PILIPI 2 - PEJANJIAN EMPAI CERITAU ILUAK

Petua supayau besatu ngan ngensian luak Keristus

¹ Kamu tegua, karnau seghundak ngan Keristus. Kamu riang, karnau disayangi Keristus. Kamu dibimbing Rua Allah mangku sangi sialka ngan sangi sayangi.

² Mangku cubaula kamu meriangka atiku nian ngan carau ini: Kamu mesti idup suati ngan sayang diau semegi, serupu'an ngan tujuan diau semegi.

³ Jangan bekerjau ndalak kepentingan diri kamu ngan mintak dipuji. Anyautu kamu mesti ngensian ngan nganggap pentingla jemau sangkan kamu.

⁴ Sanaukala pulau kepentingan jemau, jangan cuman kepentingan kamu itula.

⁵ Kamu mesti adau rupu'an ngan peghasauan luak Yesus Keristus.

⁶ Diau semegi ngan Allah. Empuak luak itu, Diau nidau terupuak, bansau kedudu'anNyautu mesti dita'anka.

⁷ Anyautu Diau sukau ninggalka gegalaunyautu, mangku njadi semegi luak sughang budak, njadi luak manusiau, mangku idup luak sughang jemau.

⁸ Diau ngensianka diriAu ngan ta'at ngan Allah enggut mati, lagi mati di kayu salip.

⁹ Karnau itu Allah ngagungka Diau seagung-agungau, dienjuakkaNyau kuasau. Besaklah kuasau itu sangkan gegalau kuasau diau lain.

¹⁰ Mangku Yesus diregaui gegalaunyau diau adau di sergau ngan di deniauni ngan di deniau jemau mati nunduak nyemba Diau.

¹¹ Mangku gegalau ughangtu ka ngaku'i, “Yesus Keristusla Tuhan!” Mangku Allah Bapak diagungka.

Usahakala supayau ketenteraman kamu njadi sempernau

¹² Kantin-kantinku diau kusayangi, kamu maju ta'at ngan aku, masau aku guak kamu, mangku mbak kini masau aku jawua, kamu mesti lebia ta'at agi. Beusahala maju, supayau keselamatan kamu njadi nyatau. Kerjaukala titu ngan takut ngan meregaui Allah.

¹³ Allahtu maju bekerjau dalam ati kamu, mangku kamu sukau ngan pacak ngerjauka kenda'Au.

¹⁴ Kerjauka gegalaunyau ngan nidau bemumut ngan nidau bebala.

¹⁵ Mangku kamu nidau besala, luak anak-anak Allah diau nidau becacat ngan idup ngan benagh di guak jemau diau ja'at ngan bedusau. Mangku kamu luak bintang diau besinagh di langit nerangi deniau,

¹⁶ masau kamu ngiciakka ceritau diau ngenjuakka idup. Amun kamu idup luak itu, mangku aku pacak mbanggaka kamu, masau Yesus Keristus datang agi. Itu njadi buktiau, bansau pejuanganku ukan nidau begunau ngan kerjauku adau asilau.

¹⁷ Berangkali daghaku ka ditumpaka luak dicughuaka di pucuak kerban diau kamu enjuakka ngan Allah karnau percayau. Amun titu ka tejadi nian, aku beterimau-kasia ngan ikut riang ngan kamu.

¹⁸ Mangku kamu pulau mesti beterimau-kasia ngan ikut riang ngan aku.

Timutius ngan Epapruditus

¹⁹ Aku ngaghap, aku pacak ngajung Timutius berayak ngan kamu, amun titu kendak Tuhan, mangku aku diriangka ngan ceritau kamu.

²⁰ Cuman Timutius sughang diau suati serupu'an ngan aku ngan nyanauka kamu nian.

²¹ Gegalau jemau lainau cuman ngerjauka kepentingan diriau ajau, ukan kepentingan Yesus Keristus.

²² Kamu la keruan, bansau Timutiustu setia nian. Diau la sesamau bekerjau ngan aku endak nceritauka ceritau iluak jak di Allah. Kami ughang duau luak duau beghanak.

²³ Diautu kuaghapka cepat kuajung guak kamu, amun la keruan, luak manau pekarauku putus nanti.

²⁴ Mangku aku percayau, amun Tuhan kenda'i, aku pulau nidau lamau agi ka berayak ngan kamu.

²⁵ Mangku aku ngirau iluak, amun kuajung kantin kitau Epapruditus diau kamu ajung nulung aku baliak ngan kamu. Diau la sesamau bekerjau ngan bejuang ngan aku.

²⁶ Diau ghindu nian ngan gegalau kamu ngan temas, karnau kamu la ndengagh ceritau diau buidapan.

²⁷ Nyela, diau buidapan nian, mis mati. Anyautu Allah sial ngan diau, ukan cuman ngan diau ajau, tapitu ngan aku pulau, mangku aku jangan tamba bingung.

²⁸ Itula sebapau aku cepat ngajung diau baliak. Mangku kamu riang, amun betemu ngan diau agi, mangku atiku tenang.

²⁹ Terimaula diau ngan riang luak kantin kamu dalam Tuhan ngan regauila gegalau jemau luak diau.

³⁰ Karnau kerjau Keristustu diau mis mati. Diau sukau nyeraka nyawaunyau endak nulung aku, karnau gegalau kamu nidau pacak ngerjaukanyau.