PENGINA'AN 5 - PEJANJIAN EMPAI CERITAU ILUAK

Kitab ngan Anak Bebiri

¹ Mangku aku nginak di tangan kanan Jemau diau duduak di pucuak kerusi rajautu sutiak gulungan kitab. Sebela luagh ngan dalamau ditulisi mangku disigil ngan tujua butiak sigil.

² Mangku aku nginak sughang malaikat gaga diau tepekiak-pekiak, kataunyau, “Sapau diau pantas ngan behak mbukak gulungan kitabtu ngan sigilau?”

³ Anyautu nidau bediau sughang kiala empuak di sergau empuak di deniau empuak di bawa deniau diau pacak mbukak gulungan kitabtu endak nginak isiau.

⁴ Mangku aku nangis sesedanan, karnau nidau bediau sughang kia diau dianggap behak mbukak gulungan kitabtu endak nginak isiau.

⁵ Mangku sughang jak di tuau-tuau tadi ngiciak ngan aku, “Jangan kaba nangis! Kina'ila, singau jak di jungku Yehuda, diautu tunas Daud la menang, mangku Diau pacak mbukak gulungan kitabtu ngan mbukak tujua butiak sigilautu.”

⁶ La udim itu aku nginak sikuak Anak Bebiri betegak di tetengaan kerusi rajau tadi, dikelilingi empat benatang itu ngan duau pulua empat tuau-tuau tadi. Anak Bebiritu luak la disembelia. Bebiritu betanduak tujua, bematau tujua, diautu tujua Rua Allah diau la diajung ke gegalau deniau.

⁷ Mangku Anak Bebiritu datang endak nerimau gulungan kitab tadi jak di tangan Jemau diau duduak di kerusi rajautu.

⁸ Diau dang ngambiak gulungantu, empat benatang ngan duau pulua empat tuau-tuau itu nunduak di adapan Anak Bebiritu. Bilang ughangtu ngecakka kecapi ngan pan emas diau buisi keminyan, itu du'a-du'a jemau diau la njadi hak Allah.

⁹ Ughangtu benyanyi nyanyika nyanyian empai, kataunyau, “Dighi pantas ngan behak nerimau gulungan kitabtu ngan mbukak sigilau, karnau Dighi la disembelia. Mangku ngan dagha Dighi jemau jak di gegalau jungku, basau, pemili ngan bangsau la dibeli batan endak Allah.

¹⁰ Dighi la njadika ughangtu sutiak bangsau, njadi imam endak bekerjau batan endak Allah. Mangku ughangtu ka merinta luak rajau di deniau.”

¹¹ Mangku aku tekinak agi, mangku ndengagh suarau banyak nian malaikat di guak kerusi rajau, empat benatang ngan tuau-tuau tadi. Malaikattu bejuta-juta.

¹² Malaikattu benyanyi ngan suarau bias, “Anak Bebiri diau disembeliatu pantas ngan behak nerimau kuasau ngan kekayauan ngan pengertian ngan kekuatan. Diautu pantas diregaui ngan diagungka ngan dipuji!”

¹³ Mangku aku ndengagh gegalaunyau diau benyawau empuak di sergau empuak di deniau empuak di bawa deniau empuak diau di laut ngan gegalaunyau diau di dalamau bekatau, “Jemau diau duduak di kerusi rajau ngan Anak Bebiri dipuji ngan diregaui ngan diagungka ngan bekuasau selelamaunyau!”

¹⁴ Mangku empat benatangtu bekatau, “Amin!” ngan tuau-tuau tadi nunduak nyemba.