RUM 14 - PEJANJIAN EMPAI CERITAU ILUAK

Jangan ngadili kantin kaba

¹ Jemau diau nidau tegua imanau mesti kamu terimau ngan iluak. Jangan bebala ngan diau mbalaka pendapatau.

² Adau diau bependapat, bansau diau bulia makan tuapau kila. Adau diau nidau tegua imanau bependapat, bansau diau cuman bulia makan gulai tetaghuan ajau.

³ Jemau diau makan tuapau kila jangan nggelakka jemau diau makan tetaghuan ajau. Mangku jemau diau makan tetaghuan ajau jangan ngadili jemau diau makan gegalaunyau, karnau Allah la nerimau jemautu.

⁴ Kamu nidau bulia ngadili budak jemau. Apu diau benagh apu sala, itu urusan tuanau. Nyela, budak itu ka ngerjauka setu diau benagh, karnau Tuhan pacak njagaui diau, supayau maju ngerjauka setu diau benagh

⁵ Adau diau nganggap adau aghi, pentingla aghitu sangkan aghi lain. Adau diau lain nganggap gegalau aghi semegi. Nengkela bilang ughang yakin ngan pendapatau.

⁶ Jemau diau nganggap aghi penting ngerjauka titu endak meregaui Tuhan. Jemau diau makan gegalaunyau ngerjauka titu endak meregaui Tuhan pulau, karnau beterimau-kasia ngan Allah. Luak itu pulau jemau diau nidau makan gegalaunyau. Diau ngerjauka titu endak meregaui Tuhan, ngan pulau beterimau-kasia ngan Allah.

⁷ Nidau sughang kia jak di kitau idup batan endak diriau ngan mati batan endak diriau.

⁸ Kitau idup, idup batan endak Tuhan. Kitau mati, mati batan endak Tuhan. Empuak idup empuak mati kitauni hak Tuhan.

⁹ Keristus la mati ngan idup agi, mangku Diau njadi Tuhan jemau diau mati ngan jemau diau idup.

¹⁰ Kantin-kantinku, tuapau gunaunyau kamu ngadili kantin kamu? Tuapau gunaunyau nggelakka kantin kamu? Gegalau kitau ka ngadap Allah endak diadili.

¹¹ Di Injil ditulis luak ini, “Katau Tuhan, ‘Ngenian, bilang jemau ka nunduak nyemba Aku. Bilang jemau ka ngaku'i Aku Allah!’ ”

¹² Gegalau kitau mesti nanggung-jawabka gegalau kerjau kitau ngan Allah.

Jangan mbuat kantin kamu bedusau

¹³ Karnau itu jangan agi kitau sangi salaka. Anyautu beusahala, supayau kamu jangan mbuat kantin kamu bedusau ngan nyesatka diau.

¹⁴ Aku seghundak ngan Tuhan Yesus, mangku aku keruan nidau bediau setu diau asalau aram, anyautu ngan jemau diau nganggap titu aram nyela titu aram.

¹⁵ Amun kamu nyakiti ati kantin kamu karnau makanan, kerjau kamutu nyatauka kamu nidau nyayangi diau. Jangan mbenasauka kantin kamu karnau makanan, karnau Keristus la mati batan endak diau.

¹⁶ Setu diau iluak batan endak kamu jangan enangka digelakka jemau.

¹⁷ Amun Allah njadi rajau dalam idup jemau, makan diau aram ngan alal nidau penting agi. Diau penting nuruti kendak Allah, idup tenang ngan riang. Titu dienjuakka Rua Allah.

¹⁸ Amun jemau bekerjau batan endak Keristus ngan carau luak itu, jemautu melemakka ati Allah ngan diregaui jemau.

¹⁹ Itula sebapau kitau mesti beusaha, supayau idup suijauan ngan sangi teguaka.

²⁰ Jangan merusakka kerjau Allah karnau makanan. Gegalau makanan bulia dimakan. Anyautu amun setu diau kamu makan mbuat jemau bedusau, kamutu besala.

²¹ Iluakla nidau makan daging, ngan nidau minum anggur ngan nidau ngerjauka tuapau-apau, amun titu mbuat kantin kitau bedusau.

²² Setu diau kamu yakintu kerjaukala di adapan Allah ajau. Riangla jemau diau nidau meghasau besala ngan setu diau dianggap iluak endak dikerjauka.

²³ Amun jemau asau-asau ngan setu diau endak dimakan, mangku masia dimakan, jemautu besala, karnau kerjaunyautu nidau dikerjauka nurut kepercayauannyau. Gegalaunyau diau dikerjauka nidau nurut kepercayauan itu dusau.