PENGINA'AN 17 - PEJANJIAN EMPAI CERITAU ILUAK

Babil diukum

¹ La udim itu sughang jak di tujua malaikat diau adau tujua pan tadi datang njenguak aku, kataunyau, “Mela ke sini. Aku endak nunjuakka ngan kaba, luak manau tinau pelacur diau ja'attu diau adau di guak banyak ayiak ka diukum.

² Rajau di deniau la menaugawia ngan tinautu. Jemau di deniauni la mabuak, karnau minum ayiak anggurau, diautu kerjaunyau diau ja'attu.”

³ Udim itu aku dibatak Rua Allah ke padang bungin. Di situ aku nginak sughang tinau duduak di pucuak benatang diau abang, penua ngan tulisan nggelakka Allah. Palak benatangtu tujua, tandu'au sepulua.

⁴ Tinautu pakai baju ungu ngan kain abang, dighiasi ngan emas, permatau ngan mutiara. Di tanganau adau pan jak di emas penua ngan setu diau ja'at ngan najis, asil kerjau ja'attu.

⁵ Di keningau ditulis sutiak namau, sutiak resiau, bacaunyau, “Babil besak, mak gegalau pelacur ngan gegalau kerjau diau ja'at di deniau.”

⁶ Mangku aku nginak tinautu mabuak karnau dagha jemau diau la njadi hak Allah ngan dagha jemau diau nceritauka Yesus. Satu aku nginak tinautu, aku kemangan nian.

⁷ Mangku malaikattu bekiciak ngan aku, “Ngapau kaba kemangan? Aku ka ngiciakka ngan kaba resiau tinautu ngan resiau benatang diau mbata'au, benatang diau bepalak tujua ngan betanduak sepuluatu.

⁸ Benatangtu senitu la adau, mbak kini nidau bediau agi, jerang agi ka nimbul jak di jurang maut mangku ajalau ka benasau. Mangku gegalau jemau di deniau, jemau diau namaunyau nidau ditulis di kitab jemau idup jak deniau adau, ka kemangan nginak benatangtu diau senitu la adau, mangku nidau bediau agi, anyautu ka nimbul agi.

⁹ Diau pentingtu adau akal ngan pengertian. Tujua palaktu tujua bukit, bada tinautu duduak. Tujua palaktu pulau tujua rajau.

¹⁰ Limau jak di rajautu la mati. Diau sikuak dang adau, diau sikuak agi lum datang. Amun diau datang nanti, diau merinta jerang ajau.

¹¹ Mangku benatang diau la adau, mbak kini nidau bediau agitu, rajau diau kedelapan. Diau pulau sughang jak di tujua rajau tadi, mangku diau ka benasau.

¹² Sepulua tanduak diau kaba kinaktu sepulua rajau diau lum merinta. Anyautu nanti ka dienjuakka kuasau endak merinta luak rajau serempak ngan benatangtu selamau sejam.

¹³ Ughangtu suijauan. Gegalau ughangtu nyeraka kekuatannyau ngan kuasaunyau ngan benatang tadi.

¹⁴ Ughangtu ka beperang melawan Anak Bebiri. Anyautu Anak Bebiritu ka ngalaka ughangtu, karnau Diautu Tuan gegalau tuan ngan Rajau gegalau rajau. Gegalau anak-buaHau, diautu jemau diau setia ngan dipiliHautu, ka ngikut menang ngan Anak Bebiritu.”

¹⁵ Mangku malaikattu bekatau agi ngan aku, “Gegalau ayiak diau kaba kinak, bada pelacurtu duduak, titu gegalau bangsau ngan jemau banyak ngan pemili ngan basau.

¹⁶ Mangku sepulua tanduak diau la kaba kinak ngan benatangtu ka luat ngan tinautu, diambiak gegalaunyau mangku diau njadi suni ngan telanjang. Dagingau dimakan ughangtu ngan disilap ngan api.

¹⁷ Karnau Allah la nggeghakka ati ughangtu endak ngerjauka rencanauNyau. Diau mbuat ughangtu sepakat endak nyeraka kuasau rajau ngan benatang tadi, mangku diau merinta enggut gegalau katau Allah la ditepati.

¹⁸ Mangku tinau diau kaba kinaktu kuta besak diau merinta rajau-rajau di deniau.”