RASUL 27 - PEJANJIAN EMPAI CERITAU ILUAK

Paulus belayar ke Rum

¹ La udim ditetapka, bansau kami ka belayar ke Italia, mangku Paulus ngan bebeghapau kawalan lainau diseraka ngan Yulius, sughang kepalak tentera jak di rumbungan Kaisar.

² Kami nayiak kapal jak di Adramitium, mangku kami pegi ngan kapaltu diau belayar ke pelabuan di perupinsi Asia. Aristarkus, jemau Makedunia asalau jak di Tesalunika, pegi serempak ngan kami.

³ Pagi di aghiau kami sampai di Sidun. Paulus diterimau Yulius ngan iluak, mangku diajung nandangi kantin-kantinau di situ, mangku ughangtu pacak ngenjuakka ngan diau setu diau enda'au.

⁴ Jak di situ kami belayar agi. Adau angin jak di adapan, mangku kami belayar wuan pulau Siprus di sebela pantai diau bang telindung.

⁵ Mangku kami nyembeghang laut di guak Kilikia ngan Pampilia, mangku kami sampai di Mira di daira Likia.

⁶ Di situ pengulu tenteratu dapat kapal jak di Aliksanderia diau endak belayar ke Italia. Mangku kami ngalia ke kapal itu.

⁷ La bebeghapau aghi kami belayar, kami lambat, mangku ngan jeghia kami sampai di Kenidus. Angin maju karut melawan kami, mangku kami nidau pacak maju ara itu. Karnau itu kami belayar ke ara selatan wuan pulau Salmuni, mangku nurut tepi pulau Kerita diau bang telindung.

⁸ La jeghia kami wuan pulautu, mangku kami sampai ke bada diau benamau “Pelabuan Alap” pasigh kuta Lasia.

⁹ Kami lamau jugau di situ, enggut jemau Yahudi la udim puasau, mangku ka bayau, amun maju belayar. Itula sebapau Paulus ngici'i ughangtu,

¹⁰ kataunyau, “Pendapatku bayau nian, amun kitau maju belayar. Kitau ka rugi banyak, ukan ajau barang ngan kapal, anyautu kitau pulau pacak benasau.”

¹¹ Anyautu kepalak tenteratu percayaula ngan kici'an jemau ngemudika kapal ngan jemau ngempu kapal sangkan katau Paulus.

¹² Pelabuan di situ ngenian nidau iluak kapal mendam di situ musim dingin. Karnau itu banyak jemau kerjau kapal tetuju belayar agi ninggalka pelabuan itu, mangku ncubau njenguak kuta Penikes endak mendam di situ selamau musim dingin. Kuta Penikestu pelabuan di Kerita diau tebukak ke ara matau-aghi umban.

Angin nyaghu di laut

¹³ Masau itu adau angin dikit jak di selatan. Ughangtu kirau rencanau ughangtu pacak dikerjauka. Alat mendamka kapal ditaghiak, mangku kapal belayar nurut tepi pulau Kerita.

¹⁴ Anyautu nidau lamau udim itu, adau angin nyaghu jak di ara pulau tadi diau dikiciakka angin “Timur laut”.

¹⁵ Kapal kami ditempua angintu, mangku nidau pacak melawan angintu. Karnau itu kami nyera ajau mangku ngenangka kapal anyut dibatak angintu.

¹⁶ Kami anyut enggut ke pulau keciak, namaunyau Kauda. Di situ ngan jeghia kami pacak nguasaui perawu diau dibatak kapaltu.

¹⁷ Perawutu dinayiakka ke kapal, mangku kapal dililiti ngan tali, supayau diau nidau mura pata, karnau ughangtu takut tebansal di bungin Sirtis diau sughuttu. Layar ditughunka, mangku kapaltu dienangka dibatak angin ajau.

¹⁸ Angin nyaghutu maju nempua kapal kami, mangku pagi di aghiau barang bata'an kapal dicapakka dalam laut.

¹⁹ Mangku pagi di aghiau agi dandanan kapaltu dicapakka pulau. Ughang itula ngerjaukanyau.

²⁰ La buaghi-aghi kami nidau nginak matau-aghi ngan bintang, angin nyaghutu maju nempua kami, mangku kami nidau bediau agi aghapan ka idup.

²¹ La lamau jugau ughangtu nidau makan, mangku Paulus pegi njenguak ughangtu ngan bekatau, “Amun kamu nuruti kici'anku ngan nidau belayar jak di Kerita, cengki kitau nidau meghasauka kerusakan ngan kerugian ini.

²² Mbak kini pulau aku mintak nian, supayau kamu jangan keciak ati, karnau nidau sughang kia jak di kamu ka mati. Cuman kitau ka kelengitan kapal ajau.

²³ Di malam adau malaikat jak di Allah diau kusemba njenguak aku,

²⁴ kataunyau, ‘Nidau endak takut, Paulus, kaba mesti ngadap Kaisar. Mangku karnau keilu'an Allah, gegalau jemau diau adau di kapalni ngan kaba ka selamat karnau kaba.’

²⁵ Itula sebapau kamu mesti netapka ati, karnau aku percayau ngan Allah, bansau gegalaunyau ka tejadi nian luak la dikiciakka ngan aku.

²⁶ Kitau ka tebansal di pantai sebua pulau.”

Kapal tebansal

²⁷ La malam ke empat belas kami masia dibatak angin di laut Adria. Kekirau tenga malam jemau kerjau kapal sangkau, kami dang nuju tepian.

²⁸ Mangku ughangtu nughunka tali ngan batu endak ngeruani dalam laut, tenyatau di situ dalamau duau pulua depau. Mangku diukur agi, tenyatau limau belas depau dalamau.

²⁹ Ughangtu takut, kalu tekandas di batu karang, mangku ditughunkanyau empat bua alat mendamka kapal di belakang, mangku kami bedu'a, supayau aghi gancang siang.

³⁰ Jemau kerjau kapal ncubau belaghi jak di kapaltu. Ughangtu nughunka perawu ngan luluak endak nughunka alat mendamka kapal di mukau.

³¹ Mangku Paulus bekatau ngan kepalak tentera ngan tenterahau diau adau di kapal, “Amun ughangtu nidau di kapal, kamu nidau ka selamat.”

³² Tenteratu netak tali perawu tadi, mangku perawutu anyut.

³³ Satu paghak siang, Paulus ngajak gegalau ughangtu makan, kataunyau, “La empat belas aghi kamu nunggu-nunggu ajau, nidau makan tuapau-apau.

³⁴ Karnau itu aku ngajung kamu makan kudai dikit jadila. Itu penting, mangku kamu selamat, karnau nidau sughang kia jak di kamu ka kurang tuapau-apau.”

³⁵ La udim ngiciak luak itu, Paulus ngambiak ruti, bedu'a beterimau-kasia ngan Allah di adapan gegalau ughangtu, dipiyak-piya'au, mangku dimakanau.

³⁶ Mangku ughangtu riang galau ngan makan pulau.

³⁷ Gegalau jemau diau adau di kapaltu duau ratus tujua pulua enam ughang.

³⁸ La udim makan kenyang, ughangtu ncapakka beghas gendum di laut, mangku kapaltu ampung.

³⁹ Satu aghi la siang, ughangtu nginak teluak ngan pantaiau datagh. Empuak ughangtu nidau keruan tepiautu, ughangtu endak ndaghatka kapaltu di situ, amun pacak.

⁴⁰ Ughangtu netak tali alat mendamka kapal, mangku ngenangka alattu dalam laut, tali kemudi dipaculi, layar di mukau dipasang, mangku kapal dibatak angin nuju pantai tadi.

⁴¹ Anyautu kapaltu melanggar bungin di dasagh laut, mangku kapaltu tebansal. Mukaunyau nidau pacak begerak agi. Belakangau ancur ditempua umbak besak.

⁴² Tentera di kapaltu merencanauka endak mbunua gegalau kawalan, karnau takut adau diau bedenang ke daghat ngan belaghi.

⁴³ Anyautu kepalak tentera nidau ngajung anak-buahau ngerjaukanyau, karnau diau endak nyelamatka Paulus. Mangku diau ngajung gegalau jemau diau pacak bedenang terjun ke laut bedenang nuju ke pantai.

⁴⁴ Diau lainau diajungau ngikut makai papan ngan pecahan kapaltu. Luak itula kami selamat galau sampai ke daghat.