PENGINA'AN 4 - PEJANJIAN EMPAI CERITAU ILUAK

Kerusi rajau di sergau

¹ La udim itu aku tekinak agi. Aku nginak adau duaghau tebukak di sergau, mangku aku ndengagh agi suarau diau la kudengagh empaini, muniau luak terumpit, kataunyau, “Mela, nayiakla ke sini, mangku aku ka nunjuakka ngan kaba setu diau mesti tejadi nanti.”

² Masau itu pulau aku dikuasaui Rua Allah, mangku aku nginak di sergau adau sebua kerusi rajau. Mangku adau Sughang duduak di kerusitu.

³ Dayi Jemautu besinagh luak permatau jeghenia ngan permatau abang. Mangku adau ghunia besinagh-sinagh ijang ngelilingi kerusi rajautu.

⁴ Di ngepungan kerusi rajautu adau duau pulua empat kerusi agi. Di kerusitu duduak duau pulua empat tuau-tuau diau makai baju putia ngan gitar emas di pala'au.

⁵ Jak di kerusi rajau tadi ngeluagh kilat ngan muni gurua telutur. Mangku di adapan kerusitu adau tujua ubur diau maghak. Itula tujua Rua Allah.

⁶ Mangku di adapan kerusitu adau pulau lautan kacau jeghenia nianan. Ngelilingi kerusitu di empat bucu adau empat ikuak benatang, di mukau belakangau penua ngan matau galau.

⁷ Benatang diau sikuak luak singau. Diau sikuak agi luak sapi lanang diau mudau. Diau sikuak agi dayiau luak dayi jemau. Diau sikuak agi luak burung elang diau dang terbang.

⁸ Empat benatangtu padau sikuak adau enam butiak sayap. Sayapautu penua ngan matau galau, di sebela dalamau pulau. Siang malam benatangtu nidau mandak-mandak benyanyi, kataunyau, “Suci, suci, sucila Tuhan, Allah diau Mahakuasau; Diau la adau jak di senitu enggut mbak kini ngan maju ka adau.”

⁹ Empat benatangtu benyanyi beterimau-kasia ngan meregaui ngan ngagungka Jemau diau duduak di kerusi rajautu diau idup selelamaunyau. Idang kali benatangtu benyanyi,

¹⁰ duau pulua empat tuau-tuau tadi nunduak di adapan Jemau diau duduak di kerusi rajautu, mangku nyemba Jemau diau idup selelamaunyautu. Mangku ughangtu nyipatka gitarau di guak kerusi rajautu ngan bekatau,

¹¹ “Ui Tuhan, Allah kami! Dighi ajau diau pantas dipuji ngan diregaui ngan bekuasau, karnau Dighi la njadika gegalaunyau. Karnau kendak Dighila gegalaunyau adau mangku idup.”