RASUL 13 - PEJANJIAN EMPAI CERITAU ILUAK

Barnabas ngan Saulus diajung

¹ Di jemau Keristen di Antiukia adau bebeghapau nabi ngan guru agamau. Namaunyau Barnabas, Simiun diau pulau dikiciakka Nigir, Lukius, jemau Kirini, ngan Menahim diau diajagh serempak ngan gubernur Herudis, ngan Saulus.

² Adau saghi ughangtu dang sembayang ngan puasau, mangku Rua Allah bekatau ngan ughangtu, “Piliala Barnabas ngan Saulus batan endak Aku, supayau ughang duau itu ngerjauka kerjau diau la kutetapka batan endak ughang duautu.”

³ Ughangtu puasau ngan bedu'a, ditepiakkanyau tanganau di palak ughang duautu, mangku diajungau pegi.

Saulus ngan Barnabas di pulau Siprus

⁴ Barnabas ngan Saulus pegi ke Selukia, karnau diajung Rua Allah, mangku jak di situ ughangtu belayar ke pulau Siprus.

⁵ La sampai di Salamis, ughangtu ngiciakka katau Allah di ghuma sembayang jemau Yahudi. Yuhanis Markus ngikut pulau ngan nulungi ughangtu.

⁶ Gegalau pulau itu diidari ughangtu enggut ke Papus. Di situ ughangtu betemu ngan sughang jemau Yahudi, benamau Baryisus. Jemau itu dukun diau ngaku'i diriau nabi.

⁷ Diautu sekantin ngan gubernur pulau itu. Gubernurtu namaunyau Sergius Paulus, diautu calak. Diau mantau Barnabas ngan Saulus, karnau endak ndengagh katau Allah.

⁸ Anyautu ughang duautu dilawan Ilimas, dukun tadi. Ilimas namaunyau basau Yunani. Diautu ncubau, supayau gubernur jangan percayau ngan Yesus.

⁹ Saulus diau diadaki Paulus dikuasaui Rua Allah, mangku ngina'i dukun tadi,

¹⁰ kataunyau, “Ui, kabani anak iblis. Kaba penipu ngan penja'at. Kaba musui gegalaunyau diau benagh. Kaba nidau mandak merusakka rencanau Allah diau endak nyelamatka manusiau.

¹¹ Mbak kini keruanila, Tuhan ka ngukum kaba. Kaba ka njadi butau. Kaba nidau ka nginak matau-aghi selamau bebeghapau aghi.” Masau itula pulau Ilimastu teghasau adau luak aban itam ngalangi mataunyau, mangku diau bejalan beghabal-ghabal ndala'i jemau batan endak mapa diau.

¹² Nginak setu diau tejaditu, gubernur tadi percayau ngan Tuhan. Diautu kepagauan nian ngan ajaghan Tuhan.

Barnabas ngan Paulus di Antiukia daira Pisidia

¹³ Paulus ngan kantin-kantinau pegi jak di Papus belayar ke Perga di Pampilia. Di situ Yuhanis Markus ninggalka rumbungan itu pegi ke Yerusalim.

¹⁴ Jak di Perga ughangtu melajuka ke Antiukia daira Pisidia. Aghi Sabat ughangtu pegi ke ghuma sembayang mangku duduak.

¹⁵ Ukum Taurat ngan kitab nabi la dibacauka, petugas ghuma sembayangtu ngajung nanyauka ughang duautu, “Amun kamu adau pesan diau nguatka ughang ini, kiciakkala ngan kami.”

¹⁶ Paulus betegak, mangku ngenjuakka tandau ngan tanganau ngan bekatau, “Ui, kapu dighi jemau Israil ngan kapu dighi jemau diau takut ngan Allah, dengaghkala aku!

¹⁷ Allah jemau Israil la milia niniak puyang kitau ngan njadika bangsau kitau besak, timpau ughangtu mendam di Mesir njadi jemau asing di situ. Mangku ngan kuasau diau besak Allah mbata'i ughangtu keluagh jak di nenggeri itu.

¹⁸ Selamau empat pulua taun Diau ngaligh ngan perembak ughangtu di padang bungin.

¹⁹ Tujua bangsau diancurkaNyau di nenggeri Kanaan, mangku diagiakaNyau nenggeritu ngan ughangtu njadi hak ughangtu.

²⁰ Gegalaunyautu tejadi jangkau empat ratus limau pulua taun. La udim diagiakaNyau nenggeritu, dienjuakkaNyau akim enggut ke nabi Samuil.

²¹ La udim itu ughangtu mintak sughang rajau, mangku Allah ngenjuakka Saul, anak Kis, jak di jungku Benyamin, njadi rajau ughangtu selamau empat pulua taun.

²² La udim itu Allah nukar Saul ngangkat Daud njadi rajau ughangtu, mangku nceritauka Daud luak ini, ‘Aku la keruan Daud, anak Isai, jemau diau melemakka atiKu ngan ngerjauka gegalau kendakKu.’

²³ Mangku jak di pengadaunyau Allah la ngenjuakka ngan jemau Israil sughang Rajau Penyelamat luak la dijanjikaNyau. Yesus itula Rajau Penyelamat itu.

²⁴ Yesustu la datang endak mulai kerjauNyau, Yuhanis la ngiciakka ngan gegalau bangsau, supayau ngubai jak di dusaunyau ngan mintak dibaptis.

²⁵ Mangku Yuhanis laka ngudimi kerjaunyau, diau bekatau, ‘Akuni ukan jemau diau kamu sangkau. Jemau itu ka datang la udim aku. Melegha'i tali sepatuAu aku nidau pantas.’

²⁶ Ui, kapu dighi pengadau Abraham ngan kapu dighi diau lain diau ta'at ngan Allah. Ceritau keselamatan la dikiciakka ngan kitau.

²⁷ Jemau Yerusalim ngan penguluau nidau ngaku'i Yesus. Ughangtu ngukum Yesus ngan ukuman mati, mangku kici'an nabi-nabi diau dibacauka idang aghi Sabat ditepati.

²⁸ Empuak ughangtu nidau nemuka salaHau diau pantas diukum mati, ughangtu mintak ngan Pilatus, supayau Diau dibunua.

²⁹ La udim dikerjauka gegalaunyau diau la ditulis ceritau Diau, Diautu ditughunka jak di kayu salip, mangku dimasuakka dalam kuburan.

³⁰ Anyautu Allah ngidupkaNyau agi jak di mati.

³¹ Selamau empat pulua aghi Diau ngancakka diriAu ngan jemau diau la ngikut Diau jak di Galilia ke Yerusalim. Mbak kini ughang itula ngiciakka Diau ngan bangsau Israil.

³² Jadi, mbak kini kamini ngiciakka ceritau iluak itu ngan kapu dighi: Diau la dijanjika Allah ngan niniak puyang kitau,

³³ la ditepatiNyau ngan kitau, ngan ngidupka Yesus jak di mati, luak ditulis di Masmur duau, ‘Kaba anakKu. Mbak kini Aku njadi Bak Kaba.’

³⁴ Allah la ngidupka Diau jak di mati. Mbak kini Diau nidau ka mati agi dalam kuburan. Titu dikiciakka Allah ngan katau ini, ‘Aku ka nepati janji diau suci ngan pacak dipercayaui diau la Kukiciakka ngan Daud.’

³⁵ Luak itu pulau la dikiciakka di Masmur lain, ‘Dighi nidau ngenangka mayat Budak diau ta'at bembau.’

³⁶ Daud ngerjauka kendak Allah mangku mati ngan dikuburka guak niniak puyangau. Nyela, mayatau busuak.

³⁷ Anyautu Yesus diau diidupka agi jak di mati nidau busuak.

³⁸ Jadi, keruanila kapu dighi, karnau Yesus mangku dikiciakka ngan kapu dighi ceritau, mbak bansau dusau pacak diabiska.

³⁹ Karnau Diautu bilang jemau diau percayau pacak dilepaska jak di gegalau dusaunyau. Titu nidau pacak dikerjauka ukum Musa.

⁴⁰ Itula sebapau kapu dighi mesti njagaui iluak-iluak, supayau jangan tejadi ngan kapu dighi setu diau la dikiciakka nabi,

⁴¹ ‘Ingatkala iluak-iluak, kamu diau galak nggelak. Kamu ka kemangan, mangku mati! Karnau masau kamu gi idup mbak kini, Aku ka ngerjauka kerjau diau nidau ka kamu percayaui, empuak dikiciakka ngan kamu.’ ”

⁴² Satu Paulus ngan Barnabas ngeluagh jak di ghuma sembayang, ughang duautu dipintak ngiciakka ceritau itu agi aghi Sabat di mukau.

⁴³ La udim jemau ngeluagh jak di ghuma sembayangtu, banyak jemau Yahudi ngan jemau lain diau takut ngan Allah ngikut Paulus ngan Barnabas. Mangku rasultu ngajagh ughangtu, diajungau, supayau maju percayau ngan keilu'an Allah.

⁴⁴ Aghi Sabat di mukau laka sekuta itu datang betunggal endak ndengaghka katau Allah.

⁴⁵ Anyautu, satu nginak jemau banyak itu, jemau Yahudi sengit nianan, mangku nggelakka Paulus ngan melawan kici'an Paulustu.

⁴⁶ Ngan beghani Paulus ngan Barnabas ngiciak terang-terangan, kataunyau, “Katau Allah mesti dikiciakka ngan kapu dighi kudai. Anyautu kapu dighi nidau nerimaunyau, mangku kapu dighi nidau dianggap pantas bulia idup selelamaunyau. Mangku kami pegi ke bangsau lain.

⁴⁷ Inila diau diperintaka Allah ngan kami, ‘Aku la netapka kaba njadi terang batan endak bangsau lain diau nidau keruan Allah, mangku karnau kaba gegalau deniau pacak diselamatka.’ ”

⁴⁸ Ndengagh kici'an itu gegalau jemau diau ukan Yahudi riang nian ngan ngagungka ceritau jak di Tuhan. Mangku gegalau jemau diau la ditetapka Allah batan endak idup selelamaunyau percayau ngan Tuhan Yesus.

⁴⁹ Mangku kici'an Tuhan tesiar di gegalau daira itu.

⁵⁰ Anyautu pengulu-pengulu kuta itu ngan tinau-tinau diau diregaui ngan takut ngan Allah diasung jemau Yahudi, supayau ughangtu nganiayau Paulus ngan Barnabas, mangku ughang duautu dilaratka jak di daira itu.

⁵¹ Rasul itu ngepaska debu di ketingau di adapan ughangtu njadi peringatan ngan ughangtu, mangku pegi ke Ikunium.

⁵² Jemau percayau di Antiukia riang nianan ngan dikuasaui Rua Allah.