PILIPI 1 - PEJANJIAN EMPAI CERITAU ILUAK

¹ Jak di aku, Paulus, ngan Timutius diau bekerjau batan endak Yesus Keristus. Kami nulis surat ini batan endak kamu diau njadi umat Allah diau adau di Pilipi karnau percayau ngan Yesus Keristus ngan pulau batan endak pengulu jemau Keristen ngan penulungau.

² Kami bedu'a, supayau Allah Bapak kitau ngan Tuhan Yesus Keristus iluak ngan kamu ngan ngenjuakka damai.

Paulus ndu'aka jemau Keristen di Pilipi

³ Dang aku teghingat ngan kamu, aku maju beterimau-kasia ngan Allah.

⁴ Mangku dang aku ndu'aka gegalau kamu, aku bedu'a ngan ati riang.

⁵ Aku beterimau-kasia ngan Allah, karnau kamu nulung aku ngiciakka ceritau iluak jak di penembaiau enggut mbak kini.

⁶ Allah la mulai ngerjauka diau iluak di ati kamu. Mangku aku percayau nian, Diau ka neruska kerjauNyau diau iluaktu enggut udim, masau Yesus Keristus datang.

⁷ Gegalau kamu maju adau di atiku. Nyela, sepantasau aku bepeghasauan luak itu tuadap kamu. Gegalau kamu la nulung aku ngan kerjauku diau dienjuakka Allah ngan aku, empuak masau aku dijilka, empuak masau aku na'anka ngan mbenaghka ceritau iluak itu.

⁸ Allah keruan, bansau aku ghindu tegalau ngan kamu ngan sayang diau asalau jak di Yesus Keristus.

⁹ Aku ndu'aka kamu, mangku kamu tamba nyayangi Allah ngan jemau ngan tamba ngeruani diau benagh ngan bepengertian nian.

¹⁰ Mangku kamu pacak milia diau iluak sekali, mangku idup kamu ka beresia ngan nidau becacat ngan nidau bediau buru'an tuapau kila, amun Keristus datang nanti.

¹¹ Idup kamu ka dipenui ngan kerjau diau benagh diau cuman pacak dikerjauka Yesus Keristus. Mangku Allah diregaui ngan diagungka.

Idup batan endak Keristus

¹² Aku endak, supayau kamu keruan, bansau setu diau la tejadi di aku mbuat tamba banyak jemau percayau ngan ceritau iluaktu.

¹³ Mangku penjagau istana ngan jemau lainau di sini la keruan galau, bansau aku dijilka karnau bekerjau batan endak Keristus.

¹⁴ Karnau aku dijilka, banyak jemau Keristen di sini tamba percayau ngan Tuhan, mangku tamba beghani ngiciakka katau Allah ngan nidau takut.

¹⁵ Adau diau ngiciakka Keristus karnau sengit ngan endak bebala. Adau pulau diau ngiciakkaNyau ngan tujuan diau iluak.

¹⁶ Ughangtu ngerjauka titu karnau nyayangi Keristus. Ughangtu keruan, bansau Diau la ngajung aku mbenaghka ceritau iluaktu.

¹⁷ Ughang lain tadi ngiciakka Keristus ngan tujuan nidau iluak. Ughangtu ngerjauka titu karnau kepentingan ughang itula. Ughangtu endak ngajung aku nanggung dalam jil.

¹⁸ Anyautu nidau ngapau-ngapau! Diau penting Keristus diceritauka luak manau kila, empuak ngan tujuan iluak, empuak ngan tujuan nidau iluak. Itula sebapau aku riang ngan maju ka riang.

¹⁹ Aku keruan, aku ka selamat karnau du'a kamu ngan pulau karnau ditulung Rua Yesus Keristus.

²⁰ Aku endak nian ngan ngaghapka, supayau aku maju ngerjauka diau benagh. Aku ngaghapka, supayau luak jak di senitu mangku pulau mbak kini Keristus diregaui ngan gegalaunyau diau kukiciakka ngan kukerjauka, empuak aku idup empuak aku mati.

²¹ Amun aku, idup batan endak Keristus; amun aku mati, aku untung.

²² Anyautu amun idup di deniauni, aku pacak ngerjauka diau begunau, mangku aku nidau keruan, manau diau mesti kupilia.

²³ Aku didesak setu duau mecam: Aku endak nian ninggalka deniauni pegi seghundak ngan Keristus, karnau titu diau iluak sekali batan endak aku.

²⁴ Anyautu batan endak kepentingan kamu iluakla aku maju di deniau.

²⁵ Aku percayau ngan titu, mangku aku keruan aku ka idup ngan seghundak agi ngan gegalau kamu, nulung kamu mangku tamba riang tamba tegua percayau ngan Keristus.

²⁶ Mangku amun aku datang agi nanti guak kamu, kamu diau seghundak ngan Keristus ka tamba bangga karnau aku.

Petua supayau maju bejuang

²⁷ Diau penting mbak kini, supayau idup kamu nurut ceritau Keristus itu. Mangku amun aku pacak datang, aku nginak, amun nidau pacak datang, aku ka ndengagh, bansau kamu tegua ngan sesamau bekerjau batan endak sutiak tujuan, diautu batan endak percayau nurut ceritau iluak.

²⁸ Kamu mesti maju beghani, jangan takut ngan lawan kamu. Ngan carau luak itu kamu ka njadi tandau ngan ughangtu, bansau ughangtu ka kala. Kamutu ka menang, karnau Allah ngenjuakka kemenangan ngan kamu.

²⁹ Karnau ngan kamu la dienjuakka setu diau iluak ukan ajau percayau ngan Keristus, tapitu pulau sengsarau batan endak Keristus.

³⁰ Mbak kini kamu pulau ngikut bejuang semegi luak kamu nginak aku bejuang senitu ngan maju bejuang enggut mbak kini, luak diau la kamu dengagh.