YUHANIS 6 - PEJANJIAN EMPAI CERITAU ILUAK

Yesus ngenju'i makan limau ribu ughang

¹ La udim itu Yesus pegi nyembeghang Danau Galilia diau dikiciakka pulau Danau Tiberias.

² Jemau banyak ngikut Diau, karnau ughangtu la nginak tandau-tandau diau dikerjaukaNyau ngan meghadui jemau buidapan.

³ Yesus nayiak ke bukit mangku duduak di situ ngan anak-buaHau.

⁴ Masau itu laka Paska, aghi rerayau jemau Yahudi.

⁵ Yesus nginak jemau banyak nianan datang njenguak Diau, mangku ngiciak ngan Pilipus, katauNyau, “Di manau kitau mbeli makanan, mangku jemau banyak ini pacak makan?”

⁶ Yesus ngiciak luak itu endak nguji Pilipus, karnau Diau la keruan setu diau endak dibuatAu.

⁷ Pilipus nimbal, kataunyau, “Makanan diau regau duau ratus ribu rupiah, empuak diagiaka dikit sughang lum kila ka cukup.”

⁸ Mangku Anderias, ading Simun Pitrus, sughang jak di anak-buaHau, bekatau ngan Diau,

⁹ “Di sini adau sughang budak keciak diau mbatak limau bua ruti jak di njelai ngan duau ikuak ikan, anyautu tuapau gunaunyau batan endak jemau sebanyak ini?”

¹⁰ Katau Yesus, “Ajungla jemau banyak ini duduak!” Di situ banyak ghumput, mangku duduak jemau banyaktu, jemau lanang adau limau ribu ughang.

¹¹ Diau la duduak galau, Yesus ngambiak ruti itu, bedu'a beterimau-kasia, mangku diagiakaNyau ngan jemau banyak itu. Luak itula pulau dibuatAu ngan ikan tadi, mangku ughangtu makan enggut kenyang.

¹² Jemau la kenyang galau, mangku Yesus ngajung anak-buaHau, katauNyau, “Lungguakkala tigha ruti tadi, mangku jangan adau diau mbuang!”

¹³ Mangku ughangtu melungguakka duau belas kinjagh penua tigha makanan tadi jak di limau bua ruti diau la dimakan jemau banyaktu.

¹⁴ Jemau banyaktu nginak tandau diau diadauka Yesus tadi mangku bekatau, “Nyela, Diaunila Nabi diau diaghapka ka datang ke deniau.”

¹⁵ Yesus keruan ughangtu endak datang endak masau Diau njadi rajau. Karnau itu Diau pegi sughang nyemuni ke gunung.

Yesus bejalan di pucuak ayiak

¹⁶ Aghitu la sangkup malam, mangku anak-bua Yesus pegi ke danau. Ughangtu nayiak perawu endak nyembeghangi danautu

¹⁷ endak ke Kapernaum. Aghi la keleman, anyautu Yesus lum kila datang njenguak ughangtu.

¹⁸ Mangku adau umbak besak karnau angin nyaghu.

¹⁹ La bedayung limau enam kilu ughangtu nginak Yesus bejalan di pucuak ayiak masighi perawutu, mangku ughangtu takut kematila.

²⁰ Yesus ngiciak ngan ughangtu, “Jangan penakut! Ini Aku!”

²¹ Ughangtu riang nerimau Yesus dalam perawu, mangku masau itu pulau perawutu sampai ke bada diau dijenguak.

Jemau banyak ndala'i Yesus

²² Pagi aghiau jemau banyak diau masia adau di sebeghang danautu nyadari, tadi gi adau sebua perawu di situ. Ughangtu keruan anak-bua Yesus pegi ngan perawutu, anyautu Yesus nidau ngikut.

²³ Mangku adau perawu-perawu lainau datang jak di Tiberias nyunggut pasigh bada jemau banyak makan ruti tadi, udim Tuhan beterimau-kasia.

²⁴ Ughangtu la nginak, bansau Yesus ngan anak-buaHau nidau bediau agi guak itu, ughangtu pulau nayiak perawu pegi ke Kapernaum endak ndala'i Yesus.

²⁵ Jemau banyaktu la betemu ngan Yesus di beghang danautu, ughangtu betanyau ngan Diau, “Kebilau Dighi sampai di sini?”

²⁶ Yesus nimbal, “Ngenian, kapu dighi ndala'i Aku, ukan karnau la ngerti tandau-tandau diau Kukerjauka, tapitu karnau kapu dighi la makan ruti enggut kenyang.

²⁷ Jangan bekerjau endak ngerjauka makanan diau ka busuak. Bekerjaula ajau endak makanan diau nidau ka busuak ngan ngenjuakka idup empai selelamaunyau. Makanantu ka dienjuakka Anak Manusiau ngan kapu dighi, karnau Diautu la ditetapka Allah Bapak.”

²⁸ Mangku ughangtu betanyau ngan Diau, “Tuapau diau mesti kami kerjauka, mangku kami ngerjauka kendak Allah?”

²⁹ Yesus nimbal, “Inila diau dikenda'i Allah ngan kapu dighi: Percayaula ngan Aku diau diajung Allah.”

³⁰ “Amun luak itu,” katau ughangtu, “Tuapau buktiau diau Dighi kerjauka, mangku kami pacak ngina'au ngan percayau ngan Dighi? Tuapau diau ka Dighi kerjauka?

³¹ Niniak puyang kami makan makanan Mana di padang bungin, luak ditulis dalam Injil: ‘Ughangtu dienju'i makanan jak di sergau.’ ”

³² Mangku Yesus ngiciak ngan ughangtu, katauNyau, “KatauKu ini benagh: Ukan Musa diau ngenju'i kapu dighi makanan jak di sergau, anyautu BapakKutu diau ngenju'i kapu dighi makanan diau ngenianau jak di sergau.

³³ Karnau makanan diau jak di Allahtu makanan diau tughun jak di sergau diau ngenjuakka idup ngan deniauni.”

³⁴ Mangku katau ughangtu, “Enju'ila kami makanan itu idang aghi!”

³⁵ Katau Yesus, “Akunila makanan diau ngenjuakka iduptu. Jemau diau datang njenguak Aku nidau ka lapagh agi, mangku jemau diau percayau ngan Aku nidau ka aus agi.

³⁶ Benagh luak diau la Kukiciakka ngan kapu dighi: Empuak kapu dighi la nginak Aku, kapu dighi nidau kila percayau.

³⁷ Gegalau jemau diau dienjuakka Bapak ngan Aku ka datang njenguak Aku, mangku jemau diau njenguak Aku, cetau nidau ka Kutulak.

³⁸ Karnau Aku datang jak di sergau ukan batan endak ngerjauka kendakKunila, tapitu batan endak ngerjauka kendak Allah diau ngajung Aku.

³⁹ Inila kendak Allah diau ngajung Aku: Supayau jak di gegalau jemau diau la dienjuakkaNyau ngan Aku sughang kia nidau ka lengit, tapitu ughangtu Kuidupka masau aghi kiamat.

⁴⁰ Nyela, inila kendak BapakKu: Supayau gegalau jemau diau nginak Ana'Au ngan percayau ngan Diau bulia idup empai selelamaunyau, mangku Akunila ngidupkanyau masau aghi kiamat.”

⁴¹ Mangku jemau Yahudi mulai bemumut mumuti Yesus, karnau Diau ngiciakka, “Akunila makanan diau datang jak di sergau.”

⁴² Ughangtu bekatau, “Ukanau Diauni Yesus, anak Yusup? Kitau keruan pejadiAu! Ngapau Diau beghani ngiciakka Diau datang jak di sergau?”

⁴³ Katau Yesus, “Jangan agi kapu dighi bemumut!

⁴⁴ Nidau sughang kia pacak datang njenguak Aku, amun ukan BapakKu diau ngajung Aku mbata'inyau njenguak Aku. Mangku jemau diau njenguak Aku ka Kuidupka masau aghi kiamat.

⁴⁵ Dalam kitab nabi-nabi ditulis luak ini: ‘Gegalau jemau ka diajagh Allah.’ Mangku jemau diau ndengagh Bapak ngan belajagh jak di Diau, jemautu ka datang njenguak Aku.

⁴⁶ Aku nidau ngatauka, adau jemau diau la nginak Bapak lain jak di jemau diau datang jak di Allah. Diautu la nginak Bapak.

⁴⁷ Ingatkala, jemau diau percayau bulia idup empai selelamaunyau.

⁴⁸ Akunila makanan diau ngenjuakka idup.

⁴⁹ Empuak niniak puyang kapu dighi makan makanan Mana di padang bungin, mangku ughangtu masia mati.

⁵⁰ Anyautu nidau luak itu makanan diau jak di sergau. Jemau diau makan makanantu cetau nidau ka mati.

⁵¹ Akunila makanan diau ngenjuakka idup diau datang jak di sergau. Jemau diau makan makanan ini ka idup selelamaunyau. Makanan diau ka Kuenjuakka nyela dagingKu diau ka Kuenjuakka batan ngenjuakka idup ngan deniauni.”

⁵² Ndengagh titu jemau Yahudi bebala sughang ngan diau lain, kataunyau, “Luak manau jemau ini pacak ngenjuakka dagingAu ngan kitau batan makanan?”

⁵³ Mangku Yesus ngiciak ngan ughangtu, “Percayaula nian: Amun kapu dighi nidau makan daging Anak Manusiau ngan minum daghaHau, kapu dighi nidau ka pacak idup ngenianau.

⁵⁴ Jemau diau makan dagingKu ngan minum daghaKu diautula bulia idup empai selelamaunyau, mangku Aku ka ngidupkanyau masau aghi kiamat.

⁵⁵ DagingKu makanan nian, daghaKu minuman nian.

⁵⁶ Jemau diau makan dagingKu ngan minum daghaKu, diautu seghundak ngan Aku, Aku ngan diau.

⁵⁷ Bapak diau ngenjuakka iduptu ngajung Aku, mangku Aku pulau idup karnau Bapak. Luak itu pulau jemau diau makan dagingKu ka idup karnau Aku.

⁵⁸ Inila makanan diau jak di sergau, ukanau luluak makanan diau dimakan niniak puyang kapu dighi, mangku kesudimannyau masia mati. Jemau diau makan makanan tadi ka idup selelamaunyau.”

⁵⁹ Gegalaunyautu dikiciakka Yesus, masau Diau ngajagh di ghuma sembayang di Kapernaum.

Kici'an diau ngenju'i idup empai selelamaunyau

⁶⁰ La udim ndengagh gegalau kici'an Yesustu tadi, banyak jak di pengikut Yesus bekatau, “Kici'an ini segau igau! Sapau ka pacak nerimaunyau?”

⁶¹ Yesus keruan, bansau ughangtu bejijia karnau kici'anNyautu, mangku Diau bekatau, “Apu kapu dighi purik karnau kici'anKu tadi?

⁶² Mangku luak manau, amun kapu dighi nginak Anak Manusiau baliak nayiak ke bada asalAu?

⁶³ Rua Allahtu diau ngenjuakka idup. Kekuatan manusiau nidau bediau gunaunyau. Kici'anKu ini diau Kukiciakka ngan kapu dighi asalau jak di Rua Allah diau ngenjuakka idup.

⁶⁴ Anyautu adau jak di kapu dighi diau nidau percayau.” Yesus keruan jak di senitu jemau diau enggup percayau ngan jemau diau njualkaNyau.

⁶⁵ Mangku Yesus bekatau agi, “Itula sebapau la Kukatauka ngan kapu dighi, nidau bediau sughang kia diau pacak datang njenguak Aku, amun nidau ditulung Bapak.”

⁶⁶ Mulai masau itu banyak jemau ninggalka Diau, enggup agi ngikutiNyau.

⁶⁷ Mangku Yesus betanyau ngan duau belas anak-buaHau, katauNyau, “Luak apau kamuni? Apu kamu endak pegi pulau ninggalka Aku?”

⁶⁸ Katau Simun Pitrus, “Tuhan, amun kami pegi, kami njenguak sapau? Kici'an Dighi ajau diau ngenju'i idup empai selelamaunyau!

⁶⁹ Kami la percayau ngan la keruan, Dighitula ajungan Allah diau suci.”

⁷⁰ Yesus nimbal, “Apu ukan Akuni diau milia kamu duau belas ughangni? Anyautu sughang jak di kamutu jemau ja'at.”

⁷¹ Diau dikiciakka Yesustu Yudas, anak Simun Iskariut. Karnau empuak Yudas temasuak sughang jak di duau belas anak-buaHautu, diaula jemaunyau diau njualka Yesus.