RUM 11 - PEJANJIAN EMPAI CERITAU ILUAK

Keilu'an Allah ngan jemau Israil

¹ Aku betanyau agi, apu Allah la ncapakka umatAu? Nidau ka adau! Karnau akuni pulau jemau Israil, pengadau Abraham jak di jungku Benyamin.

² Allah nidau ncapakka umatAu diau dipiliHau jak di senitu. Cengki kamu la keruan setu diau ditulis di Injil ceritau Elia ngaduka jemau Israil ngan Allah, kataunyau,

³ “Tuhan, nabi-nabi Dighi la ughangtu bunua, mija bada bekerban la ughangtu ancurka. Tigha aku sughang, mangku ughangtu endak mbunua aku pulau.”

⁴ Mangku tuapau timbal Allah ngan Elia? “Aku la nighaka tujua ribu ughang batan endak Aku. Ughangtu nidau kekela nyemba diwau Ba'al.”

⁵ Luak ini pulau mbak kini adau tigha jemau diau dipilia Allah karnau keilu'anNyau.

⁶ Diau milia ughangtu karnau keilu'anNyau, ukan karnau kerjau ughangtu. Amun Allah milia jemau nurut kerjaunyau, mangku keilu'an itu ukan keilu'an nian.

⁷ Rupaunyau jemau Israil nidau dapat setu diau didalak, anyautu jemau diau ndapatau jemau diau dipilia Allah. Diau lain nuli, mangku nidau pacak ndengagh suarau Allah.

⁸ Dalam Injil ditulis luak ini, “Allah mbuat ughangtu nidau pacak berupuak. Enggut mbak kini ughangtu nidau pacak nginak ngan nidau pacak ndengagh.”

⁹ Daud bekatau, “Nengkela ughangtu tejeghat ngan kerjau ughangtu diau bereruyalan, mangku ughangtu sesat ngan diukum.

¹⁰ Nengkela pengina'an ughangtu njadi keleman mangku nidau pacak nginak. Nengkela ughangtu mbengkung selelamaunyau karnau banyak penanggungan.”

¹¹ Mangku aku betanyau, apu jemau Yahudi sesat, supayau benasau? Nidau nian. Anyautu karnau ughangtu bedusau, jemau bangsau lain diselamatka, supayau ughangtu njadi sengit.

¹² Jemau Yahudi besala ngan nidau nuruti kendak Allah, mangku Allah iluak nian ngan jemau bangsau lain, apau agi amun jemau Yahudi seilu'an ngan Allah, cengki besakla keilu'an Allah ngan gegalau deniau.

Jemau bangsau lain diselamatka pulau

¹³ Mbak kini aku endak ngiciak ngan kamu, ui jemau diau ukan jemau Yahudi. Aku rasul batan endak jemau ukan jemau Yahudi, mangku riang nian ngan kerjaukuni.

¹⁴ Aghapanku, supayau bangsauku njadi sengit. Mangku ngan carau luak itu aku pacak nyelamatka separau jak di ughangtu.

¹⁵ Ughangtu nidau diterimau Allah, mangku deniau seilu'an agi ngan Allah. Apau agi amun ughangtu diterimau Allah. Cetau titu semegi ajau ngan jemau mati idup agi.

¹⁶ Amun sebua ruti dienjuakka ngan Allah, mangku gegalaunyau njadi hak Allah. Amun akagh sebatang kayu hak Allah, mangku cangkahau hak Allah pulau.

¹⁷ Separau cangka kayu saitun diau iluak diau diumpamauka jemau Yahudi la ditetak. Mangku cangka kayu diau karut dicangkuakka di guak teta'an tadi. Kamu diumpamauka cangka cangku'antu, mangku kamu idup jak di batang diau iluak.

¹⁸ Jangan nganggap kamu lebia jak di cangka diau ditetaktu. Ingatkala, bansau kamu cuman cangka ajau. Ukan cangka ngenjuakka idup ngan akagh, tapitu akagh ngenjuakka idup ngan cangka.

¹⁹ Asauku kamu ka bekatau, “Nyela, anyautu cangkatu ditetak, supayau aku pacak dicangkuakka di batangtu.”

²⁰ Nyela nian. Ughangtu dicapakka karnau nidau percayau. Kamu diterimau karnau percayau. Jangan kamu geduak. Kamu mesti takut,

²¹ karnau amun Allah nidau sial ncapakka jemau Yahudi diau luak cangka asli tadi, jangan sangkau Diau ka sial ncapakka kamu.

²² Kitau nginak keilu'an Allah ngan ketegasan Allah. Diau tegas ngan jemau diau bedusau, tapitu iluak ngan kamu, amun kamu maju idup pantas nerimau keilu'anNyau. Amun nidau, kamu pulau ka dicapakka.

²³ Mangku jemau Israil pulau, amun la percayau agi, ughangtu ka diterimau agi, karnau Allah pacak nerimau ughangtu agi.

²⁴ Amun kamu diau la diambiak jak di batang saitun diau karut mangku pacak dicangkuakka di batang saitun diau iluak, apau agi ughangtu, cengki mura diulangka ke batang asalau.

Allah nyialka gegalau jemau

²⁵ Kantin-kantinku, mangku supayau kamu jangan nganggap kamu la keruan gegalaunyau, aku endak supayau kamu ngeruani resiau ini: Separau jak di jemau Israil melawan, anyautu cuman enggut bilangan jemau bangsau lain diau percayau la cukup.

²⁶ Mangku gegalau jemau Israil ka diselamatka, karnau di Injil ditulis luak ini, “Rajau Penyelamat ka datang jak di Siun. Diau ka ngabiska gegalau keja'atan pengadau Yakub.

²⁷ Aku ka neguaka janjiKuni ngan ughangtu, masau Aku ngabiska dusau ughangtu.”

²⁸ Jemau Israil enggup nerimau ceritau iluak jak di Allah mangku njadi musua Allah. Titu njadi untung ngan kamu. Anyautu karnau Allah milia ughangtu, ughangtu maju disayangi Allah karnau niniak puyang ughangtu.

²⁹ Karnau Allah nidau kekela nyesali keilu'an ngan pilianNyau.

³⁰ Senitu kamu nidau ta'at ngan Allah, mbak kini la dibenaghka Allah, karnau ughangtu nidau ta'at.

³¹ Luak itu pulau ughangtu mbak kini nidau ta'at, supayau kamu disialka, mangku nanti ughangtu pulau ka disialka.

³² Allah la ngenangka gegalau manusiau nidau ta'at, supayau Diau pacak nyatauka keilu'anNyau ngan gegalau jemau.

Allah diagungka

³³ Alaka kayau nian ngan bepengertian nian Allah ngan ngeruani gegalaunyau. Nidau sughang kiala pacak ngeruani rencanauNyau. Nidau sughang kiala pacak ngeruani carauNyau.

³⁴ Di Injil ditulis, “Sapau diau ngeruani rupu'an Tuhan? Sapau pulau pacak ngenjuak petua-peturun ngan Diau?

³⁵ Sapau pacak ngenjuak ngan Diau, mangku pacak mintak balasan?”

³⁶ Gegalaunyau dijadika Allah, asalau jak di Allah, batan endak Allah. Allah diagungka selelamaunyau Amin.