Cori̧tio Ma̧ȩ 1 1 - Biblia Pume

Taruparea̧ Ma̧ȩ

¹ Danȩrȩ ca̧ oti̧, jo̧rȩtarequededibe. ¿Jabënȩrȩ? ¿Jabëti̧ cjianȩrȩ? ‘Jabë cjo̧ro̧ cjia jirodiro̧da’ quëna̧ jo̧rȩtarequededibe. Danȩrȩ, Pablo quȩmȩ pio judirequede. Ado pio yoa ma̧ȩ oa go̧ȩpe chjadürequededibe, pio dibë jo̧rȩtamȩrȩ. Jabechji̧ Jechurë chjadüa̧requede. Ütë tjamo̧ pio judi mitëa̧ oa chjadürëremȩdique Jechu Quiricho pio judi. Ado cüdë, ibëa̧ omȩ Chotenȩ quȩmȩ pio ju̧i̧ nö̧tamȩrȩ go̧ȩpe chjadürequededibe.

² Aja̧, Ütë tjamo̧ ja̧ a̧doparea̧ oa go̧ȩpe chjadürequededibe Cori̧tioräpȩji̧ri̧ oa. Tjamo̧ davä, Jechu Quiricho pio judiri ja̧ maea oa, Quiricho pio ju̧i̧iä china̧chjari̧ tutia̧ oa cjiaji̧ri̧ oa go̧ȩpe chjadürequededibe. Jabechji̧ mȩnȩro̧, Ütë tjamo̧ ja̧ pumȩpea̧ji̧ri̧rȩ Quiricho pio ju̧i̧iä ëna̧diäa̧ oa cjiaji̧ri̧pea̧nȩrȩ china̧chjari̧ tutia̧ oa cjiapea̧ oa. Ado pio dibëiäpȩmo̧ go̧ȩpe chjadürequededibe ca̧ oti̧. Ado pio dibëmo̧dë oa, jabo oëra̧ti̧ oa cjo̧ro̧ji̧ri̧ pio ji̧ri̧bo jo̧rȩtamȩrȩ go̧ȩpe chjadürequedejȩrȩ, Ano̧mȩ Jechu Quiricho ju̧i̧ quëna̧ji̧ri̧ pio ji̧ri̧.

³ Ado yaba̧ pio yoa ma̧ȩ oa tarupabea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe ca̧ oti̧. Aja̧, ibëa̧ Ama̧i̧ Ütë pio judi, Ano̧mȩ Jechu Quiricho pio judiborë cjäri̧ri̧ cjiaji̧ri̧rȩ a̧dotädiro̧dibe, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧.

Quiricho pio ju̧i̧iä ji̧ra̧ri̧ goaji̧ri̧mi̧ dari̧ cjiadiärëreji̧ri̧dirȩ Cori̧tioräpȩ quëna̧ji̧ri̧ pio judiro̧

⁴ Ji̧dë ma ma̧ chiadëri̧ cjiari̧ jo̧rȩtareconȩ Ütë tjamo̧ pio ju̧i̧iäpȩmo̧ pio dibë chjiari. ‘Jabechji̧ pio judirimȩ maearë cjäri̧ri̧ cjiamȩrȩ yürürëremȩdiji̧ri̧da, judiro̧ chjadëri̧ japadëa̧ ba oa chjadëri̧ yürüa̧diji̧ri̧da, jabechji̧ Jechu Quiricho pio judiri ja̧ji̧ri̧ oa chjadëri̧ yürüa̧diji̧ri̧da’ quëna̧ jo̧rȩtamȩrȩ ji̧dë ma ma̧ chiadëri̧ cjiari̧ jo̧rȩtareconȩ pio dibë chjiari, ‘chjadë tjamo̧ri̧ japea̧diji̧ri̧da’ quëna̧ jo̧rȩtamȩrȩ.

⁵ Jabechji̧ mȩnȩro̧ Jechu pio ju̧i̧ nö̧ta cja̧rȩmȩpe baga̧ tara, ji̧ra̧ri̧ goaji̧ri̧mi̧ dari̧ cjiadiärëreji̧ri̧nȩrȩ ca̧ oti̧. Tja̧mo̧ davä. Mö̧na̧mi̧ dari̧ cjiadiädënȩrȩ. Danȩrȩ, Ütërë yürüa̧ oaiä, dabarea̧ ji̧ra̧ oa chiaji̧ri̧pea̧nȩrȩ. Ado jibëa̧ dabarea̧ oa chiaji̧ri̧pea̧ oaiä, jabechji̧ jibëa̧ ma̧ȩ oa quëna̧ji̧ri̧ pio ji̧ri̧iäpȩmo̧ goae tarari̧ a̧ra̧ano̧rea̧ chiaji̧ri̧pea̧nȩrȩ. Ado dabadëji̧ri̧ pio ji̧ri̧iäpȩmo̧bo chjadëri̧ a̧ra̧ano̧rea̧ chiaji̧ri̧pea̧nȩrȩ peaja̧di.

⁶ Jabechji̧ Ütë tjamo̧ judi dibë dabarea̧ yürüa̧ oaiä, chjadëri̧ na̧rȩriä cjo̧ro̧rea̧ chiaji̧ri̧pea̧nȩrȩ yaba̧, mȩnȩro̧ Quiricho pio ju̧i̧ chjiari ma̧ȩ oa chjuari̧ quëna̧ji̧ri̧pea̧ tara, a̧ro̧rȩ Jechurë chjadüa̧ pio judiro̧ a̧ra̧ano̧a̧ ma̧ȩ oa quëna̧ji̧ri̧pea̧ tara.

⁷ Ado pio ju̧i̧iä mö̧na̧mi̧ dari̧ cjiadë manȩrȩ, jabo nö̧tadäräri̧ goaji̧ri̧pea̧nȩrȩ ji̧dëri̧, Ütë tjamo̧ pio judi dibëiäpȩmo̧ cjäri̧ri̧ cjiamȩrȩ yürüa̧ pio ju̧i̧iä. Tjamo̧ davä ca̧ oti̧. Jabëdiärea̧ decjiari̧ dami̧ti̧ ja̧beparea̧ chjadë oa chiaji̧ri̧pea̧nȩrȩ mȩnȩro̧ dibëa̧ Ano̧mȩ Jechu Quiricho pio ju̧i̧ jidataji̧ri̧rȩ cjo̧ro̧a̧ nö̧ta. Tjamo̧ davä, mȩnȩro̧ Jechu pio ju̧i̧ jidata nö̧ta, Ano̧mȩ Jechu pio judi na̧rȩ jana̧pea̧ pio ju̧i̧ jidataji̧ri̧rȩ cjo̧ro̧a̧ nö̧ta, jabechji̧ dami̧ti̧ ja̧beparea̧ chjadë oa chia maeanȩrȩ pio ju̧i̧ ja̧ oa chjadëri̧ ja̧bepapea̧ oa.

⁸ Ado pio dibëiäpȩmo̧ nö̧tadäräri̧ yürürëremȩ pio judi ji̧dë ma cjäri̧ri̧ cjiamȩrȩ ju chiarea̧ yürüpadidibe Jechu pio judi jana̧rä yuro. Tjamo̧ davä. Mȩnȩro̧ pio ju̧i̧ ja̧ dëbëräpȩ co chjami̧ dari̧ cjiapea̧ oa, mȩnȩro̧ pio ju̧i̧ ja̧ dëbëräpȩ chjai̧dë chiadë maearë cjiapea̧ oa, jabechji̧ ji̧dë ma ju chiarea̧ yürüpadidibe, mȩnȩro̧ eami̧ chjai̧dë oa chjätäräbo ji̧dë ma chjuari̧ quëna̧pea̧ oa, mȩnȩro̧ quëna̧dëpe bagachea oa.

⁹ Ado Ütë tjamo̧ judi yo̧a̧mi̧ japamȩde. Jabechji̧ pio dibë ëna̧diäa̧rä, ëna̧diärëremȩdidibe mȩnȩro̧ jibëa̧ Ja pio judiri ja̧ maearë cjo̧ro̧pea̧ oa, mȩnȩro̧ Ano̧mȩ Jechu Quiricho pio ju̧i̧ nö̧ta jadü cjiarea̧ dapea̧ oa. Ado pio ju̧i̧iä jabechji̧, judi dibë ëna̧diärërea̧mi̧ japadäräpade ma̧diä ma̧diä cjia tänȩrea̧ decjiari̧. Jabechji̧ jabomo̧ yo̧dëmȩde judi. Ado pio ju̧i̧iä ji̧dë ma ma̧ chjiadëri̧ cjiari̧ jo̧rȩtareconȩ Ütë tjamo̧ pio ju̧i̧. ‘Chia chia, chjadëri̧ japadiji̧ri̧da, Ütë tjamo̧ judi Cori̧tioräpȩ quëna̧ji̧ri̧ pio ji̧ri̧iäpȩmo̧ chjadëri̧ japadiji̧ri̧da’ quëna̧ jo̧rȩtamȩrȩ ma̧ chiadëri̧ cjiamȩrȩ jo̧rȩtareconȩ.

A̧dopaji̧ri̧ pio judiro̧ jadüchiami̧ bubami̧ dari̧ cjiadiärëreji̧ri̧dirȩ

¹⁰ Danȩrȩ ca̧ oti̧, Ano̧mȩ Jechu Quiricho judi pio coaiäpȩmo̧ tjamo̧ yo̧rea̧ yürüa̧ oaiä, jabechji̧ pio ju̧i̧ ja̧ ma̧ȩrä yo̧tarequededibe, mȩnȩro̧ cja̧rȩmȩ coëma cjiadiäa̧ maea oa jo̧rȩtariä cjo̧ro̧tä. Jabo cjäri̧ manȩrȩ, mȩnȩro̧ dibëa̧ dëbëti̧ra̧ chia dëbë ni̧bäta̧ oaiä, chjarapë jo̧rȩtaji̧ri̧rȩ jadüchiami̧ bubami̧ dari̧ cjiadiäa̧ oaiä, jabechji̧ ade cjiami̧ dari̧ cjiadiäa̧nȩrȩ mȩnȩro̧ cja̧rȩmȩ chji̧ chiami̧ dari̧ jo̧rȩtaji̧ri̧rȩ cjo̧ro̧tärea̧ ji̧. Jabo cjäri̧ manȩrȩ ca̧ oti̧. Ja̧di dari̧ cjiadiädëtäreji̧ri̧nȩrȩ, jabo cja̧rȩmȩ chji̧ chiami̧ dari̧ jo̧rȩtaji̧ri̧rȩ cjo̧ro̧täreji̧ri̧nȩrȩ. Jabechji̧ cja̧rȩmȩ coëma cjiadiäa̧ maeara̧ ütara ëte, cja̧rȩmȩ jo̧rȩtarea̧ chiami̧ darë japatäreji̧ri̧nȩrȩ.

¹¹ Jabechji̧ ja̧di ta̧rëri̧ yo̧mȩrȩ go̧ȩpe chjadürequededibe ca̧ oti̧, cüdë pio dibë chjiari goë ta̧rëa̧ oaiä. Jabechji̧ Coroe quȩyi̧ pio ji̧ ja̧ pumȩ pio ji̧ri̧iä, o ji̧ri̧iä goë ta̧rëa̧requede mȩnȩro̧ dibëa̧ dëbëti̧ra̧ chia ni̧bäta̧bea pio ju̧i̧ chjiari, mȩnȩro̧ jadüchiami̧ bubami̧ dari̧ goëdëri̧ cjia̧bea pio ju̧i̧ chjiari.

¹² Jabo Pablo judi, ¿tjana̧ yo̧cjivadiibë? quëna̧chea oa, jabechji̧ chjadëri̧ yo̧parequededibe ca̧ oti̧. Danȩrȩ, jadüchiami̧ bubape jämi̧ dari̧ cjo̧ro̧renȩrȩ. Jadüchiami̧ chji̧ chiami̧ dari̧ ni̧bärenȩrȩ. Jabechji̧ mȩnȩro̧ cja̧rȩmȩ chji̧ chiami̧ dari̧ jo̧rȩtatärea̧ ji̧, o judiro̧, "Aja̧, Pablo pio ju̧i̧mo̧i̧ cho̧rëdiärea̧rȩ" yo̧vedirȩ. Ado o judiro̧, "Aja̧, Aporo quȩmȩ pio ju̧i̧ ja̧ ma̧ȩrämo̧ cjo̧ro̧rea̧rȩ" yo̧vedirȩ. Ado o judiro̧, "Aja̧, Pedro judi a̧ra̧ano̧a̧ pio ju̧i̧mo̧i̧ ta̧rë ja̧borea̧rȩ" yo̧vedirȩ ji̧dëri̧. Ado o judiro̧, "Aja̧, Quiricho pio ju̧i̧ ja̧ ma̧ȩrämo̧ cjo̧ro̧rea̧rȩ" yo̧vedirȩ.

¹³ Jabo cjäri̧ manȩrȩ ca̧ oti̧, oëra̧ jo̧rȩtanȩrȩ dibëa̧ chjarerä ja̧beparëreji̧ri̧ pio ji̧ri̧ chjiari. Danȩrȩ, ‘Quiricho judi jadüchiami̧ jirodida’ quëna̧rea̧mi̧dëde. Jabechji̧ jadüchiami̧ ma̧ȩ oa a̧ra̧ano̧pea̧ oa chjadüa̧ ma ja̧didë, jabo cja̧rȩmȩ ma̧ȩ maea oa a̧ra̧ano̧pea̧ oa chjadürëremȩdiibe. Ado pio ju̧i̧iä a̧ro̧rȩ ütëborë cja̧rȩmȩ cjiadiäa̧ maea oa a̧ra̧ano̧rëreji̧ri̧rea̧ro̧dibe jadüchiami̧rȩ a̧ra̧ano̧ji̧ri̧borë. Danȩrȩ, ¿chjia tjamo̧rëremȩde pio dibë chjiari toro ano̧ mire ja̧borëremȩ judi? ¿Pio cüdë? ¿Pedro pio judi? Cjäri̧ marea̧rȩ ca̧ oti̧, a̧ro̧rȩ pio dibë chjiari ano̧ mire ja̧boa̧ ma ja̧didë. Quiricho pio judimo̧de. Pio ju̧i̧iäpȩmo̧ ma ba chia jo̧rȩtapea̧de. Ado danȩrȩ, ¿tjana̧ ju̧i̧iä uirä go̧ȩ cjaeä chuda̧ oa cjiarëreji̧ri̧nȩrȩ? Mȩnȩro̧ Aporo pio ju̧i̧iäpȩmo̧ quëna̧ji̧ri̧pea̧ tara ¿chjuda̧ oa cjiarëreji̧ri̧nȩrȩ? Pedro pio ju̧i̧iäpȩmo̧ quëna̧ji̧ri̧pea̧ tara ¿chuda̧ oa cjiarëreji̧ri̧nȩrȩ? Cjäri̧ manȩrȩ ca̧ oti̧, Jechu pio ju̧i̧iäpȩmo̧ ma quëna̧ji̧ri̧pea̧ oaiämo̧i̧ chuda̧ oa cjiaji̧ri̧pea̧nȩrȩ. Pio ju̧i̧ ja̧ quȩrämo̧ chuda̧ oa cjiarëreji̧ri̧nȩrȩ ado cja̧rȩmo̧ ja̧ quȩrädë. Pio ju̧i̧iä jabechji̧, ado cja̧rȩmo̧rȩ dibë chuda̧räbo, jabechji̧ Jechu ja̧ quȩrämo̧ chuda̧ oa cjiarëreji̧ri̧nȩrȩ pio ju̧i̧ ja̧ ma̧ȩrämo̧ cjo̧ro̧pea̧ oa.

¹⁴ Ado pio ju̧i̧iä jabechji̧, ma̧ chiadëri̧ cjiarequede cüdë dibë cja̧rȩmȩ oa chudadëa̧ tara. Jabo dëdë, pio ji̧ri̧mo̧i̧ chuda̧requede jabo. Quiripo quȩmȩ pio ju̧i̧mo̧i̧ chudarëremȩreconȩ ado Gaio quȩmȩ pio ju̧i̧bo.

^15-16 Ado pio ju̧i̧ uëri chudarëremȩreconȩ Etevana quȩmȩ pio ju̧i̧bo, ado jibëa̧ pumȩ pio ji̧ri̧bo. ‘Ado judiri chudadëa̧quëda’ quëna̧ jo̧rȩtarequede. Ado pio ju̧i̧iä ma̧ chiadëri̧ cjiarequede. Jabechji̧ dibë ütëbo oa uirä go̧ȩ cjaeä chudadëa̧ oaiä, jabechji̧ oëra̧ yo̧rea̧ dadëpanȩrȩ. Jabechji̧ mȩnȩro̧ yo̧pai̧ dari̧ cjia̧tärea̧ ji̧, “Aja̧, Pablo pio ju̧i̧ ja̧ quȩrä go̧ȩ cjaeä chuda̧ oa cjiarëreji̧ri̧rea̧rȩ” yo̧pai̧ dari̧ cjia̧tärea̧ ji̧, cjäri̧ manȩrȩ, ja̧di dari̧ yo̧rea̧ dadëpanȩrȩ. Jabechji̧ ca̧ quȩrä go̧ȩ cjaeä chuda̧rea̧mi̧dëde. Ado “Pablo pio ju̧i̧mo̧i̧ cho̧rëdiärea̧ro̧jo̧ȩ” peaja̧di yo̧rea̧mi̧dëde.

¹⁷ Jabechji̧ uirä go̧ȩ cjaeä chudapea̧ oa tjamo̧ri̧ chjadüdërëremȩdique Quiricho judi, jabo ma̧ȩ chjadëi̧ pio ju̧i̧ a̧ra̧ano̧pea̧ oa chjadürëremȩdique. Pio ju̧i̧iä a̧ra̧ano̧requededibe pio jiro ma̧ȩ oa, Quiricho pio ju̧i̧ chjiari ma̧ȩ oa. Jabo danȩrȩ ca̧ oti̧, cüdë pio jiro ma̧ȩ oa a̧ra̧ano̧a̧rä, cjäri̧ mareconȩ, goaeri̧ gari̧pe gari̧pe ni̧bärea̧ ma̧ȩra̧ pio ju̧ri̧ra̧ a̧ra̧ano̧dëa̧requededibe. Jabechji̧ ja̧di dari̧ a̧ra̧ano̧pea̧ oa chjadüdëa̧dique. Dai chirirä ja̧ ma̧ȩra̧ pio ju̧ri̧ra̧ a̧ra̧ano̧pea̧ oa chjadüdëa̧dique, jabo ma̧ȩ chjadëi̧ pio ju̧i̧mo̧i̧ a̧ra̧ano̧pea̧ oa chjadürëremȩdique ca̧ oti̧. Jabechji̧ Quirichorë toro ja̧boa̧ pio ju̧i̧ chjiari ma̧ȩ üdë badëri̧ cjiadiächea̧ oa, jauëchjadëmȩmi̧ dari̧ cjiadiächea oa, jabechji̧ ma̧ȩ tjamo̧i̧ cjiamȩ ma̧ȩ maeara̧ a̧ra̧ano̧pea̧ oa chjadürëremȩdique, gari̧pe gari̧pe ni̧bärea̧ ma̧ȩdë maeara̧.

Ütë tjamo̧ ja̧ dabarea̧ pio ju̧i̧ chjiari ana̧ri̧ na̧rȩdiibe Quiricho judi toro ja̧boa̧ pio ju̧i̧iä

¹⁸ Jabechji̧ Jechurë toro ja̧boa̧ pio ju̧i̧ chjiari ma̧ȩ üdë ‘tëracaba madida, badë madida’ quëna̧ jo̧rȩta maeadiro̧jo̧ȩ aeno̧a̧ oa cjiapaji̧ri̧ pio judiro̧. Jabo chjätärea̧ daea̧ji̧ri̧ pio judiro̧, cjäri̧ marea̧ro̧jo̧ȩ, ja̧di dari̧ jo̧rȩtadë marea̧rȩ, jabo ba chia jo̧rȩtarea̧ro̧jo̧ȩ pio jiro ma̧ȩ oa. ‘Jabechji̧ Quiricho pio ju̧i̧ chjiari ma̧ȩ üdë ana̧ri̧ na̧rȩdiibëda, Ütë tjamo̧ ja̧ jauëchja pio ju̧i̧ chjiari na̧rȩdiibëda, jabechji̧ pio jiro ma̧ȩ oaiä quëna̧dëji̧ri̧ pio judiro̧ chjätärea̧ dapai̧ dadiro̧da’ quëna̧ jo̧rȩtarea̧ro̧jo̧ȩ. Tjamo̧ davä ca̧ oti̧. Danȩrȩ, eami̧ pumȩ üdë pio jiro ma̧ȩ oa quëna̧ oaiä Ütë tjamo̧ ja̧ jauëchja pio ju̧i̧iä chjätärea̧ dade. Jabechji̧ aeno̧rea̧ pio ju̧i̧mo̧i̧ nö̧tarërea̧ ji̧, chjätärea̧ daea̧ji̧ri̧pea̧dirȩ jënȩro̧ quëna̧ pio ju̧i̧iä, Ütë ja̧ jauëchja pio ju̧i̧iä. Ado pio ju̧i̧iä yo̧requededibe ca̧ oti̧. Ma̧ȩ chjadëi̧ üdë ana̧ri̧ na̧rȩdiibe Ütë tjamo̧ ja̧ jauëchja pio ju̧i̧ chjiari.

¹⁹ Jabechji̧ Ütë tjamo̧ judi goarijä tänȩpadejȩ dai chirirä ja̧ jo̧rȩtarea̧ pio ju̧i̧. Tjamo̧ davä. ‘Jechu judi toro ja̧boa̧ üdë ba chiadëdida’ quëna̧ jo̧rȩtarea̧ pio ju̧i̧ goarijä tänȩpadejȩ. ‘Ado Pablo judi tjamo̧i̧ cjiari̧ yo̧diibëda’ quëna̧ jo̧rȩtapea̧ chianȩrȩ ca̧ oti̧, ma̧ȩ üdë jabërä go̧ȩpea̧ oa cjiarërea̧ tara. Tjamo̧ davä. Dai chirirä ja̧ jo̧rȩtarea̧ pio ju̧i̧ goarijä tänȩpea̧ pio ju̧i̧ chjiari ma̧ȩ oa jabërä go̧ȩpea̧ oa cjiarëremȩde. Ta̧rëchji̧vä Ütë tjamo̧ judi yo̧rërea̧ ma̧ȩ pio ju̧i̧: "Jabechji̧ eami̧ pumȩ üdë, ‘Aja̧, urëdi tjamo̧ oa jo̧rȩtarea̧ chiaquëda’ quëna̧ dabamȩ pio ju̧i̧ ja̧ jo̧rȩtarea̧ pio ju̧i̧ goarijä tänȩpareconȩ. Ado eami̧ pumȩ üdë, ‘Aja̧, dabaparea̧ bëräpȩ ju̧ri̧ a̧dë chjäte ji̧ra̧ri̧ dabamȩpea̧quëda, jabechji̧ dami̧ti̧ dabaparea̧ oa ütararea̧ chiamȩpea̧quëda’ quëna̧mȩ pio ju̧i̧ ja̧ dabarea̧ pio ju̧i̧bo yuropa tänȩpareconȩ.” Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë Ütë tjamo̧ judi yo̧rërea̧ pio ju̧i̧ chjiari.

²⁰ Ado ja̧dirä judi, Ütë tjamo̧ judi dai chirirä ja̧ jo̧rȩtarea̧ pio ju̧i̧ goarijä tänȩparä judi, ado pio jiro jo̧rȩtarea̧ üdë ‘jabomo̧ japëtaramȩ ja̧ jo̧rȩtarea̧mi̧ dadida’ quëna̧ jo̧rȩta tänȩparä judi, ¿yö̧ta dari̧ jo̧rȩtatäreji̧ri̧rea̧rȩ ca̧ oti̧? Judi dai chirirä ja̧ jo̧rȩtarea̧ pio ju̧i̧ goarijä tänȩparä judi, ¿yö̧ta dari̧ jo̧rȩtatäreji̧ri̧rea̧rȩ dai chirirä ja̧ urëdi oa jo̧rȩtaji̧ri̧ pio ji̧ri̧ chjiari? ¿Yö̧ta dari̧ jo̧rȩtatäreji̧ri̧rea̧rȩ a̧dë chjäte ji̧ra̧ri̧ dabapea̧ji̧ri̧ pio ji̧ri̧ chjiari? ¿Yö̧ta dari̧ jo̧rȩtatäreji̧ri̧rea̧rȩ goae tarari̧ ba dëbë ni̧bä chjaorea̧ chiaji̧ri̧ pio ji̧ri̧ chjiari? Yö̧ta dari̧dë, jabechji̧ judiro̧ dabapea̧ üdë, ‘jabechji̧ dai chirirä ja̧ jo̧rȩtarea̧ maeadida, ba chia tjamo̧dëdida’ quëna̧ jo̧rȩtatäreji̧ri̧rea̧rȩ. Tjamo̧ davä. Judiro̧ dabapea̧ üdë, 'jabechji̧ jibëa̧ tjo oa a̧dorea̧ chiadëdida, ado pio ju̧i̧iä Ütë tjamo̧ pio ju̧i̧iä ba chiadëdida’ quëna̧ jo̧rȩtatäreji̧ri̧rea̧rȩ pio jiro dabarea̧ pio ju̧i̧ chjiari.

²¹ Jabechji̧ a̧dë chjäte urëdi oa jo̧rȩtarea̧ chiamȩ Ütë pio judi ütarë jo̧rȩtarëremȩde pumȩ pio ji̧ri̧ chjiari. ‘Aja̧, pumȩ judiro̧ jibëa̧ ma̧na̧ri̧ jo̧rȩta̧ oaiä pio coa chjiari dabarea̧ dadëpadiro̧da, judiro̧ dai chirirä ja̧ jo̧rȩtarea̧ oaiä chjätärea̧ dadëpadiro̧da, jabo ma̧ȩ chjadëi̧ pio ju̧i̧ quëna̧rämo̧ chjätärea̧ dapadiro̧da’ quëna̧ jo̧rȩtamȩrȩ ma̧ȩ chjadëi̧ pio ju̧i̧ a̧ra̧ano̧rea̧ yürürëremȩde, pumȩ judiro̧ pio jiro ma̧ȩ oa quëna̧pea̧ oa, judiro̧ chjätärea̧ dapea̧ oa. Jabechji̧ o judiro̧ pio jiro ma̧ȩ üdë ‘teracabadida’ quëna̧räbo, jabechji̧ a̧ra̧ano̧pea̧de.

²² Tjamo̧ davä ca̧ oti̧, dai chirirä ja̧ jo̧rȩtaji̧ri̧ pio judiro̧ ta̧rë ja̧bodëdiro̧jo̧ȩ ma̧ȩ chjadëi̧ pio ju̧i̧. Danȩrȩ, judio judiro̧ jauëchja cjiari̧ na̧rȩrea̧ pio ju̧i̧mo̧i̧ jo̧rȩtadirȩ. ‘Aja̧, na̧rȩrea̧ jauëchja pio ju̧i̧mo̧i̧ da oaiä quëna̧paa̧ro̧da’ quëna̧ jo̧rȩtaji̧ri̧rȩ ji̧dë ma yo̧ chjaodirȩ. Ado judiodë pio judiro̧ ji̧dë ma jo̧rȩtadirȩ dai chirirä ja̧ jo̧rȩtarea̧ maea oa. Jabechji̧ judiro̧ chjadëri̧ dadäräji̧ri̧mi̧ cjo̧ro̧tärea̧ ji̧, ji̧dë ma na̧taji̧ri̧mi̧ dari̧ cjo̧ro̧dirȩ, dai chirirä ja̧ jo̧rȩtarea̧ maea oa jo̧rȩtaji̧ri̧rȩ. Tjamo̧ davä ca̧ oti̧, dai chirirä ja̧ jo̧rȩtarea̧ maea oa jo̧rȩtadirȩ.

²³ Jabo a̧ro̧rȩ, Jechurë chjadüa̧ pio judiro̧, jabechji̧ Quiricho judi toro cji̧de ja̧bo tänȩa̧ pio ju̧i̧ chjiari ma̧ȩ oa a̧ra̧ano̧rea̧rȩ, pumȩ judiro̧ chjai̧dëri̧ japea̧ ba oa ano̧ mire ja̧boa̧mȩ pio ju̧i̧ chjiari ma̧ȩ oa. Jabo cjäri̧ madiro̧jo̧ȩ, judio pio judiro̧ cjarari̧ cjiape bagami̧ dari̧ ta̧rëdiro̧jo̧ȩ ta aneno̧mi̧ dari̧. ‘Aja̧, Ütërë mitëa̧ chjätä tänȩmȩ pio judi ma̧na̧rä, tjamo̧ri̧ ja̧bodëpadida’ quëna̧ jo̧rȩta oaiä, jabechji̧ cjarari̧ cjiape bagami̧ dari̧ ta̧rëdiro̧jo̧ȩ Jechu judi ja̧boa̧ pio ju̧i̧ chjiari. Ado judiodë pio judiro̧, jabomo̧ yo̧riärämi̧ cjiadiro̧jo̧ȩ.

²⁴ Jabo Ütërë ëna̧diäa̧ pumȩ pio judiro̧ pio jiro ma̧ȩ oa ta̧rërä, jabechji̧ o judiro̧ jo̧rȩtami̧ jo̧rȩtadë madirȩ jabo tjaoëpai̧ dari̧ jo̧rȩtadirȩ. Tjamo̧ davä. Ütërë ëna̧diäa̧ oa cjiaji̧ri̧ pumȩ pio judiro̧, judio pio judiro̧, ado judiodë pio judiro̧borë pio jiro ma̧ȩ oa ta̧rërä, jabechji̧ ba chia jo̧rȩtadiro̧jo̧ȩ Quiricho pio ju̧i̧. ‘Aja̧, Quiricho pio judi chjadëri̧ dabarea̧ yürüdiibëda, Ütë tjamo̧ judi a̧dë chjäte jauëchja pio ju̧i̧ chjiari dabarea̧ yürüdiibëda, Ütë tjamo̧ judi a̧dë chjäte urëdi tjamo̧ oa jo̧rȩtarea̧ pio ju̧i̧ chjiari dabarea̧ yürüdiibëda’ quëna̧ jo̧rȩtaji̧ri̧rȩ ba chia jo̧rȩtadiro̧jo̧ȩ.

²⁵ Jabo dëdë, o judiro̧ badë jo̧rȩtadiro̧jo̧ȩ. Ado oëra̧ jo̧rȩtadirȩ peaja̧di Ütë tjamo̧ pio ju̧i̧ chjiari. Jabo judiro̧ oëra̧ jo̧rȩtaräbo, ‘Cjäri̧ madida, Ütë tjamo̧ judi tjamo̧ri̧ dabadëdida’ quëna̧räbo, Ütë tjamo̧ judi pumȩ ji̧ri̧ chjätä tänȩpea̧ oa japea̧rä oëra̧ japarëremȩdida’ quëna̧räbo, jabechji̧ Ütë tjamo̧ ja̧ dabarea̧ üdë ji̧dë u̧i̧ ji̧ra̧ tjamo̧de pumȩ ja̧ jo̧rȩtarea̧ pio ju̧i̧iä. Tjamo̧ davä. O judiro̧ oëra̧ jo̧rȩtaräbo, ‘Cjäri̧ madida, Ütë tjamo̧ judi tjamo̧ri̧ ju chiadëdida jabo ju baebaeami̧ dari̧ cjiadida’ quëna̧räbo, ‘Aja̧, jibëa̧ Ja oa ano̧ mire ja̧bopea̧ oa tuti chjadüa̧ oaiä, ju chiadëmȩmi̧ dari̧ japarëremȩdida’ quëna̧räbo, jabechji̧ Ütë tjamo̧ ja̧ ju chiarea̧ üdë ji̧dë u̧i̧ ji̧ra̧ tjamo̧de davä pumȩ ja̧ ju chiarea̧ pio ju̧i̧iä.

Ütë tjamo̧ judi ëna̧diärëremȩdiibe.

²⁶ Danȩrȩ ca̧ oti̧, Ütë tjamo̧ judi pio dibë pearä ëna̧diärërea̧ pio ju̧i̧ chjiari chjadëri̧ jo̧rȩtachji̧vä. Jabechji̧ Ütë tjamo̧ judi dibë pearä ëna̧diäa̧rä, jabechji̧ ba chia tjamo̧mi̧ dari̧ cjiaji̧ri̧ oa ëna̧diädërëremȩdidibe. Jabechji̧ ji̧ra̧dërëreji̧ri̧nȩrȩ a̧dë chjäte dabarea̧ chiaji̧ri̧ judiro̧. Ji̧ra̧dërëreji̧ri̧nȩrȩ go̧ȩ i pio oaiä dabapea̧ji̧ri̧ judiro̧. Ado dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧ dibë daea̧ ji̧, 'jabechji̧ tjamo̧ri̧ dabarea̧ chiadiro̧da’ quëna̧ jo̧rȩtaji̧ri̧rȩ dadëa̧diro̧dibe. Ado danȩrȩ, peaja̧di ji̧ra̧dërëreji̧ri̧nȩrȩ chiri tjamo̧ yo̧ji̧ri̧mi̧ dari̧ cjo̧ro̧ji̧ri̧ judiro̧. Tjamo̧ davä. Ütë tjamo̧ judi dibë pearä ëna̧diäa̧rä, ji̧ra̧ tjamo̧dërëreji̧ri̧nȩrȩ chiri ütë pio judiri ja̧ji̧ri̧ judiro̧.

²⁷ Jabo ja̧di dari̧ cjiaräbo, jabechji̧ Ütë tjamo̧ judi mitërëremȩdidibe jibëa̧pe bagapea̧ oa. ‘Jabechji̧ dai chirirä jo̧rȩtaji̧ri̧ pio ji̧ri̧iä dabarea̧ chiadëji̧ri̧ pio ji̧ri̧ mitëpaquiji̧ri̧da’ quëna̧ ütärë jo̧rȩtarëremȩde Ütë tjamo̧ judi, 'dabarea̧ chiaji̧ri̧ tjamo̧a̧ro̧da’ quëna̧ji̧ri̧ pio judiro̧ idëri̧ cjiaji̧ri̧rȩ cjiadiäpea̧ oa. ‘Ado dai chirirä jo̧rȩtaji̧ri̧ pio ji̧ri̧iä ju chiadëji̧ri̧ pio ji̧ri̧ mitëpaquiji̧ri̧da’ quëna̧ ütarë jo̧rȩtarëremȩde peaja̧di ‘ju chiaji̧ri̧ tjamo̧a̧ro̧da’ quëna̧ji̧ri̧ pio judiro̧ idëri̧ cjiaji̧ri̧rȩ cjiadiäpea̧ oa.

²⁸ Jabechji̧ dai chirirä ja̧ jo̧rȩtaji̧ri̧ pio judiro̧ badë daea̧ pumȩ pio ji̧ri̧ mitërëremȩdiibe pio ibë. Tjamo̧ davä. Judiro̧ ya̧e chjaoa̧ pumȩ pio ji̧ri̧, judiro̧ ba chia dadëa̧ pumȩ pio ji̧ri̧ mitërëremȩdiibe Ütë tjamo̧ judi jibëa̧pe bagapea̧ oa. Ado pio ju̧i̧iä a̧dë chjäte poë cürë jo̧rȩtapadirȩ dai chirirä ja̧ jo̧rȩtaji̧ri̧ pio judiro̧. ‘Jabo cjäri̧ madida, a̧ro̧rȩ ba chia daea̧ üdë ba chiadë jirodida, Ütë tjamo̧ pio ju̧i̧iä ba chiadë jirodida, jabo a̧ro̧rȩ badë daea̧ pio judi ba chia jirodida’ quëna̧ jo̧rȩtapadirȩ poë cürë jo̧rȩtaji̧ri̧rȩ. Jabechji̧ pio ji̧ri̧iä ba chiamȩ üdë badëde Ütë tjamo̧ pio ju̧i̧iä.

²⁹ Ado pio ju̧i̧iä eami̧ pumȩ üdë Ütë tjamo̧ ja̧ dëbëräpȩ cjiadäräa̧rä, jabechji̧ pio jȩa chjiari goaeri̧ yo̧rea̧ dadëpade. Tjamo̧ davä. Jënȩ chjadëri̧ japea̧ pio ju̧i̧ chjiari goaeri̧ yo̧rea̧ dadëpade Ütë tjamo̧ ja̧ dëbëräpȩ cjiadäräa̧rä.

³⁰ Jabechji̧ Ütë tjamo̧ pio judi tjamo̧de pio ibë chjiari tuti japarëremȩ üdë. Jabechji̧ pio judi tänȩa̧ oaiä, Jechu Quiricho pio ju̧i̧ nö̧ta cja̧rȩmȩpe bagarërereji̧ri̧rea̧rȩ. Ado yaba̧ Jechu Quiricho pio ju̧i̧iä a̧dë chjäte dabarea̧ chiaji̧ri̧pea̧rea̧rȩ Ütë tjamo̧ pio ju̧i̧ chjiari. Ado pio ju̧i̧iä jabechji̧parȩa̧ oa cjiaji̧ri̧pea̧rea̧rȩ ca̧ oti̧. Ado pio ju̧i̧iä jabechji̧, china̧chjari̧ tutia̧ oa cjiaji̧ri̧pea̧rea̧rȩ Ütë tjamo̧ pio ju̧i̧ ja̧ mape bagapea̧ oa. Jabechji̧ a̧ro̧rȩ chjai̧dë ja̧ chja̧oerä tutia̧ oa cjiami̧ dari̧ cjiarërea̧ ji̧, jabechji̧ jare chjadüa̧ oa cjiami̧ dari̧ go̧dü tänȩa̧ oa cjiaji̧ri̧pea̧rea̧rȩ pio ju̧i̧iä, Ütë tjamo̧ pio ju̧i̧iä.

³¹ Ado ja̧di tara a̧ro̧rȩ pio ibë chjiari goaeri̧ yo̧rea̧mi̧dëde. Ado danȩrȩ, pio yoa ma̧ȩ üdë ji̧mo̧ baäde no̧mȩ tjamo̧ri ja̧ go̧ȩparërea̧ ma̧ȩ pio ju̧i̧ nö̧ta. Ta̧rëchji̧vä: "Aja̧, eami̧ pumȩ üdë chjacjiamȩri̧ ni̧bätämi̧ cjiarä judi, eami̧ pumȩ üdë goaeri̧ ni̧bätämi̧ cjiarä judi, jabechji̧ pio jȩa chjiari chjacjiamȩri̧ ni̧bädëtäremȩde, jabo Ano̧mȩ pio ju̧i̧ chjiari chjacjiamȩri̧ ni̧bätäremȩde, judi pio ibë chjiari ana̧ri̧ tuti japarëremȩ pio ju̧i̧ chjiari. Aja̧, pio ju̧i̧ chjiarimo̧ goaeri̧ ni̧bätäremȩde.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë goaeri̧ ni̧bäpea̧ pio ju̧i̧ chjiari, a̧ro̧rȩ Ütë tjamo̧ pio ju̧i̧iämo̧i̧ goaeri̧ ni̧bäpea̧ oa.