RUM 9 - PEJANJIAN EMPAI CERITAU ILUAK

Israil dipilia Allah

¹ Setu diau kukiciakka ini benagh. Aku nidau mbu'ung, karnau aku hak Keristus. Ati keciakku diau dikuasaui Rua Allah ngiciak pulau, bansau kici'anku ini benagh.

² Aku bingung nian ngan atiku madak kematila

³ karnau adiak-sanakku, jemau bangsauku. Lagi aku sukau didawaika ngan diceghaika ngan Keristus batan endak ughangtu.

⁴ Jemau Israil dipilia Allah, la dijadika ana'Au. KuasauNyau la dinyatauka ngan ughangtu. Diautu la bejanji ngan ughangtu, la dienjuakka ukum Taurat, la dikiciakka carau sembayang ngan janji-janjiAu.

⁵ Ughangtu pengadau niniak puyang kami diau agungtu. Secarau manusiau Keristus asalau jak di bangsau itu. Allah diau nguasaui gegalaunyau dipuji selelamaunyau. Amin.

⁶ Titu ukan bereti, bansau janji Allah nidau lasung. Nyela, ukan gegalau jemau Israil njadi umatAu.

⁷ Lagi nidau gegalau pengadau Abraham dikiciakka anak Abraham nian. Allah ngiciakka ngan diau, “Cuman pengadau Isak ka dikiciakka pengadau kaba.”

⁸ Itu bereti, ukan gegalau pengadau dikiciakka ana'au, cuman pengadau diau dijanjika Allah.

⁹ Karnau Allah bejanji luak ini, “Masau diau ditetapka Aku ka ngulang agi, mangku Sara ka adau sughang anak lanang.”

¹⁰ Ukan itu ajau, Ribka adau duau ughang ana'au. Keduaunyau ba'au Isak, niniak puyang kitautu.

¹¹ Antak ka duau ana'autu adau, Allah la milia sughang. Pilian Allah nidau bepaut ngan kerjau manusiau, tapitu bepaut ngan kendak Allah, karnau masau itu duau ughangtu lum pacak ngerjauka tuapau-apau, apu diau iluak apu diau ja'at.

¹² Masau itu la dikiciakka ngan Ribka, “Anak diau tuau ka njadi budak adingau.”

¹³ Dalam Injil ditulis luak ini, “Yakub Kusayangi, Isau Kuluatka.”

¹⁴ Amun luak itu, tuapau kitau kiciakka mbak kini? Apu Allah nidau adil? La cetau Allah adil!

¹⁵ Allah la ngiciakka ngan Musa, “Aku ka iluak ngan jemau diau Kukenda'i, Aku ka nyayangi jemau diau endak Kusayangi.”

¹⁶ Mangku pilian Allah nidau tepaut ngan kendak ngan kerjau jemau, tapitu ngan keilu'an Allah.

¹⁷ Dalam Injil Allah bekatau ngan Piraun, rajau Mesirtu, “Aku njadika kaba rajau, karnau Aku endak ngancakka kuasauKu di kaba, mangku namauKu dikeruani di gegalau deniau.”

¹⁸ Mangku Allah nyialka jemau diau endak disialkaNyau. Diau mbuat jemau melawan, amun dikenda'iNyau.

Ukuman ngan keilu'an Allah

¹⁹ Mangku kamu ka ngiciak ngan aku, “Amun luak itu, ngapau Allah masia nyalaka manusiau? Sapau pacak ngalangi kendak Allah?”

²⁰ Sapau kamu, ui jemau, mangku endak nimbali Allah? Apu pacak setu diau dibuat ngiciak ngan diau mbuatau, “Ngapau aku dibuat luak ini?”

²¹ Apu ukan tukang peghiyuak behak ngerjauka tana liat sekenda'au? Tukangtu behak ngerjauka setu duau mecam pakai sebungka diau semegi, semecam batan endak kerjau diau iluak, semecam batan endak kerjau diau biasau.

²² Luak itu pulau Allah endak nunjuakka maraHau ngan nyatauka kuasauNyau. Anyautu Diau ngaligh nian ngan jemau diau mesti diukum ikak mbuat Diau mara.

²³ Allah pulau endak nunjuakka keagungan ngan kekayauan diau nidau abis-abis ngan kitau diau disayangiNyau, kitau diau la disediauka endak diagungka,

²⁴ kitau diau la dipilia ukan cuman jak di jemau Yahudi, tapitu jak di jemau bangsau lain pulau.

²⁵ Dalam kitab nabi Husia ditulis, “Jemau ukan umatKu ka Kukiciakka ‘umatKu’. Bangsau diau nidau Kusayangi ka Kujadika kesayanganKu.”

²⁶ Mangku, “Di bada jemau dikiciakka, ‘ukan umatKu’, di situ ughangtu ka dikiciakka ‘anak Allah diau idup’.”

²⁷ Nabi Yesaya ngiciakka jemau Israil luak ini, “Empuak jemau Israil banyak nian luak bungin di laut, cuman dikit ajau diau ka selamat,

²⁸ karnau nidau lamau agi Tuhan ka ngukum isi deniau.”

²⁹ Yesaya ngiciak pulau senitu luak ini, “Misalau Allah diau Mahakuasau ngabiska pengadau kitau, gegalau kitau njadi luak Sudum ngan Gumura.”

Ceritau iluak batan endak jemau Israil pulau

³⁰ Amun luak itu, tuapau kesimpulan kitau? Tuapau pacak kitau kiciakka? Ini: bansau jemau bangsau lain diau nidau beusaha endak dibenaghka Allah, la dibenaghka karnau percayau.

³¹ Anyautu jemau Yahudi diau maju beusaha na'ati ukum endak dibenaghka Allah nidau buasil.

³² Ngapau pulau nidau buasil? Karnau ughangtu ngerjauka titu ukan karnau percayau, tapitu ngaghapka kerjaunyau sendighi. Mangku ughangtu telabua karnau tuantuak ngan batu diau njadi pengalang.

³³ Ceritau batutu la ditulis dalam Injil luak ini, “Keruanila, di Siun la Kutepiakka sebua batu diau mbuat jemau tuantuak ngan telabua. Mangku bilang jemau diau percayau ngan Diau nidau ka dimaluka.”