YUHANIS 2 - PEJANJIAN EMPAI CERITAU ILUAK

Jamuan nika di Kana

¹ Duau malam la udim itu adau jamuan nika di kuta Kana di Galilia. Mak Yesus adau di situ.

² Yesus ngan anak-buaHau diaja'i pulau ke jamuan itu.

³ Mak Yesus nginak ayiak anggur la abis, mangku ngiciak ngan Yesus, kataunyau, “Ughangtu kurangan ayiak anggur.”

⁴ “Ngapau njenguak Aku, mak?” katau Yesus. “Lum masaunyau Aku nyatauka kuasauKu.”

⁵ Anyautu Mak Yesus ngiciak ngan tukang-tukang katang, kataunyau, “Kerjaukala tuapau diau ka dikiciakkaNyau ngan kamu.”

⁶ Di situ adau enam guci diau disediauka batan pembasuan nurut adat lembagau jemau Yahudi. Dalam sebua gucitu isiau duau pulua tikau.

⁷ Katau Yesus ngan tukang-tukang katangtu, “Isila guci-guci ini ngan ayiak!” Ughangtu ngisiau enggut penua.

⁸ La penua galau, mangku katau Yesus, “Mbak kini cidukla ayiak dikit, mangku batak ke tuau kerjau.” Ughangtu mbatak ayiaktu ke tuau kerjau,

⁹ mangku tuau kerjautu ngecap ayiak itu diau la beghuba njadi ayiak anggur. Tuau kerjautu nidau keruan ayiak anggurtu jak di manau. Tukang katang ajau diau nciduk ayiaktu tadi ngeruaninyau. Mangku tuau kerjautu mantau pengantin

¹⁰ ngan ngiciak ngan diau, kataunyau, “Biasaunyau jemau nengaka ayiak anggur diau lemak kudai, mangku jemau la nyagu minum, ditengaka diau biasau ajau. Mangku ngapau kaba ngimpani anggur diau lemak enggut mbak kini?”

¹¹ Tandau diau dulu sekali ini dibuat Yesus di Kana di Galilia. Ngan tandau itu Diau nginakka kuasauNyau, mangku anak-buaHau percayau ngan Diau.

¹² La udim itu Yesus pegi ke Kapernaum serempak ngan endu'Au, ading-adingAu ngan anak-buaHau Mangku ughangtu singga di situ bebeghapau aghi.

Yesus mberesiaka Ghuma Allah

¹³ Aghi rerayau Paska jemau Yahudi la damping, mangku Yesus pegi ke Yerusalim.

¹⁴ Di tengalaman Ghuma Allah ditemukaNyau jemau bedagang sapi, kambing, bebiri ngan burung darau ngan pulau jemau penukar tanci duduak di situ.

¹⁵ Mangku Yesus mbuat semecam pemecit jak di tali, dikisitkaNyau gegalau ughangtu jak di Ghuma Allah ngan gegalau sapi ngan bebiritu. Mija-mija jemau penukar tanci dikangkangkaNyau, mangku tanciautu buamburan.

¹⁶ Mangku dikiciakkaNyau ngan jemau njual burung darau, “Batakla gegalaunyauni jak di sini. Jangan njadika Ghuma BapakKu bada bedagang!”

¹⁷ Mangku teghingatla anak-buaHau, bansau adau tetulis di Injil, “Sayang ngan Ghuma Dighi luak api maghak dalam atiKu.”

¹⁸ Mangku tuau-tuau jemau Yahudi nantang Yesus, kataunyau, “Tuapau tandau buktiau Kaba behak beperembak luak itu?”

¹⁹ Katau Yesus, “Legha'ila Ghuma Allah ini, mangku jangkau tigau aghi Aku ka negakkanyau agi.”

²⁰ Katau jemau Yahuditu, “Manau ka adau Kaba negakka Ghuma Allah jangkau tigau aghi, awuak negakkanyau empaini empat pulua enam taun.”

²¹ Anyautu Ghuma Allah diau dikiciakkaNyautu badanAu itula.

²² La udim Yesus diidupka jak di mati, teghingatla anak-buaHau, bansau Diau la ngiciakka luak itu, mangku anak-buaHautu percayau ngan Injil ngan kici'an diau la dikiciakka Yesus.

²³ Penarau Yesus di Yerusalim selamau aghi rerayau Paska, banyak jemau percayau ngan Diau, karnau la nginak tandau-tandau diau dikerjaukaNyau.

²⁴ Anyautu Yesus nidau percayau ngan ughangtu, karnau Diau keruan gegalau jemau.

²⁵ Nidau nanti dikiciakka nian ngan Yesus perembak jemau, karnau Diau la keruan setu diau adau dalam ati manusiau.