Cori̧tio Ma̧ȩ 1 2 - Biblia Pume

Tjo tjamo̧ pio ju̧i̧iä to̧bari̧ cjiamȩrȩ a̧ra̧ano̧rëremȩde Pablo judi Quiricho pio ju̧i̧ chjiari ma̧ȩ oa.

¹ Danȩrȩ ca̧ oti̧, cüdë pio dibëiäpȩ Ütë tjamo̧ ja̧ ma̧ȩ oa a̧ra̧ano̧pea̧ oa pearä järërea̧ ji̧, goadia̧ oa cjiarërea̧ ma̧ȩ pio ju̧i̧ a̧ra̧ano̧pea̧ oa pearä järërea̧ ji̧, jabechji̧ tjamo̧ dabaji̧ri̧ ja̧ ma̧ȩra̧ pio ju̧ri̧ra̧ a̧ra̧ano̧dërëremȩrequededibe. Ji̧ra̧ri̧ dabapea̧ji̧ri̧ ja̧ ma̧ȩra̧ pio ju̧ri̧ra̧ a̧ra̧ano̧dëa̧requededibe.

² Jabechji̧ cüdë pio dibëiäpȩ jabë jädëa̧rä, ja̧di dari̧ jo̧rȩtarëremȩrequede. ‘Aja̧, cüdë pio ji̧ri̧iäpȩ järä, jabechji̧ badë oa ni̧bä chjaodëpaquiji̧ri̧da, jabo ba chia maea oa ni̧bä chjaopaquiji̧ri̧da, Jechu Quiricho pio ju̧i̧ chjiari ma̧ȩ maea oa ni̧bä chjaopaquiji̧ri̧da, toro cji̧de ja̧bo tänȩa̧ pio ju̧i̧ chjiari ni̧bä chjaopaquiji̧ri̧da’ quëna̧ jo̧rȩtarëremȩrequede, cüdë pio dibëiäpȩ jabë jädëa̧rä.

³ Ado ja̧dëa ji̧ cüdë pio dibëiäpȩ go̧düdäräa̧rä, jabechji̧ bücjüri̧ cjia tjamo̧mȩrȩ a̧ra̧ano̧rëremȩrequededibe ju chiadëmȩmi̧ darë. ‘Jabechji̧ nö̧tadëquëda, ca̧ ju chiarea̧ra̧ a̧ra̧ano̧rea̧mi̧dëquëda, ado Ütë tjamo̧ judi coa yürüa̧ ja̧beparea̧ pio ju̧i̧ chjadëri̧ ja̧bepadärärea̧ dadaemȩ jirocuni̧da, jabechji̧ ma̧ȩ ta̧rë ëte jiadapai̧dadiro̧da’ quëna̧ jo̧rȩtamȩrȩ bücjüri̧ cjia tjamo̧rëremȩrequede ca̧ oti̧. Ja̧di tara cüdë pio dibëiäpȩ go̧düdäräa̧rä, jabechji̧ jana̧ jana̧ cjiami̧ tarari̧ jape chjaorëremȩdique ca̧ chji̧ üdë. Ado i ma̧na̧ gura cjiami̧ tarari̧ cjiarëremȩdique.

⁴ Ado danȩrȩ, cüdë dibë a̧ra̧ano̧rërea̧ ji̧, jabechji̧ goaeri̧ gari̧pe gari̧pe a̧ra̧ano̧dëa̧requededibe. Dai chirirä ja̧ dabarea̧ra̧ pio ju̧ri̧ra̧ a̧ra̧ano̧dëa̧requededibe, jabo Tjo tjamo̧ ja̧ jauëchja pio ju̧i̧iä ja̧ȩ cjiami̧ dari̧ cjiamȩrȩ a̧ra̧ano̧rëremȩrequededibe, ca̧ ju chiarea̧dë maeara̧.

⁵ Jabechji̧ mȩnȩro̧ dai chirirä ja̧ ma̧ȩ pio ju̧i̧iä ja̧ȩ cjiami̧ dari̧ quëna̧chea oa, cüdë dibë goaeri̧ ni̧bä chjaoa̧ pio ju̧i̧iä ja̧ȩ cjiami̧ dari̧ quëna̧chea oa, jabechji̧ ja̧di dari̧ a̧ra̧ano̧rëremȩrequededibe, mȩnȩro̧ Ütë tjamo̧ ja̧ jauëchja pio ju̧i̧iämo̧i̧ ja̧ȩ cjiami̧ dari̧ quëna̧pea̧ oa.

⁶ Jabo a̧ro̧rȩ a̧dë chjäte dabarea̧ra̧ pio ju̧ri̧ra̧ ni̧bädë ma ja̧didë. Ni̧bärea̧ro̧jo̧ȩ. Jabechji̧ a̧ro̧rȩ üi̧padärämi̧ dari̧ cjo̧ro̧ji̧ri̧ pio ji̧ri̧ a̧ra̧ano̧rä, na̧e chia tjamo̧pe baga̧ji̧ri̧ pio ji̧ri̧ a̧ra̧ano̧rä, dëdë, a̧dë chjäte dabarea̧ra̧ pio ju̧ri̧ra̧ ni̧bä chjaorea̧ro̧jȩrȩ. Tjamo̧ davä. A̧dëri pio judiri ma̧na̧mȩ dabarea̧ra̧ a̧ra̧ano̧rea̧ro̧jȩrȩ. Jabo dai chirirä ja̧ dabarea̧ ma̧ȩra̧ pio ju̧ri̧ra̧, cjäri̧ marea̧ro̧jȩrȩ, pio jiro dabarea̧ra̧ a̧ra̧ano̧dë marea̧ro̧jȩrȩ. ¿Jabo yö̧ta dari̧ jo̧rȩtarenȩro̧ibe mȩnȩro̧? ‘Dai chiri oa tjamo̧ yo̧ji̧ri̧ ja̧ ma̧ȩra̧ pio ju̧ri̧ra̧ a̧ra̧ano̧ jirodiro̧ibëda’ ¿quëna̧renȩro̧ibe? Cjäri̧ marea̧ro̧dibe ca̧ oti̧. Pio ji̧ri̧ ja̧ ma̧ȩra̧ a̧ra̧ano̧rea̧mi̧dëde. Jabechji̧ pio judiro̧ goarijäpadirȩ. Tjamo̧ davä. Tjamo̧ cjo̧ro̧ji̧ri̧ pio judiro̧ goarijäpadirȩ. Ado judiro̧ goarijäpa tara, jabechji̧ pio ji̧ri̧ ja̧ ma̧ȩra̧ a̧ra̧ano̧rea̧mi̧dëde.

⁷ Jabo danȩrȩ, Ütë tjamo̧ pio judiri ma̧na̧mȩ dabarea̧ pio ju̧i̧ a̧ra̧ano̧rea̧ro̧dibe, goadia̧ oa cjiarëremȩ ma̧ȩ pio ju̧i̧, pumȩrȩ jibëa̧ ma̧na̧ri̧ dabaparea̧mi̧dërërea̧ ma̧ȩ pio ju̧i̧. Jabechji̧ Ütë tjamo̧ judi pearä ütarë jo̧rȩtarërea̧mi̧, jënȩ dabu oa jabë pareapadëa̧rä ütarë jo̧rȩtarërea̧mi̧ a̧ra̧ano̧rea̧ro̧dibe ca̧ oti̧. Tjamo̧ davä. A̧ro̧rȩ ütëborë Ütë tjamo̧ pio ju̧i̧ nö̧ta bucho ana̧ ëba cjiapea̧ pio ju̧i̧ chjiari ma̧ȩ oa a̧ra̧ano̧rea̧ro̧dibe, a̧ro̧rȩ a̧dë chjäte tatari̧ cjiamȩ pio ju̧i̧ nö̧ta bucho ana̧ cjo̧ro̧pea̧ pio ju̧i̧ chjiari ma̧ȩ oa.

⁸ Jabo cjäri̧ madirȩ, pio yoa chiri oa tjamo̧ yo̧ji̧ri̧ pio judiro̧ pio jiro ma̧ȩ oa tjamo̧ri̧ dabadërëreji̧ri̧diro̧jo̧ȩ. Ütë tjamo̧ judi pearä ütarë jo̧rȩtarërea̧ pio ju̧i̧ chjiari tjamo̧ri̧ dabadërëreji̧ri̧diro̧jo̧ȩ. Jabechji̧ tjamo̧ri̧ daba̧rä judi, a̧dë chjäte jauëchjamȩ pio ju̧i̧ toro cji̧de ja̧bo tänȩdëa̧täreji̧ri̧diro̧jo̧ȩ judiro̧. Tjamo̧ davä. ‘Pio judidida’ quëna̧ daba̧rä judi, jabechji̧ ibëa̧ Ano̧mȩ pio ju̧i̧ toro cji̧de ja̧bo tänȩdëa̧täreji̧ri̧diro̧jo̧ȩ.

⁹ Danȩrȩ, pearä judi goadia̧ oa cjiarërea̧ ma̧ȩ pio judi ji̧mo̧ baäde Ütë tjamo̧ judi jabërä ma̧ȩ yürürërea̧ pio ju̧i̧ nö̧ta. Ja̧di ta̧rëri̧ baäde go̧ȩpea̧ oa cjiarërea̧ ma̧ȩ üdë. Ta̧rëchji̧vä: “Danȩrȩ, Ütë tjamo̧ judi goae tjamo̧ oa jëdano̧rërea̧ pio ju̧i̧ goade. Tjamo̧ davä. A̧dë chjäte chjadë pio ju̧i̧ jëdano̧a̧ oa goade. Ado jënȩ jëdano̧a̧ pio ju̧i̧ goë boeadejȩ yaba̧ pio jȩaiäpȩmo̧ ea tjamo̧ji̧ri̧ ja̧ oa. Jabo cjäri̧ madiro̧jo̧ȩ jabo, Ütë tjamo̧ judi goë boea̧ pio ju̧i̧ chjiari dabadë madirȩ pumȩ judiro̧. Judi goë boea̧ pio ju̧i̧ cja̧rȩmȩ co dadërëreji̧ri̧diro̧jo̧ȩ. Ado pio ju̧i̧ chjiari jibëa̧ ta̧ra̧ puëra̧ pio ju̧ri̧ra̧ cja̧rȩmȩ co ta̧rëdë marëreji̧ri̧dirȩ. Ado pio ju̧i̧ chjiari jibëa̧ chji̧ra̧ peaja̧di cja̧rȩmȩ co dabadë marëreji̧ri̧dirȩ. Tjamo̧ davä, judi goë boea̧ pio ju̧i̧ dabadë marëreji̧ri̧dirȩ jabo dëdë, goë boea̧ oa goadejȩ Ütë tjamo̧ judi pio jȩaiäpȩmo̧ ea tjamo̧ji̧ri̧ ja̧ oa.” Aja̧, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ judi goë boea̧ oa goa̧ pio ju̧i̧ chjiari ma̧ȩ üdë.

¹⁰ Jabo danȩrȩ ca̧ oti̧, goadia̧ oa cjiarërea̧ ma̧ȩ pio ju̧i̧ daba tänȩrëremȩdiibe yaba̧ Ütë tjamo̧ judi Tjo tjamo̧ pio ju̧i̧iä. Tjamo̧ davä. Goadia̧ oa cjiarërea̧ ma̧ȩ pio ju̧i̧, pio jȩaiäpȩmo̧ ea tjamo̧ji̧ri̧ ja̧ oa goë boea̧ pio ju̧i̧ daba tänȩrëremȩdiibe yaba̧ Tjo tjamo̧ pio ju̧i̧iä. Jabechji̧ chjö̧na̧i̧däräti̧ oa dabamȩde Tjo tjamo̧ judi a̧dë jo̧rȩtarea̧ decjiari̧. Jabechji̧ Ütë tjamo̧ judi urëdi tjamo̧ oa jo̧rȩta̧ pio ju̧i̧bo dabamȩde.

¹¹ Danȩrȩ, eami̧ pumȩ üdë jibëa̧ chji̧ra̧ jo̧rȩtarä, jabechji̧ o judiro̧ dabarea̧mi̧dëri̧ jo̧rȩtade. Jabechji̧ dabarea̧mi̧dëri̧ goadia̧ oa cjiade jënȩ jo̧rȩta̧ üdë. Jabo jibëa̧ tjo pio judi, dëdë, dabade jënȩ jo̧rȩta̧ pio ju̧i̧ chjiari. Tjamo̧ davä. Pumȩ ja̧ tjo pio judi dabade jënȩ jo̧rȩta̧ pio ju̧i̧ chjiari. Ado peaja̧dide Ütë tjamo̧ pio ju̧i̧iä. Jabechji̧ Tjo tjamo̧ pio judi dabade Ütë tjamo̧ judi jo̧rȩta̧ pio ju̧i̧ chjiari. Aja̧, pio judimo̧rȩ dabade.

¹² Ado pio jiro Tjo tjamo̧ pio ju̧i̧ chiaji̧ri̧pea̧rea̧rȩ yaba̧ ca̧ oti̧. Jabechji̧ dai chirirä cjo̧ro̧ji̧ri̧ pio ji̧ri̧ ja̧ jo̧rȩtarea̧ oa yürüdëa̧diibe Ütë tjamo̧ judi, jabo Tjo tjamo̧ pio ju̧i̧ yürürëremȩdiibe. Aja̧, Tjo tjamo̧ pio ju̧i̧ yürürëremȩdiibe a̧ro̧rȩ dabadëchea oa, a̧ro̧rȩ Ütërë pio ibëiäpȩmo̧ a̧dë chjäte chjadë oa yürürërea̧ pio ju̧i̧ chjiari dabadëchea oa.

¹³ Danȩrȩ ca̧ oti̧, a̧ro̧rȩ dibë a̧ra̧ano̧a̧ ma̧ȩ üdë, jabechji̧ dai chirirä ja̧ jo̧rȩtarea̧ri pio judiri ma̧na̧dë madiibe, jabo Tjo tjamo̧ pio judiri ma̧na̧diibe. Jabechji̧ pio judi ibë jo̧rȩta tänȩa̧ ma̧ȩra̧ pio ju̧ri̧ra̧ a̧ra̧ano̧rea̧ro̧dibe, a̧dëri ma̧na̧mȩ dabarea̧ra̧ pio ju̧ri̧ra̧. Aja̧, Tjo tjamo̧ pio ju̧i̧ chiaji̧ri̧ pio ji̧ri̧iäpȩmo̧ ma a̧ra̧ano̧rea̧ro̧dibe pio jiro ma̧ȩ oa. Ado mȩnȩro̧ Tjo tjamo̧ pio ju̧i̧ chiaji̧ri̧pea̧ oaiä, jabechji̧ chjadëri̧ dabape järea̧ danȩrȩ.

¹⁴ Jabo Tjo tjamo̧ pio ju̧i̧ chiadëmȩ pio judi, cjäri̧ made, Tjo tjamo̧ pio judiri ma̧na̧mȩ a̧ra̧ano̧rea̧ ma̧ȩ pio ju̧i̧ ta̧rë ja̧borea̧mi̧dëdejȩ. Jabechji̧ teracaba maeade pio ju̧i̧iä. Jabomo̧ yo̧riärea̧ ma̧ȩ maeade pio ju̧i̧iä. Ado pio ju̧i̧iä dabaparea̧mi̧dë maeade. Jabechji̧ Tjo tjamo̧ pio ju̧i̧iämo̧i̧ dabaparea̧mi̧ dade pio jiro a̧ra̧ano̧rea̧ ma̧ȩ üdë.

¹⁵ Jabo Tjo tjamo̧ pio ju̧i̧ chiamȩ pio judi, jabechji̧ dami̧ti̧ chjadë oa ütarë jo̧rȩtarea̧ chiade Tjo tjamo̧ pio ju̧i̧iä. Jabechji̧ pio jiro Tjo tjamo̧ pio judi tänȩa̧ oaiä chjadëri̧ ütarë jo̧rȩtarea̧ chiade chjadë pio ju̧i̧ japapea̧ ji̧, chjai̧dë pio ju̧i̧ jiadapea̧ ji̧. Jabo quëna̧dëji̧ri̧ pio judiro̧, Tjo tjamo̧ pio ju̧i̧ jabë chiadëji̧ri̧ pio judiro̧, cjäri̧ madirȩ, chiadë madiro̧jo̧ȩ. Ado pio ju̧i̧iä ütarë jo̧rȩtarea̧mi̧dëdirȩ Ütë tjamo̧ ja̧ ma̧ȩ pio ju̧i̧ chjiari. Tjamo̧ davä. Quëna̧mȩ judi Tjo tjamo̧ pio judiri ma̧na̧mȩ ma̧ȩ oa jo̧rȩta̧ oaiä, jabechji̧ ütarë jo̧rȩtarea̧mi̧dëdiro̧jo̧ȩ quëna̧dëji̧ri̧ judiro̧.

¹⁶ Ado peaja̧di ta̧rëri̧ go̧ȩpea̧ oa cjiarëremȩde ma̧ȩ üdë peadëri ja̧. Ta̧rëchji̧vä: "Danȩrȩ, eami̧ pumȩ üdë, ’Aja̧, Ano̧mȩ judi ja̧di dari̧ jo̧rȩtamȩdida, ja̧di dari̧ ütarë jo̧rȩtamȩdida’ quëna̧ dabarea̧mi̧dëde. Ado peaja̧di Ano̧mȩ pio ju̧i̧ chi̧dëearea̧mi̧dëdejȩ.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë ibëa̧ Ano̧mȩ pio ju̧i̧ chjiari. Tjamo̧ davä. Eami̧ pumȩ üdë, ‘Aja̧, Ütë tjamo̧ judi ja̧di dari̧ jo̧rȩtadida’ quëna̧ ütarë jo̧rȩtarea̧mi̧dëde. Ado peaja̧di ütarë jo̧rȩtarea̧mi̧dëdiro̧ibe. Tjamo̧ davä. Tjo tjamo̧ pio ju̧i̧ chiadëji̧ri̧ pio judiro̧, cjäri̧ madiro̧ibe, pio ibë chjiari tjamo̧ri̧ ütarë jo̧rȩtarea̧mi̧dëdirȩ. Jabechji̧ a̧ro̧rȩ Tjo tjamo̧ pio ju̧i̧iä tjaoëpai̧ dari̧ jo̧rȩtaji̧ri̧pea̧ oaiä, a̧ro̧rȩ Quiricho pio judiri ma̧na̧mȩ jo̧rȩtarea̧ pio ju̧i̧ jo̧rȩtaji̧ri̧pea̧ oaiä, a̧ro̧rȩ Quiricho pio judimi̧ dari̧ jo̧rȩtarea̧ chiaji̧ri̧pea̧ oaiä, jabechji̧ pio ibë chjiaribo tjamo̧ri̧ ütarë jo̧rȩtarea̧ dadë madiro̧ibe Tjo tjamo̧ pio ju̧i̧ chiadëji̧ri̧ pio judiro̧.