PILEMUN 1 - PEJANJIAN EMPAI CERITAU ILUAK

¹ Pilemun, kantin sekerjau kami. Aku, Paulus, diau dijilka karnau Yesus Keristus ngan kantin kitau Timutius nulis surat ini batan endak kaba,

² batan endak kantin kitau Apia, batan endak kantin sekerjau kitau Arkipus ngan jemau Keristen diau betunggal di ghuma kaba.

³ Kami bedu'a, supayau Allah Bapak kitau ngan Tuhan Yesus Keristus iluak ngan ngenjuakka damai ngan kamu.

Pilemun nyayangi jemau karnau percayau

⁴ Dang aku bedu'a ndu'aka kaba, aku maju beterimau-kasia ngan Allah.

⁵ Karnau aku la ndengagh, bansau kaba nyayangi gegalau umat Allah ngan percayau nian ngan Tuhan Yesus.

⁶ Kitau la disatuka karnau percayau ngan Keristus. Mangku aku bedu'a, supayau kaba tamba ngerti keilu'an diau dienjuakka ngan kitau karnau seghundak ngan Keristus.

⁷ Sayang kaba meriangka ngan neguaka aku. Kaba la meriangka gegalau umat Allah.

Paulus mintak batan endak Unisimus

⁸ Karnau kitau sekantin percayau ngan Keristus, aku pacak merintaka kaba ngerjauka setu diau mesti kaba kerjauka.

⁹ Anyautu karnau kitau sangi sayangi, iluakla aku mintak ajau. Akuni la tuau, lagi pulau mbak kini dalam jil karnau Yesus Keristus.

¹⁰ Aku, Paulus, mintak ngan kaba batan endak anakku Unisimus. Aku njadi ba'au dalam Keristus masau di jil.

¹¹ Senitu diau nidau begunau ngan kaba. Mbak kini diau begunau nian, ukan ajau ngan kaba, ngan aku pulau diau begunau.

¹² Mbak kini aku ngajung diau baliak ngan kaba. Diautu kesayanganku.

¹³ Sebenaghau aku endak na'an diau di sini, supayau diau pacak nulung aku genti kaba, selamau aku di jil ikak ngiciakka ceritau iluak jak di Allah.

¹⁴ Anyautu aku nidau endak ngerjauka tuapau-apau, amun lum kaba kiciakka. Aku nidau endak masau kaba. Aku riang, amun kaba ngerjaukanyau ngan sukau.

¹⁵ Asauku Unisimus beceghai ngan kaba jerang, supayau kaba pacak dapat diau agi selelamaunyau.

¹⁶ Mbak kini diau ukan cuman budak batan endak kaba. Diau lebia jak di itu. Diau sesamau jemau Keristen diau disayangi. Diau begunau nian batan endak aku, apau agi batan endak kaba! Cengki diau begunau nian, empuak luak budak empuak luak jemau percayau ngan Tuhan.

¹⁷ Karnau itu amun kaba nganggap aku kantin kaba, terimaula diau luak kaba nerimau aku.

¹⁸ Mangku amun diau besala ngan adau utang ngan kaba, nengkela akuni diau nanggung gegalaunyautu.

¹⁹ Aku, Paulus, nulisau ngan tangankuni, “Aku ka mbayighi gegalaunyautu.” Cengki nidau nanti kuingatka, bansau kabatu beghutang ngan aku, titu diri kaba itula.

²⁰ Karnau itu, cubau tulung aku karnau Tuhan. Riangkala atiku, karnau kitau sekantin dalam Keristus.

²¹ Gegalaunyautu kutulis ngan percayau, bansau kaba ka ngerjauka setu diau kupintak. Aku keruan lebia jak di itu ka kaba kerjauka.

²² Penarau itu, sediaukala bada batan endak aku di ghuma kaba, karnau aghapan aku ka ngulang ngan kaba karnau du'a kamu.

Pesan

²³ Ipapras adau ngan aku di jil karnau Yesus Keristus. Diau bepesan ngan kaba.

²⁴ Terimaula pulau pesan jak di kantin sekerjauku, Markus, Aristarkus, Demas ngan Lukas.

²⁵ Aku bedu'a, supayau Tuhan Yesus Keristus iluak nian ngan kamu.