YUHANIS 3 - PEJANJIAN EMPAI CERITAU ILUAK

Kici'an Nikudimus ngan Yesus

¹ Adau sughang pengulu jemau Yahudi jak di rumbungan Parisi, namaunyau Nikudimus.

² Adau semalam diau datang njenguak Yesus, kataunyau, “Rabi, kami keruan, Kaba sughang Guru diajung Allah, karnau nidau bediau sughang kia diau pacak mbuat tandau diau luak Kaba buat, amun ukan Allah diau ngenjuakka kuasau ngan diau.”

³ Yesus bekatau, “KatauKu ini benagh: Amun jemau nidau ngulang dilahirka, diau nidau pacak njadi angguta umat Allah.”

⁴ “Baghia jemau la besak pacak ngulang dilahirka,” katau Nikudimus. “Cengki nidau pacak masuak agi dalam busung endu'au, mangku ngulang dilahirka.”

⁵ Yesus nimbal, katauNyau, “KatauKu ini benagh: Amun jemau nidau dilahirka jak di ayiak ngan Rua Allah, diau nidau pacak njadi angguta umat Allah.

⁶ Badan kitau dilahirka pejadi, mangku rua kitau diidupka Rua Allah.

⁷ Janganla dighi kemangan, amun Aku bekatau: gegalau kapu dighi mesti ngulang dilahirka.

⁸ Adau angin di manau diau endak. Kitau ndengagh muniau, anyautu nidau keruan jak di manau angintu ngan endak ke manau. Luak itula jemau diau dilahirka Rua Allah.”

⁹ “Luak manau ka adau?” tanyau Nikudimus.

¹⁰ Timbal Yesus, “Dighi sughang guru di Israil. Baghia dighi nidau keruan.

¹¹ Percayaula: Kamini ngiciakka setu diau keruan ngan Kami ngan nceritauka setu diau la Kami kinak. Anyautu kapu dighi enggup percayau ngan kici'an Kami.

¹² Kapu dighi nidau percayau, amun Aku nceritauka setu diau tejadi di deniauni. Luak manau kapu dighi pacak percayau, amun Aku nceritauka setu diau tejadi di sergau?

¹³ Nidau bediau sughang kia diau la nayiak ke sergau lain jak di diau la tughun jak di sergau, diautu Anak Manusiau.

¹⁴ Luak Musa nayiakka ulagh ke kayu setak di padang bungin, luak itula pulau Anak Manusiau mesti dinayiakka,

¹⁵ mangku bilang jemau diau percayau ngan Diau bulia idup empai selelamaunyau.

¹⁶ Karnau Allah sayang nian ngan deniauni, mangku Diau la ngenjuakka Ana'Au diau gi sughang itula, supayau bilang jemau diau percayau ngan Diau nidau benasau, tapitu bulia idup empai selelamaunyau.

¹⁷ Karnau Allah ngajung Ana'Au pegi ke deniau ukan endak ngadili, tapitu endak nyelamatkanyau karnau Diau.

¹⁸ Jemau diau percayau ngan Diau nidau ka diukum. Anyautu jemau diau nidau percayau la diukum Allah, karnau diau nidau percayau ngan Anak Allah diau gi sughang itula.

¹⁹ Diau dituntut karnau ceritau ini: Terang la datang ke deniauni, anyautu manusiau milia keleman, nidau galak di terang, karnau perembak ughangtu ja'at.

²⁰ Jemau diau mbuat ja'at luat ngan terang, diau enggup njenguak terang, mangku peremba'au diau ja'attu nidau kina'an.

²¹ Anyautu jemau diau ngerjauka kendak Allah njenguak terang, mangku tenyatau setu diau dikerjaukanyautu dikerjaukanyau nurut kendak Allah.”

Yuhanis nceritauka Yesus

²² La udim itu Yesus ngan anak-buaHau pegi ke Yudia, mangku mendam di situ sampai mbaptis.

²³ Yuhanis pulau mbaptis di Ainun, pasigh Salim, karnau di situ banyak ayiak, mangku jemau datang ke situ endak dibaptis.

²⁴ Masau itu Yuhanis lum tekawal.

²⁵ Mangku anak-bua Yuhanis bebala ngan jemau Yahudi pekarau ngambiak ayiak sembayang nurut adat lembagau Yahudi.

²⁶ Mangku anak-buahau njenguak Yuhanis, kataunyau, “Guru, dighi masia teghingat Jemau diau serempak ngan dighi di sebeghang ayiak Yurdan diau dighi kiciakka ngan kami senitu? Mbak kini Diau mbaptis pulau ngan banyak jemau pegi guak Diau.”

²⁷ Yuhanis nimbal, kataunyau, “Sughang kia nidau pacak ngambiak tuapau-apau, amun nidau dienju'i Allah.

²⁸ Kamu la ndengagh aku bekatau: Akuni ukan Mesias. Aku diajung nduluiNyau.

²⁹ Jemau diau bebunting diautu pengantinan. Kantin pengantinantu ngantininyau ngan ndengaghkanyau ajau, mangku diau riang, amun ndengagh suarau pengantinantu. Luak itu pulau ngan aku. Mbak kini atiku riang nian.

³⁰ KuasauNyau mesti tamba banyak, mangku kuasauku tamba dikit.”

³¹ Jemau diau datang jak di atas lebia gegalaunyau. Jemau diau datang jak di deniau temasuak jemau deniau, ngiciakka deniaunila. Jemau diau asalau jak di sergau lebia gegalaunyau.

³² Diau ngiciakka setu diau la dikina'Au ngan didengaghAu, anyautu nidau bediau sughang kia diau percayau ngan kici'anNyautu.

³³ Jemau diau percayau ngan kici'anNyautu nyetujui Allah itu benagh.

³⁴ Jemau diau diajung Allah, Diautu ngiciakka kici'an Allah, karnau Rua Allah dienjuakkaNyau galau ngan Diau.

³⁵ Bapak nyayangi Ana'Au, mangku gegalau kuasau dienjuakka ngan Diau.

³⁶ Jemau diau percayau ngan Ana'Autu bulia idup selelamaunyau. Anyautu jemau diau nidau ta'at ngan Ana'Autu nidau ka bulia idup empai. Jemautu maju diukum Allah.