RUM 10 - PEJANJIAN EMPAI CERITAU ILUAK

¹ Kantin-kantinku, aku endak nian, supayau bangsauku diselamatka. Mangku aku bedu'a ngan Allah ndu'akanyau.

² Aku beghani ngiciakka ughangtu ta'at nian ngan agamaunyau, anyautu ughangtu nidau terti carau diau benagh.

³ Ughangtu nidau terti carau manusiau seilu'an ngan Allah. Ughangtu ngikut carau ughang itula, nidau nerimau carau diau ditunjuakka Allah.

⁴ Tujuan ukum Taurat la ditepati Keristus, mangku bilang jemau diau percayau njadi seilu'an ngan Allah.

Keselamatan batan endak gegalau jemau

⁵ Musa nulis, bansau jemau diau endak dibenaghka Allah karnau ukum Taurat, jemautu ka idup, amun ta'at nian ngan ukumtu.

⁶ Anyautu ceritau carau jemau dibenaghka karnau percayau ngan injil dikiciakka luak ini, “Nidau nanti kaba ngiciak dalam ati, ‘Sapau ka nayiak ke sergau?’ ” Retiau endak ngajung Keristus tughun.

⁷ “Ngan, ‘Sapau ka tughun ke deniau jemau mati?’ ” Retiau endak ngajung Keristus nayiak jak di deniau jemau mati.

⁸ Luak inila ditulis dalam Injil, “Katau Allah adau guak kamu, adau di mulut kamu ngan di ati kamu.” Itula katau diau kami kiciakka, bansau jemau mesti percayau.

⁹ Karnau amun kamu ngaku'i ngan mulut, bansau Yesusla Tuhan, ngan percayau dalam ati, bansau Allah la ngidupka Diau jak di mati, kamu ka selamat.

¹⁰ Ngan ati jemau percayau mangku dibenaghka. Ngan mulut jemau ngaku'i mangku diselamatka.

¹¹ Karnau di Injil ditulis, “Jemau diau percayau nidau ka dimaluka.”

¹² Titu batan endak gegalau jemau, empuak jemau Yahudi empuak jemau bangsau lain, nidau bediau bidahau, karnau Allah diau sughangtu Tuhan gegalau jemau. Diau iluak nian ngan gegalau jemau diau mintak tulung ngan Diau.

¹³ Dalam Injil ditulis, “Bilang jemau diau mantau namau Tuhan ka diselamatka.”

¹⁴ Anyautu luak manau ughangtu pacak mantau Tuhan, amun lum percayau? Luak manau pacak percayau, amun lum ndengagh ceritauNyau? Luak manau pacak ndengagh ceritauNyau, amun nidau bediau jemau diau ngiciakkanyau?

¹⁵ Mangku luak manau pulau jemau pacak ngiciakkanyau, amun nidau diajung? Dalam Injil ditulis luak ini, “Alaka lema'au nerimau jemau datang ngiciakka ceritau iluak jak di Allah.”

Jemau Israil nidau percayau

¹⁶ Anyautu nidau gegalau jemau nerimau ceritau itu. Yesaya la ngiciak, “Tuhan, sapau ka percayau ngan kici'an kamu?”

¹⁷ Jadi, jemau percayau karnau ndengagh, mangku jemau ndengagh karnau adau diau ngiciakka ceritau Keristustu.

¹⁸ Mangku aku betanyau, apu nyela ughangtu lum ndengaghkanyau? Cetau la ndengagh, karnau di Injil ditulis luak ini, “Suarau ughangtu la tedengagh di manau-manau, kici'an ughangtu la sampai ke gegalau deniau.”

¹⁹ Aku betanyau agi, apu jemau Israil lum keruan? Katau Musa nimbalinyau, “Luak inila katau Allah, ‘Aku ka mbuat kamu sengit ngan jemau diau ukan umatKu, Aku ka mbuat kamu mara ngan jemau diau bigal.’ ”

²⁰ Lagi pulau Yesaya ngiciak ngan beghani, “Luak ini katau Allah, ‘Jemau diau nidau ndalak Aku la betemu ngan Aku. Aku la ngancakka diriKu ngan jemau diau nidau nanyauka ceritauKu.’ ”

²¹ Ceritau jemau Israil dikiciakka Yesaya luak ini, “Luak ini katau Allah, ‘Aku maju endak bedamai ngan ughangtu, anyautu ughangtu maju melawan ngan enggup ta'at.’ ”