TITUS 3 - PEJANJIAN EMPAI CERITAU ILUAK

Petua batan endak jemau percayau

¹ Ingatkala jemau Keristen, supayau tunduak ngan pemerinta ngan jemau diau bekuasau. Ughangtu mesti ta'at ngan sukau ngerjauka gegalaunyau diau iluak.

² Kiciakka ngan ughangtu, supayau jangan ngupatka jemau ngan jangan belagau, tapitu supayau maju ngaligh ngan iluak ngan sukau bedamai ngan gegalau jemau.

³ Karnau senitu kitau pulau idup bigal, nidau ta'at, sesat. Kitau dibudakka bemecam serilau ngan kendak. Idup kitau ja'at, sengit, sangi luatka.

⁴ Anyautu Allah, Penyelamat kitau, nyayangi kitau, la nyatauka keilu'anNyau ngan kitau.

⁵ Masau itu Diau nyelamatka kitau, ukan karnau kitau ngerjauka setu diau iluak, tapitu karnau Diau sayang ngan kitau. Diau nyelamatka kitau ngan carau mbasua kitau endak ngenjuakka idup diau empai. Titu dikerjauka Rua Allah

⁶ diau la dienjuakkaNyau galau ngan kitau karnau Yesus Keristus, Rajau Penyelamattu.

⁷ Mangku kitau diau la dibenaghka karnau keilu'anNyautu bulia idup selelamaunyau diau kitau aghapkatu.

⁸ Kici'an itu benagh. Mangku aku endak, supayau kaba nekanka kici'antu, mangku jemau diau la percayau ngan Allah beusaha nian ngerjauka setu diau iluak. Itula diau iluak ngan begunau batan endak gegalau jemau.

⁹ Jawuhila balahan diau nidau begunau diau bigal, ceritau niniak puyang, becelikaian ngan balahan ceritau ukum Taurat. Gegalaunyautu nidau bediau gunaunyau ngan nidau bediau untungau.

¹⁰ Jemau diau mbuat becelikaian di guak jemau Keristen mesti kaba tegughi sekali ngan duau kali. Udim itu jangan agi bekawan ngan diau.

¹¹ Kaba keruan, bansau jemau luak itu sesat ngan maju bedusau. Itu nyatauka diau besala nian.

¹² Amun aku la ngajung Artemas madak Tikikus njenguak kaba, beusahala cecepat datang guak aku di Nikupulis, karnau aku la merencanauka mendam di situ selamau pangkau dingin.

¹³ Tulungla nian Sinas, guru ukumtu, ngan Apulus, mangku ughang duautu pacak bejalan ngan nidau bediau kurangau.

¹⁴ Jemau kitau mesti belajagh maju ngerjauka setu diau iluak, supayau pacak ncukupi setu diau enda'au diau penting. Mangku idup ughangtu begunau.

Pesan

¹⁵ Pesan jak di gegalau jemau diau adau di sini seghundak ngan aku. Sampaika pesan kami ngan kantin-kantin kitau diau percayau ngan Keristus. Aku bedu'a, supayau Tuhan iluak nian ngan gegalau kamu.