RUM 1 - PEJANJIAN EMPAI CERITAU ILUAK

¹ Kantin-kantinku di Rum diau disayangi Allah. Aku, Paulus, nulis surat ini. Aku sughang budak Yesus Keristus diau dipilia ngan dijadika rasul mangku ditugaska endak ngiciakka ceritau iluak jak di Allah.

² Ceritau iluak itu la dijanjika Allah senitu ngan dikiciakka nabi-nabi, mangku ditulis di Injil.

^3-4 Ceritau iluaktu nceritauka Anak Allah, Tuhan kitau Yesus Keristus. Nurut manusiau Diau pengadau Daud. Nurut Rua Diau Anak Allah diau suci. Itu dibuktika ngan kuasau besak, karnau Diau la mati mangku ngulang idup.

⁵ Karnau Diau pulau kami disayangi Allah mangku dijadika rasul endak meregaui Keristus ngan mbimbing jemau jak di gegalau bangsau, supayau percayau ngan ta'at ngan Keristus.

⁶ Kamu pulau temasuak jemau itu diau la dipilia Keristus njadi umatAu.

⁷ Itula sebapau aku nulis ngan kamu diau adau di Rum, jemau diau disayangi Allah ngan dipilia njadi umatAu. Aku bedu'a, supayau Allah Bapak kitau ngan Tuhan Yesus Keristus iluak ngan kamu ngan njagaui kamu ngan damai.

Rencanau Paulus endak ke Rum

⁸ Dulu sekali aku endak ngiciakka, bansau gegalau deniau la ndengagh kamu percayau ngan Keristus. Mangku aku beterimau-kasia ngan Allah karnau ceritau kamutu.

⁹ Aku maju ndu'aka kamu, amun aku bedu'a. Allah keruan setu diau kukiciakkatu benagh. Batan endak Allah itula aku bekerjau nian ngan segenap atiku mangku ngiciakka ceritau iluak nceritauka Ana'Au.

¹⁰ Aku mintak nian ngan Allah, supayau aku lasung nian berayak ngan kamu, amun kendak Allah.

¹¹ Karnau aku endak nian betemu ngan kamu, mangku aku pacak ngenjuakka ngan kamu keilu'an jak di Rua Allah endak neguaka ati kamu.

¹² Mangku gegalau kitau diteguaka. Kamu diteguaka karnau nginak aku percayau, aku diteguaka karnau nginak kamu percayau.

¹³ Kantin-kantinku, aku endak, supayau kamu keruan, bansau la rajin aku endak nian berayak ngan kamu, anyautu maju adau alangan. Aku endak, supayau di guak kamutu pulau kerjauku buasil, luak kerjauku buasil di guak jemau bangsau lain.

¹⁴ Aku adau kewajiban ngan gegalau jemau, empuak jemau diau maju empuak jemau diau kulut, empuak jemau diau sekul empuak jemau butau urup.

¹⁵ Itula sebapau aku endak nian ngiciakka ceritau iluaktu pulau ngan kamu diau adau di Rum.

Kuasau ceritau iluak

¹⁶ Aku percayau nian ceritau iluak itu, karnau di ceritau iluaktu adau kuasau Allah diau nyelamatka gegalau jemau diau percayau, jemau Yahudi kudai, mangku jemau bangsau lain pulau.

¹⁷ Karnau ngan ceritau iluaktu diancakka caraunyau Allah mbuat manusiau seilu'an agi ngan diriAu. Caraunyau ngan percayau ngan Allah, jak di penembai enggut udim. Titu dikiciakka di Injil luak ini, “Jemau dibenaghka karnau percayau ka idup.”

Sala manusiau

¹⁸ Jak di sergau Allah nyatauka maraHau karnau dusau ngan keja'atan manusiau. Keja'atantu ngalangi manusiau ngeruani ajaghan diau benagh ceritau Allah.

¹⁹ Ughangtu ka diukum, karnau setu diau pacak dikeruani manusiau ceritau Allah la nyatau ngan manusiau, karnau la dinyatauka Allah.

²⁰ Jak Allah njadika deniau, manusiau pacak ngeruani, bansau Diaula Allah ngan kuasauNyau nidau ka udim-udim. Empuak titu nidau kina'an, tapitu pacak dikeruani, karnau setu diau dijadikaNyau, mangku dikit kia nidau bediau tapakan manusiau endak mbenaghka diriau.

²¹ Manusiau keruan adau Allah, anyautu nidau meregaui Diau ngan nidau beterimau-kasia ngan Diau, empuak Diautu Allah. Anyautu ughangtu merupuakka diau nidau-nidau ngan rupu'an ughangtu lagi bigal lagi buyan.

²² Ughangtu nganggap diriau pintar, awuak bigal.

²³ Ukan Allah diau selelamaunyau diau ughangtu semba, tapitu patung-patung diau dibuat nyerupaui jemau diau pacak mati, nyerupaui burung, benatang keting empat, ngan ulagh. Setitula diau disemba ughangtu.

²⁴ Itula sebapau Allah ngenangka ughangtu dikuasaui serilau atiau endak ngerjauka setu diau nidau senangaian, mangku sangi kerjauka setu diau ja'at.

²⁵ Allah diau benagh ughangtu genti ngan allah tiruan, mangku diau disemba ughangtu setu diau dijadika Allah, ukan Allah diau njadikanyau. Allahtu mesti dipuji selelamaunyau. Amin.

²⁶ Itula sebapau Allah ngenangka ughangtu nuruti serilau diau maluka. Jemau tinau nidau ibau agi ngan jemau lanang, anyautu sangi ibauka setinauan.

²⁷ Luak itu pulau jemau lanang. Ughangtu nidau agi ngibauka tinau ngan carau diau pantas. Ughangtu sangi ribangka selanangan, mangku jemau lanang ngerjauka diau nidau senangaian ngan jemau lanang. Mangku ughangtu nanggungka di diriau akibat peremba'autu.

²⁸ Manusiau enggup ngeruani Allah, mangku Allah ngenangka rupu'an ughangtu njadi rusak, mangku ughangtu ngerjauka setu diau nidau pantas.

²⁹ Ati ughangtu penua ngan gegalaunyau diau nidau benagh, diau ja'at, selak, busuak, sengit, endak mbunua, belagau, nipu, ndendam,

³⁰ ngupatka jemau, ngarutka jemau, luat ngan Allah, langguak, kiciak besak, kurang ajagh, kepaca'an bebuat ja'at, melawan pejadi,

³¹ bigal, nidau pacak dipercayaui, nidau sayang, nidau terti sial.

³² Ughangtu keruan, bansau jemau diau ngerjauka gegalaunyautu pantas diukum mati nurut ukum Allah. Empuak luak itu, ughangtu maju ngerjaukanyau, lagi pulau riang, amun jemau lain ngerjaukanyau pulau.