PENGINA'AN 2 - PEJANJIAN EMPAI CERITAU ILUAK

Batan endak jemau Keristen di Ipisus

¹ “Tuliskala ngan malaikat jemau Keristen di Ipisus: ‘Inila katau Aku, di tangan kananKu adau tujua bintang. Aku bejalan di pugan tujua tiang lampu emastu.

² Aku keruan kerjau kaba. Aku keruan, kaba bekerjau mati-matian ngan tekun nian. Aku keruan, kaba nidau pacak ngaligh ngan jemau ja'at. Mangku jemau diau ngakuak diriau rasul awuak ukan, la kaba uji. Mangku kaba la keruan, bansau ughangtu pembu'ung.

³ Kaba maju ngaligh ngan sengsarau karnau Aku, mangku kaba nidau kekela tekedan.

⁴ Empuak luak itu Aku nyalaka kaba, karnau kaba nidau agi nyayangi Aku luak masau empai percayau.

⁵ Karnau itu ingatkala, la jawua nian kaba nyimpang! Ubaila jak di dusau kaba, kerjaukala setu diau kaba kerjauka masau empai percayau. Amun nidau, Aku ka datang endak ncabut tiang lampu kaba jak di badahau, amun kaba nidau ngubai perembak kaba.

⁶ Anyautu adau pulau setu diau iluak di kaba: Kaba luat ngan gegalau kerjau anak-bua Nikulaus diau Kuluatka pulau.

⁷ Jemau diau betelingau dengaghkala setu diau dikiciakka Rua Allah ngan jemau Keristen! Diau menang ka Kuenjuakka makan bua jak di batang diau ngenjuakka idup diau adau di kebun Pirdaus Allah.’ ”

Batan endak jemau Keristen di Semirna

⁸ “Ngan malaikat jemau Keristen di Semirna tuliskala luak ini: ‘Inila katau Aku, Aku dulu sekali ngan mendian sekali. Aku la mati mangku ngulang idup.

⁹ Aku keruan kaba sengsarau ngan serik, awuak sebenaghau kaba kayau. Aku keruan buru'an jemau diau ngakuak diriau jemau Yahudi, awuak sebenaghau ukan. Ughangtu umat iblis?

¹⁰ Nidau nanti takut ngan setu diau mesti kaba tanggungka. Ingatkala separau jak di kamu ka dimasuakka iblis dalam jil endak nguji kamu. Kamu ka sengsarau selamau sepulua aghi. Kamu mesti tekun enggut mati, mangku Aku ka ngenjuakka ngan kamu idup selelamaunyau njadi adia menang ngan kamu.

¹¹ Jemau diau betelingau dengaghkala setu diau dikiciakka Rua Allah ngan jemau Keristen! Jemau diau menang nidau ka ngapau-ngapau ngan kematian diau keduau.’ ”

Batan endak jemau Keristen di Pergamus

¹² “Ngan malaikat jemau Keristen di Pergamus tuliskala luak ini: ‘Inila katau Aku, Aku makai pedang diau tajam ngan bematau duau.

¹³ Aku keruan bada kaba. Bada kaba di bada iblis. Empuak luak itu, kaba maju ngaku'i Aku. Kaba maju percayau ngan Aku, pulau masau Antipas, anak-buaKu diau tekun, dibunua di bada kaba, di bada iblistu.

¹⁴ Empuak luak itu adau pulau sala kaba. Adau jemau jak di kamu diau ngikut ajaghan Biliam. Biliamtu ngajaghka Balak carau nyesatka jemau Israil, supayau ughangtu menaugawia ngan makan makanan diau la disiwauka.

¹⁵ Mangku adau pulau jemau di kamu diau ngikut ajaghan anak-bua Nikulaus.

¹⁶ Karnau itu, ubaila jak di dusau kamu! Amun nidau, Aku ka cepat datang njenguak kamu, mangku Aku ka merangi ughangtu ngan pedang diau adau di mulutKu.

¹⁷ Jemau diau betelingau dengaghkala setu diau dikiciakka Rua Allah ngan jemau Keristen! Jemau diau menang ka Kuenjuakka makan makanan Mana diau tebuni, mangku Aku ka ngenjuakka ngan diau batu putia. Di batutu ditulis namau empai diau nidau dikeruani jemau lain jak di jemau nerimaunyau.’ ”

Batan endak jemau Keristen di Tiatira

¹⁸ “Ngan malaikat jemau Keristen di Tiatira tuliskala luak ini: ‘Inila katau Aku, Anak Allah. Matauku besinagh-sinagh luak maghak api ngan ketingKu besinagh luak tembagau dalam api.

¹⁹ Aku keruan gegalau kerjau kaba. Aku keruan kaba nyayangi jemau, kaba maju percayau, kaba bekerjau batan endak Allah, kaba tekun. Aku keruan banyakla kerjau kaba mbak kini sangkan senitu.

²⁰ Anyautu adau pulau setu diau Aku nidau tetuju. Kaba ngenangka Isebil, jemau tinautu, diau ngakuak diriau nabi. Diautu ngajagh ngan nipuka anak-buaKu endak menaugawia ngan makan makanan diau la disiwauka.

²¹ Aku la ngenjuakka masau, supayau diau ngubai jak di peremba'autu, anyautu diau enggup ngubai jak di kerjaunyau menaugawiatu.

²² Kina'ila, Aku ka ndatangka idapan ngan diau, mangku nidau pacak bangun. Mangku diau ngan jemau diau menaugawia ngan diau ka nanggung nian, amun ughangtu nidau ngubai jak di perembak tinautu.

²³ Anak-buahau ka Kubunua, mangku gegalau jemau Keristen ka keruan, bansau Akunila diau ngeruani ati ngan rupu'an jemau. Bilang kamu ka Kubalas nurut kerjau kamu sesughangan.

²⁴ Anyautu kamu diau lain diau adau di Tiatira nidau ngikut ajaghan itu ngan nidau melajaghi ajaghan diau dikiciakka Ilmu Iblis. Ngan kamutu Aku bekatau, Aku nidau endak nambai beban kamu.

²⁵ Anyautu setu diau la adau di kamu ta'ankala enggut Aku datang.

²⁶ Jemau diau menang ngan ngerjauka kendakKu enggut pengabisan ka Kuenjuakka kuasau nguasaui bangsau-bangsau,

²⁷ luak diau Kuterimau jak di BapakKu. Jemautu ka merintaka ughangtu ngan tungkat besi. Ughangtu ka diancurka luak tembikagh peghiyuak tana.

²⁸ Mangku jemautu ka Kuenjuakka bintang timur.

²⁹ Jemau diau betelingau dengaghkala setu diau dikiciakka Rua Allah ngan jemau Keristen!’ ”