RUM 13 - PEJANJIAN EMPAI CERITAU ILUAK

Ta'at ngan pemerinta

¹ Bilang jemau mesti na'ati pemerinta, karnau pemerinta asalau jak di Allah. Pemerintatu ditetapka Allah.

² Itula sebapau jemau diau melawan pemerinta semegi ajau ngan melawan setu diau ditetapka Allah. Jemau diau ngerjauka titu mintak diukum.

³ Jemau diau bebuat iluak nidau nanti takut ngan pemerinta. Jemau diau bebuat ja'at ajau diau takut. Amun kamu endak, supayau kamu nidau takut ngan pemerinta, kamu mesti ngerjauka setu diau iluak, mangku kamu dipuji.

⁴ Pemerintatu wakil Allah endak ngerjauka setu diau begunau batan endak kamu. Anyautu amun kamu ngerjauka setu diau ja'at, kamu mesti takut, karnau diau adau kuasau ngukum. Pemerintatu wakil Allah endak ngukum jemau diau bebuat ja'at.

⁵ Karnau itu kitau mesti ta'at ngan pemerinta, ukan ajau karnau enggup diukum, tapitu pulau karnau suarau ati keciak kitau.

⁶ Itula pulau sebapau kamu mbayighi cuki, karnau pemerinta wakil Allah diau ngurus cukitu.

⁷ Bayighila ngan gegalau jemau setu diau mesti dibayighi. Bayighila gegalau cuki diau mesti kamu bayighi. Regauila gegalau jemau diau mesti diregaui.

Amun sangi sayangi, kamu ta'at ngan ukum Taurat

⁸ Jangan beutang tuapau-apau ngan sapau kila. Cuman semecam ini diau mesti kamu kerjauka: sangi sayangi. Karnau jemau diau nyayangi kantinau la na'ati gegalau ukum Taurat.

⁹ Perinta ini: jangan menaugawia, jangan mbunua, jangan maling, jangan ngibauka barang jemau. Gegalaunyautu ngan perinta diau lain pulau disimpulka ngan perinta ini: “Sayangila kantin kaba luak kaba nyayangi diri kaba.”

¹⁰ Jemau diau nyayangi kantinau nidau ka ngerjauka setu diau ja'at ngan diau. Karnau itu jemau diau nyayangi kantinau la nuruti ukum Taurat.

¹¹ Gegalaunyautu mesti kamu kerjauka. Kamu la keruan, masau mbak kini kitau mesti bangun jak di tiduak, karnau pasighla mbak kini masau kitau diselamatka sangkan masau kitau percayau senitu.

¹² Malam laka lalu. Aghi laka siang. Karnau itu mela kitau mandakka kerjau ja'at diau dikerjauka di keleman. Kitau mesti ngenauka pakaian terang.

¹³ Kitau mesti iluak-iluak luak jemau diau idup dalam terang. Jangan bereruyalan, jangan memabu'an, jangan menaugawia, jangan nuruti serilau, jangan belagau, jangan sengit.

¹⁴ Enangka Tuhan Yesus Keristus njagaui kamu. Jangan nuruti serilau manusiau diau bedusau, jangan muaskanyau.