YUHANIS 14 - PEJANJIAN EMPAI CERITAU ILUAK

Yesusla jalan ngeruani Allah ngan idup

¹ “Janganla kamu temas.” Katau Yesus, “Percayaula ngan Allah, percayaula pulau ngan Aku.

² Di ghuma BapakKu banyak bada. Amun nidau luak itu, cetau Aku nidau ngiciak ngan kamu, bansau Aku pegi endak nyediauka bada batan endak kamu.

³ La udim Aku pegi ke situ ngan nyediauka bada batan endak kamu, Aku ka ngulang agi, mangku mbatak kamu ke badaKu, supayau di manau badaKu, di situ pulau bada kamu.

⁴ Ke manau Aku pegi, kamu keruan jalan ke situ.”

⁵ Tumas ngiciak ngan Yesus, kataunyau, “Tuhan, kami nidau keruan, ke manau Dighi pegi. Luak manau kami keruan jalan?”

⁶ Katau Yesus, “Akunila jalan ngeruani Allah ngan idup nian. Nidau sughang kia diau pacak njenguak Bapak, amun nidau karnau Aku.

⁷ Amun kamu keruan Aku, cetau kamu pulau keruan BapakKu. Mbak kini kamu la keruan Diau ngan kamu la nginak Diau.”

⁸ Katau Pilipus, “Tuhan, ancakka Bapaktu, jadila ngan kami.”

⁹ Katau Yesus, “Ui, Pilipus, Aku la lamau ngan kamu, mangku kaba lum kila keruan Aku? Jemau diau nginak Aku la nginak Bapak. Ngapau kaba ngiciakka: Ancakka Bapaktu ngan kami?

¹⁰ Apu kabani nidau percayau, Akuni di dalam Bapak, Bapak pulau di dalam Aku? Setu diau Kukiciakka ngan kamu, asalau ukanau jak di Aku. Bapak diau mendam di dalam Aku ngerjauka gegalaunyau itu.

¹¹ Percayaula ngan katauKu ini: Aku di dalam Bapak ngan Bapak di dalam Aku, senidau-nidaunyau percayaula ngan setu diau la Kukerjauka.

¹² Ngenian katauKu ini: Jemau diau percayau ngan Aku ka ngerjauka setu diau la Kukerjauka, gi banyak setu diau lebia besak agi ka dikerjaukanyau. Aku pegi njenguak Bapak,

¹³ mangku setu diau kamu pintak atas namauKu ka Kuenjuakka, mangku Bapak dipuji karnau Aku.

¹⁴ Tuapau kila diau kamu pintak atas namauKu ka Kuenjuakka.”

Yesus njanjika Rua Allah

¹⁵ “Amun kamu nyayangi Allah, kamu ka nuruti gegalau perintaKu.

¹⁶ Aku ka mintakka ngan Bapak, mangku Diau ka ngenju'i kamu Penulung lain diau ka adau guak kamu selelamaunyau.

¹⁷ Diau itu Rua Allah diau ka nyatauka, sapau Allah sebenaghau. Deniau nidau pacak nerimau Diau, karnau deniau nidau nginak Diau ngan ngeruani Diau. Anyautu kamuni ngeruani Diau, karnau Diau di guak kamu ngan mendam dalam kamu.

¹⁸ Aku nidau ka ngenangka kamu njadi anak umang. Nanti Aku ka ngulang njenguak kamu.

¹⁹ Tigha jerang agi, deniau nidau ka nginak Aku agi, anyautu kamuni ka nginak Aku. Akuni idup, karnau itu kamu ka idup pulau.

²⁰ Aghitu pulau kamu ka ngeruani, bansau Aku dalam BapakKu ngan kamu dalam Aku, Aku pulau dalam kamu.

²¹ Jemau diau nerimau perintaKu ngan nurutinyau, jemau itula nyayangi Aku. Mangku jemau diau nyayangi Aku ka disayangi BapakKu. Aku pulau ka nyayangi jemautu ngan nyatauka diriKu ngan diau.”

²² Yudas, ukan Yudas Iskariut, betanyau ngan Yesus, kataunyau, “Tuhan, tuapau sebapau Dighi endak nyatauka Dighi ngan kami, nidau ngan gegalau deniau?”

²³ Katau Yesus, “Amun jemau nyayangi Aku, diau ka nuruti kici'anKu. BapakKu ka nyayangi diau, mangku Kami ka njenguak diau ngan mendam ngan diau.

²⁴ Jemau diau nidau nyayangi Aku nidau nuruti kici'anKu. Kici'an diau kamu dengaghtu ukan jak di Aku, tapitu jak di Bapak diau ngajung Aku.

²⁵ Gegalaunyautu Kukiciakka ngan kamu, semasau Aku gi betunggal ngan kamu.

²⁶ Anyautu Rua Allah, Penulung diau ka diajung Bapak atas namauKu, diautu ka ngajaghka gegalaunyautu ngan kamu ngan ngingatka gegalaunyau diau la Kukiciakka ngan kamu.

²⁷ Aku mbuat ati kamu tenang. Keinji'anKu Kuenjuakka ngan kamu, mangku diau dienjuakka itu ukan luak diau dienjuakka deniau. Nidau nanti temas, ngan nidau nanti penakut.

²⁸ Kamu la ndengagh Aku bekatau ngan kamu, Aku ka pegi, anyautu Aku ka ngulang agi njenguak kamu. Amun kamu nyayangi Aku, cetau kamu riang, karnau Aku pegi njenguak BapakKu, karnau pentingla Bapak sangkan Aku.

²⁹ Aku ngiciakka titu ngan kamu mbak kini, antak ka gegalaunyautu tejadi, supayau kamu percayau, amun titu tejadi nanti.

³⁰ Aku nidau ka ngiciak banyak agi ngan kamu, karnau la masaunyau penguasau deniauni datang. Anyautu diau nidau bekuasau ngan diriKu.

³¹ Anyautu gegalaunyautu mesti tejadi, supayau deniau keruan, bansau Aku nyayangi Bapak ngan ngerjauka gegalaunyau diau diajungka Bapak ngan Aku. Mela, kitau pegi jak di sini.”