YUHANIS 20 - PEJANJIAN EMPAI CERITAU ILUAK

Kuburan diau bangkang

¹ Aghi minggu paghak siang butau Maria Magdalina pegi ke kuburan itu. La sampai di kuburan diau nginak batu penukup kuburan la teguliak jak di tebuak kuburantu.

² Diau belaghi njenguak Simun Pitrus ngan anak-bua diau disayangi Yesus, mangku ngiciak ngan ughang duautu, kataunyau, “Tuhan la diambiak jemau jak di kuburan, anyautu kami nidau keruan di manau bada Diau ditepiakka.”

³ Mangku Pitrus ngan kantinau tadi pegi ke kuburan.

⁴ Ughang duautu belaghi, anyautu cepatla kantinau sampai di kuburan sangkan Pitrus.

⁵ Anak-bua itu nyubuak kuburan, mangku tekinak kain pembalutAu di situ. Anyautu diau nidau masuak.

⁶ La udim itu Simun Pitrus sampai pulau. Diau masuak ke kuburantu, mangku nginak kain pembalutAu di situ.

⁷ Anyautu setangan diau dikebatka di palak Yesus nidau bediau di pasigh kain tadi, la tegulung di bada lain.

⁸ Mangku anak-bua diau dulu sampai di kuburantu masuak pulau. Diau nginak mangku percayau.

⁹ Masau itu ughangtu lum ngerti setu diau ditulis dalam Injil, bansau Diau mesti ngulang idup jak di mati.

¹⁰ La udim itu duau ughang anak-bua Yesustu baliak ke badahau.

Maria Magdalina nginak Yesus

¹¹ Maria Magdalina betegak guak kuburan sampai nangis. Diau dang nangis, nyubuak dalam kuburan,

¹² mangku tekinak duau ughang malaikat bebaju putia. Malaikat itu duduak di bada mayat Yesus ditepiakka senitu, diau sughang guak pala'Au, diau sughang agi di ketingAu.

¹³ Malaikat itu ngiciak ngan Maria, kataunyau, “Ngapau kaba nangis?” Katau Maria, “Tuhanku diambiak jemau, aku nidau keruan di manau Diau ditepiakka.”

¹⁴ La udim ngiciak luak itu, diau nulia ke belakang, mangku tekinak Yesus betegak di situ, anyautu diau nidau keruan, bansau itu Yesus.

¹⁵ Yesus betanyau ngan diau, “Ngapau kaba nangis? Kaba ndala'i sapau?” Maria sangkau itu tukang sayia kebun, mangku diau ngiciak luak ini, “Amun dighi ngaliakaNyau, kiciakkala ngan aku, mangku aku pacak ngambi'Au.”

¹⁶ Katau Yesus, “Maria!” Maria nulia ke Yesus, mangku bekatau basau Ibrani, “Rabuni!” Retiau guru.

¹⁷ Katau Yesus, “Jangan ngecakka Aku, karnau Aku lum nayiak njenguak Bapak. Anyautu pegila njenguak anak-buaKu, kiciakkala ngan ughangtu, mbak kini Aku nayiak njenguak BapakKu diau pulau Bapak kamu, AllahKu diau pulau Allah kamu.”

¹⁸ Mangku Maria Magdalina pegi ngiciak ngan anak-bua Yesus, bansau diau la nginak Tuhan, lagi pulau bansau Yesus la ngiciakka gegalaunyautu ngan diau.

Anak-buaHau nginak Yesus

¹⁹ Aghi petamau minggu itu, satu aghitu la malam, anak-bua Yesus nunggal di sebua ghuma ngan duaghaunyau dikunci, karnau ughangtu takut ngan tuau-tuau jemau Yahudi. Mangku Yesus datang betegak di pugan anak-buaHautu ngan bekatau, “Salam damai batan endak kamu.”

²⁰ La udim bekatau luak itu, Diau ngancakka telapak tanganAu ngan ghusu'Au. Mangku anak-buaHautu riang nian nginak Tuhan.

²¹ Yesus bekatau agi ngan ughangtu, “Salam damai batan endak kamu! Luak Bapak ngajung Aku, luak itula pulau Aku ngajung kamu.”

²² La udim ngiciak luak itu, Yesus niupka nyawaunyau ngan ughangtu sampai bekatau, “Terimaula Rua Allah.

²³ Amun kamu ngabiska dusau jemau, dusaunyau ka abis. Amun kamu nidau ngabiska dusau jemau, dusaunyau nidau ka abis.”

Tumas betemu ngan Yesus

²⁴ Anyautu Tumas, sughang jak di duau belas anak-buaHautu, diau dikiciakka “Gembagh”, nidau bediau guguak ughangtu, masau Yesus datang ke situ.

²⁵ Mangku anak-buaHau tadi ngiciak ngan Tumas, kataunyau, “Kami la betemu ngan Tuhan!” Anyautu Tumas bekatau, “Amun aku lum nginak engkas besipaku di tanganAu ngan lum ncucuakka jaghiku ke engkas besipakutu ngan ncucuakka tanganku ke ghusu'Au, aku nidau ka percayau.”

²⁶ La udim seminggu anak-bua Yesus betunggal agi di ghuma itu ngan Tumas adau pulau di situ. Duaghau dang dikunci, mangku Yesus datang betegak di tetengaan ughangtu sampai bekatau, “Salam damai batan endak kamu.”

²⁷ La udim itu Yesus ngiciak ngan Tumas, katauNyau, “Kina'ila tanganKu, tepiakka jaghi kaba di sini. Surungkala tangan kaba ngan cucuakka ke ghusuakKu. Mangku jangan kaba nidau percayau, anyautu percayaula.”

²⁸ Mangku katau Tumas, “Dighila Tuhanku ngan Allahku!”

²⁹ Katau Yesus, “Kaba percayau, karnau la nginak Aku. Riangla jemau diau percayau empuak nidau nginak Aku.”

Sebapau kitab ini ditulis

³⁰ Gi banyak tandau nyelia lainau diau dikerjauka Yesus di adapan anak-buaHau, anyautu nidau tecatat dalam kitab ini.

³¹ Tapitu gegalaunyau diau temasuak di sini la ditulis, supayau kamu percayau, Yesus itula Keristus, Rajau Penyelamat, Anak Allah, mangku supayau kamu bulia idup, karnau percayau ngan Diau.