RASUL 28 - PEJANJIAN EMPAI CERITAU ILUAK

Di Malta

¹ La sampai di daghat, kami ndengagh, bansau daghattu pulau Malta.

² Jemau pulau itu iluak nian ngan kami. Ughangtu ningguakka api besak batan endak kami, karnau aghi ujan lagi dingin.

³ Paulus ngambiak kayu ditepiakkanyau di api, mangku adau ulagh keluagh, karnau panas apitu, ncetuak tanganau.

⁴ Satu ughangtu nginak ulagh itu tegerintung di tangan Paulus, ngiciak sughang ngan diau lain, “Jemautu cengki pembunua, karnau empuak diau lepas jak di bayau laut, diwau keadilan nidau ngenangka diau idup.”

⁵ Anyautu Paulus ngelecingka ulaghtu ke dalam api, dikit kia nidau teghasau sakit.

⁶ Ughangtu nyangkau, tanganau ka mengkak ngan diautu ka mati masau itu pulau. Anyautu la lamau nunggu-nunggu, nidau tejadi tuapau-apau ngan Paulus, mangku rupu'an ughangtu beghuba, dikiciakka Paulus itu diwau.

⁷ Nidau jawua jak di bada itu adau tana Publius. Diautu gubernur. Ngan iluak diau nerimau kami njadi mendahau selamau tigau aghi.

⁸ Masau itu bak Publius dang buidapan demam ngan mising abang. Paulus masuak bili'au. Diau bedu'a, ditepiakka tanganau di diau, dighadukanyau.

⁹ La udim itu datang pulau jemau buidapan lainau di pulau itu njenguak Paulus, mangku dighadukanyau pulau.

¹⁰ Kami diregaui ughangtu nian. Mangku satu kami endak belayar, ughangtu ngenjuakka gegalaunyau diau kami enda'au.

Jak di Malta ke Rum

¹¹ La tigau bulan di situ, kami pegi jak di pulau itu nayiak kapal jak di Aliksanderia. Selamau musim dingin diau belabua di pulau itu. Kapal itu makai lambang diwau Kembagh.

¹² Kami belabua di Sirakusa, singga di situ tigau aghi.

¹³ Jak di situ kami belayar agi nurut pantai, mangku kami sampai di Regium. Pagi di aghiau adau angin jak di selatan, mangku pagi di aghiau agi kami sampai di Putiuli.

¹⁴ Di situ kami betemu bebeghapau jemau diau percayau ngan Yesus. Ughangtu ngajak kami, mangku kami singga ngan ughangtu selamau seminggu. La udim itu kami pegi ke Rum.

¹⁵ Jemau diau percayau di Rum la ndengagh ceritau kami, mangku ughangtu datang njenguak kami di Purum Apius ngan Teris Taberni. Satu Paulus nginak ughangtu, diau beterimau-kasia ngan Allah mangku atiau diteguaka.

¹⁶ La sampai di Rum, Paulus dibuliaka mendam di ghumahau dijagaui sughang tentera.

Paulus di Rum

¹⁷ La tigau aghi di Rum, Paulus ngajak pengulu-pengulu jemau Yahudi di situ betunggal. Ughangtu la betunggal, Paulus bekatau, “Adiak-sanak, aku nidau besala ngan bangsau kitau ngan nidau melawan adat lembagau niniak puyang kitau. Empuak luak itu, aku ditangkap di Yerusalim ngan diseraka ngan jemau Rum.

¹⁸ Pekarauku diperisau, ughangtu endak melepaska aku, karnau nidau bediau salaku diau pantas diukum ngan ukuman mati.

¹⁹ Anyautu karnau jemau Yahudi melawan, mangku aku tepasau nuntut pekarauku diadili ngan Kaisar. Anyautu aku ukan endak ngaduka bangsauku.

²⁰ Itula sebapau aku mintak, supayau betemu ngan kapu dighi endak ngiciak ngan kapu dighi. Karnau aku tekawal, karnau Rajau Penyelamat diau diaghapka bangsau Israil.”

²¹ Mangku ughangtu bekatau, “Kami lum nerimau surat jak di Yudia ceritau kaba, lagi nidau sughang kia jak di adiak-sanak kitau datang ngiciakka setu diau ja'at ceritau kaba.

²² Anyautu kami endak pulau ndengagh pendapat kaba, karnau gegalau kami la keruan, bansau ajaghan diau kaba percayaui dilawan di manau-manau.”

²³ Mangku ughangtu netapka aghiau endak betemu ngan Paulus. Aghi diau ditetapkatu banyak nian jemau datang ke bada Paulus. Jak di akap enggut malam Paulus ngiciakka ngan nerangka ceritau Allah endak merinta. Makai ayat-ayat kitab Musa ngan kitab nabi-nabi diau beusaha, supayau ughangtu percayau ngan Yesus.

²⁴ Adau diau percayau karnau kici'an Paulus, adau diau nidau.

²⁵ Mangku pendapat ughangtu nidau semegi. Antak ka ughangtu pegi jak di situ, Paulus ngiciak luak ini, “Nyela nian, katau Rua Allah diau dikiciakka nabi Yesaya ngan niniak puyang kapu dighi.

²⁶ ‘Katau Allah, pegila, kiciakkala ngan bangsau ini: Kamu ka maju ndengagh, anyautu nidau terti, kamu maju nginak, anyautu nidau kina'an.

²⁷ Karnau ati ughangtu keghas, telingau ughangtu ditukup, matau ughangtu dipejamka, supayau ughangtu jangan nginak, jangan ndengagh ngan jangan ngerti, mangku ughangtu jangan ngulang njenguak Aku, mangku ughangtu nidau pacak Kughaduka.’ ”

²⁸ Mangku Paulus bekatau, “Kapu dighi mesti keruan, bansau keselamatan diau jak di Allahtu dikiciakka ngan bangsau lain. Ughangtu ka nerimaunyau.” [

²⁹ La udim Paulus ngiciak luak itu, jemau Yahudi itu pegi ngan bebala sughang ngan diau lain.]

³⁰ Paulus nunggu ghuma siwahannyautu selamau duau taun. Diau nerimau gegalau jemau diau tandang ngan diau.

³¹ Ngan beghani diau ngiciakka ngan ughangtu ceritau Allah endak merinta ngan ceritau Tuhan Yesus Keristus. Paulus ngerjaukanyau ngan bibas, nidau dialang-alangi.