Chamue Ma̧ȩ 2 5 - Biblia Pume

Davi judi icharaita ja̧ ütëmȩrȩ cjo̧ro̧rëremȩde

¹ Ja̧dëa ji̧ Icharai ja̧ u̧ri̧ pio judiri ja̧ji̧ri̧ buba 12rë goëdepea̧diro̧jo̧ȩ Davi pio ju̧i̧, Eboro̧ quȩmȩräpȩmȩ oa. Ado ju̧ri̧pȩ go̧düdäräji̧ri̧rȩ ja̧di ta̧rëri̧ yo̧rëreji̧ri̧diro̧jo̧ȩ: —Danȩ, cja̧rȩmȩ pumȩrea̧rȩ. Mȩadi ja̧ji̧ri̧rea̧rȩ.

² Ado chjadëri̧ dabarea̧ro̧mȩ. Jabechji̧ Chauro judi ibëa̧ ütërërea̧räbo, pio mȩnȩ tjamo̧renȩ pio ibë nö̧ta ëba tai̧ chjaorëremȩ judi a̧ro̧rȩ acji tai̧a̧ ji̧. Tjamo̧ davä. Ibë eadëji̧ri̧ judiro̧ pio ibëiäpȩmo̧ acji jana̧tärea̧ ji̧, jabechji̧ pio mȩnȩ ëba tai̧ chjaorëremȩrenȩibe pio ji̧ri̧iäpȩ acji jäpea̧ oa. Ado pio ju̧i̧iä icharaita judiro̧ ütëborë pio mȩamo̧ cho̧rë järëreji̧ri̧rea̧ro̧mȩ, tjamo̧ ëba acji tai̧mȩ pio ju̧i̧, Chauro pio ju̧i̧dë. Ado danȩ, Jeova judi pio mȩaiäpȩmo̧ yo̧ë cji̧däa̧bea pio ju̧i̧ chjiaribo dabarea̧rȩ. Aja̧, judi pio mȩaiäpȩmo̧ yo̧ë cji̧däa̧bea ji̧, “Aja̧, oveja jidami̧ dari̧ jidaparenȩjȩrȩ ca̧ pumȩ pio ji̧ri̧” yo̧a̧bea ji̧, “Icharai pio judiri ja̧ ji̧ri̧ pio ji̧ri̧ ja̧ ütëmȩrȩ cjo̧ro̧parenȩ” yo̧a̧bea ji̧ dabarea̧rȩ. Pio ju̧i̧iä jabechji̧, 'Ibëa̧ ütëtäremȩdida' quëna̧ jo̧rȩtarea̧ro̧mȩ —yo̧ji̧ri̧rȩ ni̧bä chjaorëreji̧ri̧diro̧jo̧ȩ Davi ju̧i̧, tjamo̧ yo̧ji̧ri̧ judiro̧.

³ Ado pio ju̧i̧iä Davi judi yo̧ë cji̧därëremȩdejȩrȩ Icharai ja̧ tjamo̧ yo̧ji̧ri̧ pio ji̧ri̧. Jabechji̧ pio jȩa goëdaera̧pea̧ji̧ri̧ oa, Eboro̧räpȩ ni̧bä chjaoera̧pea̧ji̧ri̧ oa, yo̧ë cji̧därëremȩdejȩrȩ Jeova pio ju̧i̧ ja̧ dachoro. Aja̧, judi jibëa̧ ütëmȩrȩ cjo̧ro̧pea̧ pio ju̧i̧ chjiari, judiro̧ ütëborë cja̧rȩmȩ chji̧ chiami̧ dari̧ jo̧rȩtapea̧ pio ju̧i̧ chjiari yo̧ë cji̧dämȩrȩ, ni̧bä chjaorëremȩdejȩrȩ jënȩ yo̧a̧mi̧ japapea̧ ma̧ȩ maea oa. Ado judiro̧ Davi pio ju̧i̧iä ta̧rë ëte, jabechji̧ yo̧ oa arë cjarärëreji̧ri̧diro̧jo̧ȩ jibëa̧ tjübë oa ütë tänȩpea̧ oa. Ado Icharai pio judiri ja̧ji̧ri̧ pio ji̧ri̧ ja̧ ütëpe bagarëremȩde.

⁴ Aja̧, 30 ui goamȩrȩ icharaita ja̧ ütëpea̧de. Ado 40 ui nö̧ta ütëmȩrȩ cjo̧ro̧rëremȩde.