YAKUBUS 3 - PEJANJIAN EMPAI CERITAU ILUAK

Nguasaui lida

¹ Kantin-kantinku, nidau nanti banyak jak di kamu diau endak njadi guru. Kitau keruan, bansau kitau diau njadi guru ka diadili lebia beghat jak di jemau lain.

² Gegalau kitau rajin bebuat sala. Jemau diau nidau kekela bebuat sala ngan kici'an, diautu sempernau diau pacak nguasaui gegalau diriau.

³ Kitau ngenauka buling di idung kebau, mangku diau ngikut kendak kitau, mangku kitau nguasaui gegalau kebau itu.

⁴ Kina'ila pulau kapal. Kapal itu besak nian ngan dibatak angin deghas, anyautu kapaltu dikendalika kemudi diau keciak nian nurut kendak jemau diau ngendalikanyautu.

⁵ Luak itu pulau ngan lida kitau. Empuak lidatu keciak, mangku diau pacak nyumbungka diri ngiciakka setu diau besak-besa'an. Kina'ila pulau api diau keciak, diau pacak nyilap utan diau libagh nian.

⁶ Lida itu luak api. Lidatu nimbulka keja'atan di badan kitau mangku gegalaunyau ja'at. Ngan api diau asalau jak di nerakau lidatu mutungka gegalau idup kitau.

⁷ Bilang mecam benatang belia, benatang njalagh, burung ngan ikan pacak dijinakka manusiau, nyela la dijinakka.

⁸ Anyautu lida manusiau nidau pacak dijinakka sughang kia. Lidatu ja'at, nidau pacak dikuasaui, penua racun diau mbunua.

⁹ Ngan lidatu kitau muji Tuhan, Bapak kitau. Ngan lida kitau pulau ndawaika jemau diau dijadika nurut rupau Allah.

¹⁰ Jak di mulut diau semegi ngeluagh katau pujian ngan pulau katau dawaian. Semestiau jangan luak itu!

¹¹ Apu adau matau-ayiak diau ngeluaghka ayiak biasau ngan ayiak masin jak di matau-ayiak diau semegi?

¹² Batang aghau nidau pacak ngasilka niugh, batang kupi nidau pacak ngasilka aghau. Luak itu pulau matau-ayiak diau masin nidau pacak ngeluaghka ayiak biasau.

Pengertian jak di sergau

¹³ Amun adau jak di kamu diau bepengertian nian, diau mesti nyataukanyau ngan idup iluak ngan kerjau diau iluak diau dikerjauka ngan pengertian ngan nidau geduak.

¹⁴ Anyautu amun kamu sengit, purik ngan merupuakka diriau ajau, titu nidau nanti dibanggaka, karnau ngan carau itu kamu ngubai ceritau diau benagh njadi sala.

¹⁵ Pengertian luak itu ukan asalau jak di sergau. Diau asalau jak di deniau, jak di serilau manusiau, jak di iblis.

¹⁶ Amun adau diau sengit ngan merupuakka diriau ajau, mangku adau pulau kekacauan ngan gegalau mecam kerjau diau ja'at.

¹⁷ Anyautu jemau diau adau pengertian jak di sergau, diau penting sekali supayau jemautu tulus, mangku galak bedamai, galak begaul ngan belagham. Diau nyialka jemau nian ngan ngerjauka diau iluak, diau nidau mihak ngan nidau cak iluak.

¹⁸ Nyela, keilu'an diasilka jak di damai jak di jemau diau galak damai.