YUHANIS 11 - PEJANJIAN EMPAI CERITAU ILUAK

Lasarus mati

¹ Lasarus mendam di Betania ngan kelawaiau Maria ngan Marta.

² Mariatu tinau diau minya'i keting Tuhan ngan minyak ghum, dikusu'inyau ngan gumba'au.

³ Lasarus itu buidapan, mangku kelawaiautu ngajung jemau ngiciakka ngan Yesus, “Muanai kami diau Dighi sayangitu buidapan.”

⁴ Yesus ndengagh ceritau itu, Diau bekatau, “Idapan ini nidau ka mbatak nyawau. Ini tejadi, mangku Allah diagungka, Anak Allah pulau diagungka.”

⁵ Yesus sayang nian ngan Marta tigau beghadingtu.

⁶ Yesus la ndengagh ceritau tadi, bansau Lasarus buidapan, mangku Diau masia mendam di badaHau duau aghi agi.

⁷ La udim itu Diau ngiciakka ngan anak-buaHau, “Mela, kitau ngulang ke Yudia.”

⁸ Anak-buaHautu bekatau, “Senitu jemau Yahudi endak nyipati Dighi ngan batu. Mbak kini Dighi endak ngulang ke situ agi?”

⁹ Katau Yesus, “Ukanau saghi duau belas jam? Jemau diau bejalan aghi siang nidau tuantuak keting, karnau diau nginak terang deniau.

¹⁰ Jemau diau bejalan aghi malam, tuantuak keting, karnau nidau bediau terang ngan diau.”

¹¹ Luak itula kici'an Yesus, mangku Diau bekatau agi, “Kantin kitau Lasarus la tiduak, anyautu Aku ka pegi mbangunka diau.”

¹² Katau anak-buaHau, “Tuhan, amun Lasarus tiduak, diau ka ghadu.”

¹³ Sebenaghau diau dikiciakkaNyau tadi, Lasarus mati, anyautu anak-buaHau nyangkau diau dikiciakkaNyautu, Lasarus tiduak nian.

¹⁴ Mangku Yesus ngiciak ngan ughangtu ngan sebenaghau, katauNyau, “Lasarus la mati.

¹⁵ Anyautu Aku riang pulau, Aku nidau di situ masau itu, karnau iluakla batan endak kamu luak ini, mangku kamu belajagh percayau. Mbak kini mela kitau pegi ngaruaka diau.”

¹⁶ Tumas diau pulau dikiciakka “Gembagh” ngiciak ngan kantinau anak-bua Yesus lainau, kataunyau, “Mela kitau ngikut endak mati serempak ngan Diau.”

Yesustu ngenjuakka idup ngan mbuat jemau ngulang idup

¹⁷ Yesus sampai di Betania, Lasarus la empat aghi dikuburka.

¹⁸ Betaniatu pasigh ngan Yerusalim, kekirau bejalan setenga jam jawuhau.

¹⁹ Banyak jemau Yahudi la datang nandangi Marta ngan Maria endak melemakka ati ughang duau beghadingtu, karnau muanaiautu la mati.

²⁰ Marta ndengagh ceritau Yesus la datang, diau pegi njenguak Diau. Maria mendam di ghuma.

²¹ Mangku Marta ngiciak ngan Yesus, kataunyau, “Tuhan, misalau Dighi adau di sini, muanaiku cetau nidau mati.

²² Anyautu aku keruan, mbak kini pulau Allah ka ngenjuakka ngan Dighi gegalaunyau diau Dighi pintak ngan Diau.”

²³ Katau Yesus, “Muanai kaba ka ngulang idup.”

²⁴ Katau Marta, “Aku keruan, diau ka ngulang idup masau aghi kiamat.”

²⁵ “Akunila ngenjuakka idup ngan mbuat jemau ngulang idup.” Katau Yesus, “Jemau diau percayau ngan Aku ka idup, empuak diau la mati.

²⁶ Mangku jemau diau idup ngan percayau ngan Aku, nidau ka mati selelamaunyau. Apu kaba percayau tini?”

²⁷ “Au, Tuhan,” katau Marta, “Aku percayau Dighitu Almasih, Rajau Penyelamat, Anak Allah, diau ka datang ke deniau ini.”

Yesus nangis

²⁸ La udim ngiciak luak itu, Marta pegi endak mantau Maria mbisi'inyau, “Guru adau di sini, nanyauka kaba.”

²⁹ Satu ndengagh ceritau itu, Maria cecepatan betegak pegi njenguak Yesus.

³⁰ Yesus lum masuak dusun, Diau gi adau di bada Marta ngiciak ngan Diau tadi.

³¹ Jemau Yahudi diau dang adau di ghumahau endak melemakka atiau nginak Maria cecepatan betegak pegi keluagh. Ughangtu ngikutka diau, karnau nyangkau diau pegi ke perantuan endak nangis di situ.

³² La sampai di bada Yesus tadi, Maria nginak Yesus, mangku nunduak di adapanNyau ngan bekatau, “Tuhan, misalau Dighi di sini, cetau muanaiku nidau mati.”

³³ Satu Yesus nginak Maria nangis ngan jemau Yahudi diau ngikutkanyau nangis galau, atiAu sian nian,

³⁴ mangku Diau nanyauka, “Di manau bada diau dikuburka?” Katau ughangtu, “Mela kina'ila, Tuhan!”

³⁵ Mangku Yesus nangis.

³⁶ Jemau Yahuditu bekatau, “Kina'ila, ukan main sayangAu.”

³⁷ Adau pulau diau bekatau, “Diauni mbuat jemau butau nginak. Cengki Diau pacak nulung, mangku Lasarus galak endiak ka mati.”

Lasarus ngulang idup

³⁸ Yesus sial nian mangku pegi ke perantuan. Kuburantu tebuak besak, ditukup ngan batu.

³⁹ Katau Yesus, “Guliakkala batu itu.” Marta, uau jemau mati itu, nimbal, kataunyau, “Tuhan, la empat aghi diauni dikuburka. Cetau la bembau.”

⁴⁰ Yesus bekatau, “La Kukiciakka ngan kaba, ‘Amun kaba percayau, kaba ka nginak kuasau Allah.’ ”

⁴¹ Mangku ughangtu ngguliakka batu itu, Yesus ncungak ke langit ngan bekatau, “Terimau kasia, Bak, karnau Dighi la ndengaghka du'aKu.

⁴² Aku keruan Dighi maju ndengaghka du'aKu, anyautu Aku ngiciakka ini batan endak jemau banyak diau adau di sini, supayau ughangtu percayau, bansau Dighitu ngajung Aku.”

⁴³ La udim ngiciakka luak itu, Yesus tegauk, katauNyau, “Lasarus, keluaghla!”

⁴⁴ Jemau diau la mati tadi ngeluagh. Keting tanganau masia bebalut ngan kain putia ngan dayiau ditukup ngan setangan. Mangku katau Yesus ngan ughang di situ, “Kelucungila kain pembalutau, mangku diau pacak bejalan.”

Kesepakatan endak mbunua Yesus

⁴⁵ Banyak jak di jemau Yahudi diau nandangi Maria percayau ngan Yesus, karnau la nginak setu diau dibuatAutu.

⁴⁶ Adau pulau diau pegi njenguak jemau Parisi ngiciakka ngan ughangtu setu diau la dibuat Yesustu.

⁴⁷ Mangku imam-imam bepangkat tinggi ngan jemau Parisi ngajung pengadilan agamau betunggal, ngiciakka, “Tuapau diau mesti kitau kerjauka? Jemau itu ngerjauka banyak tandau nyelia.

⁴⁸ Amun kitau ngenangka Diau maju luak itu, gegalau jemau ka percayau ngan Diau, mangku penguasau jemau Rum ka datang merusakka Ghuma Allah ngan gegalau bangsau kitau.”

⁴⁹ Mangku sughang jak di ughangtu, namaunyau Kayapas, imam besak taun itu, bekatau, “Kamuni endiak keruan tuapau-apau.

⁵⁰ Apu kamu nidau ngeruani, iluakla batan endak kamu sughang mati sangkan gegalau bangsau kitau benasau?”

⁵¹ Kayapas ngiciakka luak itu ukan jak di rupu'annyautula, tapitu karnau diau Imam Besak taun itu, diau meramalka, Yesus ka mati batan endak jemau Yahudi.

⁵² Diau ukan mati batan endak bangsau itu ajau, tapitu pulau endak nunggalka ngan nyatuka anak-anak Allah diau di bada lainau.

⁵³ Mangku mulai aghitu pengulu-pengulu Yahudi sepakat endak mbunua Yesus.

⁵⁴ Karnau itu Yesus nidau agi bejalan di mukau umum jemau Yahudi. Diau pegi jak di Yudia ke kuta Epraim diau pasigh ngan padang bungin. Di situla Yesus mendam ngan anak-buaHau.

⁵⁵ Masau itu aghi rerayau Paska la pasigh. Banyak jemau la pegi ke Yerusalim endak njalanka adat lembagau pembasuan diri nurut adat Yahudi, antak ka aghi rerayau mulai.

⁵⁶ Ughangtu ndala'i Yesus, mangku ughangtu dang betunggal di Ghuma Allah, sughang ngiciak ngan diau lain, kataunyau, “Luak manau pendapat kamu? Asauku Yesus nidau ka datang ngikuti aghi rerayau ini.”

⁵⁷ Imam-imam bepangkat tinggi ngan jemau Parisi la merintaka, bilang jemau diau keruan bada Yesus mesti ngiciakkanyau ngan ughangtu, supayau Yesus ditangkap.