Chamue Ma̧ȩ 1 8 - Biblia Pume

Icharaita judiro̧ chiri ütë oa goatämi̧ cjiaji̧ri̧rȩ cjo̧dërëreji̧ri̧dirȩ Chamue pio ju̧i̧iä

¹ Ado Chamue judi ütama̧i̧ tjamo̧pea̧rä, jibëa̧ u̧ri̧ pio ji̧ri̧ mitërëremȩdejȩrȩ. Chjai̧dëri̧ japaji̧ri̧ pio ji̧ri̧ iëno̧ iëno̧ ta̧rëpea̧ oa, pio ji̧ri̧ ütarë ta̧rë ëte bape chjaopea̧ oa mitërëremȩdejȩrȩ, tjamo̧ ütaraji̧ri̧rȩ cjo̧ro̧pea̧ oa.

² Yabomȩ judi Joe quȩmȩrëremȩde. Ado durimȩ judi, Abia quȩmȩrëremȩde. Ado judiro̧ yo̧a̧ri̧borë Becheba quȩmȩ bë ma̧ri̧räpȩ ju̧ri̧ ja̧bepaji̧ri̧pe bagarëreji̧ri̧dirȩ. Pumȩ ji̧ri̧ ütarë ta̧rë ëte bape chjaopea̧ ji̧ ja̧bepaji̧ri̧pea̧dirȩ.

³ Jabo cjäri̧ madirȩ, pio jibë nö̧rimȩ pio ju̧i̧ chjadëri̧ cho̧rëdiätärea̧ ji̧, coëma cjiari̧ cjo̧ro̧mȩ pio ju̧i̧ cho̧rë japatärea̧ ji̧, cho̧rëdiädëa̧diro̧jo̧ȩ. Chëre maea oa jo̧rȩtaji̧ri̧rȩ cjo̧ro̧rëreji̧ri̧dirȩ. Ado pio ju̧i̧iä ade cjiami̧ dari̧ cjiadiärëreji̧ri̧dirȩ. Tjamo̧ davä. Pumȩ pio ju̧i̧iä chjadëri̧ iëno̧ iëno̧ ta̧rë ëte coëma cjiari̧ ütarë yo̧tärea̧ ji̧, chjai̧dëri̧ japea̧mȩ pio ju̧i̧ chjadëri̧ ütarë bape chjaotärea̧ ji̧, cjäri̧ madirȩ, oëra̧diämi̧ dari̧ japarëreji̧ri̧dirȩ. Jabechji̧ chjai̧dëri̧ japadëmȩ pio ju̧i̧ cjäri̧ri̧ cjia datärea̧ ji̧, pio jibëiäpȩmo̧ chëre oa yürüa̧mȩ pio ju̧i̧äpȩmo̧ ma cjäri̧ri̧ cjia darëreji̧ri̧diro̧jo̧ȩ, chjai̧dëri̧ japamȩ pio ju̧i̧. Ado pio jibëiäpȩmo̧ yürüdëmȩ pio ju̧i̧äpȩmo̧ cjäri̧ri̧ cjia dadëa̧diro̧jo̧ȩ jabo pio ju̧i̧ bape chjaoa̧diro̧jo̧ȩ, chjai̧dëri̧ japadëmȩbo oa. Aja̧, ja̧di dari̧ ja̧bepe cjiaji̧ri̧rȩ japarëreji̧ri̧dirȩ ma̧i̧ dari̧ japaji̧ri̧rȩ, tjamo̧i̧ cjiari̧ ütarë bape chjaodëji̧ri̧rȩ.

⁴ Pio ju̧i̧iä Icharai pio judiri ja̧ji̧ri̧ ütëti̧ pio judiro̧ a̧dopa ëte goëdepea̧diro̧jo̧ȩ Chamue pio ju̧i̧, Dama quȩmȩ bë ma̧ri̧räpȩmȩ oa.

⁵ Ado Chamue pio ju̧i̧iäpȩ go̧düdärä ëte, ja̧di ta̧rëri̧ yo̧rëreji̧ri̧diro̧jo̧ȩ: —Danȩ, ütama̧i̧ tjamo̧pea̧renȩ yaba̧. Ado na̧ u̧ri̧ judiro̧ pio mȩnȩmi̧ dari̧ cjiatärea̧ ji̧, cjäri̧ madirȩ, pio mȩnȩmi̧ dadëdirȩ. Ado pio mȩnȩ coëma cjiari̧ ütarë yo̧a̧mi̧ japadë madiro̧ibe. Jabechji̧ coëma cjiari̧ cjo̧ro̧dëdirȩ. Pio ju̧i̧iä jabechji̧ dai oa cjo̧ro̧mȩ ütë oa mitëtä earea̧ro̧mȩ a̧ro̧rȩ ütëborë pio ju̧i̧ ja̧ chja̧oerä ano̧ mire cjo̧ro̧pea̧ oa. Peaja̧di dari̧ cjoro maeadirȩ ibëa̧ yuroro cjo̧ro̧ji̧ri̧ pumȩ judiro̧. Jibëa̧ ütë oa goa maeadirȩ. Ado peaja̧di dari̧ cjo̧ro̧tämi̧ cjiarea̧rȩ a̧ro̧rȩ. Ado pio ju̧i̧iä yo̧rea̧ro̧mȩ ibëa̧ ütë oa mitëtä —yo̧ji̧ri̧rȩ yo̧rëreji̧ri̧diro̧jo̧ȩ Chamue ju̧i̧iäpȩmo̧.

⁶ Jabo judiro̧ dai oa cjo̧ro̧mȩ ütë oa mitë yürütä eaji̧ri̧rȩ goë cjo̧dëa̧ üdë goae tjamo̧dërëremȩde Chamue pio ju̧i̧iä. Ado pio ju̧i̧iä ana̧ri̧ jo̧rȩtamȩrȩ goë cjo̧dërëremȩdejȩ Jeova ju̧i̧iä pio ju̧i̧ chjiari.

⁷ Jabo Jeova judi ja̧di ta̧rëri̧ yo̧mȩrȩ dëbë yo̧rëremȩdejȩ: —Danȩ, ta̧rë ja̧bojȩrȩ icharaita ji̧ri̧. Chja jabechji̧ judiro̧ yo̧a̧mi̧ japavä. Danȩ, pio mȩa tjamo̧ri̧ jiadadëdiro̧mȩ jabo pio coa jiadadiro̧coe. Danȩ, pio cüdërequede ji̧ri̧ ja̧ Ütë judi, jabo cjäri̧ madirȩ, ca̧ chja̧oerä cjo̧ro̧dëri̧ cjiadirȩ. Ado pio ju̧i̧iä jiadadiro̧coe.

⁸ Jabechji̧ cüdë pio jiro pumȩ ji̧ri̧ Ejito chiriri pio judiri go̧dü tänȩa̧ri ja̧ ji̧dë ma jiade chjaodiro̧coe, putu jura̧ a̧dë chami̧ dari̧. Pio coaiäpȩmo̧ ma chjacjiamȩri̧ jo̧rȩtatärea̧ ji̧, cjäri̧ madirȩ, ado cja̧rȩmo̧ ütë oa, ado cja̧rȩmo̧ ütë oa ano̧ mire jo̧rȩte chjaodiro̧jȩrȩ. Aja̧, no̧mȩ tjamo̧ri ja̧ jiade chjaodiro̧coe. Ado peaja̧dimi̧ dari̧ japadiro̧mȩ yaba̧.

⁹ Ja̧di tara yo̧requedemȩ. Jabechji̧ chjadëri̧ ta̧rë ja̧bojȩrȩ. Judiro̧ mȩa yo̧a̧mi̧ japavä. Jabo danȩ, chjadëri̧ ütarë yo̧jȩrȩ dai oa cjo̧ro̧mȩ ütë pio ju̧i̧ ja̧ chja̧oerä cjo̧ro̧pea̧ pio ju̧i̧ chjiari. Jabechji̧ goae tjamo̧dëpadejȩrȩ. Chjai̧dë oa chjätä tänȩpai̧ dadejȩrȩ. Conȩdami̧ dari̧ japapai̧ dadejȩrȩ. Aja̧, chjadëri̧ ütarë yo̧jȩrȩ jabërä judiro̧ dabadëchea oa —yo̧mȩrȩ yo̧rëremȩdejȩ Chamue pio ju̧i̧iäpȩmo̧ Jeova judi.

¹⁰ Pio ju̧i̧iä Chamue judi Jeovarë yürüa̧ ma̧ȩ ütëbo oa ni̧bä chjaorëremȩdejȩrȩ icharaita ji̧ri̧iäpȩmo̧, pio jȩaiä dai oa cjo̧ro̧mȩ ütë oa yürütä eaji̧ri̧ pio ji̧ri̧iäpȩmo̧. Ja̧di ta̧rëri̧ yo̧mȩrȩ yo̧rëremȩdejȩrȩ:

¹¹ —Danȩrȩ, mȩnȩro̧ cjo̧dëa̧mi̧ yürüpadidibe Jeova judi. Mȩnȩro̧ cjo̧dëa̧mi̧ yürüpadidibe dibëa̧ ütë oa. Jabo mȩnȩro̧ dabadëchea oa chjadëri̧ ütarë yo̧parequededibe pio jiro ütë ja̧ chja̧oerä cjo̧ro̧pea̧ pio ju̧i̧ chjiari. Danȩrȩ, dibëa̧ u̧ri̧ pio ji̧ri̧, mȩnȩro̧ cjäri̧ri̧ cjia da̧ pio ji̧ri̧ baë mitëmi̧ dari̧ mitëpadejȩrȩ. Jabechji̧ jibëa̧ guadiape jäpea̧ oa mitëpadejȩrȩ mȩnȩro̧ jiadarea̧mi̧dëri̧. Ado o ji̧ri̧ mitëpadejȩrȩ jibëa̧ yae charara̧ bagura tänȩpea̧ oa, acji tai̧pea̧ oa. Tjamo̧ davä. Ja̧di dari̧ japapadejȩrȩ. Ado danȩrȩ, o ji̧ri̧ jibëa̧ yaera̧ uë chaji̧ri̧rȩ acji tai̧pea̧ oa mitëpadejȩrȩ. Ado o ji̧ri̧ a̧de mitëpadejȩrȩ pio jȩa chjadëri̧ jidapea̧ oa. Ado judi jibëa̧ yae charara̧ tai̧a̧ ji̧, jabechji̧ o ji̧ri̧ mitëpadejȩrȩ chara yaboi̧räpȩ jäji̧ri̧rȩ ëna̧diäpea̧ oa. Jabechji̧ dae cjiaji̧ri̧ judiro̧, 'Aja̧, ibëa̧ ütë judi jana̧diibëda' quëna̧ dabapea̧ oa, jabechji̧ chara yaboi̧ ëna̧diäriä tai̧padirȩ pumȩ judiro̧ ütëborë ütë pio ju̧i̧iäpȩmo̧ ba chia jo̧rȩtapea̧ oa.

¹² Ado danȩrȩ, o ji̧ri̧ a̧de mitëpadejȩrȩ guadia ütë tjamo̧ tänȩpea̧ oa. Ado pio ji̧ri̧ ja̧ chja̧oerä ja̧bepapaji̧ri̧ judiro̧ cja̧rȩmȩ mil guadia mu̧i̧tjoi̧dirȩ. Ado pio ji̧ri̧bo mitëpadejȩrȩ. Ado pio ji̧ri̧ uëri o ji̧ri̧ a̧de mitëpadejȩrȩ. Aja̧, tjamo̧ yo̧ji̧ri̧ guadia tänȩpea̧ oa mitëpadejȩrȩ. Ado pio ji̧ri̧ ja̧ chja̧oerä ja̧bepapaji̧ri̧ judiro̧ jabechji̧ 50 guadia mu̧i̧tjo̧i̧dirȩ. Pio ji̧ri̧bo mitëpadejȩrȩ. Aja̧ ca̧ oti̧, ja̧di dari̧ mitë chjaopadejȩrȩ davä dibëa̧ u̧ri̧ pio ji̧ri̧. Ado jibëa̧ tjado oa chjadëri̧ cabëpapea̧ oa peaja̧di mitëpadejȩrȩ o ji̧ri̧, jibëa̧ mu̧i̧tjoi̧paji̧ri̧ oa. Ado ji̧ri̧ uëri o ji̧ri̧ a̧de mitëpadejȩrȩ jibëa̧ jurarea̧ oa mitë yürüpea̧ oa. Tjamo̧ davä, ütë ja̧ tjadoro ja̧ jurarea̧ üdë joechjapea̧rä, mitë yürüpadiro̧jo̧ȩ. Aja̧, dibëa̧ u̧ri̧ pio ji̧ri̧ mitëpadejȩrȩ ja̧di dari̧ ja̧bepapea̧ oa. Ado yipjatë oa jëdano̧pea̧ oa, dëbëribo jo̧dë chiamȩ tjapënȩ jujuai̧mi̧ da oa jëdano̧pea̧ oa, acji jana̧ji̧ri̧ pio ji̧ri̧ ja̧bo tänȩrea̧ to oa jëdano̧pea̧ oa peaja̧di mitëpadejȩrȩ o ji̧ri̧. Ado yae chara ja̧ bagurarea̧ to pio ju̧i̧bo jëdano̧pea̧ oa a̧de mitëpadejȩrȩ dibëa̧ u̧ri̧ ji̧ri̧.

¹³ Ado danȩrȩ, dibëa̧ jabi pio ji̧ri̧bo mitëpadejȩrȩ goaeri̧ pjȩa̧mȩ joarea̧ oa jëdano̧pea̧ oa. Ado jibëa̧ jurarea̧ oa jëdano̧pea̧ oa, jibëa̧ chja̧pe oa japapea̧ oa, peaja̧di mitëpadejȩrȩ jibëa̧ mu̧i̧tjo̧i̧paji̧ri̧ oa. Aja̧, ja̧di ta̧rëri̧ yo̧mȩrȩ ütarë yo̧requededibe jabërä, mȩnȩro̧ dabadëchea oa.

¹⁴ Ado danȩrȩ, dibëa̧ tjado chjadë tjamo̧ oa peaja̧di mitëpadejȩ jibëa̧pe bagari̧. Tjamo̧ davä. Dibëa̧ tjado chjadëdë oa mitëdëpadejȩ, jabo chjacjiamȩ tjamo̧ pio ju̧i̧mo̧ mitëpadejȩ, jurarea̧ ji̧ra̧ri̧ chiamȩ tjado oa. Uva chiamȩ tjado oa, orivo quȩmȩ jurarea̧ chiamȩ tjado oa mitëpadejȩ jibëa̧ mu̧i̧tjoi̧ tjamo̧ pio ji̧ri̧iäpȩmo̧ yürüpea̧ oa, judiro̧ jurarea̧ dapea̧ oa.

¹⁵ Ado mȩnȩro̧ dibëa̧ tjadoro jurarea̧ pio ju̧i̧ mitërä, peaja̧di mitëpade. Ütëbo oa mitëdëpade jabo o oa mitëpade. Jabechji̧ mȩnȩro̧ ichi chjö̧na̧i̧ tirigo chomi̧ da oa mitërea̧ darä judi, jabechji̧ cja̧rȩmȩmi̧ da oa mitëpade pio dibëiä. Ado mȩnȩro̧ ta ütëbo tirigo chomi̧ da oa mitërea̧ darä judi, jabechji̧ yo̧a̧ri̧ chomi̧ da oa mitëpade pio dibëiä. Aja̧, ja̧di maeari̧ japapade. Tjamo̧ davä. Mȩnȩro̧ ichi chjö̧na̧i̧ uvami̧ da oa mitërea̧ darä judi, jabechji̧ cja̧rȩmȩ uvami̧ da oa mitëpade pio dibëiä. Ado mȩnȩro̧ ta ütëbo uvami̧ da oa mitërea̧ darä judi, jabechji̧ yo̧a̧ri̧ uvami̧ da maea oa mitëpade. Jabo danȩrȩ, mȩnȩro̧ ji̧dë u̧i̧ ji̧ra̧ oa mitërea̧ darä judi, jabechji̧ ji̧dë u̧i̧ mitëpade. Ado jabechji̧ mȩnȩro̧ 50 uvami̧ da oa mitërea̧ darä judi, jabechji̧ 5 uvami̧ da oa mitëpade. Aja̧ ca̧ pumȩ, ja̧di maeari̧ japapade. Dibëa̧ ütëbo oa mitëdëpade jabo o oa, dëdë mitëpade. Jabechji̧ jibëa̧ mu̧i̧tjoi̧ pio ji̧ri̧iäpȩmo̧ yürüpea̧ oa mitëpadejȩ, jibëa̧ mu̧i̧tjoi̧ tjamo̧ pio ji̧ri̧iäpȩmo̧bo.

¹⁶ Ado danȩrȩ, dibëa̧ mu̧i̧tjoi̧ peaja̧di mitëpadejȩrȩ. Tjamo̧ davä. Oari mu̧i̧tjoi̧ pio ji̧ri̧, ado ivi mu̧i̧tjoi̧ pio ji̧ri̧bo mitëpadejȩrȩ pio dibëiä. Ado pio ji̧ri̧ uëri dibëa̧ baca chjacjiaji̧ri̧ pio ji̧ri̧bo mitëpadejȩrȩ peaja̧di. Jabechji̧ jibëa̧ tjadoräpȩ ja̧bepapea̧ oa, dabu oa cabëpapea̧ oa mitëpadejȩrȩ. Ado dibëa̧ buro chjadë oa mitëpadejȩrȩ peaja̧di jibëa̧ jurarea̧ oa chia baäpea̧ oa. Pio jiro ja̧beparea̧ oa ja̧bepapea̧ oa mitëpadejȩrȩ.

¹⁷ Ado dibëa̧ oveja pio ji̧ri̧bo mitëpadejȩrȩ. Jabechji̧ mȩnȩro̧ ichi chjö̧na̧i̧ oveja goarä judi, cja̧rȩmȩ mitëpade. Jabo mȩnȩro̧ ta ütëbo oveja oa goarä judi, yo̧a̧ri̧ mitëpade. Ado danȩrȩ, pio yoa ma̧ȩbo a̧de yo̧requededibe. Danȩrȩ, mȩnȩro̧ dibëa̧ ütë oa goarä, mȩnȩro̧ dai oa cjo̧ro̧mȩ ütë oa goarä, jabechji̧ pio ju̧i̧ ja̧ mu̧i̧tjoi̧mi̧ dari̧ cjiadiä mapanȩrȩ mȩnȩro̧ ütëborë.

¹⁸ Ado japamitë chjätä ëte, jabechji̧ goae tjamo̧dëpe bagapadidibe. Tjamo̧ davä. Dai oa cjo̧ro̧mȩ ütë pio ju̧i̧ ja̧ chja̧oerä cjo̧ro̧pea̧ üdë goae tjamo̧dëpe bagapadidibe. Ëcarami̧ tarari̧ jo̧rȩta tänȩpadidibe. Ado pio judirä goë cjo̧dëparenȩro̧jo̧ȩ Jeova pio ju̧i̧iä dibë cjatäcjiarea̧ yürütä. Jabo cjäri̧ madidibe, Jeova judi ta̧rë ja̧bodëpadidibe. Jabechji̧ mȩnȩro̧ dai oa cjo̧ro̧mȩ ütë oa ji̧dë ma earërea̧ oaiä, jabechji̧ ta̧rë ja̧bodëpadidibe —yo̧mȩrȩ yo̧rëremȩdejȩrȩ Chamue judi icharaita pio ji̧ri̧iäpȩmo̧.

¹⁹ Jabo icharaita judiro̧ ta̧rë ja̧bodëri̧ cjiaji̧ri̧rȩ ja̧di ta̧rëri dëbë yo̧a̧diro̧jo̧ȩ: —Cjäri̧ marea̧rȩ. Dai oa cjo̧ro̧mȩ ütë oa eadë ma ja̧didë. Ea tjamo̧rea̧rȩ. Jabechji̧ chjadëri̧ yürüibe.

²⁰ Ibëa̧ yuroro cjo̧ro̧ji̧ri̧ pumȩ pio judiro̧ jibëa̧ ütë oa goami̧ dari̧ goatämi̧ cjiarea̧rȩ peaja̧di. Aja̧, ibëa̧ ütë pio ju̧i̧ ja̧ chja̧oerä cjo̧ro̧pea̧ oa, judi ibë chjadëri̧ yabo ëba tai̧pea̧ oa, ibë eadëji̧ri̧ pio ji̧ri̧ chjadëri̧ boadäräpea̧ oa ea tjamo̧rea̧rȩ. Yürüibe —yo̧a̧diro̧jo̧ȩ.

²¹ Ado Chamue judi icharaita pio ji̧ri̧iä ta̧rë ëte, jabechji̧ judiro̧ yo̧a̧ ütëbo oa yo̧a̧dejȩ Jeova pio ju̧i̧iäpȩmo̧.

²² Ado Jeova judi dëbë yo̧a̧dejȩ: —Jabechji̧ ta̧rë ja̧bojȩrȩ. Judiro̧ cjo̧dëa̧mi̧ yürüjȩrȩ jibëa̧ ütë oa —dëbë yo̧a̧dejȩ Jeova judi. Ado Jeova pio ju̧i̧iä ta̧rë ëte, Chamue judi ma̧ȩ yürürëremȩdejȩrȩ icharaita pio ji̧ri̧iäpȩmo̧. Ado ji̧ri̧iäpȩmo̧ ma̧ȩ oa yürü ëte baä tänȩrëremȩdejȩrȩ ütëbo oa, tjamo̧ yo̧ji̧ri̧ pio ji̧ri̧bo. Judiro̧ jana̧rea̧ durimo̧ baä tänȩrëremȩdejȩrȩ jibëa̧ bëräpȩ.