Chamue Ma̧ȩ 1 16 - Biblia Pume

Davi pio ju̧i̧ ano̧ mire ütë tänȩrëremȩdejȩ Jeova judi

¹ Ja̧dëa ji̧ Jeova judi yo̧rëremȩdejȩ Chamue pio ju̧i̧iäpȩmo̧: —Danȩ, ¿napai̧rä yuro gito ana̧ri̧ jo̧rȩtaparenȩ Chauro pio ju̧i̧ chjiari? Jabechji̧ jiada̧reconȩ. Icharaita ja̧ ütëmȩrȩ cjo̧ro̧rea̧mi̧dëde. Pio ju̧i̧iä ji̧dë ma gito ana̧ri̧ jo̧rȩtadëtäremȩrenȩ pio ju̧i̧ chjiari. Jabo danȩ, orivo quȩmȩ yo̧ oa mitëvä. Ado jabëtari̧mi̧ oa chjö̧ra ëte, jabechji̧ Berȩ quȩmȩräpȩ jätä earequedemȩ, Jeche quȩmȩ pio ju̧i̧ ja̧ bëräpȩ. Pio ju̧i̧ ja̧ ja pio ju̧i̧, cja̧rȩmȩ oa mitëa̧reconȩ ano̧ mire ütë tänȩpea̧ oa. Pio ju̧i̧iä jätä earequedemȩ —yo̧a̧dejȩ Chamue pio ju̧i̧iäpȩmo̧.

² Jabo Chamue judi dëbë yo̧a̧dejȩ: —Jabo cjäri̧ marequede. Ja̧di dari̧ japarea̧mi̧dërequede. Chauro judi pio ju̧i̧ chjiari goë ta̧rërä judi, "Aja̧, ado cja̧rȩmo̧ oa ano̧ mire ütë tänȩpea̧ oa tai̧ jirode" yo̧a̧ oa goë ta̧rërä judi, chjaodëri̧ ja̧bo tänȩpai̧ dadique. Ado pio ju̧i̧iä jabechji̧, ja̧dira̧ järea̧mi̧dërequede —dëbë yo̧a̧dejȩ. Jabo Jeova judi dëbë yo̧a̧dejȩ: —Danȩ, baca üi̧ boi̧ mitë ëte jäemȩrenȩ. Ado mȩnȩ Berȩräpȩ go̧düdäräa̧rä, jabechji̧ pio ju̧ri̧pȩ cjo̧ro̧ji̧ri̧ pio ji̧ri̧iäpȩmo̧ ja̧di ta̧rëri̧ yo̧emȩrenȩjȩrȩ: “Aja̧, Jeova pio ju̧i̧iäpȩmo̧ goe gu̧rori̧ cäë yürüpea̧ oa jana̧requede."

³ Ado ja̧dëa ji̧ mȩnȩ ju̧ri̧pȩ go̧düdäräa̧rä, jabechji̧ Jeche quȩmȩ pio ju̧i̧iäpȩmo̧ ma̧ȩ chjadütä earequedemȩ, judi pio mȩaiäpȩ jätä jibëa̧ pumȩ pio ji̧ri̧ nö̧ta. Jabechji̧ mȩnȩ goe gu̧rori̧ cäë yürüro, jabechji̧ pio judiborë cjiatä eareconȩ. Aja̧, ja̧di dari̧ japatä earequedemȩ Chamue. Jävä yaba̧. Ado mȩnȩ go̧düdäräa̧rä, ma̧ȩ yürüparequedemȩ mȩnȩ japapea̧ ji̧. 'Aja̧, ja̧di dari̧ japapea̧dida yaba̧, pio ju̧i̧ mitëpea̧dida' quëna̧pea̧ oa, ma̧ȩ yürüparequedemȩ. Ado pio ju̧i̧ ja̧ tjübëri yo̧ra̧ gu̧ro tänȩparenȩjo̧ȩ chiri ütë tänȩpea̧ oa —yo̧mȩrȩ yo̧rëremȩdejȩ Chamue ju̧i̧ Jeova judi.

⁴ Ado Jeova judi yo̧a̧mi̧ japarëremȩde Chamue judi. Jäa̧de Berȩ quȩmȩ bë mari̧ boi̧chji̧räpȩ. Ado ju̧ri̧pȩ go̧düdäräa̧mȩ oa, tjamo̧ cjo̧ro̧ji̧ri̧ judiro̧ uapaji̧ri̧rȩ goë daera̧pea̧diro̧jo̧ȩ. '¿Tjana̧ japera̧pea̧cjivadi' quëna̧ jo̧rȩtaji̧ri̧rȩ goëdaera̧pea̧diro̧jo̧ȩ i ma̧na̧ guraji̧ri̧rȩ. Pio ju̧i̧iä iëno̧ë ta̧rëa̧diro̧jo̧ȩ: —¿Jabo tjana̧ japea̧ oa jana̧renȩ? ¿Chjadëri̧ jana̧nȩ? Ibë cjäri̧ri̧ cjia jo̧rȩtamȩrȩ ¿jana̧nȩ? Jabo ana̧ri̧ jo̧retamȩrȩ ¿jana̧nȩ? Chjadëri̧ yo̧ibe —yo̧a̧diro̧jo̧ȩ.

⁵ Ado Chamue judi dëbë yo̧a̧dejȩrȩ: —Aja̧, chjadëri̧ jana̧requede dibë cjäri̧ri̧ cjia jo̧rȩtamȩrȩ. Jabechji̧ Jeova pio ju̧i̧iäpȩmo̧ goe gu̧rori̧ yürera̧pea̧reconȩ. Pio ju̧i̧iä jëdano̧tä earequededibe. Chjai̧dë gȩrȩ chiadëji̧ri̧mi̧ dari̧ cjiadiäpea̧ oa jëdano̧chji̧vä. Jaeibe. Ëba jächji̧coe cäë yürürea̧räpȩ —yo̧a̧dejȩrȩ. Ado Chamue judi jabërä Jeche pio ju̧i̧iäpȩmo̧ ma̧ȩ chjadüa̧ oaiä, jabechji̧ pio judiro̧borë go̧düdäräji̧ri̧rȩ dëbëdiärëreji̧ri̧diro̧jo̧ȩ. Ado pio ju̧i̧iä Chamue judi jëdano̧a̧dejȩ Jeche pio ju̧i̧ chjai̧dë gȩrȩ chiadëmȩmi̧ dari̧ cjiadiäpea̧ oa. Ado peaja̧di dari̧ japea̧dejȩrȩ pio ju̧i̧ ja̧ u̧ri̧ pio ji̧ri̧. Ado ja̧di dari̧ japa ëte pio jȩa nö̧ta jätä yabëa̧dejȩrȩ Jeova pio ju̧i̧iäpȩmo̧ yürürea̧räpȩ.

⁶ Ado cäë yürürea̧räpȩ go̧düdäräa̧rä, Chamue judi Jeche joja pio ju̧i̧ ütarë daea̧dejȩ yabomȩ ju̧i̧, Eriabo quȩmȩ pio ju̧i̧. Ado pio ju̧i̧ daea̧ oaiä, 'Aja̧, Jeovarë mitëa̧ pio judipamȩ jirodida, pio judi ano̧ mire ütëpa jirodida, tjamo̧i̧ cjiari̧ jo̧rȩta jiroquëda' quëna̧ jo̧rȩtamȩrȩ darëremȩdejȩ.

⁷ Jabo Jeova judi yo̧a̧dejȩ Chamue ju̧i̧: —Cjäri made. Judidëde. Pio ju̧i̧ mitëdëa̧reconȩ. Jabechji̧ dairimo̧ ütarë darea̧mi̧dëde. Dëdë, pumȩ ütëde, ju chocodëde. Üi̧ chjacjiamȩde jabo mitëdëa̧reconȩ. Pumȩ judiro̧ ütarë dami̧ ütarë dadëmȩrequede cüdë. Jabechji̧ pumȩ judiro̧ dai oa pio ju̧i̧mo̧i̧ ütarë dadirȩ, jabo ja̧didërequede cüdë. Chji̧räpȩmo̧ cjacjarë damȩrequede. Pio ju̧i̧iä mitëdëa̧reconȩ ju̧i̧ —yo̧a̧dejȩ Chamue ju̧i̧.

⁸ Ja̧dëa ji̧ Jeche judi ëna̧diärëremȩdejȩ jibëa̧ ja ado cja̧rȩmo̧ oa, Abinadabo quȩmȩ oa. Jabechji̧ Chamue judi pio ju̧i̧ ano̧ mire ütarë dapea̧ oa ëna̧diäa̧dejȩ. Jabo judi ma̧na̧rä, Chamue judi yo̧a̧dejȩ: —Cjäri̧ made, pio ju̧i̧bo mitëdëa̧dejȩ Jeova judi.

⁹ Ado ja̧dëa ji̧ jäjäa judi ado cja̧rȩmo̧ oa ano̧ mire ëna̧diäa̧dejȩ Chama quȩmȩ oa. Jabo pio ju̧i̧ daea̧ ji̧, yo̧a̧dejȩ Chamue judi: —Cjäri̧ made, pio yoabo jiada̧dejȩ Jeova judi. Pio ju̧i̧ mitëdëa̧dejȩ.

¹⁰ Ado Jeche judi tänȩa̧ oa, ja̧di maeari̧ ano̧ mire jana̧diärëreji̧ri̧dirȩ ju̧i̧ ja̧ u̧ri̧ judiro̧ Chamue ja̧ dëbëräpȩ cjiadäräpea̧ oa. Aja̧, jibëa̧ u̧ri̧ 7rë Chamue ja̧ dëbëräpȩ cjiadärä marëreji̧ri̧dirȩ. Jabo Chamue judi yo̧a̧dejȩ Jeche ju̧i̧: —Jabo cjäri̧ madejȩrȩ, pio jiro u̧ri̧ pio ji̧ri̧ mitëdëa̧dejȩrȩ Jeova judi.

¹¹ Ado pio ji̧ri̧ ütëbo oa ütarë da ëte, Chamue judi iëno̧ë ta̧rëa̧dejȩ Jeche ju̧i̧: —Jabo danȩ, ¿pio ji̧ri̧mo̧i̧ ëbanȩ mȩnȩ? Ado cja̧rȩmo̧ ja oa ¿ëbadënȩ? Ado Jeche judi dëbë yo̧a̧dejȩ: —Dëdë, cja̧rȩmȩrȩ jabëdiäa̧de durimȩ tjamo judi, Davi quȩmȩ pio judi. Jabo oveja oa jidamȩrȩ cjiadiäa̧de chiriräpȩ. Jabo Chamue judi dëbë yo̧a̧dejȩ: —Jabechji̧ ma̧ȩ chjadüjo̧ȩ jana̧tä. Pio judi jana̧rämo̧ goe gu̧rori̧ yürüparea̧ro̧jo̧ȩ Jeova ju̧i̧iäpȩmo̧. Jana̧täde —yo̧a̧dejȩ.

¹² Pio ju̧i̧iä Jeche judi ma̧ȩ chjadürëremȩdejȩ. Ado japamitë chjätä ëte jana̧mȩ oa daea̧dejȩ Chamue judi. Dacho chjacjiamȩ oa, chamacho chjacjiamȩ oa darëremȩdejȩ. Ja̧dëa ji̧ Jeova judi yo̧rëremȩdejȩ Chamue ju̧i̧: —Jabechji̧ pio judide. Cüdë mitëa̧ pio judide. Pio ju̧i̧ yo̧ra̧ pio ju̧ri̧ra̧ gu̧ro tänȩpea̧de tjübërä. 'Aja̧, ütë tänȩpea̧ pio judidida' quëna̧ jo̧rȩtamȩrȩ yo̧ra̧ gu̧ro tänȩjo̧ȩ —yo̧a̧dejȩ.

¹³ Ado Chamue judi Jeova pio ju̧i̧iä ta̧rëa̧ oaiä, chjaodëri̧ mitërëremȩdejȩ yo̧ chiamȩ joë oa. Ado ju̧i̧ ja̧ ayima̧i̧ pio ji̧ri̧ ja̧ dachoro yo̧ra̧ gu̧ro tänȩrëremȩdejȩ ütë tänȩpea̧ oa. Ado chjaodëri̧ cjiadärärëremȩdejȩ Davi ju̧i̧ Jeova ja̧ Tjo judi. Ado pio judiri yurori ëba cjia marëremȩdejȩ a̧dë baärea̧ decjiari̧. Ado ja̧dëa ji̧ Chamue judi baärëremȩde jibëa̧ bëräpȩ, Damaräpȩ.

¹⁴ Jabo Jeova ja̧ Tjo judi a̧dë baärëremȩdejȩ Chauro ju̧i̧. Ado Jeova pio judi chjadüa̧ oa conȩdaera̧pea̧dejȩ yaröca üdë.