PENGINA'AN 6 - PEJANJIAN EMPAI CERITAU ILUAK

Enam sigil dibukak

¹ La udim itu aku nginak Anak Bebiritu mbukak sigil diau petamau jak di tujua sigiltu. Mangku aku ndengagh sikuak jak di empat benatang tadi bekatau, “Mela!” Suaraunyau luak muni gurua.

² Mangku aku nginak nian, adau sikuak kudau putia ngan sughang jemau di pucu'au. Jemautu adau pana di tanganau mangku dienjuakka gitar tandau menang. Mangku diau bejalan njadi pemenang ngan maju menang.

³ La udim itu aku nginak Anak Bebiritu mbukak sigil diau keduau, mangku aku ndengagh benatang diau sikuak agi bekatau “Mela!”

⁴ Mangku datang sikuak kudau abang. Jemau diau di pucu'au dienjuakka kuasau endak ngabiska damai di deniauni, mangku jemau sangi bunua. Mangku diau dienjuakka sebila pedang besak.

⁵ La udim itu Anak Bebiritu mbukak sigil diau ketigau, mangku benatang diau sikuak agi bekatau, “Mela!” Aku nginak, mangku adau sikuak kudau itam. Di tangan jemau diau di pucu'au adau timbangan.

⁶ Mangku aku ndengagh suarau jak di guak empat benatang tadi diau bekatau, “Selitir beghas diau alap regaunyau upa saghi. Tigau litir beghas diau karut regaunyau upa saghi pulau. Anyautu jangan merusakka minyak ngan anggur.”

⁷ La udim itu Anak Bebiritu mbukak sigil diau keempat. Mangku aku ndengagh benatang diau sikuak agi bekatau, “Mela!”

⁸ Mangku aku nginak, adau sikuak kudau pucat. Diau adau di pucu'au namaunyau Maut, kuasau maut ngikutinyau. Diau dienjuakka kuasau mbunua bagi empat sebagi jak di isi deniau pakai pedang, kelapaghan, idapan diau cepat minda ngan benatang diau buas diau adau di deniauni.

⁹ La udim itu Anak Bebiritu mbukak sigil diau kelimau. Mangku aku nginak di bawa bada bekerban adau jemau diau dibunua karnau ta'at ngan ngiciakka katau Allah.

¹⁰ Ughangtu tepekiak ngan suarau nyaghing, kataunyau, “Ui Tuhan, Penguasau diau suci ngan benagh. Lamau beghapau agi Dighi nidau ngukum ngan nidau mbalas dagha kami ngan jemau diau mbunua kami?”

¹¹ Ughangtu padau sughang dienju'i selambagh baju putia mangku dikiciakka ngan ughangtu, bansau ughangtu mesti gheghadu dikit agi, enggut genap itungan kantinau sekerjau diau ka dibunua pulau luak ughangtu.

¹² La udim itu aku nginak Anak Bebiritu mbukak sigil diau keenam. Mangku adau gempau besak. Matau-aghi njadi itam luak kain itam. Bulan njadi abang luak dagha.

¹³ Mangku bintang di langit tumbanan ke deniau luak bua aghau tumbanan gi mata, amun digugak angin nyaghu.

¹⁴ Langit ngeciak luak kertas digulung. Gegalau gunung ngan pulau dialiaka jak di badahau.

¹⁵ Mangku rajau di deniau ngan penguasau ngan kepalak tentera ngan jemau kayau ngan jemau bekuasau ngan jemau lainau, empuak budak empuak jemau bibas, gegalaunyau nyemuni di gua ngan serang batu di gunung.

¹⁶ Ughangtu bekatau ngan gunung ngan batutu, “Runtuala, tinggangla kami! Bunikala kami jak di Jemau diau duduak di kerusi rajautu, jak di mara Anak Bebiritu.

¹⁷ Karnau la sampai aghi diau mbayauka, masau Diau dang ngukum deniau. Sapau pacak ta'an?”