YUDAS 1 - PEJANJIAN EMPAI CERITAU ILUAK

¹ Jak di aku, Yudas, ading Yakubus, diau njadi budak Yesus Keristus. Aku nulis ini batan endak jemau diau dipilia ngan disayangi Allah Bapak ngan dijagaui batan endak Yesus Keristus.

² Aku bedu'a, supayau Allah iluak nian ngan kamu, mangku kamu tenteram galau ngan tamba sangi sayangi.

Guru diau nyesatka

³ Kantin-kantinku diau kusayangi. Aku endak nian nulis ngan kamu ceritau selamat diau la kitau alami galau. Anyautu mbak kini aku terupuak nuliska ini endak neguaka kamu, mangku kamu maju beusaha batan endak ajaghan diau benagh diau la dienjuakka Allah ngan umatAu.

⁴ Adau jemau diau masuak di guak kamu ngan nidau dikeruani. Ughangtu jemau ja'at, nyala-gunauka ceritau keilu'an Allah endak nuruti serilau ngan nidau ngaku'i Yesus Keristus, awuak Diau sughang itula Penguasau ngan Tuhan kitau. Jak di senitu ukuman ughangtu la ditetapka.

⁵ Kamu la keruan gegalaunyautu ngan nidau asau-asau. Anyautu aku endak ngingatka kamu, bansau nyela Tuhan diau nyelamatka umatAu Israil jak di nenggeri Mesir. Udim itu Diau mbenasauka jemau diau nidau percayau.

⁶ Ingatla malaikat-malaikat diau melanggar batas kekuasauannyau. Malaikattu pegi ninggalka badahau. Mangku ughangtu dikebat ngan rantai di bada diau keleman di bawa tana. Di situ ughangtu dita'an enggut diukum masau kiamat nanti.

⁷ Ingatla pulau kuta Sudum ngan Gumura ngan dusun-dusun di ngepungannyau. Jemau kuta itu ngerjauka setu diau semegi ngan malaikat tadi. Ughangtu ngerjauka setu diau ja'at ngan menaugawia ngan ndalak kepuasan diau nidau pantas. Ughangtu la diukum ngan api diau nidau padam-padam, njadi peringatan batan endak gegalau jemau.

⁸ Luak itu pulau ughangtu ngayal sampai merusak badanau sendighi. Ughangtu nganggap Allah nidau bekuasau ngan nggelakka malaikat diau agung di sergau.

⁹ Mikail, pengulu malaikattu, nidau pulau ngerjauka titu. Masau diau bebala ngan Iblis mbalaka sapau diau ka dapat mayat Musa, nidau beghani nggelakka Iblis ngan kici'an. Diau cuman ngiciakka, “Tuhan ka marai kaba!”

¹⁰ Anyautu ughangtu nggelakka gegalaunyau diau nidau ughangtu keruani. Ughangtu semegi ngan benatang diau nidau berupu'an diau ngikut serilaunyau ajau. Ikak itula ughangtu benasau.

¹¹ Ughangtu celakau! Ughangtu ngikuti jalan Kain. Ughangtu endak tanci, mangku ncelakauka diriau ngan sesat luak Biliam. Ughangtu ka benasau karnau melawan luak Kura.

¹² Masau kamu ngadauka jamuan, ughang itula di guak kamu diau maluka. Ughangtu makan ngan selak, nidau maluan ngan cuman merupuakka diriau ajau. Ughangtu luak aban diau ditiup angin diau nidau nughunka ujan. Ughangtu luak batang diau nidau ngasilka bua empuak pangkau bebuahan, luak batang diau la dicabut ngan akaghau diau mati nian.

¹³ Luak umbak besak diau nimbulka buwia diau kumua, luak itula ughangtu mbuwiaka perembak diau maluka. Ughangtu luak bintang diau sesat. Batan endak ughangtu la disediauka Allah bada di keleman nian enggut selelamaunyau.

¹⁴ Hinuk, pengadau piyut Adam, senitu la ngiciakka ughangtu, kataunyau, “Kina'ila, Tuhan datang ngan beribu-ribu malaikatAu diau suci

¹⁵ endak ngakimi gegalau jemau. Diau ka ngukum jemau ja'at karnau peremba'au diau ja'at diau dikerjaukanyautu. Jemau bedusau diau melawantu ka diukum karnau gegalau katau diau nggelakkatu.”

¹⁶ Ughangtu maju bejijia ajau ngan nyempit karnau penanggungannyau. Ughangtu idup nurut serilau. Ughangtu muji diriau ngan cak iluak, supayau dapat untung.

Peringatan ngan petua

¹⁷ Kantin-kantinku diau kusayangi, ingatkala setu diau senitu la dikiciakka rasul-rasul Tuhan kitau Yesus Keristus.

¹⁸ Ughangtu maju ngiciakka ngan kamu senitu, “Antak ka aghi kiamat ka adau jemau diau ka nggelakka kamu. Ughangtu idup nurut serilaunyau diau ja'at.”

¹⁹ Ughang itula diau mbuat pecelikaian. Ughangtu dikuasaui serilau deniauni, ukan dikuasaui Rua Allah.

²⁰ Anyautu kamu beusahala, supayau kamu tamba percayau ngan Yesus Keristus, karnau imantu bereresia nian. Mangku bedu'ala ngan kuasau Rua Allah.

²¹ Jagauila diri kamu, mangku kamu nidau nyimpang jak di sayang Allah, sampai nungguka Tuhan kitau Yesus Keristus ngenjuakka ngan kamu idup selelamaunyau, karnau Diau iluak nian.

²² Sialkala jemau diau asau-asau.

²³ Selamatkala ughangtu jak di api nerakau. Tariakla ughangtu ke jalan diau benagh. Jemau lain mesti kamu sialka pulau ngan peghasauan takut. Anyautu luatkala bekakas ughangtu diau la dikumuhi serilau endak bedusau.

Du'a pujian

²⁴ Allah pacak njagaui kamu, supayau jangan bebuat dusau. Diau pacak mbata'i kamu ngan riang ngan nidau becacat ke badaHau diau agung.

²⁵ Diautula Allah ngan Rajau Penyelamat kitau karnau Yesus Keristus, Tuhan kitau. Diautu Allah diau agung, bekuasau ngan diregaui jak di senitu enggut mbak kini ngan selelamaunyau. Amin.