RUM 12 - PEJANJIAN EMPAI CERITAU ILUAK

Idup batan endak Allah

¹ Mangku, kantin-kantinku, Allah iluak nian ngan kitau. Itula sebapau aku mintak nian ngan kamu, supayau kamu nyeraka diri kamu njadi kerban diau idup batan endak Allah ngan melemakka atiAu. Luak itula semestiau kamu nyemba Allah.

² Jangan menau carau deniauni. Enangka Allah ngubai ati kamu, supayau carau idup kamu njadi empai, mangku kamu pacak ngeruani kendak Allah, tuapau diau iluak diau melemakka ati Allah ngan diau sempernau.

³ Allah la ngenjuakka pengertian ngan aku, mangku aku ngici'i gegalau kamu, jangan nganggap diri kamu lebia jak di sebenaghau. Anyautu kamu mesti merupuakka diri kamu ngan ngensian, bilang ughang nurut kesanggupan percayau diau dienjuakka Allah ngan kamu.

⁴ Badan kitau banyak dandanan. Bilang dandanan lain gunaunyau.

⁵ Luak itu pulau kitau. Empuak banyak, kitau cuman sutiak badan karnau seghundak ngan Keristus. Mangku bilang kitau dandananNyau luak dandanan sutiak badan.

⁶ Bilang kitau adau kesanggupan diau dienjuakka Allah ngan kitau sesughangan nurut kenda'Au, mangku kitau mesti nggunaukanyau. Amun jemau pacak ngiciakka katau Allah, diau mesti ngerjaukanyau nurut imanau.

⁷ Jemau diau pacak nulung jemau mesti nulung nian. Jemau diau pacak ngajagh mesti ngajagh nian.

⁸ Jemau diau pacak muji jemau mesti muji nian. Jemau diau pacak ngenju'i jemau mesti ngenjuak nian ngan sepantasau. Jemau diau pacak mimpin mesti mimpin nian. Jemau diau pacak nyialka jemau mesti nyialkanyau ngan riang.

Carau nyayangi jemau

⁹ Jangan cak nyayangi. Luatka diau ja'at, kerjaukala diau iluak.

¹⁰ Kamu mesti sangi sayangi luak jemau duau beghading, simbang-cepat sangi regaui.

¹¹ Rajinla bekerjau, jangan malas. Bekerjaula batan endak Tuhan ngan riang jak di Rua Allah.

¹² Aghapkala Tuhan ngan riang. Amun adau penanggungan, ngalighla ngan maju bedu'a.

¹³ Tulungla kantin diau percayau diau nidau bediau tuapau-apau. Terimaula jemau di ghuma kamu ngan riang.

¹⁴ Mintak ngan Allah setu diau iluak batan endak jemau diau meluatka kamu, du'akala, jangan didawaika.

¹⁵ Riangla ngan jemau diau riang, nangisla ngan jemau diau nangis.

¹⁶ Suijauanla sughang ngan diau lain. Jangan geduak. Terimaula pulau jemau diau nidau diregaui. Jangan anggap diri kamu pintar.

¹⁷ Jangan balaska ja'at ngan ja'at. Kerjaukala diau dianggap gegalau jemau iluak.

¹⁸ Kamu mesti beusaha idup damai ngan gegalau jemau.

¹⁹ Kantin-kantinku diau kusayangi, jangan kamu ndendam. Nengkela Allah diau ngukum, karnau di Injil ditulis, “Allah bekatau, ‘Akula diau mbalas, Akula diau ngukumau.’ ”

²⁰ Anyautu amun musua kamu lapagh, enju'i diau makan. Amun diau aus, enju'i diau minum. Ngan carau luak itu diau ka maluan.

²¹ Jangan endak dikalaka ngan setu diau ja'at, anyautu kalakala keja'atan ngan keilu'an.