YAKUBUS 1 - PEJANJIAN EMPAI CERITAU ILUAK

¹ Batan endak gegalau umat Allah diau adau di gegalau deniau. Pesan jak di aku, Yakubus. Aku bekerjau batan endak Allah ngan Tuhan kitau Yesus Keristus.

Percayau ngan bepengertian

² Kantin-kantinku, riangla kamu, amun kamu meghasauka banyak cubauan.

³ Kamu la keruan, amun kamu maju percayau empuak dicubaui, mangku asilau kamu njadi tekun.

⁴ Mangku kamu mesti maju tekun mangku ngasilka diau sempernau, nidau kurang tuapau-apau.

⁵ Amun adau jemau jak di kamu diau kurang bepengertian, jemautu mesti mintak ngan Allah, mangku Allah ka ngenjuakka pengertian ngan diau, karnau ngan bilang jemau Allah ngenjuak ngan riang, nidau ngungkit.

⁶ Jemau diau mintak mesti percayau, jangan asau-asau. Jemau diau asau-asau luak umbak laut diau diembus angin ke situ ke sini.

^7-8 Jemau diau luak itu rupu'annyau nidau tetap ngan nidau keruan tuapau diau endak dikerjaukanyau. Karnau itu diau nidau nanti ngaghapka bulia setu jak di Tuhan.

Kayau ngan serik

⁹ Jemau diau serik mesti meghasau riang, amun Allah ninggikanyau.

¹⁰ Jemau kayau mesti riang pulau, amun Allah nyerikkanyau karnau diau ka abis luak bungau ghumput.

¹¹ Matau-aghi tumbua, mangku masau dang angat ghumputtu ka layu, bungaunyau runtuan, alapau abis. Luak itu pulau jemau kayau; diau ka abis, masau dang beusaha.

Ujian ngan cubauan

¹² Riangla jemau diau ta'an dicubaui, karnau udim diau buasil diujitu, diau ka nerimau upa, itu idup diau la dijanjika Allah ngan jemau diau nyayangi Diau.

¹³ Amun adau jemau diau dicubaui, jangan diau ngiciakka, “Cubauan itu datang jak di Allah.” Allah nidau pacak dicubaui diau ja'at ngan nidau pulau ncubaui sughang kiala.

¹⁴ Tapitu bilang jemau dicubaui ngan serilaunyau sendighi, diau dipikati serilaunyautu.

¹⁵ Mangku amun serilau diau ja'attu dituruti, nimbul dusau. Mangku amun dusau la buasil, akibatau mati.

¹⁶ Kantin-kantinku diau kusayangi, jangan kamu tetipu!

¹⁷ Gegalau enju'an diau iluak ngan diau sempernau datang jak di sergau, dienjuakka Allah diau njadika gegalau terang di langit. Diautu Allah diau nidau beghuba ngan nidau mbuat keleman, karnau nidau njawuhi kitau.

¹⁸ Nurut kenda'Autula Diau njadika kitau ngan pirmanAu diau benagh. Diau ngerjauka titu, supayau kitau bulia bada diau iluak sekali jak di gegalaunyau diau la dijadikaNyau.

Ndengagh ngan ngerjaukanyau

¹⁹ Ui kantin-kantinku diau kusayangi. Ingatkala iluak-iluak. Bilang jemau mesti cepat ndengagh, tapitu nidau cepat nimbal ngan nidau cepat mara.

²⁰ Jemau diau mara nidau pacak ngerjauka setu diau iluak diau melemakka ati Allah.

²¹ Karnau itu capakkala gegalaunyau diau nidau iluak ngan ja'at diau banyak nian. Terimaula ngan riang katau Allah dalam ati kamu, karnau katau itu adau kuasau nyelamatka kamu.

²² Kamu mesti ngerjauka katau Allah, jangan cuman ndengagh ajau. Amun nidau luak itu, kamu nipuka diri kamu sendighi.

²³ Amun jemau cuman ndengagh katau ajau ngan nidau ngerjaukanyau, diautu luak jemau diau ngina'i dayiau diau sebenaghau di cemin.

²⁴ Udim dikina'i iluak-iluak, diau pegi ngan nidau teghingat agi dayiau tadi.

²⁵ Ukum Allah sempernau, adau kuasau endak nyelamatka manusiau. Jemau diau melajaghi, meratikanyau iluak-iluak ngan ngerjauka ukumtu nian, jemautu ka disayangi Allah, mangku gegalaunyau diau dikerjaukanyau ka buasil, karnau ukan cuman ndengagh ajau, mangku nidau teghingat agi,

²⁶ Amun adau jemau diau meghasau diriau ta'at ngan agamaunyau, anyautu nidau njagaui lidahau, diau nipuka diriau. Agamaunyau nidau bediau retiau.

²⁷ Keta'atan agamau diau ngenian nurut Allah Bapak, itu nulung jemau anak umang ngan randau diau sengsarau ngan njagaui diri, mangku jangan dirusakka deniau.