PILIPI 4 - PEJANJIAN EMPAI CERITAU ILUAK

¹ Karnau itu, kantin-kantinku diau kusayangi, majula percayau nian ngan Tuhan. Aku ghindu nian ngan kamu. Kamula mbuat aku riang ngan bangga.

² Yudia ngan Sintiki, aku mintak nian, supayau kamu duau suati serupu'an karnau sesamau percayau ngan Tuhan.

³ Ngan kaba Sunsugus, kantinku diau pacak dipercayaui, aku mintak, supayau kaba nulung ughang duautu. Ughang duautu la sesamau bekerjau ngan aku endak ngiciakka ceritau iluak jak di Allah luak Kelimines ngan gegalau jemau lainau diau bekerjau ngan aku. Namau ughangtu la adau di buku jemau idup.

⁴ Luak manau kila kamu mesti riang karnau seghundak ngan Tuhan. Sekali agi aku ngiciakka: Riangla kamu!

⁵ Keilu'an kamu mesti dikeruani gegalau jemau. Tuhan la damping.

⁶ Jangan kamu ghegak ngan tuapau kila! Maju bedu'a, mintakla ngan Allah setu diau kamu endak ngan maju beterimau-kasia.

⁷ Mangku damai jak di Allah diau nidau pacak manusiau terti ka njagaui ati ngan rupu'an kamu karnau la seghundak ngan Yesus Keristus.

⁸ Mangku, kantin-kantinku, rupuakkala setu diau begunau ngan pantas dipuji, gegalaunyau diau benagh, diau diregaui, diau adil, diau beresia, diau alap ngan iluak.

⁹ Kerjaukala setu diau la kamu pelajaghi ngan terimau jak di aku, diau kamu dengagh ngan diau kamu kinak di aku. Mangku Allah diau ngenjuakka damai ka adau guak kamu.

Beterimau-kasia ngan jemau Keristen di Pilipi

¹⁰ Aku riang nian dalam Tuhan, karnau mbak kini kamu teghingat agi ngan aku. Aku ukan ngiciakka kamu nidau teghingat ngan aku. Nyela, kamu maju ngingatka aku, cuman nidau kungang nunjuakkanyau.

¹¹ Aku ngiciakka ini ukan karnau aku kurangan. Aku la belajagh meghasau cukup ngan setu diau adau.

¹² Aku pacak idup ngan serbaunyau kurang, mangku aku pacak pulau idup ngan serbau keliwatan banyak. Aku la keruan resiau idup luak manau kila, empuak kenyang empuak lapagh, empuak dang buadau empuak serik.

¹³ Gegalaunyautu pacak kutanggung, karnau kuasau diau dienjuakka Keristus ngan aku.

¹⁴ Luak manau kila, iluak pulau kerjau kamu la nulung aku, masau aku nanggung.

¹⁵ Kantin-kantinku di Pilipi, kamu keruan nian, bansau senitu, masau aku ninggalka Makedunia, masau ceritau iluaktu empai kukiciakka, nidau bediau jemau Keristen diau nulung aku lain jak di kamu. Cuman kamu itula diau meghasauka untung ngan rugi ngan aku.

¹⁶ Masau aku di Tesalunika, la lebia sekali kamu ngighim tanci ngan aku.

¹⁷ Ukan aku cuman endak nerimau pengenjuak. Diau aku endak, supayau kamu adau asil diau nguntungka kamu.

¹⁸ Mbak kini aku la nerimau gegalaunyau, la lebia jak di cukup. Gegalau pengenjuak kamu la kuterimau jak di Epapruditus. Gegalaunyau diau kuendak la adau galau. Pengenjuak kamutu luak kerban diau bembau ghum diau dikerbanka ngan Allah ngan diterimau ngan riang.

¹⁹ Allah diau kusemba kayau kematila. Diau ka ngenjuakka ngan kamu gegalaunyau diau kamu mesti gunauka karnau Yesus Keristus.

²⁰ Tepujila Allah Bapak kitau selelamaunyau. Amin!

Pesan

²¹ Sampaika pesanku ngan gegalau umat Allah diau percayau ngan Yesus Keristus. Terimaula pulau pesan jak di kantin-kantin kitau diau seghundak ngan aku.

²² Gegalau umat Allah di sini bepesan ngan kamu, terutamau jemau jak di istana Kaisar.

²³ Aku bedu'a, supayau Tuhan Yesus Keristus iluak ngan gegalau kamu.