RASUL 24 - PEJANJIAN EMPAI CERITAU ILUAK

Paulus diaduka jemau Yahudi di adapan Pelikes

¹ La udim empat malam Imam Besak Ananias ngan tuau-tuau jemau Yahudi pegi ke Kaisaria serempak ngan sughang diau keruan ukum, namaunyau Tertulus. Ughangtu ngadap gubernurtu ngiciakka aduan ngaduka Paulus.

² Paulus diadapka, mangku Tertulus mulai ngiciakka pengaduan, kataunyau, “Gubernur Pelikes diau kami regaui. Dighi ngatur nenggeri kami ngan iluak. Karnau itu nenggeri kami maju meghasauka tenteram, mangku ngan pengertian dighi banyak peghubahan diau iluak di bangsau kami.

³ Karnau gegalaunyautu kami riang nian ngan gegalau jemau maju beterimau-kasia ngan dighi.

⁴ Mangku supayau nidau lamau, aku mintak dighi ndengaghka kami ngan ngaligh jerang ajau.

⁵ La nyatau ngan kami, bansau jemau ini mbayauka. Diautu ngacauka jemau Yahudi di manau-manau di gegalau deniau. Diau pulau pengulu partai Nasarit.

⁶ Lagi diau ncubau ngumuhi Ghuma Allah. Itula sebapau kami nangkap diau rencanau endak diadili nurut ukum Taurat kami.

⁷ Anyautu Kumandan Lisias merebuti kami ngambiak Paulus jak di kami,

⁸ mangku ngajung tukang ngadu ngadap dighi. Amun dighi merisau jemau ini, dighi ka ngeruani gegalaunyau diau kami aduka ini.”

⁹ Jemau Yahudi diau adau di situ pulau ngikut ngaduka Paulus ngan mbenaghka gegalaunyau diau dikiciakka Tertulus tadi.

Paulus mbenaghka diriau

¹⁰ Mangku gubernur ngenjuakka tandau ngan Paulus, bansau diau bulia ngiciak. Mangku Paulus bekatau, “Aku keruan dighi la betaun-taun njadi akim di nenggeri ini. Karnau itu aku beghani mbenaghka aku di adapan dighi.

¹¹ Amun dighi merisau, dighi ka keruan, mbak bansau lum lebia jak di duau belas aghi aku pegi ke Yerusalim endak sembayang di situ.

¹² Mangku nidau kekela jemau Yahuditu nginak aku bebala ngan sughang kia ngan ngacauka, empuak di Ghuma Allah empuak di ghuma sembayang, empuak di manau kila di kuta.

¹³ Ughang ini nidau pulau pacak mbuktika buru'an diau dikiciakka ngan dighi mburuakka aku.

¹⁴ Nyela, aku ngakuak ngan dighi, mbak bansau aku nyemba Allah niniak puyang kami nurut ajaghan empai diau dikiciakka ughang ini sala. Anyautu aku masia percayau gegalaunyau diau ditulis dalam ukum Taurat ngan kitab nabi-nabi.

¹⁵ Luak ughangtu pulau aku ngaghapka Allah, bansau gegalau jemau ka idup jak di mati, empuak jemau iluak empuak jemau ja'at.

¹⁶ Karnau itu aku beusaha, supayau aku maju idup ngan ati beresia di adapan Allah ngan manusiau.

¹⁷ Aku la lamau nidau di Yerusalim, la bebeghapau taun, mangku aku ngulang agi mbatak enju'an tanci batan endak bangsauku ngan endak bekerban batan endak Allah.

¹⁸ Penarau aku dang ngerjauka titu, ughangtu nginak aku di Ghuma Allah, masau aku empai udim mberesiaka diriku. Jemau banyak nidau bediau ngan nidau bediau kekacauan.

¹⁹ Cuman adau bebeghapau jemau Yahudi di situ jak di Asia. Ughang itula semestiau ngadap di sini endak ngiciakka pengaduan ngan dighi, amun ughangtu adau nian setu diau endak diaduka ngan aku.

²⁰ Nengkela ughang ini diau adau di sini mbak kini ngiciakka kejeditanku diau ughangtu keruani di aku, masau aku diperisau di pengadilan agamau.

²¹ Di pugan ughangtu aku cuman ngiciak luak ini, ‘Aku diadili mbak kini, karnau aku percayau, bansau jemau mati ka idup agi.’ ”

²² Mangku Pelikes diau la banyak keruan ceritau ajaghan empai itu gheghaduka sidang itu, kataunyau, “Nanti amun kumandan Lisias datang ke sini, aku ka mutuska pekarau ini.”

²³ Mangku diau ngajung Paulus maju dikawalka, anyautu diau nidau dikebat ngan kantin-kantinau bulia tandang pulau ngan ngenjuakka tuapau kila diau enda'au.

Paulus ngiciak ngan Pelikes ngan Derusila

²⁴ La udim bebeghapau aghi Pelikes ngan biniau Derusila diau jemau Yahudi ngajung njenguak Paulus, mangku ndengagh diau ngiciak ngiciakka ceritau percayau ngan Yesus Keristus.

²⁵ Anyautu Paulus ngiciakka carau jemau dibenaghka Allah ngan carau nguasaui diri ngan ukuman aghi kiamat. Pelikes penakut mangku bekatau, “Jadila kudai, mbak kini pegila. Aku ka ngajung njenguak kaba agi, amun adau luangan.”

²⁶ Penarau itu diau ngaghapka ka dapat tanci jak di Paulus. Itula sebapau diau rajin ngajung jemau njenguak Paulus endak ngiciak ngan diau.

²⁷ La udim duau taun Pelikes digenti, mangku Perkius Pestus njadi gubernur. Pelikes endak meriangka jemau Yahudi, mangku diau ngenangka Paulus tekawal.