RUM 4 - PEJANJIAN EMPAI CERITAU ILUAK

Abraham njadi penauan karnau percayau

¹ Amun luak itu, tuapau diau ka kitau kiciakka ceritau Abraham, niniak puyang kitau?

² Amun Abraham dibenaghka karnau kerjaunyau, diau adau sebapau endak bangga, anyautu ukan di adapan Allah.

³ Di Injil ditulis, “Abraham percayau, mangku karnau itu diau diterimau Allah njadi jemau benagh.”

⁴ Amun jemau bekerjau, diau nerimau upa. Upahautu nidau dianggap enju'an ajau, karnau upatu ha'au.

⁵ Anyautu amun adau jemau diau nidau ngandalka kerjaunyau, mangku diau percayau ngan Allah diau nyatauka jemau bedusau bibas jak di salahau, jemautu dibenaghka Allah karnau percayau.

⁶ Luak itu pulau la dikiciakka Daud, bansau riangla jemau diau dibenaghka Allah ukan karnau kerjaunyau.

⁷ “Riangla jemau diau la diampuni dusaunyau ngan salahau la diabiska Allah.

⁸ Riangla jemau diau dusaunyau nidau diperitungka Allah!”

⁹ Apu riang itu cuman batan endak jemau diau besunat, apu batan endak jemau nidau besunat pulau? Nyela, batan endak jemau nidau besunat pulau. La kami kiciakka, bansau Abraham dibenaghka karnau percayau.

¹⁰ Kebilau diau dibenaghka? Apu antak ka disunat apu la udim? Nyela, antak ka disunat.

¹¹ Sunattu cuman njadi tandau, bansau diau dibenaghka Allah karnau percayau antak ka besunat. Mangku diau njadi bapak gegalau jemau percayau diau nidau besunat, mangku ughangtu dibenaghka karnau percayau.

¹² Mangku diau pulau bapak jemau diau besunat, ukan ajau karnau ughangtu besunat, tapitu karnau ughangtu menau Abraham diau percayau antak ka besunat.

Abraham nerimau janji Allah karnau percayau

¹³ Allah bejanji ngan Abraham ngan pengadaunyau, bansau deniau njadi ha'au. Allah bejanji luak itu ukan karnau Abraham ta'at ngan ukum Taurat, tapitu karnau diau percayau mangku dibenaghka Allah.

¹⁴ Amun cuman jemau diau ta'at ngan ukum Taurat ajau ka nerimau setu diau dijanjika Allah, mangku percayau ngan Allahtu nidau bediau gunaunyau ngan janjitu mbu'ung.

¹⁵ Ukum Taurat mbuat manusiau diukum. Anyautu amun nidau bediau peraturan, pelanggaran pulau nidau bediau.

¹⁶ Allah bejanji karnau jemau percayau ngan Diau. Janjitu dienjuakka ajau, mangku janjitu dienjuakka ngan gegalau pengadau Abraham, ukan ajau ngan jemau diau nuruti ukum Taurat, tapitu pulau ngan jemau diau percayau luak Abraham, karnau Abraham bak kitau galau.

¹⁷ Di Injil ditulis luak ini, “Aku njadika kaba bak banyak bangsau.” Luak itu janji Allah ngan Abraham, mangku Abraham percayau ngan Diau. Diautu Allah diau ngidupka jemau mati ngan njadika setu diau nidau bediau njadi adau ngan kici'an ajau.

¹⁸ Abraham maju ngaghap ngan percayau, awuak nidau bediau aghapan agi, bansau diau njadi bak banyak bangsau, luak ditulis di Injil, “Pengadau kaba ka banyak nianan.”

¹⁹ Sebenaghau masau itu Abraham la tuau laka seratus taun, lagi pulau Sara, biniautu, nidau bediau anak. Empuak luak itu, Abraham maju percayau.

²⁰ Diau nidau asau-asau ngan janji Allah. Mangku diau tamba kuat karnau percayau nian, mangku ngagungka Allah.

²¹ Diau percayau nian, bansau Allah pacak ngerjauka setu diau la dijanjikaNyautu.

²² Itula sebapau diau dibenaghka Allah.

²³ Katau ini “diau dibenaghka” ukan ditulis batan endak Abraham ajau,

²⁴ tapitu batan endak kitau pulau. Kitau pulau dibenaghka, amun kitau percayau ngan Allah diau ngidupka Yesus, Tuhan kitau, jak di mati.

²⁵ Yesustu diseraka ngan dibunua karnau dusau kitau, mangku Diau diidupka agi, supayau kitau pacak ngulang seilu'an ngan Allah.