Chamue Ma̧ȩ 2 7 - Biblia Pume

Davi judi Ütë tjamo̧ ja̧ bë oa cji̧dätämi̧ cjiarëremȩdejȩ

¹ Ado Jeova judi icharaita pio ji̧ri̧ chjiari ana̧ri̧ tuti japea̧ oaiä, jabechji̧ chjadëri̧ cjo̧ro̧rëreji̧ri̧dirȩ jibë eadëji̧ri̧ pio judiro̧ eami̧ oa japarea̧ dadëri̧. Jabechji̧ chjadëri̧ cjo̧ro̧rëreji̧ri̧dirȩ ütëborë, uapadëji̧ri̧rȩ. Ado pio ju̧i̧iä Davi pio judiborë chjadëri̧ cjo̧ro̧rëremȩde. Jibëa̧ bë chjacjiamȩrä, ana̧ tjamo̧ro cjo̧ro̧rëremȩde, chiri ütëmȩrȩ cjo̧ro̧rea̧ bërä.

² Ado Davi judi Nata̧ quȩmȩ pio ju̧i̧ ni̧bätämi̧ cjiamȩrȩ ma̧ȩ chjadürëremȩdejȩ pio jȩaiäpȩ jana̧tä. Ado ja̧dëa ji̧ jana̧mȩ oa, ja̧di ta̧rëri̧ yo̧a̧dejȩ Nata̧ quȩmȩ pio ju̧i̧iäpȩmo̧, Ütërë ea jana̧ chjadüa̧ oa ni̧bämȩ pio ju̧i̧iäpȩmo̧: —Danȩ, pio yi cjo̧ro̧requede ca̧ bë chjadërä, chjacjiamȩrä, chedoro quȩmȩ to maeara̧ japea̧ bërä. Jabechji̧ chjadë tjamo̧ri̧ cjo̧ro̧requede. Jabo danȩ, ja̧didëde Ütë tjamo̧ ja̧ to cjara üdë. Jabechji̧ Ütë tjamo̧ ja̧ to cjara üdë jabomo̧ ira̧ japea̧ oa cjiamȩ jo̧ro tutia̧ oa cjiade. Pio ju̧i̧iä ana̧ri̧ jo̧rȩtarequede —yo̧a̧dejȩ.

³ Ado Nata̧ judi pio ju̧i̧ ta̧rëa̧ oaiä ja̧di ta̧rëri̧ dëbë yo̧a̧dejȩ: —Danȩ, Jeova judi pio mȩadimȩde. Pio ju̧i̧iä jabechji̧, mȩnȩ jo̧rȩta̧mi̧ japavä —yo̧a̧dejȩ.

⁴ Jabo gȩnȩpea̧rä, Jeova judi ma̧ȩ yürürëremȩdejȩ Nata̧ pio ju̧i̧, ja̧di ta̧rëri̧ yo̧mȩrȩ:

⁵ —Danȩ, goëdejo̧ȩ Davi pio ju̧i̧, ca̧ mu̧i̧tjoi̧ pio ju̧i̧. Pio ju̧i̧iäpȩmo̧ ma̧ȩ yürütä earequedemȩ. Ja̧di ta̧rëri̧ yo̧tä earequedemȩ pio ju̧i̧iäpȩmo̧: “Aja̧, ja̧di ta̧rëri̧ yo̧dimȩ Jeova judi. Jabechji̧ cüdë bëpapea̧ jo̧ oa cji̧dätä eadërequedemȩ.

⁶ Danȩ, cüdë icharaita ji̧ri̧ Ejito chiriri pio judiri go̧dü tänȩrërea̧ pio judiri yurori, jabechji̧ bë ana̧rä bëpadë marëremȩrequede jabo jabechji̧ ira̧ japea̧ jo̧romo̧ bëparëremȩrequede, chjaodëri̧ iëchärea̧mi̧ da jo̧ro. Tjamo̧ davä. Ado chjereno̧ cji̧därea̧mi̧ da jo̧ro bëparëremȩrequede icharaita pio ji̧ri̧ nö̧ta chjätäti̧ cjiarërea̧ ji̧.

⁷ Ado cüdë icharaita pio ji̧ri̧di chjätäti̧ cjiarërea̧ ji̧, jabechji̧ eami̧ tjamo̧ yo̧mȩ pio ju̧i̧, jabechji̧ yo̧dëa̧reconȩ. 'Aja̧, chedoro quȩmȩ tora̧ pio ju̧ri̧ra̧ ca̧ bë oa cji̧de yürücoe' yo̧dërëremȩreconȩ. Cja̧rȩmȩ co ja̧di ta̧rëri̧ yo̧dërëremȩreconȩ. Jabechji̧ i maeara̧ japea̧ oa cjiamȩ jo̧ro cjo̧ro̧requede jabechji̧.“ Aja̧ Nata̧, ja̧di ta̧rëri̧ yo̧emȩrenȩ Davi pio ju̧i̧iäpȩmo̧.

⁸ Ado danȩ Nata̧, pio ju̧i̧ uëri pio yoa ma̧ȩbo ade yo̧tä earequedemȩ pio ju̧i̧iäpȩmo̧. Aja̧, ja̧di ta̧rëri̧ a̧de yo̧tä earequedemȩ: “Danȩ Davi, a̧dë chjäte ju chiamȩ pio judirequede mȩaiäpȩmo̧ ma̧ȩ yürümȩ judi. Jeova pio judirequede. Ado chiri tjoräpȩmȩ oa, oveja ji̧ri̧ jidamȩ oa mitërëremȩrequedemȩ mȩnȩ ütëmȩrȩ cjo̧ro̧pea̧ oa, Icharai pio judiri ja̧ pumȩ pio ji̧ri̧ ja̧ ütëmȩrȩ ano̧ mire cjo̧ro̧pea̧ oa.

⁹ Ado danȩ, mȩnȩ eami̧räpȩ tai̧ cjia̧ ji̧, jabechji̧ ji̧dë ma ëba cjiarëremȩrequedemȩ mȩa a̧dë baärea̧ decjiari̧. Ado mȩa eadëji̧ri̧ pio ji̧ri̧ acji tai̧a̧ ji̧, jabechji̧ ji̧dë ma boadärärea̧ yürürëremȩrequedemȩ. Ado yaba̧ mȩnȩ chiri ütëmȩrȩ cjo̧ro̧pea̧ oaiä, jabechji̧ oëra̧ti̧ oa cjo̧ro̧ji̧ri̧ judiro̧ pio mȩa chjiari goë goë ta̧rëpadirȩ. Ado ba chia jo̧rȩtapadiro̧mȩ. Aja̧, pio cüdë tänȩa̧ oa ba chia jo̧rȩtapadiro̧mȩ

^10-11 Ado danȩ, ca̧ pumȩ pio ji̧ri̧ chjadëri̧ yürüparequedejȩrȩ jibëa̧ chiri oa judiro̧ chjadëri̧ cjo̧ro̧rea̧ dapea̧ oa. Aja̧, judiro̧ uapadëji̧ri̧rȩ cjo̧ro̧pea̧ oa, chji̧ goaera̧ jo̧rȩtaji̧ri̧rȩ cjo̧ro̧pea̧ oa yürüparequedejȩrȩ, judiro̧ ji̧dë ma conȩda̧ oa cjiachea oa. Jabechji̧ pumȩ chjadëdë judiro̧ pio ji̧ri̧iäpȩ ji̧dë ma acji go̧düdärä chjaorërea̧ ji̧, ma̧i̧ dari̧ japarërea̧ ji̧, ja̧di dari̧ japarea̧ dadëpadirȩ yaba̧ cüdë go̧dü tänȩji̧ri̧ pio ji̧ri̧ mitëa̧ oaiä. Jabechji̧ icharaita judiro̧ pio ji̧ri̧ ja̧ chja̧oerä cjo̧ro̧ji̧ri̧pea̧ pio judiri yurori japarea̧ dadëa̧diro̧jȩrȩ. Tjamo̧ davä. Judiro̧ ca̧ pumȩ ji̧ri̧ pearä japarërea̧mi̧ japarea̧ dadëji̧ri̧pea̧dirȩ yaba̧ cüdë go̧dü tänȩji̧ri̧ pio ji̧ri̧iä ana̧ri̧ tuti japea̧ oaiä. Ado danȩ Davi, Jeova pio judimȩrȩ pio yoa ma̧ȩbo a̧de yürürequedemȩ na̧ea̧ri ja̧ji̧ri̧ pio ji̧ri̧ chjiari. Danȩ, na̧ pumȩ judiro̧ ji̧dë ma ano̧ mire chiri ütëji̧ri̧rȩ cjo̧ro̧padirȩ bucho ana̧, chiri ütëdëpe bagarea̧mi̧dëri̧.

¹² Tjamo̧ davä. Mȩnȩ ütama̧i̧pa ëte ja̧boa̧rä, mȩnȩ na̧ ütëti̧rea̧ pio ji̧ri̧ nö̧ta na̧ra̧ oa cjiarä, jabechji̧ mȩnȩ nö̧ria̧ pio ju̧i̧ cja̧rȩmȩ oa ano̧ mire ütë tänȩpareconȩ. Ado pio ju̧i̧ ja̧ chja̧oerä cjo̧ro̧paji̧ri̧ judiro̧ no̧i̧dë tjamo̧padirȩ.

¹³ Ado pio ju̧i̧ mitëpareconȩ ca̧ bë oa cji̧däpea̧ ji̧. Ado pio judiri ja̧ji̧ri̧ pio judiro̧, jabechji̧ ji̧dë ma ba chia tjamo̧räpȩ chapadirȩ chiri ütëji̧ri̧rȩ. Goarijärea̧ decjiari̧, yuroparea̧ decjiari̧ ano̧ mire ütëji̧ri̧rȩ cjo̧ro̧padirȩ bucho ana̧.

¹⁴ Ado na̧ ja üdë, jabechji̧ ca̧ japadique. Ado pio ju̧i̧ ja̧ ama̧i̧parequede. Ado judi oëra̧diärä judi, jabechji̧ ama̧i̧rȩ japarëmi̧ cjiari̧ japapareconȩ bide cjaeämi̧ dari̧.

¹⁵ Ji̧dë ma cjäri̧ri̧ cjia dapareconȩ cjäri̧ri̧ cjia dadëpe bagarea̧ decjiari̧. Ji̧dë ma eapareconȩ eadëpe bagarea̧ decjiari̧. Jabechji̧ Chauro pio ju̧i̧ jiadarërea̧mi̧ jiadadëpareconȩ. Chauro pio ju̧i̧ ütë cjatä tänȩrërea̧mi̧ ütë cjatä tänȩdëpareconȩ.

¹⁶ Ado danȩ, na̧ea̧ri ja̧ji̧ri̧ judiro̧ ji̧dë ma ütëji̧ri̧rȩ cjo̧ro̧padirȩ yuroparea̧ decjiari̧. Tjamo̧ davä. Pumȩ judiro̧, jabechji̧ na̧ea̧ri ja̧mȩ pio ju̧i̧ ja̧ chja̧oerä bucho ana̧ cjo̧ro̧padirȩ, na̧ea̧ri ja̧dëmȩ pio ju̧i̧ ja̧ chja̧oerä ano̧ mire cjo̧ro̧rea̧ decjiari̧.“ Aja̧, ja̧di ta̧rëri̧ yo̧tä earequedemȩ Davi pio ju̧i̧iäpȩmo̧ —yo̧mȩrȩ ni̧bä chjaorëremȩdejȩ Nata̧ ju̧i̧iäpȩmo̧ Ütë tjamo̧ judi.

¹⁷ Ado Nata̧ judi pio jiro ma̧ȩ oa ta̧rëa̧ oaiä, jabechji̧ ütëbo oa ni̧bä chjaorëremȩdejȩ Davi pio ju̧i̧.