YAKUBUS 2 - PEJANJIAN EMPAI CERITAU ILUAK

Jangan nginak rupau

¹ Kantin-kantinku diau percayau ngan Yesus Keristus, Tuhan diau agungtu, jangan kamu nginak rupau.

² Misalau adau jemau kayau pakai cincin emas ngan baju alap datang betunggal ngan kamu, mangku adau pulau jemau serik diau pakai baju cebagh galau.

³ mangku kamu meregaui jemau diau bebaju alaptu ngan bekiciak ngan diau, “Duduakla di kerusi diau alap ini.” Mangku ngan jemau serik tadi kamu bekiciak, “Betegakla di situ.” apu “Duduakla di dasagh guak ketingku.”

⁴ Ngan carau luak itu kamu la mbidaka di antarau kamu ngan ngengirauka jemau ngan rupu'an diau ja'at.

⁵ Kantin-kantinku diau kusayangi, ingatkala, jemau diau dianggap deniau serik dipilia Allah njadi jemau kayau karnau percayau. Jemautu ka bulia bagian di sergau diau dijanjika Allah ngan jemau diau nyayangiNyau.

⁶ Anyautu kamu nggelakka jemau serik. Awuak jemau kayautula diau nyaraui kamu ngan mbatak kamu ke pengadilan.

⁷ Ughangtula nggelakka namau diau diregaui diau dienjuakka ngan kamu.

⁸ Amun kamu nuruti ukum diau penting ini diau ditulis di Injil, “Sayangila kantin kaba, luak kaba nyayangi diri kaba”, kamu ngerjauka setu diau iluak.

⁹ Anyautu amun kamu nginak rupau, kamu bedusau. Ukum Allahtu nyatauka, bansau kamu melanggar ukum.

¹⁰ Jemau diau melanggar sutiak perinta Allah semegi ngan melanggar gegalaunyau.

¹¹ Karnau Diau bekatau, “Jangan menaugawia.” Diau pulau bekatau, “Jangan mbunua.” Amun kamu nidau menaugawia, tapitu mbunua, kamu pelanggar ukum.

¹² Ngiciakla ngan kerjaula luak jemau diau diadili nurut ukum Allah diau mbibaska manusiau.

¹³ Karnau Allah nidau ka ngancakka sayangAu ngan jemau diau nidau endak nyayangi. Anyautu kuatla sayang sangkan ukuman.

Percayau ngan ngerjaukanyau

¹⁴ Kantin-kantinku, tuapau gunaunyau jemau bekatau, “Aku percayau”, anyautu peremba'au nidau nunjuakkanyau? Apu percayau luak itu pacak nyelamatka?

¹⁵ Misalau sughang kantin kamu diau percayau nidau bediau baju ngan nidau bediau makanan,

¹⁶ mangku amun sughang jak di kamu ngiciakka ngan diau, “Allah iluak ngan kaba. Pakaila baju tebal ngan makanla”, anyautu nidau ngenjuakka ngan diau setu diau ka ngidupkanyau, tuapau gunaunyau?

¹⁷ Luak itula pulau, amun percayau. Amun nidau dinyatauka di perembak, mangku percayautu nidau bediau gunaunyau.

¹⁸ Asauku adau diau bekatau, “Kamutu percayau, akuni ngerjauka setu diau iluak.” Aku ka nimbal, “Tunjuakkala ngan aku percayau kamutu nidau bediau setu diau iluak, mangku aku ka nunjuakka ngan kaba percayauku ngan kerjauku diau iluak.”

¹⁹ Kamu percayau, bansau Allah gi sughang. Iluak! Iblis pulau percayau titu, mangku diau gemetagh ketakutan.

²⁰ Ui, kamu bigal nianan. Apu aku mesti nunjuakka, bansau percayau nidau bediau kerjau diau iluak nidau bediau gunaunyau?

²¹ Ingatka ajau Abraham, niniak puyang kitau. Diau diterimau Allah karnau kerjaunyau, masau diau nyeraka Isak, ana'au, endak dikerbanka ngan Allah.

²² Nyela nian, bansau percayau mesti dinyatauka ngan kerjau, mangku ngan kerjau itu percayau njadi sempernau.

²³ Luak itu ditepati katau Injil ini, “Abraham percayau ngan Allah, mangku diau diterimau njadi jemau benagh.” Itula sebapau Abraham dikiciakka “kantin Allah”.

²⁴ Na, kamu nginak, bansau jemau dibenaghka karnau kerjaunyau, ukan karnau cuman percayau ajau.

²⁵ Luak itu pulau Rahab, tinau pelacur itu. Diau diterimau Allah karnau kerjaunyau, masau diau mbunika ajungan itu di ghumahau ngan nulung ughangtu belaghi ke jalan lain.

²⁶ Na, luak badan nidau bediau rua mati, luak itu pulau percayau nidau bediau kerjau nidau bediau gunaunyau.