RASUL 22 - PEJANJIAN EMPAI CERITAU ILUAK

¹ “Gegalau adiak-sanak, dengaghkala kataukuni. Aku endak mbenaghka diriku.”

² Satu jemau banyaktu ndengagh Paulus ngiciak pakai basau Ibrani, ughangtu tamba diam. Paulus bekatau,

³ “Akuni jemau Yahudi, lahir di Tarsus di perupinsi Kilikia, mangku aku besak di Yerusalim ini. Aku diajagh guru Gamali'il ngan neghagi belajagh ukum Taurat niniak puyang kitau, mangku aku galak kerjau batan endak Allah semegi ngan kapu dighi mbak kini.

⁴ Aku nganiayau jemau diau ngikut ajaghan empai enggut mati. Tinau lanang kutangkap dimasuakka dalam jil.

⁵ Imam Besak ngan gegalau pengulu kitau pacak nceritauka, bansau aku nidau mbu'ung. Ughang itula la ngenjuakka surat kuasau ngan aku batan endak nangkap jemau diau ngikut ajaghan empaitu diau adau di Damsik. Mangku aku pegi ke situ endak nangkap jemau diau ngikut ajaghan empaitu diau adau di situ, mangku mbata'i ughangtu ke Yerusalim endak diukum.”

Paulus nceritauka setu diau dighasaukanyau

⁶ “Aku dang bejalan, laka sampai di Damsik, kekirau tengaghi, adau cayau diau terang nianan besinagh jak di langit di sekitar aku.

⁷ Aku rubua ke tana, mangku aku ndengagh suarau ngiciak ngan aku, ‘Ui, Saulus, ngapau kaba nganiayau Aku?’

⁸ Aku betanyau, ‘Sapau Dighi, Tuhan?’ Kataunyau, ‘Akuni Yesus, jemau Nasarittu, diau kaba aniayau.’

⁹ Kantin-kantinku nginak cayautu pulau, anyautu nidau ndengagh suarau diau ngiciak ngan aku.

¹⁰ Mangku aku betanyau agi, ‘Tuapau mesti kukerjauka, Tuhan?’ Katau Tuhan, ‘Betegakla ngan pegila ke Damsik. Di situ nanti ka dikiciakka ngan kaba gegalaunyau diau Allah ajungka ngan kaba.’

¹¹ Mangku aku njadi butau, karnau cayau diau nyilauka itu. Mangku kantin-kantinku mapa aku masuak Damsik.

¹² Di situ adau sughang benamau Ananias. Diautu alim, ta'at ngan ukum Taurat, lagi diregaui jemau Yahudi di Damsik.

¹³ Diau datang njenguak aku, betegak guak aku ngan bekatau, ‘Ui, Saulus, nginakla agi kaba.’ Masau itu pulau aku ncega, mangku matauku nginak agi.

¹⁴ Mangku kataunyau agi, ‘Allah niniak puyang kitau la netapka kaba, supayau kaba ngeruani kenda'Au ngan nginak Jemau diau suci diau ngerjauka kendak Allah ngan ndengagh suarauNyau,

¹⁵ karnau kaba mesti ngiciakka ngan gegalau jemau setu diau la kaba kinak ngan kaba dengagh.

¹⁶ Mbak kini jangan agi kaba asau-asau. Mintakla dibaptis. Ngiciakla ngan Tuhan, mintak supayau dusau kaba diabiska.’ ”

Paulus nceritauka luak manau diau diajung

¹⁷ “Aku ngulang ke Yerusalim, mangku aku dang bedu'a di Ghuma Allah, aku dikuasaui Rua Allah.

¹⁸ Aku nginak Tuhan diau bekatau ngan aku, ‘Pegila, tinggalkala cecepat Yerusalim, karnau jemau di sini nidau ka nerimau kici'an kaba ceritau Aku.’

¹⁹ Aku bekatau, ‘Tuhan, ughangtu keruan nian, bansau akuni pegi ke ghuma-ghuma sembayang endak nangkap jemau diau percayau ngan Dighi, mangku dimasuakka dalam jil ngan dibaduki.

²⁰ Mangku satu Setipanus diau ngiciakka ceritau Dighi dibunua, aku pulau adau di situ nyetujui pembunuan itu, lagi akuni nunggui pekakas jemau diau ngerjaukanyautu.’

²¹ Anyautu Tuhan bekatau agi, ‘Pegila, Aku ka ngajung kaba ke bada diau jawua jak di sini njenguak jemau bangsau lain.’ ”

²² Jemau banyaktu maju ndengaghka Paulus ngiciak, anyautu satu ndengagh katau itu, ughangtu tegauk-gauk, kataunyau, “Bunuala diau! Diauni nidau pantas idup!”

Paulus dalam binting

²³ Ughangtu maju tegauk-gauk, sampai ngepaska baju ngan ngamburka debu.

²⁴ Karnau itu kumandan ngajung Paulus dibatak ke binting, supayau diperisau ngan dibaduki endak ngeruani, tuapau sebapau jemau banyaktu tegauk luak itu melawan diau.

²⁵ Anyautu la udim Paulus dikebat endak dibaduki, diau bekiciak ngan tentera diau betugastu, “Apu bulia mbaduki sughang diau behak di nenggeri Rum, apau agi amun lum diadili?”

²⁶ Ndengagh itu, tentera tadi pegi njenguak kumandan ngan bekatau, “Tuapau diau dighi kerjauka? Jemau itu behak di nenggeri Rum.”

²⁷ Mangku kumandan pegi guak Paulus, kataunyau, “Kiciakkala, apu kaba ngenian jemau behak di nenggeri Rum?” Timbal Paulus, “Awu, nyela.”

²⁸ Katau kumandantu, “Aku njadi jemau behak di nenggeri Rum, karnau kubeli ngan regau besak.” Katau Paulus, “Akuni behak di nenggeri Rum, karnau bak kami la behak di nenggeri Rum.”

²⁹ Mangku tentera diau endak mbaduki Paulustu cecepat mundur. Kumandantu penakut pulau, karnau diau la ngajung ngebat Paulus, awuak diautu behak di nenggeri Rum.

Paulus di pengadilan agamau

³⁰ Kumandan itu endak nian ngeruani, tuapau sebapau jemau Yahudi nyalaka Paulus. Karnau itu pagi di aghiau diau ngajung imam-imam bepangkat tinggi ngan gegalau pengadilan agamau, supayau betunggal, mangku Paulus dikeluaghka jak di jil, dibatak jak di binting ngadap ughangtu.