȩrȩ, o judiro̧ ibë conȩdarä, jabechji̧ ma̧ chjua jo̧rȩtaji̧ri̧rȩ chjuari̧ quëna̧rea̧ro̧jo̧ȩ Ütë tjamo̧ ju̧i̧ jaepeparea̧ decjiari̧.

¹³ Ado o judiro̧ pio ibë chjiari chjai̧dëri̧ ni̧bärä, jabechji̧ a̧ro̧rȩ pio ji̧ri̧iäpȩmo̧ goae tarari̧ ba dëbë ni̧bätärea̧ ji̧, jabechji̧ ma̧ȩ goae tjamo̧ra̧ pio ju̧ri̧ra̧ dëbë yo̧rea̧ro̧jȩrȩ. Ado danȩrȩ ca̧ oti̧, dai chirirä cjo̧ro̧ji̧ri̧ pio judiro̧, jabechji̧ china̧chjami̧ daji̧ri̧ oa cjoai̧tä cjoai̧tä dae chjaodiro̧ibe, cjäri̧dati̧mi̧ da maea oa. Ado pio ju̧i̧iä pumȩrȩ jura̧ duri pio ju̧i̧ aeno̧rea̧mi̧ daji̧ri̧ oa dae chjaodiro̧ibe, cjo̧dëräpȩ ju̧ri̧ aeno̧pea̧mi̧ da maea oa. Aja̧ ca̧ oti̧, ja̧di dari̧ jape chjaodiro̧ibe yaba̧mi̧rä no̧mȩ tjamo̧ri ja̧.

¹⁴ Jabo danȩrȩ ca̧ oti̧, pio dibë idëri̧ cjia tänȩpea̧ oa chi̧dëeadërequededibe jabo jabechji̧, ca̧ u̧ri̧mi̧ dapea̧ tara chi̧dëearequededibe, cüdë dibë ea tjamo̧ tara.

¹⁵ Jabechji̧ dibë chi̧dëeaji̧ri̧ pio judiro̧ ji̧ra̧ tjamo̧räbo, mȩnȩro̧ Quiricho pio ju̧i̧ ja̧ ma̧ȩrä chjadëri̧ cjo̧ro̧tä chi̧dëeaji̧ri̧ pio judiro̧ ji̧ra̧ tjamo̧räbo, jabechji̧ dibëa̧ ama̧i̧mi̧ damȩ judi cja̧rȩmȩ maeade. Ji̧ra̧dëdirȩ. Ado pio judirequede cüdë. Tjamo̧ davä. Dibëa̧ ama̧i̧mi̧ damȩ pio judirequede. Jabechji̧ mȩnȩro̧ Jechu Quiricho pio judiri ja̧ji̧ri̧pe baga̧ oaiä, jabechji̧ dibëa̧ ama̧i̧mi̧ dari̧ cjiadiärëremȩrequede. Jabechji̧ pio cüdë dibë ma̧ȩ chjadëi̧ pio ju̧i̧ a̧ra̧ano̧rërea̧ oaiä, mȩnȩro̧ pio coaiä quëna̧ji̧ri̧pea̧ oaiä, jabechji̧ dibëa̧ ama̧i̧mi̧ dari̧ cjiadiäa̧requede.

¹⁶ Ado pio ju̧i̧iä, cüdë dibëa̧ ama̧i̧mi̧ dapea̧ oaiä, jabechji̧ chi̧dëearequedediibe pio coa cho̧rëdiäpea̧ oa.

¹⁷ Ado ja̧di dari̧ cjo̧ro̧tä eamȩrȩ jabërä chjadürëremȩreconȩ ibëa̧ omȩ Timoteo pio ju̧i̧, judi dibë chjadëri̧ a̧dopea̧ oa pio coa cho̧rëdiäpea̧ ji̧. Jabechji̧ ea tjamo̧reconȩ Timoteo ju̧i̧. Peaja̧di ca̧ jami̧ dade. Jabechji̧ cüdë a̧ra̧ano̧a̧ oaiä peaja̧di quëna̧mȩpea̧dejȩ Jechu Quiricho pio ju̧i̧. Ado yaba̧ Ütërë yo̧a̧mi̧ japamȩde. Ütë tjamo̧ ja̧ ma̧ȩrä chjadëri̧ ja̧bepamȩde. Aja̧ ca̧ oti̧, pio ju̧i̧ jabërä chadürëremȩreconȩ. Ado judi pio dibëiäpȩ go̧düdäräa̧rä, jabechji̧ chjadëri̧ jo̧rȩta tänȩpadidibe davä cüdë coëma cjiari̧ cjo̧ro̧a̧ pio ju̧i̧ chjiari. Jabechji̧ Quiricho pio ju̧i̧ cho̧rëdiätämi̧ cjiaji̧ri̧ pio judiro̧, ‘Aja̧, ja̧di dari̧ cjo̧ro̧täreji̧ri̧a̧ro̧da, Pablo pio judimi̧ dari̧ cjo̧ro̧täreji̧ri̧a̧ro̧da’ quëna̧ jo̧rȩtapea̧ oa chjadëri̧ a̧ra̧ano̧padidibe. Ado danȩrȩ ca̧ oti̧, cüdë eami̧räpȩ järä, cüdë quëna̧ji̧ri̧ pio judiro̧ eami̧ a̧dopamȩräpȩ järä, jabechji̧ peaja̧di ta̧rëri̧ a̧ra̧ano̧requedejȩrȩ chiri oëra̧ti̧ oa cjo̧ro̧ji̧ri̧ oa.

¹⁸ Jabo mȩnȩro̧ orë, cjäri̧ manȩrȩ, dibëa̧ chji̧rämo̧ jo̧rȩtaji̧ri̧rȩ goaeri̧ yo̧nȩrȩ. “Cjäri̧ made. Pablo judi uapade. Ado judi uapa oaiä tjamo̧ri̧ goëdaera̧dëpadiibe. Tjamo̧ri̧ chi̧dëeadëpadiibe judi uapa tara” yo̧nȩrȩ.

¹⁹ Jabo cjäri̧ marequededibe ca̧ oti̧. Ütë tjamo̧ judi coa järea̧ yürürä judi, dëdë, jäparequede. Japamitë boi̧chji̧ chjätä ëte tjamo̧ri̧ goëde jäparequededibe. Ado cüdë pio ju̧ri̧pȩ go̧düdäräa̧rä, jabechji̧ jibëa̧ chji̧rämo̧ jo̧rȩtaji̧ri̧rȩ goaeri̧ ni̧bäji̧ri̧ pio ji̧ri̧ chjiari chjadëri̧ dabarea̧ daparequede. Chjadëri̧ ütarë ta̧rëparequede. Jabechji̧ judiro̧ tjamo̧ri̧ ni̧bä chjaorea̧ chiarä judi, Tjo tjamo̧ pio judiri ma̧na̧mȩ ju chiarea̧ra̧ pio ju̧ri̧ra̧ ni̧bärea̧ chiarä judi, tjamo̧ri̧ ütarë ta̧rërea̧ daparequede. Jabo cjäri̧ madirȩ, judiro̧ ju chiadëji̧ri̧rȩ ni̧bärä judi, ya maeara̧ jo̧rȩtaji̧ri̧rȩ ni̧bärä judi, jabechji̧ pio ji̧ri̧ chjiari tjamo̧ri̧ ütarë ta̧rërea̧ daparequede cüdë pio ju̧ri̧pȩ go̧düdäräa̧rä.

²⁰ Jabechji̧ Ütërë yo̧a̧ chja̧oerä tjamo̧ri̧ cjo̧ro̧mȩ judi, jabechji̧ tjaoëpai̧ dari̧ cjo̧ro̧rea̧ chiade Tjo tjamo̧ pio ju̧i̧iä. Jabechji̧ o judiro̧ ütarë darea̧mi̧ dari̧ chjadëri̧ na̧rȩriä cjo̧ro̧de Tjo tjamo̧ pio judiri ma̧na̧mȩ ju chiarea̧ra̧ cjo̧ro̧a̧ oaiä. Jabo ya maeara̧ goaeri̧ ni̧bärea̧mi̧dëde. Tjamo̧ davä. Ütërë yo̧a̧ chja̧oerä cjo̧ro̧rea̧ üdë, jabechji̧ ya maeara̧ goaeri̧ ni̧bärea̧mi̧dëde.

²¹ Ado ja̧di tara cüdë pio dibëiäpȩ järea̧ darä, ¿yö̧ta dari̧ japatä earenȩro̧coe? Dibë ya̧mȩmi̧ dari̧ goae tarari̧ chi̧dëeatä earenȩro̧coe? Jabo cjäri̧ marequededibe ca̧ oti̧, ja̧di dari̧ japadëri̧ cjiarequededibe. Jabechji̧ mȩnȩro̧ jabërä chjadëri̧ ano̧ mire jo̧rȩtarä judi, mȩnȩro̧ chjai̧dë pio ju̧i̧ putu jura̧ a̧dë chami̧ dari̧ jabërä ano̧ mire jo̧rȩtarä judi, jabechji̧ ma̧ chiadëri̧ cjia tjamo̧mȩrȩ dadärätäremȩrequededibe pio dibë cjäri̧ri̧ cjia damȩrȩ, bücjüi̧ idamȩmi̧ darë eamȩrȩ.