YUHANIS 9 - PEJANJIAN EMPAI CERITAU ILUAK

Yesus meghadui jemau diau butau jak di keciak

¹ Yesus dang ngerayau, Diau nginak sughang jemau diau butau jak di kandungannyau.

² Anak-buaHau betanyau ngan Yesus, kataunyau, “Pak Guru, tuapau sebapau jemau ini butau jak di keciak? Apu ikak dusau diauni, apu ikak dusau pejadiau?”

³ Yesus bekatau, “Diauni butau ukan ikak dusaunyau, ukan pulau ikak dusau pejadiau, tapitu supayau kuasau Allah nyatau dalam idupau.

⁴ Selamau aghi siang kitau mesti ngerjauka kerjau Allah diau ngajung Aku. Aghi laka malam, mangku sughang kia nidau pacak mbuat tuapau-apau.

⁵ Selamau Aku di deniau ini, Akunila terang deniau.”

⁶ La udim ngiciak luak itu, Yesus beluda ke tana, dikudakkaNyau ayiak liughAutu ngan tana, dikuyutka ke matau jemau butau tadi,

⁷ mangku bekatau ngan diau, “Pegila, bebasuala kaba di kulam Siluam.” Siluam retiau “diajung”. Mangku jemautu pegi mbasua dayiau, udim itu baliak, mataunyau la nginak.

⁸ Jemau pasigh ghumahau ngan jemau diau rajin nginak diau mintak-mintak senitu bekiciak, “Ukanau diauni jemau diau rajin mintak-mintak?”

⁹ Adau diau ngiciakka, “Nyela, diau.” Adau diau ngiciakka, “Ukan, diau cuman luluak jemau itu.” Jemau itu ngiciak, “Nyela, akunila diau.”

¹⁰ Ughangtu betanyau, “Luak apau mangku matau kaba pacak nginak?”

¹¹ Jemau tadi nimbal, “Jemau diau benamau Yesus mbuat licak dikit, dikuyutkaNyau di matauku, katauNyau, ‘Pegila ke kulam Siluam, basuala dayi kaba.’ Mangku aku pegi. La udim aku mbasua dayiku, aku pacak nginak.”

¹² Ughangtu betanyau, “Di manau jemau itu?” “Aku endiak keruan agi.” katau jemau tadi.

Jemau Parisi merisau pekarau jemau diau la ghadu tadi

^13-14 Masau Yesus ngudak tana ngan ayiak liughAu batan endak meghadui matau jemau butau tadi pacak nginak, aghi itu aghi Sabat. Mangku jemau itu dibatak ke jemau Parisi.

¹⁵ Ughangtu betanyau pulau ngan diau, luak manau diau pacak nginak. Jemautu nimbal, “Diau nguyutka licak ke matauku, aku mbasuhinyau, mangku aku pacak nginak.”

¹⁶ Adau jak di jemau Parisi diau ngiciak, “Nidau ka adau jemau diau ngerjauka ini asalau jak di Allah, karnau diau nidau nuruti adat lembagau aghi Sabat.” Adau diau lain ngiciak, “Manau ka adau jemau bedusau ngerjauka tandau luak ini?” Mangku pendapat jemau Parisitu nidau semegi.

¹⁷ Ughangtu betanyau agi ngan jemau tadi, kataunyau, “Luak manau pendapat kaba ngan jemau diau mbuat kaba nginak?” “Diautu sughang nabi.” katau jemau itu.

¹⁸ Anyautu jemau Yahudi tadi nidau percayau, bansau jemau itu butau sebelumau, mbak kini pacak nginak. Itula sebapau ughangtu ngajung njenguak pejadiau,

¹⁹ mangku betanyau ngan pejadiautu, “Apu anak kapu dighi nian diauni, diau kapu dighi kiciakka butau jak di keciak? Amun nyela nian, luak apau mangku pacak nginaktu?”

²⁰ Pejadiau nimbal, “Nyela, anak kami nian, diau nian butau jak di keciak.

²¹ Anyautu luak manau diau pacak nginak mbak kini, kami nidau keruan. Mangku sapau diau njegilka mataunyautu, kami pulau nidau keruan. Tanyauka ajau ngan diau. Diau la besak, diau pacak ngiciakkanyau.”

²² Pejadiau ngiciak luak itu karnau takut ngan jemau Yahudi, karnau jemau Yahudi la sepakat, mbak bansau jemau diau ngaku'i Yesustu Rajau Penyelamat nidau bulia agi masuak ghuma sembayang.

²³ Itula sebapau pejadi jemau itu tadi ngiciakka, “Diau la besak, tanyauka ajau ngan diau.”

²⁴ Mangku jemau Yahuditu tadi mantau jemau diau senitu butautu sekali agi, ngiciak ngan diau, “Besumpala, kaba ka ngiciakka diau benagh. Kami keruan jemau diau meghadui kaba jemau bedusau.”

²⁵ “Apu Diau jemau bedusau, apu nidau,” katau jemautu, “Aku nidau keruan. Sutiak ajau aku keruan, senitu aku butau, mbak kini aku la nginak.”

²⁶ Mangku ughangtu ngiciak agi ngan diau, kataunyau, “Tuapau dibuatAu ngan kaba? Luak manau Diau mbuat matau kaba nginak?”

²⁷ Timbalau, “La kukiciakka ngan kapu dighi, anyautu kapu dighi nidau ndengaghkanyau. Ngapau kapu dighi endak ndengagh agi. Apu kapu dighi endak njadi pengikutAu pulau?”

²⁸ Mangku ughangtu nggelakka diau, kataunyau, “Kabatula pengikutAu, kamini pengikut Musa.

²⁹ Kami keruan, Allah ngiciak ngan Musa. Asalau jemau itu kami nidau keruan.”

³⁰ Jemau itu nimbal, kataunyau, “Luak manau titu? Kapu dighi nidau keruan asalAu jemau itu jak di manau, awuak Diautula mbuat aku pacak nginak?

³¹ Kitau keruan, Allah nidau ndengaghka jemau bedusau, tapitu jemau diau meregaui Allah ngan nuruti kenda'Au didengaghkaNyau.

³² Semenjak deniau adau lum kekela tedengagh adau jemau dighadui diau butau jak di keciak.

³³ Amun asal jemau itu ukan jak di Allah, Diau nidau ka pacak mbuat tuapau-apau.”

³⁴ Ughangtu nimbal, kataunyau, “Tuapau? Kabani endak ngajagh kami? Kaba diau penua ngan dusau jak di keciak?” Mangku diau diajung kisit jak di ghuma sembayang.

³⁵ Yesus la ndengagh, mbak bansau jemau butau tadi la diajung kisit, Diau ndala'i jemautu, mangku bekiciak, “Apu kaba percayau ngan Anak Manusiau?”

³⁶ Jemautu nimbal, “Sapau Diautu, Guru? Kiciakkala, mangku aku percayau ngan Diau.”

³⁷ Katau Yesus, “Kaba la nginak Diau, mangku jemau diau dang ngiciak ngan kaba, nyelala Diau.”

³⁸ “Aku percayau, Tuhan!” katau jemau tadi, mangku nunduak nyemba Yesus.

³⁹ Mangku Yesus ngiciak agi, katauNyau, “Aku datang ke deniau ini batan endak ngadili jemau; mangku jemau diau butau pacak nginak, jemau diau pacak nginak njadi butau.”

⁴⁰ Adau jemau Parisi diau ndengagh Yesus ngiciak luak itu tadi, mangku ughangtu betanyau ngan Diau, “Kamini butau pulau?”

⁴¹ Timbal Yesus, “Misalau kapu dighi butau, kapu dighi nidau bedusau. Anyautu karnau kapu dighi ngiciak, ‘Kami nginak’, kapu dighi maju dalam dusau.”