Cori̧tio Ma̧ȩ 1 3 - Biblia Pume

Quëna̧ji̧ri̧ pio judiro̧ Tjo tjamo̧rȩ chi̧dëea̧ chja̧oerä cjo̧ro̧tärea̧ ji̧, jadüchiami̧ bubami̧ dari̧ cjo̧ro̧rëreji̧ri̧dirȩ

¹ Jabo cjäri̧ marequededibe ca̧ oti̧, cüdë dibëa̧ chjarerä cjo̧ro̧rërea̧ ji̧, chjadëri̧ a̧ra̧ano̧rea̧ dadërëremȩrequededibe. Jabechji̧ mȩnȩro̧ Tjo tjamo̧ pio judiri ja̧ a̧ra̧ano̧rea̧ oa chjadëri̧ ta̧rë ja̧botärea̧ ji̧, ta̧rë ja̧bodëa̧nȩrȩ. Mȩnȩro̧ Tjo tjamo̧rȩ chi̧dëea̧ chja̧oerä cjo̧ro̧tärea̧ ji̧, dibëa̧ icjararä chjai̧dërë chi̧dëea̧ chja̧oerä cjo̧ro̧rëreji̧ri̧nȩrȩ. Ado pio ju̧i̧iä chjadëri̧ a̧ra̧ano̧rea̧ dadëa̧requededibe. Jabechji̧ mȩnȩro̧ Quiricho pio judiri ja̧ji̧ri̧pea̧räbo, cjäri̧ manȩrȩ, pea nö̧ria̧ oa cjiaji̧ri̧mi̧ dari̧ cjiarëreji̧ri̧nȩrȩ. Ju baebaeami̧ dari̧ cjo̧ro̧rëreji̧ri̧renȩrȩ. Ado pio ju̧i̧iä chjadëri̧ a̧ra̧ano̧rea̧ dadëa̧requededibe.

² Jabechji̧ go̧a̧ chocomi̧ da oa yürütärea̧ ji̧, yö̧cö uimi̧ da maea oa yürürëremȩrequededibe jabë bori̧mi̧ da tara. Ado yaba̧ japamitë ana̧ chjätä ëte, jabë pjärämȩnȩrȩ. Jabechji̧ mȩnȩro̧ ji̧dë u̧i̧ na̧e chiape jätärea̧ ji̧, cjäri̧ manȩrȩ, jabë bori̧mi̧ danȩrȩ.

³ Tjamo̧ davä. Jabechji̧ jabënȩrȩ. Dibëa̧ icjararä chjai̧dërë chi̧dëea̧ chja̧oerä jabë cjo̧ro̧nȩrȩ. Ado pio ju̧i̧iä jabechji̧, ütëchjai̧pe jämi̧ dari̧ cjiadënȩrȩ. Pio ju̧i̧iäji̧ri̧rȩ dibëa̧ dëbëti̧ra̧ chia goëdëri̧ cjiaji̧ri̧rȩ ma̧ȩ goaedëra̧ dëbë ni̧bätanȩrȩ. Ado mȩnȩro̧ goadëji̧ri̧rȩ cjo̧ro̧a̧ oaiä, cjäri̧ marenȩro̧jȩrȩ, goaji̧ri̧ pio ji̧ri̧iäpȩmo̧ goadi ërecjiarenȩro̧jȩrȩ. Ado mȩnȩro̧ ja̧di dari̧ cjo̧ro̧a̧ oaiä, jabechji̧ chjadë maearä cjiami̧ dari̧ na̧rȩnȩrȩ mȩnȩro̧ chjai̧dëri̧ cjo̧ro̧a̧ pio ju̧i̧ chjiari, dibëa̧ icjararä chjai̧dërë chi̧dëea̧ chja̧oerä cjo̧ro̧pea̧ pio ju̧i̧ chjiari. Jabechji̧ mȩnȩro̧ tjaoëpai̧ dari̧ cjo̧ro̧tärea̧ ji̧, jabomo̧ dai chirirä cjo̧ro̧ji̧ri̧ pio judiro̧mi̧ dari̧ cjo̧ro̧nȩrȩ, dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧mi̧ dari̧, Tjo tjamo̧ pio ju̧i̧ chiadëji̧ri̧ pio judiro̧mi̧ dari̧.

⁴ Jabechji̧ mȩnȩro̧ cja̧rȩmȩ chji̧ chiami̧ dari̧ jo̧rȩtatärea̧ ji̧, jadüchiami̧ chji̧mi̧ dari̧ jo̧rȩtaji̧ri̧rȩ cjo̧ro̧nȩrȩ. Jabechji̧ o judiro̧, "Aja̧, Pablo pio ju̧i̧mo̧i̧ cho̧rëdiätämi̧ cjiarea̧rȩ," yo̧vedirȩ. Ado o judiro̧, "Aja̧, Aporo pio judimo̧rȩ cho̧rëdiäpea̧de," yo̧vedirȩ. Jabo cjäri̧ manȩrȩ ca̧ oti̧, ma̧i̧ dari̧ japanȩrȩ. Dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧mi̧ dari̧ cjo̧ro̧nȩrȩ.

⁵ Jabo coëma cjiari̧ jo̧rȩtachji̧vä ca̧ oti̧. Danȩrȩ, ¿chjia tjamo̧de Aporo judi? Ado Pablo judi, ¿chjia tjamo̧de? Cjäri̧ marea̧rȩ, jabomo̧ mu̧i̧tjoi̧rea̧rȩ. Ado pio ibëiä, Ütë tjamo̧ ja̧ mu̧i̧tjoi̧ pio ji̧ri̧iä ma̧ȩ chjadëi̧ oa ta̧rë ëte, quëna̧ji̧ri̧pea̧nȩrȩ. Jabechji̧ judi ibë yürüa̧ ja̧beparea̧ pio ju̧i̧mo̧i̧ ja̧beparëreji̧ri̧rea̧rȩ.

⁶ Danȩrȩ, tjadoro ja̧bepaji̧ri̧mi̧ dari̧ a̧ra̧ano̧rëreji̧ri̧rea̧ro̧dibe. Cüdë cho oa ponȩmȩmi̧ dari̧ tarupë a̧ra̧ano̧rëremȩrequededibe Ütë tjamo̧ ja̧ ma̧ȩ oa. Ado ji̧dë duri oa, Aporo pio judi uira̧ cjarämȩmi̧ dari̧ a̧de a̧ra̧ano̧rëremȩdidibe. Ja̧dimi̧ dari̧ ja̧beparëreji̧ri̧rea̧rȩ jabomo̧ mu̧i̧tjoi̧ maearë, ba chia tjamo̧dë maearë. Jabechji̧ Ütë tjamo̧ pio judide buiu tänȩmi̧ dari̧ japamȩ judi, a̧ro̧rȩdë.

⁷ Jabechji̧ tjamo̧ ja̧bepamȩ judi Ütë tjamo̧ pio judide. Jabechji̧ ponȩmȩmi̧ dari̧ a̧ra̧ano̧mȩ judi buiu tänȩrea̧ chiadëde. Ado uira̧ cjarämȩmi̧ dari̧ a̧ra̧ano̧mȩ judi peaja̧di cjitë tänȩrea̧ chiadëde. Jabo Ütë tjamo̧ pio judimo̧rȩ buiu tänȩrea̧ chiade. Pio judimo̧rȩ cjitë tänȩrea̧ chiade. Jabechji̧ ba chia tjamo̧mȩ pio judide, a̧ro̧rȩdë.

⁸ Jabo cho oa ponȩmȩmi̧ dari̧ a̧ra̧ano̧mȩ pio judi, ado uira̧ cjarämȩmi̧ dari̧ a̧ra̧ano̧mȩ pio judi, jabechji̧ mu̧i̧tjoi̧ maearë ji̧mo̧ ja̧bepadirȩ. Ji̧mo̧ ja̧bepadirȩ cja̧rȩmȩ jo̧rȩtarea̧ maea oa jo̧rȩtaji̧ri̧rȩ. Ado jënȩro̧ ja̧bepea̧ ba oa, jabechji̧ ba ano̧a̧ oa cjiapadirȩ.

⁹ Jabechji̧ Ütë tjamo̧ pio ju̧i̧ nö̧ta ja̧bepaji̧ri̧rȩ a̧ra̧ano̧rea̧rȩ pio ju̧i̧ ja̧ jadümi̧ darë. Ado mȩnȩro̧, jabechji̧ Ütë tjamo̧ ja̧ tjadümi̧ danȩrȩ. Ado a̧ro̧rȩ pio ju̧i̧ nö̧ta ja̧bepaji̧ri̧rȩ a̧ra̧ano̧rea̧ro̧dibe tjado ja̧bepaji̧ri̧mi̧ darë. Ado peaja̧di Ütë tjamo̧ ja̧ bëmi̧ danȩrȩ. Ado pio ju̧i̧ nö̧ta ja̧bepaji̧ri̧rȩ bë cji̧däji̧ri̧mi̧ darë a̧ra̧ano̧rea̧ro̧dibe. Ado pio ju̧i̧iä yo̧requededibe ca̧ oti̧. Aro̧rȩ Ütë tjamo̧ pio judi yürüa̧ oa jadü maearë ja̧bepa tara, jabechji̧ oëra̧ jo̧rȩtadëtäreji̧ri̧nȩrȩ pio ibë chjiari. ‘Aja̧, pio jiro a̧ra̧ano̧mȩ judi o pio ji̧ri̧iä ji̧dë u̧i̧ ba chia jirodida, pio ju̧i̧mo̧i̧ cho̧rëdiäpacuni̧da’ quëna̧ jo̧rȩtadë matäreji̧ri̧renȩro̧ibe.

¹⁰ Danȩrȩ ca̧ oti̧, cüdë dibë pearä a̧ra̧ano̧a̧rä, jabechji̧ Ütë tjamo̧ judi pio coaiäpȩmo̧ cjäri̧ri̧ cjiamȩrȩ yürüa̧ oaiä, bë oa cji̧däpea̧ ji̧ tjamo̧ri̧ dabamȩmi̧ dari̧ a̧ra̧ano̧rëremȩrequededibe, taru a̧rȩmȩ chjua tjamo̧ oa cji̧dämȩmi̧ dari̧. Tjamo̧ davä. Bëmi̧ da üdë chjua tjamo̧ri̧ cjiapea̧ oa, jaejaea cjiami̧ dari̧ cjiachea oa, ja̧dimi̧ dari̧ ütara̧mi̧ a̧ra̧ano̧rëremȩrequededibe taru a̧rȩmȩ chjua tjamo̧ oa cji̧dämȩmi̧ dari̧. Ado cüdë a̧ra̧ano̧a̧ duri oa ano̧ mire a̧ra̧ano̧paji̧ri̧ pio judiro̧, cüdë a̧ra̧ano̧a̧ uëmo̧i̧ ano̧ mire a̧ra̧ano̧paji̧ri̧ pio judiro̧, jabechji̧ taru a̧rȩmȩmi̧ da uëmo̧ a̧ra̧ano̧pea̧ chiadirȩ. Jabo danȩrȩ, na̧e chia tjamo̧täreji̧ri̧dirȩ chjadëri̧ ano̧ mire ja̧bepapea̧ oa, badë maeara̧ ja̧bepachea oa.

¹¹ Jabechji̧ cja̧rȩmȩ maeade taru a̧rȩmȩmi̧ da üdë. Ado Jechu Quiricho pio judide. Ado cüdë dibë Quiricho pio ju̧i̧ chjiari a̧ra̧ano̧rërea̧ oaiä, jabechji̧ taru a̧rȩmȩ pio ju̧i̧ cji̧dämȩmi̧ dari̧ a̧ra̧ano̧rëremȩrequededibe, taru a̧rȩmȩ tjamo̧mi̧ damȩ pio ju̧i̧ chjiari. Aja̧, pio jiro taru a̧rȩmȩmi̧ darämo̧ ano̧ mire cji̧därea̧mi̧ dade. Jabechji̧ ado cja̧rȩmo̧ taru a̧rȩmȩmi̧ darä ano̧ mire cji̧därea̧mi̧dëde. Jabechji̧ cja̧rȩmȩ maeade, ado judiri decjiade. Ado pio jiro taru a̧rȩmȩmi̧ da̧ ju̧i̧iämo̧i̧ chjuari̧ cjiami̧ dari̧ cjiapade bëmi̧ da üdë. Ado pio ju̧i̧iä pio ju̧i̧ uëmo̧ ja̧bepapea̧ maeade.

¹² Jabo danȩrȩ ca̧ oti̧, taru a̧rȩmȩrä ano̧ mire ja̧bepapaji̧ri̧ pio judiro̧, jabechji̧ cja̧rȩmȩ maeara̧ ja̧bepadëpadirȩ, jabo ji̧ra̧ra̧ ja̧bepapai̧ dadirȩ. Jabechji̧ o judiro̧ ba chia tjamo̧ra̧ pio ju̧ri̧ra̧ ja̧bepapadirȩ tüe baärea̧mi̧dë maeara̧, chjua tjamo̧ra̧. Tjamo̧ davä. Oromi̧ dara̧ pio ju̧ri̧ra̧, ado paratami̧ dara̧ pio ju̧ri̧ra̧, ado ta̧dë ba chiami̧ dara̧ pio ju̧ri̧ra̧ ja̧bepapadirȩ a̧dërimȩ jo̧rȩtarea̧ra̧ jo̧rȩtaji̧ri̧rȩ. Jabo o judiro̧ ba chiara̧ ja̧bepatärea̧ ji̧, cjäri̧ madirȩ, ba chiadëmi̧ dara̧ ja̧bepapadirȩ tüe baäa̧ oa cjiapai̧ damȩra̧ pio ju̧ri̧ra̧, chjua tjamo̧dëra̧ pio ju̧ri̧ra̧. Tjamo̧ davä. Tjo̧ro̧mi̧ dara̧ pio ju̧ri̧ra̧, cärämi̧ dara̧ pio ju̧ri̧ra̧, ado udimi̧ dara̧ pio ju̧ri̧ra̧ ja̧bepapadirȩ, dai chirirä ja̧ jo̧rȩtarea̧ra̧ pio ju̧ri̧ra̧ jo̧rȩtaji̧ri̧rȩ.

¹³ Jabo ibë ütëbo oa ütarapea̧ doro, jabechji̧ a̧ro̧rȩ Ütë tjamo̧ ja̧ oa ja̧bepea̧ pio ju̧i̧ ütara̧ oa cjiapade cjo̧dëra̧ pio ju̧ri̧ra̧. Ado a̧ro̧rȩ chjadëri̧ ja̧bepea̧rä judi, a̧ro̧rȩ ba chiara̧ pio ju̧ri̧ra̧ ja̧bepea̧rä judi, jabechji̧ tüe chjätäpade ba chia maearë cjiadiäri̧. Jabo a̧ro̧rȩ chjadëri̧ ja̧bepadëa̧rä judi, jabo badë maeara̧ ja̧bepea̧rä judi, jabechji̧ chjadëri̧ tüe chjätätärea̧ ji̧, tüe baäpade cjiadiädëri̧.

¹⁴ Pumȩ judi ja̧bepea̧ üdë ba chia maearë cjiadiärä judi, judi taru a̧rȩmȩmi̧ darä ja̧bepea̧ üdë chjadëri̧ cjiadiärä judi, jabechji̧ chjadëri̧ ba ano̧a̧ oa cjiapade.

¹⁵ Jabo pumȩ judi ja̧bepea̧ üdë ba chia maearë cjiadiädë marä judi, jënȩ ja̧bepea̧ üdë baë tüe baäa̧ oa cjia marä judi, cjäri̧ made, chjätärea̧ damȩborë mö̧na̧mȩrȩ cjiadiäpade ja̧bepadëmȩmi̧ dari̧. Jabechji̧ judi chjätärea̧ damȩborë ja̧bepadëmȩmi̧ dari̧ cjiadiäpade. Ado pio ju̧i̧iiä ba ano̧a̧ oa cjiadëpade. Jabechji̧ ma̧i̧ dari̧ tüe baämȩ jo̧ tjori pio judiri go̧dümȩmi̧ dari̧ cjiadiäpade badë maeara̧ ja̧bepea̧ oaiä. Jabo tüe chjätämȩmi̧ dari̧ chjadëri̧ chjätärea̧ dapade.

¹⁶ Jabo danȩrȩ ca̧ oti̧, ¿pio dibë chjiari tjamo̧ri̧ dabadënȩrȩ? Danȩrȩ, Ütë tjamo̧ pio ju̧i̧ ja̧ Tjo üdë dibëa̧ icjararä bëpera̧pea̧de. Tjamo̧ davä, bëpera̧pea̧didibe quëna̧ji̧ri̧ pio ji̧ri̧. Ado pio ju̧i̧iä Cori̧tioräpȩ a̧dopaji̧ri̧ pio judiro̧ Ütë tjamo̧ ja̧ bëmi̧ danȩrȩ. Tjamo̧ davä. Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ bëmi̧ danȩrȩ.

¹⁷ Ado pio ju̧i̧iä eami̧ pumȩ üdë pio ju̧i̧ ja̧ bëmi̧ da pio ju̧i̧ cja̧ri̧daparȩmi̧ dari̧ japarä judi, bape chjaopadejȩ. Jabechji̧ Ütë tjamo̧ ja̧ bëmi̧ da üdë pio ju̧i̧ ja̧de. Ado pio ju̧i̧ ja̧ tara, jabechji̧ a̧dë chjäte china̧chjari̧ tutia̧ oa cjiade pio ju̧i̧ ja̧ maea oa. Ado pio ju̧i̧iä jabechji̧ cjari̧daparȩmi̧ dari̧ japadëpea̧de.

¹⁸ U̧i̧pea̧ oa cjiadëchji̧vä mȩnȩro̧ dabapea̧ ma̧ȩ pio ju̧i̧ chjiari. Pio yoa chirirä ja̧ jo̧rȩtarea̧ ji̧ra̧ tjamo̧ oa dabapea̧ oaiä, u̧i̧pea̧ oa cjiadëchji̧vä. Ado pio ju̧i̧iä yo̧requededibe ca̧ oti̧. Danȩrȩ, mȩnȩro̧ pio yoa chirirä ja̧ jo̧rȩtarea̧ ji̧ra̧ tjamo̧ oa dabapea̧rä judi, mȩnȩro̧ dai chirirä ja̧ jo̧rȩtaji̧ri̧ pio ji̧ri̧iä ji̧dë u̧i̧ dabapea̧rä judi, jabechji̧ pio ji̧ri̧iä tjamo̧ri̧ dabadëji̧ri̧pe bagami̧ dari̧ poë ae jo̧rȩtatäreji̧ri̧nȩrȩ ca̧ oti̧ badë jo̧rȩtarea̧ pio ju̧i̧. Tjamo̧ davä. Poë ae jo̧rȩtatäreji̧ri̧nȩrȩ mȩnȩro̧ a̧dë chjäte ba chiamȩ jo̧rȩtarea̧ra̧ pio ju̧ri̧ra̧ ano̧ mire jo̧rȩtapea̧ oa, mȩnȩro̧ Ütë tjamo̧ pio judiri ma̧na̧mȩ jo̧rȩtarea̧ maeara̧ ano̧ mire jo̧rȩtapea̧ oa, no̧mȩ ja̧ jo̧rȩtarea̧ pio ju̧i̧ boë cjaeä jo̧rȩtapea̧ oa.

¹⁹ Jabechji̧ dai chirirä ja̧ jo̧rȩtarea̧ üdë badë maeade Ütë tjamo̧ pio ju̧i̧iä. Ado pio ju̧i̧iä teracaba maeade. Ado danȩrȩ, cüdë dibë pea yo̧a̧ üdë ji̧mo̧ baäde Ütë tjamo̧ judi no̧mȩ tjamo̧ri ja̧ go̧ȩpa tänȩrërea̧ ma̧ȩ pio ju̧i̧ nö̧ta. Danȩrȩ, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä: “’Tjamo̧ri̧ dabarea̧ chiaquëda, ado cja̧rȩmo̧ ju̧i̧iä dabaparea̧mi̧dëquëda’ quëna̧ji̧ri̧ pio judiro̧, jabechji̧ jënȩro̧ oëra̧ jo̧rȩta̧ oaiä puërä choë cjatäa̧ oa cjiami̧ dari̧ cjiadiäpadirȩ Ütë tjamo̧ pio judi tänȩa̧ oaiä.”

²⁰ Ado danȩrȩ ca̧ oti̧, pio yoa ma̧ȩbo a̧de go̧ȩpea̧ oa cjiarëremȩde. Ta̧rëchji̧vä: “Ütë tjamo̧ judi cjacjarë daba dae chjaodejȩrȩ pumȩ ji̧ri̧. Tjamo̧ davä. ‘Tjamo̧ri̧ dabarea̧ chiaquëda’ quëna̧ji̧ri̧ pio ji̧ri̧ chjiari tjamo̧ri̧ dabade. Jabechji̧ pio judiro̧ jo̧rȩta̧ üdë ‘badë madida’ quëna̧ jo̧rȩtamȩrȩ cjacjarë dae chjaodejȩrȩ Ütë tjamo̧ judi.” Aja̧, ja̧di ta̧rëri̧ go̧ȩpea̧ oa cjiade ca̧ oti̧.

^21-22 Ado ja̧di tara, Ütë tjamo̧ judi pumȩ ja̧ chji̧räpȩmo̧ cjacjarë damȩ tara, jabechji̧ oëra̧ jo̧rȩtadëtäreji̧ri̧nȩrȩ pio ibë chjiari, dibë a̧ra̧ano̧ji̧ri̧ pio ji̧ri̧ chjiari. Ado pio ibë chjiari goaeri̧ ni̧bädëtäreji̧ri̧nȩrȩ peaja̧di. “Aja̧, pio ju̧i̧mo̧i̧ cho̧rëdiätämi̧ cjiareconȩ. Pio ju̧i̧mo̧i̧ ta̧rë ja̧bopareconȩ” yo̧dë matäreji̧ri̧nȩrȩ. Tjamo̧ davä. Pio coa chjiari, Aporo pio ju̧i̧ chjiari, ado Pedro pio ju̧i̧ chjiari, cjäri̧ manȩrȩ, ja̧di ta̧rëri̧ ni̧bä chjaodë matäreji̧ri̧nȩrȩ. Danȩrȩ, Ütë tjamo̧ pio judimo̧rȩ yürüa̧ oa a̧ra̧ano̧rea̧ro̧dibe. Ado pio ju̧i̧ ja̧ mu̧i̧tjoi̧ maearë ji̧mo̧ ja̧beparea̧rȩ pio dibëa̧ oa, cja̧rȩmȩ chji̧ chiami̧ dari̧. Tjamo̧ davä. Ütë tjamo̧ judi dibëa̧ pio ju̧i̧ ja̧bepa tänȩa̧ oaiä, ji̧mo̧ ja̧beparea̧rȩ dibë chjadëri̧ a̧dopea̧ oa. Jabechji̧ pio dibëa̧ oa ja̧bepapea̧ oa yürürëremȩdiibe Ütë tjamo̧ judi pio dibëiäpȩmo̧. Dibëa̧pe bagami̧ dari̧ cjiadiäa̧rea̧rȩ. Jabo pio a̧ro̧rȩmo̧rȩdë, jabo chjö̧na̧i̧ oa yürürëremȩdidibe ca̧ oti̧. Danȩrȩ, dai chirirä ja̧ üdë, dai chirirä ja̧ cjo̧ro̧pea̧ üdë, ado dai chiri oa a̧dë ja̧bopea̧ üdë, ado mȩnȩro̧ pio yaba̧mi̧rä eami̧ oa chjätäa̧ üdë, ado mȩnȩro̧ ji̧dë duri oa eami̧ oa chjätäpea̧ üdë, jabechji̧ pio mȩnȩro̧ chjadëri̧ a̧doa̧ oa cjiapea̧ oa yürürëremȩde Ütë tjamo̧ judi.

²³ Ado pio ju̧i̧iä Quiricho pio chjiarimo̧i̧ goaeri̧ ni̧bätäreji̧ri̧nȩrȩ ca̧ oti̧. Tjamo̧ davä. Dibë a̧ra̧ano̧ji̧ri̧ pio ji̧ri̧ chjiari goaeri̧ ni̧bädëtäreji̧ri̧nȩrȩ, jabo Quiricho pio ju̧i̧ chjiarimo̧i̧ goaeri̧ ni̧bätäreji̧ri̧nȩrȩ, mȩnȩro̧ pio ju̧i̧ ja̧pea̧ tara. Ado Quiricho judi Ütë tjamo̧ pio ju̧i̧ ja̧de.