RUM 5 - PEJANJIAN EMPAI CERITAU ILUAK

Seilu'an agi ngan Allah

¹ Mbak kini kitau la seilu'an agi ngan Allah karnau percayau, mangku kitau idup damai ngan Allah karnau Tuhan kitau Yesus Keristus.

² Karnau kitau percayau ngan Diau, mangku Diau nulung kitau ngeruani keilu'an Allah. Mbak kini kitau la meghasaukanyau. Mangku kitau riang, karnau adau aghapan kitau ka meghasauka keagungan Allah.

³ Lebia agi kitau riang karnau sengsarau, karnau kitau keruan sengsarautu mbuat kitau tekun.

⁴ Ketekunan mbuat kitau ta'an diuji, mangku karnau ta'an diuji adau aghapan.

⁵ Aghapan luak itu nidau ka ngeciwauka kitau, karnau ati kitau la diisi ngan sayang Allah. Titu dikerjauka Rua Allah diau la dienjuakka ngan kitau.

⁶ Masau kitau gi malas, Keristus la mati batan endak kitau, masau diau ditetapka Allah, awuak kitau jemau ja'at.

⁷ Nidau bediau jemau endak mati batan endak jemau diau benagh. Amun batan endak jemau diau iluak, asauku ka adau jemau diau endak mati.

⁸ Anyautu Allah nyatauka sayangAu ngan kitau, karnau Keristus mati batan endak kitau, masau kitau gi jemau bedusau.

⁹ Apau agi mbak kini, kitau la seilu'an ngan Allah karnau Keristus mati, mangku kitau cengki ka diselamatka jak di ukuman Allah karnau Diau.

¹⁰ Masau kitau gi bemusuan ngan Allah, kitau la didamaika karnau Ana'Au mati batan endak kitau, apau agi mbak kini kitau diau la seilu'an ngan Allah, cengki kitau ka diselamatka karnau Keristus idup.

¹¹ Ukan itu ajau. Kitau riang pulau karnau keilu'an Allah itu, mangku kitau la seilu'an ngan Diau karnau Tuhan kitau Yesus Keristus.

Bidahau Adam ngan Keristus

¹² Dusau masuak ke deniau karnau sughang jemau, mangku jemau mati ikak dusau. Mangku kematian nguasaui gegalau jemau ikak bedusau galau.

¹³ Antak ka ukum Taurat dienjuakka, dusau la adau di deniau. Anyautu dusau nidau dituntut, karnau nidau bediau ukum diau pacak dilanggar.

¹⁴ Empuak luak itu jak timpau Adam enggut timpau Musa gegalau jemau mati galau. Jemau diau nidau melanggar luak Adam ngikut mati galau. Adamtu gambaran jemau diau ka datang nantitu.

¹⁵ Anyautu ughang duautu nidau semegi. Besakla akibat keilu'an ati Allah sangkan akibat pelanggaran Adam. Nyela, banyak jemau mati, ikak sughang jemau nidau ta'at. Besakla akibat keilu'an ngan pengenjuak Allah diau dienjuakka ngan banyak jemau, karnau keilu'an ati sughang jemau, diautu Yesus Keristus.

¹⁶ Besakla pulau pengenjuak Allah sangkan akibat dusau sughang jemau tadi. Karnau jemautu la bedusau, mangku diau diukum. Anyautu banyak jemau la bedusau, mangku dinyatauka nidau besala karnau keilu'an ati Allah.

¹⁷ Gegalau jemau mati ikak dusau sughang jemau tadi. Besakla akibat diau dikerjauka sughang jemau lainau, diautu Yesus Keristus. Karnau Diautu Allah la ngenjuakka keilu'an ngan banyak jemau, dienjuakka ajau, mangku jemau pacak seilu'an ngan Allah. Mangku jemautu ka idup ngan menang karnau Yesus Keristus.

¹⁸ Jadi, dusau sughang jemau mbuat gegalau jemau diukum. Luak itu pulau kerjau sughang jemau diau ngerjauka kendak Allah mbuat gegalau jemau dilepaska jak di dusaunyau, mangku dienjuakka idup.

¹⁹ Gegalau jemau la njadi jemau bedusau, karnau sughang jemau nidau ta'at. Luak itu pulau banyak jemau seilu'an agi ngan Allah, karnau sughang jemau diau ta'at ngan Allah.

²⁰ Mangku ukum Taurat dienjuakka Allah, mangku pelanggaran tamba banyak. Anyautu tamba jemau banyak bedusau, tamba Allah banyak nyayangi jemau.

²¹ Na, jemau mati karnau bedusau. Anyautu Allah nunjuakka jalan ngan kitau, mangku kitau seilu'an ngan Diau, karnau Diau nyayangi kitau. Mangku kitau la seilu'an ngan Allah. Diau ngenjuakka idup selelamaunyau ngan kitau karnau Tuhan kitau Yesus Keristus.