RUM 6 - PEJANJIAN EMPAI CERITAU ILUAK

Idup seghundak ngan Keristus

¹ Amun luak itu, tuapau diau ka kitau kiciakka? Apu kitau maju mbuat dusau, supayau Allah tamba nyayangi kitau?

² Nidau ka adau! Dusau nidau agi nguasaui kitau. Mangku manau pacak kitau maju ngerjauka dusau?

³ Cengki kamu la keruan, bansau masau kitau dibaptis, kitau njadi seghundak ngan Yesus Keristus. Itu bereti, kitau pulau mati ngan Diau.

⁴ Masau kitau dibaptiskatu, kitau mati ngan Diau, mangku kitau pulau dikuburka ngan Diau. Mangku Keristus diidupka agi jak di mati, karnau kuasau Bapak diau agung. Luak itu pulau kitau pacak njalani idup diau empai.

⁵ Amun kitau la seghundak ngan Keristus, la mati ngan Diau, cengki kitau pulau seghundak ngan Diau diidupka agi luak Diau.

⁶ Kitau keruan, bansau carau idup kitau diau lamau la mati serempak ngan Keristus di kayu salip, supayau serilau kitau diau melawan Allah nidau bekuasau agi, mangku kitau nidau agi dikuasaui dusau.

⁷ Karnau jemau diau la mati nidau agi dikuasaui dusau.

⁸ Amun kitau la mati serempak ngan Keristus, kitau percayau, kitau ka diidupka pulau serempak ngan Diau.

⁹ Kitau keruan, bansau Keristus la diidupka jak di mati, nidau ka mati agi. Kematian nidau bekuasau agi ngan Diau.

¹⁰ Karnau satu Diau mati, dusau nidau bekuasau agi. Titu tejadi cuman sekali ajau batan endak selelamaunyau, mangku idupAu mbak kini batan endak Allah.

¹¹ Kamu pulau mesti nganggap diri kamu mati batan endak dusau, tapitu idup batan endak Allah karnau seghundak ngan Yesus Keristus.

¹² Karnau itu jangan agi endak idup kamu di deniauni dikuasaui dusau, supayau jangan agi nuruti serilau diau ja'at.

¹³ Jangan agi kamu nyeraka dandanan badan kamu ngan kuasau dusau endak ngerjauka setu diau ja'at. Anyautu serakala diri kamu ngan Allah karnau kamu la ngalia jak di mati mangku ngulang idup. Mangku serakala gegalau diri kamu ngan Allah batan endak ngerjauka setu diau benagh.

¹⁴ Dusau nidau agi nguasaui kamu, karnau kamu nidau idup agi nurut ukum Taurat, tapitu nurut keilu'an Allah.

Kitau wajib ngerjauka kendak Allah

¹⁵ Mangku luak manau kitau? Apu bulia kitau mbuat dusau, karnau kitau nidau agi dikuasaui ukum Taurat, tapitu disayangi Allah? Nidau ka adau!

¹⁶ Cengki kamu keruan, amun kamu njualka diri kamu ngan sughang jemau njadi buda'au, mangku kamu budak jemautu nian ngan mesti na'atinyau. Apu kamu budak dusau ngan na'ati dusau diau nyebapka kamu mati, apu kamu budak Allah ngan na'atiNyau, mangku kamu dibenaghka?

¹⁷ Terimau-kasia nian ngan Allah, karnau senitu kamu njadi budak dusau, mbak kini kamu na'ati nian ajaghan diau benagh diau la dikiciakka ngan kamu.

¹⁸ Kamu la dilepaska jak di dusau, mangku njadi budak Allah.

¹⁹ Karnau kamu segau ngerti, aku endak ngiciakka cuntau idup idang aghi. Senitu kamu nyeraka diri kamu njadi budak setu diau nidau senangaian ngan tamba ja'at mangku ngerjauka keja'atan. Luak itu pulau mbak kini kamu mesti nyeraka gegalau diri kamu njadi budak Allah mangku ngerjauka setu diau beresia.

²⁰ Masau kamu njadi budak dusau, kamu sangkau nidau pantas ngerjauka kendak Allah.

²¹ Mangku tuapau asilau? Gegalaunyau maluka kamu mbak kini. Kerjau itu cuman mbatak mati.

²² Anyautu mbak kini kamu la dilepaska jak di dusau mangku njadi budak Allah. Untungau kamu la idup batan endak Allah mangku bulia idup sejati selelamaunyau.

²³ Karnau upa dusau itu mati. Anyautu Allah ngenjuakka idup sejati selelamaunyau karnau seghundak ngan Yesus Keristus Tuhan kitau, dienjuakka ajau.