RUM 8 - PEJANJIAN EMPAI CERITAU ILUAK

Idup nurut Rua Allah

¹ Mbak kini jemau diau idup seghundak ngan Yesus Keristus nidau agi diukum selelamaunyau,

² karnau Rua Allah diau nguasaui kitau ngan ngenjuakka idup la melepaska kitau jak di kuasau dusau ngan maut.

³ Setu diau nidau pacak dikerjauka ukum Taurat karnau kitau manusiau bedusau la dikerjauka Allah. Diau la ngajung Ana'Au datang ke deniau nyerupaui manusiau biasau, njadi kerban batan dusau manusiau, mangku dusau diukum ngan diabiskaNyau.

⁴ Allah ngerjauka titu, supayau kitau pacak ngerjauka kenda'Au diau nyatau dalam ukum Taurat, karnau kitau idup nurut Rua Allah ukan nurut serilau manusiau.

⁵ Jemau diau idup nurut serilau manusiau maju merupuakka setu diau diibauka manusiau. Jemau diau idup nurut Rua Allah maju merupuakka setu diau dikenda'i Rua Allah.

⁶ Amun kitau idup nurut serilau manusiau, kitau mati. Amun kitau idup nurut Rua Allah, kitau idup damai ngan Allah.

⁷ Amun ati jemau dikuasaui serilau manusiau, diau bemusuan ngan Allah, karnau diau nidau na'ati ukum Allah, nyela, diau nidau pacak ta'at ngan ukum Allah.

⁸ Jemau diau idup nurut serilau manusiau nidau pacak melemakka ati Allah.

⁹ Anyautu kamu nidau idup nurut serilau manusiau. Kamuni idup nurut Rua Allah, amun ngenian Ruatu adau dalam kamu. Jemau diau nidau bediau Rua Allah ukan hak Keristus.

¹⁰ Amun Keristus adau dalam kamu, mangku Rua Allah ngenjuakka idup ngan kamu karnau la dibenaghka, empuak badan kamu ka mati karnau dusau.

¹¹ Amun Rua Allah diau la ngidupka Keristus jak di mati adau dalam kamu, mangku Allah diau ngidupka Keristus jak di matitu ka ngidupka badan kamu pulau, karnau RuaHau adau dalam kamu.

¹² Mangku, kantin-kantinku, kitau adau utang. Kitau ukan beghutang ngan manusiau endak idup nurut serilau manusiau.

¹³ Amun kamu idup nurut serilau manusiau, kamu ka mati. Anyautu amun ngan kuasau Rua kamu la matika perembak diau bedusau, kamu ka idup.

¹⁴ Gegalau jemau diau nuruti Rua Allah njadi anak Allah.

¹⁵ Karnau Rua diau kamu terimau nidau njadika kamu budak, mangku kamu nidau penakut agi. Anyautu Ruatu njadika kamu anak Allah, mangku karnau kuasau Ruatu kitau mantau Allah “Bak, bakku!”

¹⁶ Rua Allah ngan rua kitau nyatauka, bansau kitau anak-anak Allah.

¹⁷ Mangku karnau kitau ana'Au, kitau pulau behak nerimau setu diau dijanjika Allah batan endak ana'Au. Kitau ka nerimau pulau luak Keristus setu diau la disediauka Allah batan endak Diau. Karnau, amun kitau sengsarau ngan Diau, kitau pulau ka diagungka ngan Diau.

Aghapan anak-anak Allah

¹⁸ Aku keruan, bansau penanggungan kitau mbak kini nidau pacak dibandingka ngan keagungan diau ka diancakka ngan kitau nanti.

¹⁹ Gegalau setu diau dijadika nunggu nian masau Allah ngancakka anak-ana'Au.

²⁰ Karnau gegalaunyautu la diseraka ngan nidau begati, ukan karnau dikenda'inyau, tapitu karnau kendak Allah diau nyerakanyau.

²¹ Empuak luak itu adau aghapan, bansau adau masau gegalaunyau diau dijadika Allah ka dilepaska jak di kuasau diau mbenasauka, mangku ka dilepaska ngan diagungka serempak ngan anak-anak Allah.

²² Kitau keruan, enggut mbak kini gegalaunyautu nyempit, karnau kesakitan luak tinau diau endak merunggu.

²³ Ukan itu ajau, kitau pulau nyempit dalam ati. Kitau la nerimau Rua diau dienjuakka Allah njadi pengenjuak diau dulu sekali. Kitau masia nunggu Allah mbibaska kitau njadika kitau ana'Au.

²⁴ Kitau diselamatka karnau ngaghapka Allah. Anyautu amun setu diau kitau aghapka la kina'an, titu ukan diaghapka agi. Sapau masia ngaghapka setu diau la kina'an?

²⁵ Anyautu amun kitau ngaghapka setu diau lum kitau kinak, mangku kitau ta'an nungguau.

²⁶ Luak itu pulau Rua Allah nulung kitau, karnau kitau nidau tegua, karnau kitau nidau keruan, luak manau semestiau kitau bedu'a. Rua itula mintak ngan Allah batan endak kitau karnau ghindu tegalau, nidau pacak dikiciakka.

²⁷ Mangku Allah diau ngeruani ati manusiau ngerti kendak Rua, karnau Ruatu mintak nurut kendak Allah batan endak umatAu.

²⁸ Kitau keruan, bansau Allah ngatur gegalaunyau, mangku ngasilka diau iluak batan endak jemau diau nyayangi Diau, jemau diau la dipilia nurut kenda'Au.

²⁹ Karnau bilang jemau diau la dipilia Allah jak di senitu pulau la ditetapka endak njadi semegi ngan Ana'Au Yesus Keristus, mangku Ana'Autu njadi diau tuau jak di ading-beghadingAu.

³⁰ Luak itula Allah milia ughangtu diau la dulu ditetapkaNyau, mangku ughang diau la dipiliatu pulau la seilu'an ngan Diau. Mangku ughang diau la seilu'antu ka diagungka pulau.

Nidau bediau diau pacak ngalangi Allah nyayangi kitau

³¹ Mangku tuapau diau pacak kitau kiciakka mbak kini? Sapau pacak melawan kitau, amun Allah mihak ngan kitau?

³² Allahtu rila nyeraka Ana'Au batan endak kitau galau. Baghia Diau nidau ngenjuakka ngan kitau gegalaunyau diau lainau.

³³ Sapau pacak ngaduka jemau diau dipilia, amun Allah la mbenaghkanyau?

³⁴ Apu adau diau pacak nyalaka ughangtu? Nidau bediau! Yesus Keristus la mati, tapitu la diidupka agi jak di mati, la duduak di sebela kanan Allah, mangku Diautu ka mbenaghka ughangtu.

³⁵ Tuapau pacak ngalangi Keristus nyayangi kitau? Apu Diau dialangi, amun kitau bingung ngan nanggung, amun kitau diluatka, amun kelapaghan ngan serik, amun adau bayau, lagi mati?

³⁶ Dalam Injil ditulis luak ini, “Sesaghian kami adau dalam bayau maut karnau Dighi. Kami dibuati luak bebiri diau endak disembelia.”

³⁷ Dalam gegalaunyautu kitau pacak menang nian, karnau Diau nyayangi kitau.

³⁸ Aku yakin, di gegalau deniau nidau bediau diau pacak ngalangi Allah nyayangi kitau, empuak mati, empuak idup, empuak malaikat, empuak penguasau, empuak masau mbak kini, empuak masau diau ka datang,

³⁹ empuak kuasau diau adau di langit, empuak diau adau di deniau, empuak setu diau lainau. Gegalaunyautu nidau pacak ngalangi Allah nyayangi kitau, luak diau la kitau ghasauka dalam Tuhan kitau Yesus Keristus.