PENGINA'AN 3 - PEJANJIAN EMPAI CERITAU ILUAK

Batan endak jemau Keristen di Sardis

¹ “Ngan malaikat jemau Keristen di Sardis tuliskala luak ini: ‘Inila katau Aku, Aku ngempu tujua rua jak di Allah ngan tujua bintangtu. Aku keruan gegalau kerjau kaba. Kaba dikiciakka idup, awuak kaba mati.

² Aku lum betemu sutiak kiala kerjau kaba diau sempernau di adapan Allah. Karnau itu bangunla, teguakala setu diau gi adau di kaba diau laka mati.

³ Mangku ingatkala setu diau la diajaghka ngan kaba ngan setu diau la kaba dengagh, mangku ta'atila itu ngan ubaila jak di perembak kaba! Amun nidau, Aku ka datang luak pemaling. Kaba nidau ka keruan, kebilau masaunyau Aku datang njenguak kaba.

⁴ Anyautu di Sardis adau pulau jemau diau nidau ngumuhi bajuau. Jemautu ka bejalan ngan Aku, pakai baju putia, karnau pantas batan endak itu.

⁵ Jemau diau menang ka dienjuakka baju putia luak jemau itu tadi. Namaunyau nidau ka Kukusam jak di kitab jemau diau ka dienjuakka idup. Aku ka ngaku'i namaunyau di adapan BapakKu ngan di adapan malaikatAu.

⁶ Jemau diau betelingau dengaghkala setu diau dikiciakka Rua Allah ngan jemau Keristen.’ ”

Batan endak jemau Keristen di Piladelpia

⁷ “Ngan malaikat jemau Keristen di Piladelpia tuliskala luak ini: ‘Inila katau Aku, Aku suci ngan benagh. Aku adau kunci Daud. Amun Aku mbukak, nidau bediau sughang kiala diau pacak ngatupkanyau. Mangku amun Aku ngatupka, nidau bediau sughang kiala diau pacak mbuka'au.

⁸ Aku keruan gegalau kerjau kaba. Kina'ila, Aku la mbuka'i kaba duaghau, mangku sughang kiala nidau pacak ngatupkanyau. Aku keruan kekuatan kaba nidau sebeghapau. Anyautu kaba nuruti ajaghanKu ngan maju ngaku'i Aku.

⁹ Kina'ila, jemau diau njadi anak iblis, pembu'ung diau ngakuak diriau jemau Yahudi awuak ukan. Ughangtu ka diseraka ngan kaba. Aku ka mbuat ughangtu njenguak kaba ngan nunduak di adapan kaba. Mangku ughangtu ngakuak, bansau Aku nyayangi kaba.

¹⁰ Kaba la nuruti kici'anKu endak nantika Aku ngan tekun. Karnau itu Aku ka njagaui kaba jak di masau penanggungan, masau gegalau jemau di deniau ka dicubaui.

¹¹ Aku gancang datang. Jagauila iluak-iluak setu diau adau di kaba, mangku nidau sughang kia ngambiak adia kaba menang.

¹² Jemau diau menang ka Kujadika tiang di Ghuma Allah diau suci, mangku diau adau di bada itu selelamaunyau. Di diau ka Kutuliska namau Allah ngan namau kuta Allah, diautu Yerusalim empai diau ka tughun jak di sergau jak di Allah, ngan pulau namauKu diau empai ka Kutuliska di diau.

¹³ Jemau diau betelingau dengaghkala setu diau dikiciakka Rua Allah ngan jemau Keristen.’ ”

Batan endak jemau Keristen di Laudikia

¹⁴ “Ngan malaikat jemau Keristen di Laudikia tuliskala luak ini: ‘Inila katau Aku, Akunila tetap ngan nyatauka setu diau benagh ngan pacak dipercayaui, mulaunyau gegalaunyau diau dijadika Allah.

¹⁵ Aku keruan gegalau kerjau kaba. Kaba nidau dingin ngan nidau pulau angat. Alaka ilu'au, amun kaba dingin madak angat!

¹⁶ Anyautu kaba angat-angat kuku; angat nidau, dingin nidau. Itula sebapau kaba ka Kuludaka jak di mulutKu.

¹⁷ Kaba bekatau, ‘Aku kayau, gegalaunyau la adau, nidau kurang tuapau-apau.’ Kaba nidau keruan, bansau kaba sarau ngan malang, lagi serik, butau ngan telanjang.

¹⁸ Karnau itula aku negughi kaba, supayau kaba mbeli jak di Aku emas diau asli, la diuji dalam api, mangku kaba njadi kayau. Mangku belila pulau baju putia, supayau kaba makaiau, mangku jangan kina'an kaba telanjang diau malukatu. Mangku belila pulau minyak batan endak mbasua matau kaba, mangku kaba pacak nginak.

¹⁹ Jemau diau Kusayangi Kutengul ngan Kusakiti. Karnau itu rilakala ati kaba ngan ubaila jak di perembak kaba!

²⁰ Kina'ila, Aku betegak di mukau duaghau ngan nggagur. Amun adau jemau ndengagh suarauKu ngan mbukakka duaghau, Aku ka masuak betemu ngan diau. Mangku Aku makan ngan diau, diau ngan Aku.

²¹ Jemau diau menang ka Kududuakka sebada duduak ngan Aku, luak Aku pulau la menang mangku duduak sebada duduak ngan BapakKu.

²² Jemau diau betelingau dengaghkala setu diau dikiciakka Rua Allah ngan jemau Keristen.’ ”