YUHANIS 17 - PEJANJIAN EMPAI CERITAU ILUAK

Yesus bedu'a

¹ La udim ngiciak luak itu, Yesus ncungak ke langit, mangku bekatau, “Bak, masaunyau la sampai, agungkala Anak Dighi, mangku Anak Dighi ngagungka Dighi pulau.

² Dighi la ngenjuakka kuasau ngan Diau nguasaui gegalau manusiau, mangku Diau ka ngenjuakka idup empai selelamaunyau ngan gegalau jemau diau la Dighi enjuakka ngan Diau.

³ Retiau idup empai selelamaunyau itula ngeruani Dighi, Allah diau sebenaghau diau gi sughang itula ngan ngeruani Yesus Keristus diau la Dighi ajung.

⁴ Aku la ngagungka Dighi di deniau ngan ngudimi kerjau diau la Dighi ajungka ngan Aku.

⁵ Bak, mbak kini agungka Aku di adapan Dighi ngan carau Aku diagungka, timpau Aku guak Bapak antak ka deniau adau.

⁶ Aku la nyatauka namau Dighi ngan gegalau jemau jak di deniauni diau la Dighi enjuakka ngan Aku. Dighitu ngempu ughangtu, mangku Dighi la ngenjuakka ughangtu ngan Aku. Ughangtu la nuruti kici'an Dighi.

⁷ Mbak kini ughangtu keruan, bansau gegalaunyau diau la Dighi enjuakka ngan Aku asalau jak di Dighi.

⁸ Kici'an diau Dighi kiciakka ngan Aku, la Kukiciakka ngan ughangtu, mangku ughangtu la nerimaunyau. Ughangtu keruan nian asalKu jak di Dighi, mangku ughangtu percayau, Dighitu ngajung Aku.

⁹ Aku ndu'aka ughangtu, Aku ukan ndu'aka deniau, anyautu Aku ndu'aka jemau diau la Dighi enjuakka ngan Aku, karnau Dighi ngempu ughangtu.

¹⁰ Gegalaunyau diau Kuempu itu, Dighi ngempuau pulau, mangku gegalaunyau diau Dighi empu itu, Aku ngempuau pulau. Aku la diagungka ughangtu.

¹¹ Mbak kini Aku njenguak Dighi. Akuni nidau agi di deniauni, anyautu ughangtu gi adau di deniauni. Bak, diau suci, sayiala ughangtu ngan kuasau namau Dighi, namau diau la Dighi namauka ngan Aku, supayau ughangtu njadi seghundak luak Kitau.

¹² Masau Aku gi adau guak ughangtu, Aku la nyayia ughangtu ngan kuasau namau Dighi, namau diau la Dighi namauka ngan Aku. Aku la njagaui ughangtu, mangku nidau sughang kia jak di ughangtu benasau lain jak di jemau diau semestiau benasau, mangku setu diau ditulis dalam Injil ditepati.

¹³ Mbak kini Aku njenguak Dighi. Gegalaunyau ini Kukiciakka, timpau Aku gi adau di deniau, mangku ughangtu meghasauka gegalau keinji'anKu.

¹⁴ La Kukiciakka ngan ughangtu kici'an Dighi, mangku deniau meluatka ughangtu, karnau ughangtu nidau jak di deniau, luak Aku pulau nidau jak di deniau.

¹⁵ Aku nidau mintak, supayau Dighi ngambiak ughangtu jak di deniauni, anyautu Aku mintak, supayau Dighi njagaui ughangtu jak di diau ja'at.

¹⁶ Ughangtu nidau jak di deniauni, luak Aku pulau nidau jak di deniauni.

¹⁷ Beresiakala ughangtu batan endak Dighi ngan Pirman Dighi diau benagh. Nyela, Pirman Dighitu benagh.

¹⁸ Aku ngajung ughangtu ke deniau, luak Dighi la ngajung Aku ke deniau.

¹⁹ Bak, batan endak ughangtu Aku nyeraka diriKu ngan Dighi, supayau ughangtu pulau nyeraka diriau nian batan endak Dighi.

²⁰ Aku ukan ndu'aka ughang ini ajau. Aku pulau ndu'aka jemau diau ka percayau ngan Aku karnau kici'an ughang ini.

²¹ Bak, Aku mintak, supayau gegalau ughangtu njadi seghundak, luak Dighi seghundak ngan Aku, Aku seghundak ngan Dighi. Aku endak ughangtu seghundak ngan kitau, mangku deniau percayau, bansau Dighi ngajung Aku.

²² Akuni la ngagungka ughangtu ngan carau luak Dighi la ngagungka Aku, mangku ughangtu njadi seghundak, luak Kitau pulau la seghundak.

²³ Aku seghundak ngan ughangtu, Dighi seghundak ngan Aku, mangku ughangtu seghundak nian. Mangku deniau keruan, Dighitu ngajung Aku, Dighi nyayangi ughangtu, luak Dighi nyayangi Aku.

²⁴ Bak, Aku endak, supayau jemau diau Dighi enjuakka ngan Aku adau guak Aku di badaKu, mangku ughangtu nginak keagungan diau la Dighi enjuakka ngan Aku, karnau Dighi la nyayangi Aku antak ka deniau adau.

²⁵ Bak diau adil, deniau nidau keruan Dighi, anyautu Aku keruan Dighi ngan ughangtu keruan, bansau Dighitu ngajung Aku.

²⁶ Aku la nyatauka namau Dighi ngan ughangtu, Aku maju nyataukanyau, mangku sayang Dighi ngan Aku maju dalam ati ughangtu, mangku Aku seghundak ngan ughangtu.”